MATEO 22

1Yesu ɔ́sɔ ɔ́tina bekyuli ala na agba kemo ɔnii, 2"Katɔti lɛga bɔdi buse aani ɔmɛni. Uwi ɔdi ni, ɔga ɔdi ɔ́di uleku buti limeyi lɛdi úte ubidi. 3Ɔ́tala nwuna kabla bablane ɔnii batásu bekyuli bani na ɔ́lɔ ɔnii bebo limeyi kadikɔ mmɔ na bebo. Nsu béni na banii belebo. 4"Anwuɔsu ɔ́tala kabla bablane babambadi ɔnii batásu bekyuli bammɔ banii, 'Limeyi lɛni bɔdubo bɔdi lídu! Bɔ́ɔdu bebuo bani ƒui na bɔdubuti bútaanu-mii kama. Na báaklibi lɛla biala bése. Anwuɔsu biteebo uleku ketikɔ!' 5"Nsu bana ɔdi biala útabu nwuna bɔlɔ bɔmmɔ. Mmomu bátɔlɔ bésie kesii kani na ɔdi biala ɔɔyɔ́. Ɔdi ɔ́tɔlɔ úsie nwuna kemo. Na ɔdi lɛnɔ úsie kuye kadikɔ. 6Na babambadi lɛnɔ béƒie kabla bablane bammɔ na bébo-ma na bádu-ma. 7Ɔga ɔmmɔ ɔ́kɛ kɔnyi geen, na ɔ́tala nwuna bekpone na bátádu bekyuli badune bammɔ ƒui na bákyula bana ɔma. 8"Amu na ɔ́lɔ nwuna kabla bablane na ɔ́su-ma ɔnini, 'Mina ubi uleku buti limeyi lɛmmɔ bɔdi uwi údu. Nsu bekyuli bani na lɛ́lɔ liboku limeyi lɛmmɔ kadikɔ ni, bátamanku bétete limeyi lɛmmɔ. 9Anwuɔsu biteesie kuye ekpo ekpo ƒui na bitálɔ bekyuli bani na bɛdubɔnu ƒui bɛnii bebo limeyi kadikɔ mɛni.' 10Amu na kabla bablane bammɔ bésie kuye ekpo ekpo ƒui bátálɔ ukyuli biala na bánu béboku. Bekyuli bekpidi ku babuni ƒui béyi ɔtɔ ɔmmɔ. 11"Na ka ɔga ɔmmɔ úduo úsie utánu bekyuli bani nlie kadikɔ mmɔ ni, ɔ́nu ɔnana ɔni naaakya uleku ketikɔ limeyi bɔdi awu. 12Na ɔga ɔmmɔ úye-nwu ɔnini, 'Ɔkpana, dɛ na ɔ́bla asa na ébo mɛni na aaakya uleku ketikɔ limeyi bɔdi awu?' Nsu útakana kenye budie. 13"Amu na ɔ́su nwuna bagyumanane mmɔ ɔnini, 'Bibo kɔgba bɛda-nwu enu ku lɛgba, na bibo-nwu bɛlɛku bitákya kasuudikɔ. Mmɔ na keku ku animi bɔdu bɔdubɔkya.' " 14Na Yesu ɔ́wɔlɔ lɛgba lɛmɛni ɔnini, "Katɔti ɔɔlɔ bekyuli pii ka baƒɔ-nwu badi, nsu ɛlɛɛ kani na ɔ́ƒuna údie-ma akɔ." 15Ƒarisiƒuɔ badi bátása na bábla kasusu banii betéwi Yesu kenye benu na bawia-nwu litemi. 16Anwuɔsu bátala bana batɛyane badi ku bekyuli bani nsiaku Herode kama bákya Yesu. Na ka bésie ni, básu-nwu banini, "Ala ɔtinane, bɔgyi ka ese siin na aatina Katɔti bɔƒɔtaadi ulu ɔmmɔ geen, ɔsika alánu ukyuli anumi taabla lɛla lɛdi. Na alákpete bekyuli asula lɛnɔ. 17Anwuɔsu, su-bu ƒula kasusu. Bula ɔda bubo buute kuƒi ka butaaƒɔ kuyi teete Romaƒuɔ Ɔga Unengudi munuu útalɛka butaaƒɔ?" 18Nsu Yesu ɔ́ɔnu bana lɛkwɛ likpidi ɔ́ti ɔsu na ɔ́su-ma ɔnini, "Amii anumi lɛlɔ bekyuli! Bi ɔsu na bɛwia-mi litemi? 19Bɛtina-mi kaplɛ kani na biiti taaƒɔ kuyi kɔmmɔ na bɔnu." Amu na béti ɔdi béboku-nwu. 20Mmɔ na Yesu úye-ma ɔnini, "Ɔma na báta básia mɛni, na ɔma lɛnyi nsia mɛni?" 21Amu na bédie kenye banini, "Ɔga Unengudi Kaesare na ɔdi." Anwuɔsu Yesu ɔ́su-ma ɔnini, "Biti lɛla lɛni ndi Kaesare lɛdi bite Kaesare. Na biti lɛla lɛni ndi Katɔti lɛdi bite Katɔti." 