MATEO 25

1"Na uwi ɔni na ami Ukyuli Ɔyawine Ubi ndububo ni, Katɔti lɛga bɔdi buse aani ɔmɛni. Uwi ɔdi kemo ni, belekubi leevu badi béti bana lɛsogya banii batákpanku uleku ɔgya ku ulekudi besienku kaduli. 2Bana kemo ɛlɔ badi badɔlɔdi, na ɛlɔ bakladi lɛnɔ badi banundane. 3Badɔlɔdi bammɔ béti bana lɛsogya, nsu béteti inɔmii bɔdi bétebunku-ni. 4Na banundane bammɔ ama béti inɔmii bébunku bana lɛsogya báda. 5Ka uleku ɔgya ɔmmɔ ɔ́kpɛ kama ku bubo ɔsu ni, lɛlɛɛ líbo lɛɛda begblebi bammɔ na bálɛɛ. 6"Ɔbla usientɛ asa bénu kɔvanu ka ni, 'Bɛɛnu uleku ɔgya ɔmmɔ o-o! Bɛta bɛlɛ bibo na butásiaku-nwu!' 7"Amu na begblebi leevu bammɔ báta na bátu bana lɛsogya. 8Na badɔlɔdi bammɔ básu banundane bammɔ banii, 'Bite-bu bina inɔmii bɔmmɔ bɔdi, ɔsika bula lɛsogya lɛdaku buni.' 9"Na banundane bammɔ básu-ma banini, 'Bula inɔmii bulédu abu ku-mii, anwuɔsu biteesie beyene kudɔ na bitéye bina bɔdi.' 10"Ka bánya bátɔlɔ kani na uleku ɔgya ɔmmɔ úbeduo. Na begblebi ɛlɔ bani náda lɛlɔ bése mmɔ básiaku-nwu béduo uleku ketikɔ mmɔ, na bákalɛ ɔtɔ. 11"Kama ni, begblebi bakladi bammɔ lɛnɔ bébo na básu banii, 'Ati, ati! Ya na buduo!' 12"Na uleku ɔgya ɔmmɔ ɔ́su-ma ɔnini, 'Kudi kudii! Lɛɛɛgyi-mii.' " 13Amu na Yesu ɔ́wɔlɔ lɛgba lɛmmɔ ɔnini, "Anwuɔsu bilie kagyumana, ɔsika bɛɛɛgyi limeyi iye uwi ɔni na masɔ mebo." 14"Na uwi ɔni na Ukyuli Ɔyawine Ubi ɔdubo ni, Katɔti lɛga bɔdi bɔdubuse aani ɔmɛni lɛnɔ. Uwi ɔdi kemo ni, unengu ɔdi ɔ́ta na ɔ́bla kasusu ka usie ulu ɔdi. Ɔ́lɔ nwuna kabla bablane na úti nwuna ala ɔ́kya-ma lɛkɔkɔ. 15Úte ɔdi biala lɛla lɛni na wakana bɔda. Unwi ni, úte-nwu egulabi aƒɔ alɔ. Na ɔbambadi ni, úte-nwu aƒɔ anyɔ. Na ɔkladi ni, úte-nwu koƒo kunwi. Na ɔ́tɔlɔ úsie ulu. 16Kabla ɔblane ɔni náƒɔ aƒɔ alɔ amɛni úsie kalɔ kɔnakunwi na útébo egulabi ammɔ únwini na ɔ́sɔ ɔ́kɛ aƒɔ alɔ ɔ́sia. 17Lɛni kani na kabla ɔblane ɔni náƒɔ aƒɔ anyɔ lɛnɔ úbo nwuna ɔdi únwini na ɔ́sɔ ɔ́kɛ aƒɔ anyɔ abambadi ɔ́sia. 18Nsu kabla ɔblane ɔni náƒɔ egulabi koƒo kunwi anwu úsie útégyeli kalɔ na úti nwuna unwoti egulabi ɔ́bala mmɔ. 19"Na emeyi pii adi kama ni, kabla bablane bamɛni unwoti ɔmmɔ únwini úbo na anwu ku-ma bábu akunta. 