MATEO 23

1Ɔmɛni kama ni, Yesu ɔ́tɛmiku bekyuli lisu lɛmmɔ ku nwuna batɛyane. 2Ɔ́su ɔnini, "Ɔda bubo ala batinane ku Ƒarisiƒuɔ ama ni, benye Mose kenye na bebo kuƒi kɔni na bedie Katɔti ɔda bubo bɔmmɔ kalɔ. 3Anwuɔsu ɔlɛka bɛbla lɛla biala na básu-mii kaduɛ. Nsu ni, bitasiaku ala ani na baabla kama, ɔsika baládi ala ani baasu mmɔ lɛlɔ. 4Kalɛ na beedie ɔda bubo bɔmmɔ kalɔ ni, ubo bekyuli ɔkplu geen ka badi-mu lɛlɔ aani kalɛ na baatɛ etila ku unu taasia bekyuli lili. Na balayɔ ka bakyaku-ma kɔnu na akɔsi-ma bude. 5"Baabla lɛla biala kalɛ na bekyuli banu-ma aani Katɔti kabla bablane geen. Bɛnu ala ani na bébo báda bana atɛntɛ ku enubɔ na Bunweni Kedee etemila asia-nya lɛlɔ, ku kalɛ na bákya-nya na ébomo. Na bɛnu kakpakɔ ala ani na báta bámana ala abuni lidu lɛni bákya mmɔ lɛlɔ. 6Baayɔ́ kuliekɔ kɔbuni bulie na emeyi kadikɔ ku kuliekɔ kunengudi bulie na Yudaƒuɔ kɔsakɔ. 7Baayɔ́ banii bekyuli beteebo kalɔ teegyele-ma na kuyeya na bataalɔ-ma banii Ala Ɔtinane. 8"Na bɔƒɔtaadi ulu lɛlɔ ni, bitaya na bekyuli balɔ-mii Unwoti, ɔsika banwa na bɛdi bite lɛlɔ. Na Unwoti unwi pɛ kani na bibo. 9Na bina akɔ ni, bitalɔ ukyuli ɔdi na kayawi mɛni bɛnii Blɔti, ɔsika Blɔti unwi pɛ na bibo. Na ɔkya katɔ. 10Na bitalɔ ɔdi bɛnii Ɔtinane, ɔsika bina Ɔtinane unwi pɛ ɔni kani na bibo ndi Ukyuli Ɔƒunadi ɔmmɔ. 11Bina kemo ɔni mɔɔwia ɔnii ɔƒɔ lɛnyi ku ɔbu ni, ɔlɛka ɔbla aani kabla ɔblane. 12Na ukyuli ɔni na ɔɔtalaku lɛlɔ katɔ ni, Katɔti ɔdubɔyula-nwu kalɔ. Na ukyuli ɔni muuboku lɛlɔ kalɔ ni, Katɔti ɔdubɔtalaku-nwu katɔ. 13"Bɔbwɛ muute amii Katɔti ɔda bubo ala batinane ku Ƒarisiƒuɔ! Anumi lɛlɔ bekyuli bɛdi! Bɛ́kalɛ Katɔ Ɔga Ɔma ulu bɛ́da bekyuli. Na amii alati biléduo, na biléte bekyuli bamba bani mɔɔkya ɔkplu lɛnɔ ulu na beduo. 14Bɔbwɛ muute amii Katɔti ɔda bubo ala batinane ku Ƒarisiƒuɔ! Anumi lɛlɔ bekyuli bɛdi! Biisié bekpinele kudɔ ka bitébunku-ma, nsu bɛɛtɔ́lɔ-ma taaƒɔ-ma ala. Na bɛɛkpali katɔ gyɔlɔɔ taabu-ma kɔdɔlɔ. Ɔmɛni ɔsu ni, bina kɔtu bɔni bɔdubɔkɔ katɔ bubu! 15"Bɔbwɛ muute amii Katɔti ɔda bubo ala batinane ku Ƒarisiƒuɔ! Anumi lɛlɔ bekyuli bɛdi! Bɛkɛ kayawi ekpo ekpo ƒui biitú lɛlɔ kalɛ na bɛkɛ ina ɔƒɔtaadine unwi bite Katɔti. Na si bɛ́kɛ ɔdi ni, bɛɛtina-nwu kalɛ na ubie na uduo lɛgyavonku lɛmmɔ kemo utulo amii alati ƒui! 16"Bɔbwɛ muute amii banumbwɛne ulu batinane bani anumi nábwɛ! Bɛɛtina bɛnii, 'Si ukyuli ɔ́kpali ala ɔ́lɔ Katɔti kakpakɔ úse kenye kadi ni, linyese lɛmmɔ liiibo ɔkplu. Nsu si ɔ́kpali ala ɔ́lɔ sika ugyiedi ani nsia Katɔti kakpakɔ mmɔ úse kenye kadi ni, linyese lɛmmɔ lɛdubɔyu ɔkplu geen.' 17Banumbwɛne badɔlɔdi! Bi náƒɔ kuye útulo, sika ugyiedi ɔmmɔ munuu Katɔti kakpakɔ kani mɔɔyá na sika ugyiedi ɔmmɔ ɔɔbla kedee? 18Bɛɛtina lɛnɔ bɛnii, 'Si ukyuli ɔdi ɔ́kpali ala ɔ́lɔ Katɔti lɛkpabi úse kenye kadi ni, linyese lɛmmɔ liiibo ɔkplu. Nsu si ɔ́kpali ala ɔ́lɔ ala ani na béti básia lɛkpabi lɛmmɔ lɛlɔ úse kenye ni, linyese lɛmmɔ lɛdubɔyu ɔkplu geen.' 19Banumbwɛne geen na bɛdi! Bi náƒɔ kuye útulo, ala ani nsia lɛkpabi lɛmmɔ lɛlɔ munuu lɛkpabi lɛni mɔɔyá na ala ammɔ aabla kedee? 20Anwuɔsu ni, si ukyuli ɔdi ɔ́kpali ala ɔ́lɔ lɛkpabi úse kenye ni, na linyese lɛmmɔ lɛdanku lɛkpabi lɛmmɔ ku ala ani nsia-ni lɛlɔ ƒui. 21Na si ɔ́kpali ala ɔ́lɔ Katɔti kakpakɔ úse kenye ni, na linyese lɛmmɔ lɛdanku kakpakɔ kammɔ ku Katɔti ɔni keliekɔ ndi kakpakɔ kammɔ. 22Na si ukyuli ɔ́kpali ala ɔ́lɔ katɔ úse kenye ni, nwuna linyese lɛmmɔ lɛdanku Katɔti lɛgaboku ku Katɔti ɔlati ɔni nlie lɛgaboku lɛmmɔ lɛlɔ. 23"Bɔbwɛ muute amii Katɔti ɔda bubo ala batinane ku Ƒarisiƒuɔ! Anumi lɛlɔ bekyuli bɛdi! Biiti kevoma kutu akyala ƒɛƒɛɛ ani bɛ́bla muedi lɛkpa leevudi teete Katɔti, nsu bíni na biládi ɔda bubo bɔni náƒɔ kuye geen butulo lɛlɔ. Na muna lɛlɔ bɔdi ndi kalɛ na bilanu bekyuli anumi bilabla lɛla lɛdi. Na bɛnu bekyuli kɔnyana. Na bɛdi lɛla biala ulu lɛlɔ bite bekyuli. Ala amɛni lɛnɔ na ɔlɛka bɛbla, na bitada ɔdi bitese. 24Batɔnkune banumbwɛne bɛɛsia bina ɔdi anu na bɛɛtimi alɔlɔ blii suɛ na ntɛ anumi. Nsu bina ablala aatina ka biibweli kubweyi kɔni ntulo balɔlɔ bammɔ ƒui! 25"Bɔbwɛ muute amii Katɔti ɔda bubo ala batinane ku Ƒarisiƒuɔ! Anumi lɛlɔ bekyuli bɛdi! Bɛɛƒɔ bina lɛɛƒɛɛ ku akyami kama na eekeye, nsu ana kemo eesé lɛlɔ aani kalɛ na bíyi ku ɔdivo ku ami lɛti lɛkɛ. 26Awɔ Ƒarisini ɔnumbwɛne! Ka ƒula ɔɔƒɛɛ kemo bɔƒɔ, na nwuna kama lɛnɔ kadubukeye. 