MATEO 28

1Ka kadi kégye Kwasida ɔtanta ni, Maria Magdalene ku Maria ɔkladi ɔmmɔ bésie banii batánu Yesu kaƒiɔtɔ kammɔ. 2Kɔnakunwi ni, kalɔ kákunku momoomo geen. Na Katɔti ɔtu ɔdi ɔ́yu ɔ́si katɔ úbo na úbeminime lɛtakpɛ lɛmmɔ, na úlie-ni lɛlɔ. 3Nwuna lɛlɔ liikeye aani ɔƒɛ na nwuna awu use ƒututuutu. 4Liƒu lɛ́da bagyumanane bammɔ na lɛlɔ lɛ́tɔ-ma geen, na básini bátɛ aani bekpine. 5Amu na Katɔti ɔtu ɔmmɔ útemiku beleku bammɔ na ɔ́su-ma ɔnini, "Bitayia. Ngyi ka bɛɛwia Yesu ɔni na bákana bámana ugyii lɛlɔ mmɔ. 6Uuubo mɛni. Ɔ́ta úlie ngba aani kalɛ na ɔ́su úse. Bibo na bibanu likpo lɛni na báva-nwu. 7Bisie pla na bitásu nwuna batɛyane bɛnii ɔ́ta ɔ́lɛ bekpine akɔ ulie ngba, na ɔtɔ-mii anumi úsela Galilea. Mmɔ na bɛdubɔnu-nwu. Ɔmɛni ɔsu nkɛ." 8Anwuɔsu bábabla bátɔlɔ kaƒiɔtɔ kammɔ kudɔ. Na ina ka liƒu lɛ́da-ma muedi ni, béti ebiti békeli bésie banii batásu Yesu batɛyane kenye kammɔ. 9Kɔnakunwi ni, ama ku Yesu bása na ulu lɛlɔ. Na ɔ́su-ma ɔnini, "Lígyele-mii." Mmɔ na bákpɛ béde-nwu na béboku lɛlɔ kalɔ báda-nwu lɛgba na bémwi-nwu. 10Na Yesu ɔ́su-ma ɔnini, "Bitayia. Biteesie na bitásu mina banwa bɛnii beteesie Galilea. Mmɔ na badubɔnu-mi." 11Uwi ɔni na beleku bammɔ bénwini bésela ni, bekpone bammɔ badi bésie ɔma kemo na bátásu Yudaƒuɔ bakpane benengu bammɔ ala ani nálɛ mmɔ ƒui. 12Amu na bakpane benengu bammɔ ku ɔma benengu bátása banii beeti kasusu. Béte bekpone bammɔ egulabi pii adi, 13na básu-ma banini, "Bɛsu bɛnii usien uwi ɔni na bɛɛlɛɛ ni, nwuna batɛyane bébo na bébeyu ukpine ɔmmɔ bátɔlɔku. 14Na si Romaƒuɔ aban unengu únu litemi lɛmɛni ni, bɔdubɔya na unu kalɔ geen ka ɔɔɔdi bina bɔƒiɔ." 15Bagyumanane bammɔ báƒɔ egulabi ammɔ na bábla aani kalɛ na básu-ma. Na Yudaƒuɔ bammɔ bégyingya Yesu ukpine buyu litemi lɛmmɔ na bana akɔ úbalɛ ɔmwi. 16Na batɛyane leevu-unwi bammɔ bákɔ bésie Galilea lɛbinkpo lɛni lɛlɔ na Yesu ɔ́su-ma úse. 17Na ka bánu-nwu ni, bana badi bémwi-nwu. Nsu badi lɛnɔ kasusu kábla-ma inyɔ inyɔ. 18Amu na Yesu ɔ́kpɛ úde-ma na ɔ́su-ma ɔnini, "Katɔti úti katɔ ku kalɔ ɔyikun ƒui úte-mi. 19Anwuɔsu biteesie kayawi kadi biala bekyuli akɔ na bɛtina-ma ala kalɛ na benwini mina batɛyane. Na bɛkpila-ma ntu na Ati ku Ubi ku Katɔti Kɔyu lɛnyi kemo. 20Na bɛtina-ma bɛnii badi ala ani ƒui na lɛ́tina-mii lɛlɔ. Na ndubɔkya-mii akɔ uwi ƒui utálɛ kayawi kawɔlɔkɔ."

will be added

X\