MATEO 20

1"Katɔti lɛga bɔdi buse aani ɔmɛni kalɛ. