MATEO 24

1Ka Yesu ɔ́lɛ ɔ́si Katɔti kakpakɔ mmɔ ɔɔtɔlɔ ni, nwuna batɛyane bébo-nwu kudɔ na bakya baatina-nwu kakpakɔ lɛtɔ lɛmmɔ. 2Na ɔ́su-ma ɔnini, "Bɛsia-ni anumi kaduɛ. Ɔsika mɔɔsu-mii nnii badubɔƒɛ lɛtɔ lɛmɛni ƒui, ɔni na lɛtabi lɛdi lilébu lilasia lɛkpanadi lɛlɔ muedi. Badubugyingya ana ƒui bewi kalɔ." 3Uwi ɔni na Yesu úsie útélie Inɔ Egyii Kɔbi lɛlɔ ni, nwuna batɛyane bébo-nwu kudɔ na básu-nwu banii ɔtina-ma uwi ɔni na ala amɛni adubɔlɛ ku ala abambadi ani lɛnɔ ndubɔlɛ na watina ka kawɔlɔkɔ kani na ɔdubɔsɔ ubo uwi údu. 4Yesu ɔ́su-ma ɔnini, "Bise anu kaduɛ na ukyuli ɔdi ulátɔlɔ-mii. 5Bekyuli pii badubuti mina lɛnyi bebo babasu-mii banini, 'Ami ndi Ukyuli Ɔƒunadi ɔmmɔ' na batɔlɔ bekyuli pii. 6Bɛdubunu kekpo ku kekpo etemila. Nsu bitaya na ɔtɔtɔ ɔgyu-mii. Ɔdi ka ala amɛni ƒui udu alɛ, nsu ulátina ka kawɔlɔkɔ kammɔ kéedu tɔ. 7Kalɔ kadi bekyuli badubɔta na bekpoku babambadi. Na lɛga kadikɔ kadubukpoku kabambadi. Na kɔka kɔdububo na ekpo ekpo. Na kalɔ lɛnɔ kadubo butaakunku na ekpo ekpo. 8Ala amɛni ndubuse kalɔ aani kalɛ na kawɔƒɔ keesé uleku kalɔ ku bɔdu. 9"Bina bekisine badubɔya na beƒie-mii bete ɔma benengu na batɛku-mii litemi. Na bani-mii kɔtu na badu-mii. Kadi ƒui bekyuli badubukisi-mii, ɔsika bɛdi mina batɛyane. 10Bekyuli bani náƒɔ-mi bádi pii badubunwini kama bakya-mi uwi ɔmmɔ kemo. Na badubɔkya bana bakpana kakya na beteekisi lɛlɔ. 11Bekyuli pii badubɔta banyi ɔkɔ banii ama ndi Katɔti kenye bediene na batɔlɔ bekyuli pii. 12Likpidi bɔbla lɛdubo bumomo na baƒɔtaadine pii basɔ baláyɔ lɛlɔ. 13Na ukyuli ɔni ndubɔkya ɔkplu utálɛ kawɔlɔkɔ ni, Katɔti ɔdubute-nwu ngba ƒui. 14Na bekyuli badubɔkɔ Katɔti lɛga bɔdi litemi buni lɛmmɔ lɛsa na kayawi ƒui kalɛ na ukyuli biala ɔkɛ kuƒi unu-ni asa na kawɔlɔkɔ kammɔ kedu. 15"Na bɛdubɔnu lɛla lɛni na Katɔti uukisi na liisé lɛlɔ ka unye nwuna likpo kedee kalɛ na Katɔti Kenye Udiene Daniel únweni úse. Na amii bani mɔɔká ɔku ɔmmɔ ni, biduo-nwu kemo kaduɛ na binu-nwu kalɔ. 16Uwi ɔmmɔ ni, amii bani nkya Yudea ni, ɔdi ka bikeli bisie abi lɛlɔ. 17Na ukyuli ɔni nnye nwuna lɛsa