MATEO 26

1Uwi ɔni na Yesu ɔ́wɔlɔ ala amɛni ƒui bɔtina ni, ɔ́su nwuna batɛyane ɔnini, 2"Bɛgyi ka kébu emeyi anyɔ na bɔdi limeyi lɛni bɔɔlɔ Kukpi Lili Bɔvia Limeyi. Na badubuti ami, Ukyuli Ɔyawine Ubi, bete na bakana-mi bamana ugyii lɛlɔ." 3Amu na bakpane benengu ku ɔma benengu bátása na Ɔkpane Unengudi Kaiaƒa kaduli. 4Na béti kasusu kalɛ na beƒie Yesu na bɔbɛ kemo na badu-nwu. 5Nsu básu lɛnɔ banii, "Buleƒie-nwu na limeyi bɔdi kemo, ɔsika bekyuli badubɔta babakyaku-bu unyeƒi." 6Na uwi ɔmmɔ kemo ni, Yesu ɔ́kya Betania na ɔnana ɔdi baalɔ Simon ɔni na úƒi ɔlɛgyie kesii. 7Uwi ɔni na Yesu ulie ɔɔdi ni, uleku ɔdi úbo-nwu kudɔ mmɔ. Ɔda inɔmii ku ɔsii ɔdi. Na buunwenyi ƒɛƒɛɛ na bɔ́ƒɔ kuye geen. Na úwilimi-mu úwi Yesu lili lɛlɔ. 8Ka nwuna batɛyane bánu ɔmɛni ni, útayɔ-ma kaƒɔ. Béye lɛlɔ banii, "Bi ɔsu na uubile inɔmii bɔmɛni lɛni? 9Ɔdubɔkana na uti inɔmii bɔmɛni uye kuye bonwu na uti egulabi ammɔ ute bawabane." 10Ka Yesu únu lɛla lɛni na badaku bɔsu ni, ɔ́su-ma ɔnini, "Bi ɔsu na bilaya na uleku ɔmɛni ɔkɛ atu kesekɔ? Ɔ́bla lɛla lɛbuni úte-mi. 11Bawabane bakya-mii akɔ uwi biala. Nsu ami ni, ɔɔɔdi uwi biala na ndubɔkya-mii kudɔ. 12Uleku ɔmɛni úti inɔmii bɔmmɔ úwi-mi lɛlɔ úse úte mina bɔva. 13Na mɔɔsu-mii geen ka ni, kesi kesii na badubɔkɔ litemi buni lɛmɛni lɛlɔ lɛsa na kayawi mɛni ni, badubuti lɛla lɛni na uleku ɔmɛni ɔ́bla mɛni basu batina na beti benyimo-nwu." 14Amu na basiakune leevu-inyɔ bammɔ akɔ unwi ɔni baalɔ Yuda Iskariot úsie bakpane benengu kudɔ. 15Na úye-ma ɔnini, "Bi na bɛdubute-mi si lɛ́kya Yesu kakya na lídie-nwu lite-mii?" Mmɔ ni, bátuna ka badubute-nwu sika ɔƒualadi ebi aavlatɛ. 16Na ɔ́si uwi ɔmmɔ lɛlɔ úsela ni, úse kalɔ ɔkya ɔɔwia uwi ɔbuni ɔni lɛlɔ na ɔsia na udie Yesu ute-ma. 17Amu na limeyi lideedi lɛni lɛlɔ na baadi bodobodo ɔni néteƒu ni, batɛyane bammɔ bébo Yesu kudɔ banii, "Wɛ na aayɔ́ ka butáklibi Kukpi Lili Bɔvia Limeyi bɔdi adila bute-ɔ?" 18Ɔ́tala-ma ɔnana ɔdi kudɔ na ɔ́su-ma ɔnini, "Bisie ɔmankemo na bitásu-nwu bɛnii, 'Ala ɔtinane ɔnii, "Mina uwi úudu. Na ƒula kesii na ami ku mina batɛyane bɔdubɔdi Kukpi Lili Bɔvia adila ammɔ." ' " 19Anwuɔsu batɛyane bamɛni bábla kalɛ na Yesu ɔ́su-ma na bátánwa Kukpi Lili Bɔvia Limeyi bɔdi adila amɛni bése. 20Na ka useyi uwi údu ni, Yesu ku nwuna batɛyane leevu-inyɔ bammɔ bébo bebelie kalɔ. 21Na uwi ɔni na belie baadi ni, Yesu ɔ́su-ma ɔnini, "Mɔɔsu-mii ka ni, bina kemo unwi ɔdubɔkya-mi kakya." 22Litemi lɛmɛni lɛ́yu batɛyane bamɛni ɔlɛ geen na bésie kalɔ beeye-nwu unwi unwi banii, "Blɔti, ɔɔɔdi ami na ada, ntu?" 23Yesu údie kenye ɔnii, "Ukyuli ɔni na ami ku-nwu kɔnu nkya lɛkyami kemo ndubɔkya-mi kakya. 24Ami Ukyuli Ɔyawine Ubi ndubukpi aani kalɛ na Bunweni Kedee Ɔku ɔ́su. Nsu ni, bɔbwɛ muute ukyuli ɔni na ndubɔkya-mi kakya. Si nka bátawɔ-nwu muedi ni, na nka ɔdia-nwu utulo." 25Amu na Yuda, ɔni ndubɔkya-nwu kakya mmɔ ɔ́su ɔnini, "Ala ɔtinane, ɔɔɔdi ami na ada, ntu?" Na Yesu údie kenye ɔnii, "Bɔsu na ada." 26Uwi ɔni na Yesu ku nwuna batɛyane belie baadi ni, úti bodobodo. Na ka ɔ́gya Katɔti enu ni, ɔ́bwɛ-nwu kɔkɛ kɔkɛ na úle-ku úte-ma. Ɔ́su ɔnini, "Bɛƒɔ ɔmɛni na bɛdi. Ɔmɛni ndi mina ɔlɔna." 27Amu na úti ɔɔƒɛɛ ɔdi, na ka ɔ́gya Katɔti enu ni, úti úte-ma. Na ɔ́su-ma ɔnini, "Bina ƒui bɛni. 28Ɔmɛni ndi mina ubugya ɔni na líti muusé kenye kani na Katɔti únyimi ku nwuna bekyuli likpo. Na ndubuti-nwu liwi kalɔ na bekyuli pii lili, kalɛ na Katɔti uti ekpidi ɔkyiɛ-ma. 29Na mɔɔsu-mii geen ka ni, nsɔ lɛɛɛdubo ntɛ bɔmɛni udu bɔdi bɔni ntu limeyi lɛni na ami ku-mii bɔdubɔni ntɛ bɔwɔdi na Katɔti lɛga kadikɔ." 30Amu na bátu ɔnu ɔdi béti bemwi Katɔti, na bávi bálɛ bésie Inɔ Egyii Kɔbi lɛlɔ. 31Mmɔ na Yesu ɔ́su nwuna batɛyane ɔnini, "Bina ƒui bɛdubukeli-mi kudɔ, na kebu ami lɛti. Ɔsika Bunweni Kedee Ɔku ɔɔsu ɔnini, 'Katɔti ɔdubɔdu baƒonu ɔdane ɔmmɔ na nwuna baƒonu begyingya.' 32Nsu na mina bɔsɔ bɔta bɔsi bekpine akɔ ni, ndubɔgyu lɛtɔ-mii na Galilea." 33Amu na Petro ɔ́su Yesu ɔnini, "Si ina bakladi ƒui béni-ɔ muedi ni, ami lɛɛɛdubo-ɔ kama bɔlɛ kudii!" 34Amu na Yesu ɔ́su Petro ɔnini, "Mɔɔsu-ɔ ka usien ɔmɛni asa na akɔkɔ wete kenye muedi ni, adubɔsu kɔtɛ ƒui ka aaagyi-mi." 35Petro údie kenye ɔnini, "Si ina ɔlɛka badu ami ku-ɔ muedi ni, lɛɛɛdubo bɔsu nnii lɛɛɛgyi-ɔ." Na lɛni kani na nwuna batɛyane bammɔ ƒui básu. 36Amu na Yesu ku nwuna batɛyane bammɔ bésie kesii kani baalɔ Getsemane, na ɔ́su-ma ɔnini, "Bɛsɔ bilie mɛni na lisie ngye ntákpali katɔ." 37Úti ku Petro ku Sebedeo bebi inyɔ bammɔ ɔ́da. Na ka bákɛ ni, kɔyɔ kúwi-nwu na lɛƒɛda lɛ́ƒɔ-nwu lɛlɔ kemo. 38Na ɔ́su-ma ɔnini, "Muunú ɔlɛ na mina kɔyu kemo geen aani si bukpi nda. Bɛsɔ binye mɛni na bitaagyumana ku-mi." 39Amu ka úsie lɛtɔtɔ blii ni, ɔ́yu úbi kalɔ na ɔ́kpali katɔ ɔnini, "Mina Ɔti, si wadia ni, na aƒɔ lɛbibo ɔɔƒɛɛ ɔmɛni na mina kudɔ. Nsu ni, tabla mina lɛyɔla, mmomu bla ƒula lɛdi." 40Ka ɔ́sɔ únwini úsie batɛyane ɛtɛ bammɔ kudɔ ni, ɔ́nu ka baalɛɛ. Na úye Petro ɔnini, "Bítakana na binyeku-mi kagyumana ɔdɔ unwi pɛ? 41Bɛsɔ bilie kagyumana na bɛkpali katɔ kalɛ na bileduo bukpoku taanu kpakplaa kemo. Kɔyu kɔɔyɔ́ ka kɔbla, nsu ɔlɔna use kpɛtɛ kpɛtɛ." 42Amu na Yesu ɔ́sɔ únwini úsie kunyɔdi na ɔ́kpali ɔnini, "Mina Ɔti, si lɛbibo lɛni ndubo buti mɛni lilávi-mi lɛlɔ na ɔdi-ɔ lɛƒɔyɔ ka liti-ni ni, ya na ɔlɛ lɛni." 43Ka Yesu ɔ́sɔ únwini úbo ni, úbanu ka lɛlɛɛ litulo batɛyane ɛtɛ bammɔ na bátakana bana anumi muedi bubimi. 44Yesu ɔ́da-ma úse na ɔ́sɔ úsie kɔtɛdi na ɔ́kpali katɔ kalɛ na ɔ́kpali úbavi. 45Amu na ɔ́sɔ úbo batɛyane bammɔ kudɔ na ɔ́su-ma ɔnini, "Ɔsu bɔtɛ na bɛmua bɛtɛ bɛɛnwuna lɛni? Ɔƒɛni na uwi ɔmmɔ údu ka beti Ukyuli Ɔyawine Ubi ɔmmɔ bakya bekyuli bekpidi enu kemo. 46Bɛta na buteesie. Bɛnu, kakya ɔkyane ɔmmɔ úude." 47Yesu ɔmua unye ɔɔtɛmiku-ma asa na Yuda ɔni ndi leevu-inyɔ bammɔ akɔ unwi ɔ́da úbalɛ. Ɔdanku bekyuli lisu lɛni na bakpane benengu ku batɔnkune bédie. Na bada lɛkɛɛ ku ligyii. 48Kakya ɔkyane ɔmmɔ ɔ́ya na báti bése ɔnini, "Ukyuli ɔni na makya kɔgbu ni, anwu ndi ukyuli ɔni na bɛɛwia. Biƒie-nwu." 49Ka Yuda ɔ́nya ɔ́nu Yesu kani na úsie-nwu kudɔ na ɔ́su-nwu ɔnini, "Ala ɔtinane, keyi buɛɛ kasiaku-ɔ." Amu na ɔ́kya-nwu kɔgbu. 50Yesu údie kenye ɔnini, "Ɔkpana, bi na aawia mɛni?" Amu na bekyuli bammɔ bébo Yesu kudɔ na béƒie-nwu na báda-nwu kpakplaa. 51Na bani nsiaku Yesu mmɔ kemo unwi ɔ́ni nwuna ɔkɛɛ ɔ́kpa na úbeyi ɔkpane unengudi kabla ɔblane kɔtu úkulo. 52Amu na Yesu ɔ́su-nwu ɔnini, "Ti ƒula ɔkɛɛ kya nwuna kakyakɔ. Bekyuli bani mɔɔgyumana lɛlɔ ku lɛkɛɛ ni, lɛkɛɛ kenye na beekpi. 53Munuu aaagyi anii lɛkana na livele mina Ɔti na ubebunku-mi? Na mmɔ kani ɔdubuti Katɔti batu bekpone limomo lɛni ntulo akpa leevu-anyɔ umene-mi! 54Nsu si bébo na békpo béte-mi ni, na Bunweni Kedee Ɔku etemila ammɔ elebo aani kalɛ na Katɔti ɔ́su úse lɛni na ɔdi ka ɔlɛ." 55Ɔmɛni kama ni, Yesu úye bekyuli lisu lɛmmɔ ɔnini, "Bi ɔsu na ɔlɛka biti ligyii ku lɛkɛɛ bibo bɛnii bibeƒie-mi aani si lɛ́ta línye aban lɛlɔ? Lɛ́tina bekyuli ala limeyi biala na Katɔti kakpakɔ na bíteƒie-mi. 56Nsu ala amɛni ƒui álɛ lɛni kalɛ na ala ani na básu bése na Bunweni Kedee Ɔku kemo ébo éte lɛni." Amu na nwuna batɛyane ƒui békeli bátɔlɔ-nwu kudɔ. 57Amu na ama bani néƒie Yesu mmɔ bétiku-nwu bésienku Ɔkpane Unengudi Kaiaƒa kaduli, kesii kani na bakpane benengu ku ɔma benengu ku ɔda bubo ala batinane bása belie. 