20Kabla ɔblane ɔni náƒɔ egulabi aƒɔ alɔ úti aƒɔ alɔ bamba ɔ́sia úboku na ɔ́su ɔnii, 'Ati, éte-mi egulabi aƒɔ alɔ na lɛ́kɛ alɔ líbunku.' 21"Nwuna unwoti ɔmmɔ ɔ́su-nwu ɔnii, 'Kabla ɔblane ɔbuni, ábla lɛla biala ulu lɛlɔ geen! Ka ásia ala blii suɛ amɛni anu kaduɛ ɔsu ni, ndubuti-ɔ linyene ala enengudi kenye. Bo butaadi na butaani na butaakɛ ebiti!' 22"Kabla ɔblane ɔni náƒɔ egulabi aƒɔ anyɔ lɛnɔ úbo na ɔ́su ɔnini, 'Ati, éte-mi egulabi aƒɔ anyɔ na lɛ́kɛ aƒɔ anyɔ bamba líbunku.' 23"Nwuna unwoti ɔmmɔ ɔ́su-nwu ɔnii, 'Kabla ɔblane ɔbuni, ábla lɛla biala ulu lɛlɔ geen! Ka ásia ala blii suɛ amɛni anu kaduɛ ɔsu ni, ndubuti-ɔ linyene ala enengudi kenye. Bo butaadi na butaani na butaakɛ ebiti!' 24"Amu na kabla ɔblane ɔni náƒɔ egulabi koƒo kunwi úbo na ɔ́su ɔnini, 'Ati, ngyi ka adi ukyuli ɔni na ƒula litemi libo ɔkplu na eedé edula na kesii kani na átava adi. Na aaƒɛ edula kesii kani na átagya adi. 25Na ka mɔɔyia ɔsu ni, líti ƒula egulabi ammɔ ńtéku lɛ́kya kalɔ. Anwuɔsu aanu ƒula egulabi ƒui mɛni.' 26"Nwuna unwoti ɔmmɔ ɔ́su-nwu ɔnini, 'Kabla ɔblane ukpidi ku ɔkɔsɔne na adi. Agyi ka muudé edula na kesii kani na ńtava adi, na mɔɔƒɛ edula kesii kani na ńtagya lɛla lɛdi. 27Amu bi ɔsu na éteti mina egulabi étetése egulabi kesekɔ, na si líbo ni, na mbaƒɔ mina egulabi ku kuvonsia?' 28"Amu na unwoti ɔmmɔ ɔ́su kabla ɔblane bamba ɔnini, 'Bɛƒɔ egulabi ammɔ na nwuna kudɔ na biti-nya bite ukyuli ɔni nda aƒɔ leevu mmɔ.' 29Ɔsika ukyuli ɔni mbo lɛla lɛdi ni, anwu kani na basɔ badubo bute na ɔsɔ ɔkɛ ubu. Na ukyuli ɔni neeebo ɔdi anwu ni, ubliidi ɔni nse-nwu muedi ni, badubɔƒɔ balɛku-nwu lɛkɔkɔ. 30Na kabla ɔblane ɔni na nwuna lɛlɔ liiibo kɔsia kɔdi mɛni anwu ni, bibo-nwu bɛlɛku bitákya kasuudikɔ. Mmɔ na keku ku animi bɔdu bɔdubɔkya. 