MATEO 21

1Uwi ɔni na Yesu ku nwuna batɛyane bákpɛ béde Yerusalem na bétédu Betƒage na Inɔ Egyii Kɔbi lɛlɔ ni, Yesu ɔ́tala nwuna batɛyane inyɔ na batɔ anumi. 2Na ɔ́su-ma ɔnini, "Biteesie lɛkpaklɔ lɛni ntɛ-mii lɛtɔtɔ mmɔ kemo. Mmɔ ni, bɛdubɔnu ebuo utine ɔni na bákya-nwu kabuli na ubidi unye-nwu kudɔ. Bidie-nwu kabuli na biti-ma biboku-mi. 3Na si ukyuli ɔdi úye-mii lɛla lɛdi ni, bɛsu-nwu bɛnii, 'Blɔti mɔɔwia-ma.' Na badubɔnyonu-ma bete-mii kɔnakunwi." 4Ɔmɛni ɔ́lɛ lɛni aani kalɛ na Katɔti kenye udiene ɔdi ɔ́su úse ɔnii, 5"Bɛsu Sion bekyuli bɛnii, 'Bɛnu! Bina ɔga ɔdubo-mii kudɔ. Úboku lɛlɔ kalɔ na ulie ebuo ala utine ubi lɛlɔ ɔdubo.' " 6Anwuɔsu batɛyane inyɔ bammɔ bésie na bátábla aani kalɛ na Yesu ɔ́tala-ma ɔnii batábla. 7Na béti ebuo utine ɔmmɔ ku ubi béboku, na béti bana adi béwi-ma lɛlɔ, na Yesu ɔ́kɔ úlie ubi ɔmmɔ lɛlɔ. 8Na bekyuli bammɔ beete yiidu na béti bana adi béwi ulu lɛlɔ. Na badi lɛnɔ békulo kuke béwi ulu ɔmmɔ lɛlɔ. 9Amu na bekyuli bani ntɔ ku bani nkpɛ ƒui bése kalɔ baava taasu banii, "Yiidu! Ɔga Dawid Uwɔ ɔmmɔ ɔ́si ɔdubo o-o! Bimwi anwu ɔni ndubo na Blɔti lɛnyi kemo! Hosiana!" 10Uwi ɔni na Yesu úduo Yerusalem ni, nwuna lɛlɔ litemi lɛ́ƒɔ ɔma ɔmmɔ ƒui. Na bekyuli béye lɛlɔ banii, "Ɔma na ɔdi?" 11Na bekyuli bamba bédie kenye banini, "Ɔmɛni ndi Katɔti Kenye Udiene Yesu ɔni nási Nasaret na Galilea kalɔ lɛlɔ!" 12Yesu úsie útéduo Katɔti kakpakɔ na ɔ́gya bekyuli bani nkya mɔɔdi kuye na mmɔ ɔ́lɛku kaduli kammɔ kemo. Údi kasiakɔ kani lɛlɔ na bekyuli bani mɔɔvumana kɔlɔ bamba egulabi teete bekyuli mmɔ úbo. Na údi bani muuyé babloduma lɛnɔ eboku úbo. 13Na ɔ́su-ma ɔnini, "Bénweni na Bunweni Kedee Ɔku kemo ka Katɔti ɔ́su ɔnini, 'Badubɔlɔ mina kaduli banii kesii kani na badubɔkpali katɔ.' Nsu amii bíti-ka bínwini beyune kabɛkɔ!" 14Amu na badi béti banumbwɛne ku bani naaakana busie kaduɛ béboku kakpakɔ kaduli mmɔ, na Yesu ɔ́bwi-ma. 15Na ka bakpane benengu ku ɔda bubo ala batinane bánu akɔla ani na Yesu ɔdaku bɔbla ku banamu bani mɔɔva taasu banii, "Bimwi Ɔga Dawid Uwɔ" mmɔ ni, béti kɔnyi geen. 16Anwuɔsu béye Yesu banii, "Eenú lɛla lɛni na banamu bammɔ baasu mɛni?" Na Yesu údie kenye ɔnini, "Muunú. Na ngyi lɛnɔ ka bɛ́ka ɔmɛni na Bunweni Kedee Ɔku kemo ka ni, 'Ábla banamu ku bebiwɔ anii beti bumwi bɔni náƒɔ kuye geen bete-ɔ.' " 17Ɔmmɔ kama ni, Yesu ɔ́tɔlɔ bakpane benengu ku ɔda bubo ala batinane bammɔ kudɔ na úsie útéduo Betania útátɛ. 