22Ka bénu ɔmɛni ni, kasusu kéƒu-ma na bátɔlɔ-nwu kudɔ. 23Na limeyi lɛmmɔ kani lɛlɔ ni, Sadukiƒuɔ bani mɔɔsu banii bekpine basɔ baláta bébo Yesu kudɔ. 24Na bébeye-nwu banini, "Ala ɔtinane, Mose ɔ́su-bu ɔnii si ɔnana ɔdi úkpi na ɔ́da ulekudi úse na beeebo bebi ni, na ɔnana ɔmmɔ ɔnwani ɔnanabi uti ukpinele ɔmmɔ. Na anwu ku-nwu bawɔ bebi. Na beti bebi bammɔ babla aani ɔnana ɔni nsɔ neeebo mmɔ bebi. 25Amu na uwi ɔdi ni, banwani bananabi maatɛ badi bákya mɛni. Ɔnanabi unengudi úti uleku, na bátawɔ asa na ɔnanabi ɔmmɔ úkpi. Na nwuna ɔnwani ɔnanabi ɔni nsia-nwu kama úti ukpinele ɔmmɔ. 26Na ɔnanabi unyɔdi ku ɔtɛdi útálɛ maatɛdi lɛlɔ ƒui béti uleku ɔmmɔ ɔni anwu ku bana kemo ɔdi bátawɔ asa na békpi. 27Na kawɔlɔkɔ ni, uleku ɔmmɔ lɛnɔ úbekpi. 28Na ɔƒɛni ni, limeyi lɛni lɛlɔ na bekpine badubɔsɔ bata ni, bana akɔ ɔmani ulekudi na uleku ɔmmɔ wenwini ka bana ƒui béti-nwu dii?" 29Yesu údie kenye ɔnini, "Bɛ́yii ulu ɔmmɔ geen! Ɔsika bilenu Bunweni Kedee Ɔku ɔmmɔ kalɔ, na bɛɛɛgyi lɛla lɛdi na Katɔti ɔyikun lɛlɔ. 30Na si bekpine básɔ báta belie ngba ni, badubɔbla aani Katɔti batu na beleti beleku na belelie agya lɛnɔ. 31Bítaka lɛla lɛni na Katɔti ɔ́su-mii ɔ́si kalɛ na bekyuli badubɔsɔ bata lɛlɔ? Katɔti ɔ́su ɔ́siku bina bati kuuku lɛlɔ ɔnini, 32'Ami ndi Abraham Katɔti ku Isak Katɔti ku Yakob Katɔti!' Ɔmɛni ɔɔtina ka ama bani néekpi ni, bamua beli ngba. Anwuɔsu ɔdi ama lɛnɔ Katɔti." 33Na ka bekyuli pii bammɔ bénu ala amɛni ni, bana kasusu kábla kalɛ kadi na ala ani na Yesu ɔ́tina ɔsu. 34Uwi ɔni na Ƒarisiƒuɔ bammɔ bénu ka Yesu ala kenye budie bɔ́ya na Sadukiƒuɔ bammɔ básɔ bátakana na beye lɛla lɛdi ni, bábasala. 35Na bana kemo unwi ɔni ndi ɔda bubo ala ɔtinane ɔ́wia ɔnii uuye Yesu litemi lɛdi na uti ɔkywɛ-nwu kakpagyuɛ. Ɔ́su ɔnini, 36"Ala ɔtinane, ɔda bubo bɔmani ndi bunengudi ƒui na ɔda bubo bɔmmɔ ƒui akɔ?" 37Yesu údie kenye ɔnini, "Ɔlɛka bɛyɔ Unwoti ɔni ndi bina Katɔti ku bina kayi ƒui ku bina kɔyu ƒui ku bina kasusu ƒui. 38Na ɔmɛni ndi ɔda bubo bunengudi ƒui. Na ɔdi uuutulo ɔmɛni. 39Na ɔni nsɔ nsia lɛnɔ use aani udeedi ɔmmɔ kalɛ. Yɔ ƒula ukyulikpana aani ƒula lɛlɔ kalɛ. 40Ɔda bubo inyɔ bɔmɛni lɛlɔ na Mose ɔda bubo ku Katɔti kenye bediene ala bɔtina ƒui bɔsia." 41Ka Ƒarisiƒuɔ badi bása lisu ni, Yesu úye-ma litemi lɛdi ɔnini, 42"Bi na bɛɛkali taasiku Ukyuli Ɔƒunadi ɔmmɔ lɛlɔ? Na ɔma kaba kemo ubi na ɔdi?" Bédie kenye banii, "Ɔga Dawid kaba kemo ubi na ɔdi." 43Amu na Yesu úye-ma ɔnini, "Si use lɛni ni, dɛ na ɔ́bla asa na Dawid ɔkɛnku Katɔti Kɔyu ɔyikun lɛlɔ na ɔɔlɔ-nwu ɔnii Ɔti? Na Dawid ɔmmɔ ɔlati ɔ́su ɔnini, 44'Katɔti ɔ́su mina Ɔti ɔnini, "Sɔ lie-mi kɔdianu kakɛ wetédu uwi ɔni na maya na akɔliku ƒula lɛgba anya ƒula bekisine lɛlɔ." ' 45Na si Dawid ɔɔlɔ Ukyuli Ɔƒunadi ɔmmɔ ɔnii Ɔti ni, dɛ na ɔ́bla na ɔ́sɔ ɔdi Dawid ɔmmɔ kaba kemo ubi?" 46Bana akɔ ɔdi útakana na udie Yesu litemi lɛmmɔ kenye. Na ɔ́si limeyi lɛmmɔ lɛlɔ ni, ɔdi ɔ́sɔ útakana na use kayi uye Yesu litemi lɛbambadi lɛdi.

will be added

X\