31"Uwi ɔni na Ukyuli Ɔyawine Ubi ɔmmɔ ɔdububo na nwuna lɛga bɔdi kemo ni, Katɔti batu bana ƒui badubɔka bamana-nwu. Na ɔdubo ubelie nwuna lɛgaboku lɛlɔ. 32Na kadi ƒui bekyuli badubɔsala bebenye-nwu anumi. Mmɔ na ɔdubule-ma kemo aani kalɛ na baƒonu lɛlɔ ɔnune ɔɔƒuna baƒonu taalɛku bese akɔ. 33Ɔdubɔya na bekyuli babuni bebenye-nwu kudɔ. Na ɔdubɔya na bekyuli bekpidi bammɔ besie kama. 34"Na Ɔga ɔmmɔ ɔdubɔsu bekyuli bani nnye-nwu kudɔ ɔnini, 'Amii ndi bekyuli bani na Katɔti ɔni ndi mina Ɔti ɔ́ya na lɛlɔ lɛdubɔyɔ-mii kaduɛ. Anwuɔsu bibo na bibeduo lɛga kadikɔ kani na Katɔti ɔ́klibi úse úte-mii ɔ́si kayawi kalɔ kesekɔ ƒui. 35Mɔɔƒɔ-mii kayu kamɛni ɔsika uwi ɔni na kɔka kɔ́da-mi ni, bíte-mi adila. Ka utukwɛ ɔ́da-mi ni, bíte-mi ntu. Ka ndi ɔƒɔ ni, bígyingya enu bɛ́ƒɔ-mi na ḿbeduo-mii kudɔ. 36Na ka nkɛ kasɔngya ni, bíte-mi adala. Na uwi ɔni na muuƒi ni, bɛ́nu-mi lɛlɔ. Ka bákya-mi ɔtɔ ni, bíbo bíbanu-mii.' 37"Mmɔ ni, bekyuli babuni bamɛni badubuye-nwu banini, 'Ati, uwi ɔmani na bɔ́nu-ɔ ka kɔka kɔɔda-a na búte-ɔ adila, iye utukwɛ ɔɔda-a búte-ɔ ntu? 38Uwi ɔmani na adi ɔƒɔ ébeduo-bu na bɔ́ƒɔ-ɔ, iye akɛ kasɔngya na búte-ɔ adala? 39Na uwi ɔmani na búnu ka eeƒi iye bákya-a ɔtɔ na búbo búbanu-ɔ?' 40"Amu na Ɔga ɔmmɔ ɔdubudie kenye ɔnini, 'Mɔɔsu-mii nnii uwi ɔni na bíbunku ukyuli ɔni na bilábu ƒui na mina badi akɔ ni, ami na bɛ́bla bíte.' 41"Amu na ɔdubɔsu bani na ɔ́ya na bésie kama ɔnini, 'Bɛkpɛ bɛlɛ-mi lɛlɔ, amii bani na Katɔti úwida! Biteesie lɛgyavonku lɛni neeeni kudii na Katɔti ɔ́klibi úse úte ukisine ɔmmɔ ku nwuna ayu ekpidi kemo! 42Kɔka kɔ́da-mi na bítete-mi adila na lɛdi. Utukwɛ ɔ́da-mi na bítete-mi ntu na lɛni. 43Ndi ɔƒɔ ḿbeduo-mii na bítaƒɔ-mi. Nkɛ kasɔngya na bítete-mi adala. Líƒi na bákya-mi ɔtɔ, nsu bítabanu-mi.' 44"Amu na ama lɛnɔ badubuye-nwu banini, 'Ati, uwi ɔmani na bɔ́nu ka kɔka kɔɔda-a, iye utukwɛ ɔɔda-a, iye adi ɔƒɔ, iye ákɛ kasɔngya, iye eeƒi, iye bákya-a ɔtɔ na bútebo na bubebunku-ɔ?' 45"Mmɔ na Ɔga ɔmmɔ ɔdubɔsu-ma ɔnini, 'Mɔɔsu-mii ka ni, uwi ɔni na bítabla lɛbuni bítete ukyuli ɔni na balábu ƒui na mina badi akɔ ni, ami na bítabla bítete!' " 46Yesu ɔ́wɔlɔ ɔnini, "Bekyuli bamɛni na badubuti batákya lɛbibo lɛni naaadubo bɔsa kudii kemo. Na bekyuli babuni bammɔ badubɔkɛ ngba bɔni naaadubo bɔsa kudii."

will be added

X\