18Na kadi kégye ɔtanta ɔni na ɔ́sɔ únwini ɔdubo ni, kɔka kubo kɔɔda-nwu. 19Na ka ɔ́nu kɔdingyii kɔdi na ulu kudɔ mmɔ ni, údeyi úsie mmɔ. Nsu útanu lɛla lɛdi útetulo kuna evete. Anwuɔsu ɔ́su kugyii kɔmmɔ ɔnini, "Asɔ alanwu ebi adi kudii lɛnɔ." Kɔnakunwi ni, kɔdingyii kɔmmɔ kúse kalɔ kɔɔyɛyɛ. 20Ka batɛyane bammɔ bánu lɛni ni, kasusu kéƒu-ma. Na béye banini, "Bi náya na kɔdingyii kɔmɛni kúkpi kɔnakunwi lɛni?" 21Amu na Yesu údie kenye ɔnini, "Mɔɔsu-mii geen nnii si bɛ́ƒɔ bɛ́di na bina kasusu keeese inyɔ inyɔ ni, bɛdubɔkana lɛla lɛni na lɛ́bla kɔdingyii kɔmɛni bɔbla. Nsu ɔɔɔdi ɔmɛni lɛti. Mmomu ni, bɛdubɔkana na bɛsu kɔbi kɔmɛni muedi bɛnii, 'Gyu mɛni téduo ɛpu kemo,' na ɔdubɔlɛ lɛni. 22Na lɛla biala lɛni na bɛdubuye Katɔti na bɔƒɔtaadi kemo ni, bɛdubɔkɛ-ni." 23Amu na Yesu únwini úbo Katɔti kakpakɔ mmɔ. Na ka ɔɔtina ala ni, Katɔti bakpane benengu ku Yudaƒuɔ benengu bammɔ bébeye-nwu banii, "Kenyekɔ kamani na ebo asa na aabla ala amɛni udu? Na ɔma néte-ɔ kenyekɔ kammɔ?" 24Mmɔ na Yesu údie kenye ɔnini, "Bɛya na liye-mii lɛla lɛdi linu. Na si bídie kenye kaduɛ ni, asa masu-mii kenyekɔ kani na mbo asa na mɔɔbla ala amɛni. 25Wɛ na Yohane ɔ́kɛ kenyekɔ kani na ubo asa na ɔ́kpila bekyuli ntu ɔ́siku? Katɔti kudɔ na kási munuu ukyuli kudɔ na kási?" Amu na bése kalɔ beeye lɛlɔ teenu banii, "Bi na ɔlɛka bɔsu? Si bɔ́su bɔnii kási Katɔti kudɔ ni, ɔdubuye-bu ɔnii, 'Bi ɔsu na bítaƒɔ Yohane bítadi?' 26Nsu si bɔ́su bɔnii ukyuli kudɔ na ɔ́kɛ-ka ɔ́siku ni, bɔɔyia ka bekyuli badubɔbla-bu lɛla lɛdi, ɔsika bana ƒui báƒɔ bádi banii Katɔti kenye udiene na ɔdi." 27Anwuɔsu na bédie kenye banini, "Bɔɔɔgyi kesii kani na ɔ́kɛ kenyekɔ kammɔ ɔ́siku." Mmɔ na Yesu lɛnɔ ɔ́su-ma ɔnini, "Lɛni kani na ami lɛnɔ lɛɛɛdubo-mii bɔsu kenyekɔ kani mbo asa na mɔɔbla ala amɛni udu." 28"Dɛ na bɛɛkali taasiku litemi lɛmɛni lɛlɔ? Ɔnana ɔdi ɔ́kya na ubo bebi bananabi inyɔ. Ɔ́su unengudi ɔnini, 'Ubi, teesie tátuma na mina kemo ɔmwi.' 29"Amu na ubi ɔmmɔ údie ɔti ɔda ɔnii, 'Lɛɛɛdubo busie.' Nsu kama ni, ɔ́vumana kasusu na úsie. 30"Amu na ɔti úsie útásu ubidi unyɔdi lɛnɔ lɛni kani. Na anwu ɔ́tuna, nsu útesie. 