MATEO 4

1Amu na Katɔti Kɔyu kútiku Yesu kúsienku ketele kemo kesii kani na ukisine ɔmmɔ ukpoku-nwu ɔnu. 2Na ka Yesu úlie kɔka usien ku ɔƒɛ emeyi aavlene kama ni, kɔka kúbo kɔɔda-nwu. 3Amu na ukisine ɔmmɔ úbo-nwu kudɔ na ɔ́su-nwu ɔnini, "Si Katɔti ubidi na adi ni, su atabi amɛni na enwini adila." 4Mmɔ na Yesu údie kenye ɔnini, "Bunweni Kedee Ɔku ɔɔsu ɔnii, 'Adila lɛti eléte ngba. Mmomu Katɔti litemi biala lɛlɔ bɔdi muute ngba geen.' " 5Amu na ukisine ɔmmɔ ɔ́kpanku Yesu úsienku Yudaƒuɔ ɔma unengudi kemo. Na úti-nwu útényene Yudaƒuɔ kakpakɔ likpo lɛni nákuku lítulo ƒui. 6Amu na ɔ́su-nwu ɔnini, "Si Katɔti Ubidi na adi ni, na aba lɛgyu eténye kalɔ. Ɔsika Bunweni Kedee Ɔku ɔɔsu ɔnii, 'Katɔti ɔdubɔtala nwuna batu na bagyu-ɔ bada enu kemo ɔni na ƒula ɔgba muedi uletulo atabi adi.' " 7Yesu údie kenye ɔnini, "Nsu Bunweni Kedee Ɔku ɔmmɔ ɔɔsu ɔnii, 'Tasɔ ƒula Unwoti Katɔti anu.' " 8Amu na ukisine ɔmmɔ úti Yesu úsienku kɔbi kangyaa kɔdi lili. Mmɔ na ɔ́tina-nwu kayawi agala ku ana bukeye ƒui. 9Na ɔ́su Yesu ɔnini, "Si álɛ akɔnkɔ na émwi-mi ni, ndubuti ala amɛni ƒui lite-ɔ." 10Amu na Yesu údie kenye ɔnini, "Satan, gyu-mi lɛlɔ! Bunweni Kedee Ɔku ɔ́su ɔnii, 'Ƒula Unwoti Katɔti kani na ɔlɛka alɛ akɔnkɔ emwi.' " 11Amu na ukisine ɔmmɔ ɔ́tɔlɔ Yesu kudɔ, na Katɔti batu bébo bébebunku-nwu. 12Uwi ɔni na Yesu únu ka béƒie Yohane bákya ɔtɔ ni, ɔ́tɔlɔ úsie Galilea. 13Útelie Nasaret, mmomu úsie útélie Kapernaum, ɔma ɔni na uwi Galilea Ɛpu kudɔ na Sebulon ku Naƒtali kalɔ lɛlɔ. 14Úlie mmɔ kalɛ na Katɔti Kenye Udiene Yesaia kenye kani na ɔ́su úse kebo kete lɛni ɔnini, 15- 16"Sebulon ku Naƒtali bekyuli bani nli lɛdisa kemo na ɛpu ulu lɛlɔ na Yordan ketu ɔvi ku Galilea kesii kani na bekyuli bani naaadi Yudaƒuɔ lɛnɔ belie ni, badubɔnu bukeye. Na bani na belie kukpi ɔgbankpi kemo ni, Katɔti bukeye bɔdubuwi-ma lɛlɔ." 17Ɔ́si uwi ɔni na Yesu útélie Kapernaum ni, úse kalɔ ɔɔkɔ́ lɛsa ɔnini, "Binwini kama bɛkya bina ekpidi, ɔsika uwi ɔni na Katɔti ɔdi lɛga na bula kɔyi kemo úude." 18Na ka Yesu ɔkɛ Galilea Ɛpu kɔtu ni, ɔ́nu banwani inyɔ badi bani ndi asawu bewine. Ama ndi Simon ɔni baalɔ Petro ku ɔnwani Andrea ka bada asawu beedie lɛna na Ɛpu ɔmmɔ kemo. 19Yesu ɔ́su-ma ɔnini, "Ɔ́si ɔƒɛni ni, bɛsiaku-mi na lɛtina-mii kalɛ na beedie bekyuli teete Katɔti." 20Mmɔ kani na báda bana lɛsawu béwi na básiaku-nwu kama. 21Amu ka úsie blii ni, ɔ́sɔ ɔ́nu banwani inyɔ badi bani baalɔ Yakobo ku Yohane bani ndi Sebedeo bebi. Ama ku bana ɔti Sebedeo ɔmɛni bakya ɔkɔlɔ kemo baaklibi bana lɛsawu asa na Yesu ɔ́lɔ-ma. 22Mmɔ kani na báda bana ɔti bákya ɔkɔlɔ ɔmmɔ kemo na ama lɛnɔ básiaku-nwu kama. 23Yesu ɔ́vi Galilea kalɔ lɛlɔ ƒui na ɔ́tina ala na Yudaƒuɔ kasalakɔ. Na ɔ́kɔ lɛsa na Katɔti lɛgadi litemi buni lɛlɔ. Na ɔ́bwi bekyuli bani muuƒi lɛlɛ lidu lidu ƒui. 24Nwuna lɛlɔ litemi lígyingya na Siria kalɔ lɛlɔ ƒui. Anwuɔsu bekyuli bákpanku balɛne bani na lɛlɛ lidu lidu liikpóku-ma béboku. Na badi ni, ayu ekpidi elie-ma lɛlɔ eekpóku-ma. Na badi beeƒi kalɛ teebo. Badi lɛnɔ lɛlɔ kakɛ kékpi-ma. Na Yesu ɔ́bwi-ma ƒui. 25Bekyuli pii bási Galilea ku lɛma linengudi leevu lɛdi kemo ku Yerusalem ku Yudea kalɔ ku Yordan ketu ɔvi ƒui bábasiaku Yesu kama.

will be added

X\