58Petro anwu ɔkpɛ kama buɛɛ na úbavi útéduo kaduli kammɔ kemo. Útélie kalɔ na bagyumanane bammɔ kudɔ na ɔnu kalɛ na litemi lɛmmɔ lɛdubɔwɔ. 59Bakpane benengu bamɛni ku litemi batɛne bani nlie mmɔ ƒui báyɔ ka bawiaku Yesu litemi lɛdi lɛni lɛlɔ na basia na bakɛ-nwu badu. 60Nsu ina ka bekyuli pii bébo bábada-nwu kenye muedi ni, bátakɛ lɛla lɛdi. Nkyuli inyɔ badi bébo 61na básu banii, "Ukyuli ɔmɛni ɔ́su ɔnini, 'Ndubɔƒɛ Katɔti kakpakɔ. Na emeyi atɛ kama ni, ndubɔsɔku-ka lɛtu.' " 62Ɔkpane unengudi ɔ́ta unye na úye Yesu ɔnini, "Eenú etemila ani na baasu na ƒula lɛlɔ mɛni? Bi na ebo na adubɔsu?" 63Nsu Yesu úbile kenye na útasu lɛla lɛdi. Ɔkpane unengudi ɔ́sɔ ɔ́su-nwu ɔnini, "Lɛ́kpali Katɔti mɔɔkya-a nnii su-bu si awɔ ndi Ukyuli Ɔƒunadi ɔni ndi Katɔti Ubidi ɔmmɔ." 64Amu na Yesu údie kenye ɔnini, "Ɛɛn. Awɔ násu, na use lɛni sɔsɔ. Na mɔɔsu-mii nnii uwi klukui kemo ni, bɛdubɔnu Ukyuli Ɔyawine Ubi ɔmmɔ ka ulie Katɔ Ɔyikune Ƒui kɔdianu. Na bɛdubɔnu ka ɔ́si katɔ ɔdubo na uyɔlɔ kemo!" 65Uwi ɔni na ɔkpane unengudi únu ɔmɛni ni, ɔ́ni nwuna awu ɔ́bwɛ na ɔ́va ɔnini, "Binu enyekpi ani na ɔɔtɛmi! Bɔsɔ buláwia kenye bediene badi lɛnɔ! 66Bi ndi bina kasusu?" Bana ƒui bédie kenye banii, "Ɔlɛka badu-nwu kukpi kɔtɔ!" 67Amu na bétuo lisuo béwi-nwu anumi na bébo-nwu. Na badi lɛnɔ báƒiɛmi-nwu lɛtugya. 68Na béye-nwu banii, "Ukyuli Ɔƒunadi ɔmmɔ na adi? Su-bu ukyuli ɔni nébo-ɔ!" 69Amu na Petro ɔmua ulie keyi mmɔ asa na ɔkpane unengudi kabla ɔblane ɔni ndi ulekubi úbo mmɔ na ɔ́su-nwu ɔnini, "Awɔ lɛnɔ ásiaku Yesu ɔni nási Galilea kalɔ lɛlɔ." 70Nsu Petro ɔ́tuala na bekyuli bammɔ ƒui anumi ɔnii, "Ńtenu lɛla lɛni na aasu mɛni kalɔ." 71Na ɔ́tɔlɔ mmɔ úténye kaduli kammɔ kayakun. Ulekubi kabla ɔblane ɔbambadi lɛnɔ ɔ́nu Petro na ɔ́su bani nnye mmɔ ɔnii, "Anwu lɛnɔ ɔ́siaku Yesu Nasareni ɔmmɔ." 72Amu na Petro ɔ́sɔ ɔ́tuala na ɔ́kpali ala ɔnini, "Lɛɛɛgyi ukyuli ɔmmɔ!" 73Uwi útetu asa na bani nnye mmɔ bébo bábasu Petro banii, "Útalɛka eni anii aaadi-ma akɔ unwi. Ɔsika ƒula butemi buudie-ɔ keyi nwaa." 74Amu na Petro ɔ́sɔ ɔ́kpali ala momoomo ɔnini, "Katɔti ɔni-mi kɔtu si ɔkɔ na mɔɔnyi nnii lɛɛɛgyi ukyuli ɔmmɔ." Kɔnakunwi ni, akɔkɔ úte kenye. 75Na Petro únyimo lɛla lɛni Yesu ɔ́su ɔnini, "Asa na akɔkɔ ɔdubute kenye ni, adubɔsu kɔtɛ sɔɔn ka aaagyi-mi." Anwuɔsu ɔ́lɛ keyi na útéwulo geen.

will be added

X\