lili ni, utayu utebo kalɔ ɔnii ubedie nwuna ala na ɔtɔ kemo. 18Na ukyuli ɔni nkya kemo ɔsɔ utenwini utesie kaduli ɔnii utéti nwuna kɔdi. 19Na baƒɔndane ku bebi beni bani nda bebi bani mɔɔnyimi ni, bana lɛlɔ lɛdubɔbla kɔnyana geen. 20Bivele Katɔti bɛnii bukeli bɔmɛni butebo na kɔyɔ uwi iye lɛnwunameyi lɛdi lɛlɔ. 21Ɔ́si kayawi kalɔ kesekɔ ni, lɛbibo libendi lɛmɛni udu lítebo tɔ kudii. Na nina udu ɔdi lɛnɔ ɔsɔ ulebo kudii. 22Nsu ni, Katɔti ɔ́ɔƒana emeyi ammɔ. Si ɔɔɔdi lɛni ni, ukyuli ɔdi ɔsɔ uuubo ngba. Nsu bekyuli bani na Katɔti ɔ́ƒuna úse ɔsu na ɔdubɔƒana emeyi ammɔ. 23Anwuɔsu si ukyuli ɔdi ɔ́su ɔnii, 'Nu! Ukyuli Ɔƒunadi ɔkya mɛni,' iye si badi básu banii, 'Ɔkya ngye' ni, bitaƒɔ-nwu bitadi. 24Ɔsika bekyuli badubɔta banyi ɔkɔ banii ama ndi Ukyuli Ɔƒunadi ɔmmɔ, na badi lɛnɔ basu banii Katɔti kenye bediene badi. Na badubɔbla akɔla budie bɔtina ebendi lidu lidu, kalɛ na si nka bakana ni, beti batɔlɔ bekyuli bani na Katɔti ɔ́ƒuna úse muedi. 25Binu! Mɔɔlɛ-mii lise asa na uwi ɔmmɔ udu. 26"Si bekyuli básu-mii banii, 'Ɔkya ketele kemo' ni, bitesie bitatánu. Na si básu-mii banii, 'Ɔkya ɔtɔ mɛni' ni, bitaƒɔ bitadi. 27Ɔsika ami Ukyuli Ɔyawine Ubi ndubudie mina lɛlɔ keyi aani kalɛ na ɔnantu ɔdubo bɔna ɔɔbwɛ bukeye taasi kayaa na ɔƒɛ katukɔ taatálɛ kanukɔ. 28Anwuɔsu bitayiƒla ka kesii kani na lɛla lɛdi likpi lɛtɛ ni, mmɔ na begbini baasa. 29"Na lɛbibo emeyi ammɔ kama ni, ɔƒɛ ɔdubɔbla suu, na kɔbuli kɔsɔ kulekeye lɛnɔ, na ayabi adubɔnu asi katɔ, na kayaa ɔyikun ƒui ɔdubɔkunku. 30"Ala adi adubɔlɛ na kayaa ani mɔɔtina ka Ukyuli Ɔyawine Ubi ɔdubo. Na kayawi bekyuli ƒui badubuwulo na bana ekpidi ɔsu uwi ɔni na badubɔnu ka Ukyuli Ɔyawine Ubi ɔkɛ uyɔlɔ kemo ɔ́yu ɔ́si kayaa ɔdubo na bukeye bonwu ku ɔyikun kemo. 31Badubɔvwii kakpɛɛ. Na Ukyuli Ɔyawine Ubi ɔdubɔtala nwuna batu na basi katɔ betédie bekyuli baƒunadi ƒui basiku kayawi kesii biala. 32"Bɛtɛya lɛla lɛdi bɛsiku kɔdingyii lɛlɔ. Si uwi ɔni na bɛnu ka kɔdingyii kɔmmɔ kɔgba kúmo ntu na kuse kalɔ kuudie evete awɔdi ni, na ɔɔtina ka ketudi údu. 33Lɛni kani na si bɛnu ala amɛni ƒui ni, bɛti ka uwi ɔni na Ukyuli Ɔƒunadi ɔmmɔ ubo úude, na unye kayakun. 