31"Bana kemo ɔmani nábla ɔti ɔmmɔ lɛyɔla?" Bédie kenye banii, "Ubi unengudi ɔmmɔ." Amu na Yesu ɔ́su-ma ɔnini, "Mɔɔsu-mii nwaa nnii beyune ku bayalɛ baaví-mii teeduo Katɔ Ɔga Ɔma! 32Ntu Ɔkpilane Yohane úbo úbatina-mii ulu buni ɔni lɛlɔ na bɛsia, nsu bítaƒɔ-nwu bítadi. Nsu beyune ku bayalɛ ama báƒɔ bádi. Na ina ka bɛ́nu ɔmɛni muedi ni, bítavumana bina kasusu na bɛƒɔ-nwu bɛdi. 33"Binu lɛgba lɛbambadi lɛdi. Ukyuli ɔdi ɔ́kya dii ɔni mbo adingyii kemo kani na ɔ́tu awodu ɔ́mana. Ɔ́bla ntɛ kebulokɔ na ɔ́tu ɔgyumanane keliekɔ. Amu na úti kemo kamɛni úte bekyuli badi ɔnii bataanu-ka lɛlɔ, na ɔ́tɔlɔ úsie ulu. 34Uwi ɔni na egyiibi ammɔ édu bude ni, kemo ɔlati ɔmɛni ɔ́tala nwuna kabla bablane ɔnii batáƒɔ nwuna kadikɔ beboku-nwu. 35"Kemo lɛlɔ banune bamɛni béƒie kabla bablane bamɛni na bébo unwi na bádu unwi, na bébo unwi lɛnɔ atabi bádu. 36Amu na kemo ɔlati ɔmmɔ ɔ́sɔ ɔ́tala kabla bablane babambadi bani mmomo ntulo bedeedi. Na bábla ama lɛnɔ aani kalɛ na bábla bedeedi bammɔ. 37Kawɔlɔkɔ ni, ɔ́tala ubidi ɔlati ɔ́kya-ma. Na ɔ́su ɔnii, 'Lɛ́ƒɔ lɛ́di ka badubɔbu mina ubidi anwu.' 38"Nsu uwi ɔni na lɛlɔ banune bamɛni bánu ubidi ɔmɛni ni, básu lɛlɔ banini, 'Aanu kemo ɔlati ubidi ɔni ndi nwuna ala ɔdine. Bɛya na bɔdu-nwu na buƒie nwuna ala bɔƒɔ.' 39Anwuɔsu béƒie-nwu na bebo balɛku kemo kammɔ kemo, na bádu-nwu." 40Amu na Yesu úye-ma ɔnini, "Ɔƒɛni ni, bi na bɛɛbu ka kemo ɔlati ɔmmɔ ɔdubo kemo lɛlɔ banune bammɔ bɔbla si ɔ́si úbo?" 41Bédie kenye banini, "Ɔdubɔdu bekyuli bekpidi bammɔ ulikplu kemo na uti kemo kammɔ ute lɛlɔ banune babambadi bani ndubuti edula beboku-nwu si údu edula ɔƒɛwi." 42Na Yesu ɔ́su-ma ɔnini, "Bínu na Bunweni Kedee Ɔku kemo ka ni, 'Lɛtabi lɛni na batune béni báva banii lɛɛɛdia ni, ani mmomu nébenwini lɛtabi lɛni náƒɔ kuye litulo na atabi ƒui akɔ. Katɔti nábla lɛla bonwu lɛmɛni. Na lɛ́ƒɔ-bu anu geen!' " 43Amu na Yesu ɔ́sɔ ɔ́su-ma ɔnini, "Anwuɔsu mɔɔsu-mii nnii Katɔti ɔdubɔƒɔ nwuna lɛga kadikɔ kammɔ na bina kudɔ bileduo-ka! Na ɔdubuti ute bekyuli bamba bani ndubɔbla nwuna lɛyɔla. 44Na ukyuli biala ɔni mebuli mayu lɛtabi lɛni béni báva mmɔ lɛlɔ ni, ɔdubɔdu lɛlɔ. Na si lɛtabi lɛmmɔ lɛnɔ lɛ́lɛ líbo ɔdi lɛlɔ ni, lɛdubutu-nwu lɛbwɛ kpɛtɛ kpɛtɛ." 45Na ka bakpane benengu ku Ƒarisiƒuɔ bénu Yesu agba amɛni ni, báti ka ama na ɔda. 46Anwuɔsu báwia ka beƒie-nwu. Nsu baayia bekyuli pii bammɔ, ɔsika bana ƒui baabu Yesu aani Katɔti kenye udiene.

will be added

X\