27"Bɔbwɛ muute amii Katɔti ɔda bubo ala batinane ku Ƒarisiƒuɔ! Anumi lɛlɔ bekyuli bɛdi! Bise aani kɔƒiɔtɔ kɔni na bákwa-ku kama na kɔɔdia bɔnu. Nsu nwuna kemo ɔdi ukpine ɔni nébie na úbu ekubi ekubi. 28Lɛni kani na bɛɛbla lɛlɔ aani bekyuli babuni na bekyuli anumi, nsu bíyi ku kenwini ku ekpidi lidu. 29"Bɔbwɛ muute amii Katɔti ɔda bubo ala batinane ku Ƒarisiƒuɔ! Anumi lɛlɔ bekyuli bɛdi! Bɛɛtú kɔƒiɔtɔ kɔbuni teete Katɔti kenye bediene bani nélie siin, na bɛɛklibi-ku kaduɛ. 30Na bɛɛsu ka, 'Si bula bati kuuku uwi na bulie ni, nka abu bulasiaku-ma kama na bɔdu Katɔti kenye bediene bammɔ.' 31Nsu bina ala ani bɛɛbla mɔɔtina geen ka bekyuli bani nádu Katɔti kenye bediene bammɔ kaba bebi na bɛdi. 32Anwuɔsu ni, bisie anumi na bɛwɔlɔ lɛla lɛni na bina bati kuuku bése kalɔ. 33"Bekyuli bekpidi bɛdi! Bise aani balakpi ku bana bebi! Anwuɔsu ni, bɛɛɛdubo bɔkana na bikeli Katɔti kɔtu kɔni na ɔdubɔni-mii na lɛgyavonku kemo! 34Ɔmɛni ɔsu ni, ndubɔtala Katɔti kenye bediene ku banundane ku Katɔti ɔda bubo ala batinane lɛkya-mii akɔ. Na ka biikisi-ma ɔsu ni, bɛdubɔkana badi bɔmana ugyii lɛlɔ na bekpi, na bibo badi kugyiimi na kasalakɔ, na bɛbɔku badi lɛnɔ bɛsiku ɔma unwi bisienku ɔma unyɔdi kemo. 35Na bekyuli bani nse siin ubugya ɔni na bíwiakun ɔ́si Habel lɛlɔ útálɛ Barakia ubidi Sakaria ɔni na bina bati bádu-nwu na kakpakɔ ku lɛkpabi ntɛ mmɔ ni, ubugya ɔmmɔ ɔdubɔsi bina kadi bekyuli ƒui lɛlɔ. 36Na mɔɔsu-mii geen ka ubugya buwiakun bɔmɛni bɔsia amii bani nlie ngba mɛni lɛlɔ. 37"Yerusalem, Yerusalem! Awɔ muubó Katɔti kenye bediene ku bekyuli bani na Katɔti ɔ́tala ɔ́kya-mii atabi taadu. Kɔlɛ kɔlɛ sɔɔn mɛni na líbimi mina enu nnii mɔɔsála-mii aani kalɛ na akɔkɔ uledi uuti nwuna avwi teebi nwuna bebi lɛlɔ, nsu étenu kalɔ! 38Ɔmɛni ɔsu ni, Katɔti ɔdubudie ɔma ɔmɛni atu na ɔyii udu. 39Na mɔɔsu-mii geen ka ni, ɔ́si ɔƒaani ni, bɛsɔ bɛɛɛdubo-mi bɔnu wetédu ka bɛdubɔsu bɛnii, 'Bimwi anwu ɔni ndubo na Blɔti lɛnyi kemo!' "

will be added

X\