34Mɔɔsu-mii geen ka ala amɛni ƒui adubɔlɛ asa na bina akɔ badi na mɛni bɛdubɔsa bukpi. 35Katɔ ku kalɔ kadubɔvi, nsu mina etemila anya aaadubo bɔvi kudii. 36"Ukyuli ɔdi ɔɔɔgyi limeyi iye uwi ɔni kemo na ami, Ukyuli Ɔyawine Ubi, nsɔ ndubo. Katɔti batu baaagyi, na ami lɛnɔ lɛɛɛgyi. Ati lɛti kani ngyi. 37Ami, Ukyuli Ɔyawine Ubi, ndubo buse aani kalɛ na ɔ́lɛ na Noa uwi. 38Uwi ɔmmɔ asa na ɔnantu wana waƒɔ kalɔ lɛlɔ ƒui ni, bekyuli bákya bátaadi taani. Na banana ku beleku beeti lɛlɔ útálɛ limeyi lɛni na Noa útéduo ɔkɔlɔ ɔmmɔ kemo. 39Nsu bátati lɛla lɛni mɔɔlɛ́ úti útédu uwi ɔni na ɔnantu ɔ́na ɔ́gbala-ma ƒui. Lɛni kani na Ukyuli Ɔyawine Ubi bubo lɛnɔ bɔdubɔbla. 40Na banana inyɔ badubunye kemo na, Katɔti ɔdubɔƒɔ unwi na ɔda unwi use. 41Na beleku inyɔ badubɔkya ɔlaaƒɔ kakɔkɔ, na Katɔti ɔdubɔƒɔ unwi na ɔda unwi use. 42"Anwuɔsu bilie kagyumana, ɔsika bɛɛɛgyi limeyi lɛni na bina Unwoti ɔdububo. 43Si kaduli ɔlati ɔgyi uwi ɔni na uyune ɔdububo ni, nka ɔdubulie kagyumana. Na uláya na uyune ɔmmɔ wabwɛ weduo-nwu ɔtɔ kemo. 44Lɛni kani na ɔlɛka amii lɛnɔ bilie kagyumana, ɔsika ami Ukyuli Ɔyawine Ubi ndububo mbeyu-mii lɛtu. 45"Kabla Ɔblane ɔni náda anu na ɔɔbla ala ulu lɛlɔ ni, anwu na nwuna unwoti uuti teenye kabla bablane bakladi kenye. Na uunye-ma kenye teete-ma adila na uwi ɔbuni kemo. 46Kubiti geen ndubo kabla ɔblane ɔmmɔ si nwuna unwoti ɔ́si úbo úbanu ka ɔɔbla lɛla lɛni na ɔ́su. 47Mɔɔsu-mii geen ka unwoti ɔmɛni ɔdubuti kabla ɔblane ɔmmɔ ɔbla nwuna ala ƒui lɛlɔ ɔnune. 48Nsu si ɔdi kabla ɔblane ukpidi ni, ɔdubɔsu na nwuna kayi kemo ɔnini, 'Mina unwoti ɔdubutu uwi geen!' 49Anwuɔsu ɔdubuse kalɔ uteebo nwuna kabla ɔblane bakpana bammɔ. Na anwu ku ntɛ bekpine bataadi na bataani. 50Na unwoti ɔmmɔ ɔdububo uwi ɔni na kabla ɔblane ɔmɛni ulásia-nwu anu ku uwi ɔni lɛlɔ na ɔɔɔgyi uuuse. 51Na unwoti ɔmmɔ ɔdubɔni kabla ɔblane ɔmmɔ kɔtu geen. Na nwuna kɔtu bɔni kɔdubɔyu ɔkplu aani anumi lɛlɔ bekyuli bɔdi kalɛ! Mmɔ na keku ku animi bɔdu bɔdubɔkya!"

will be added

X\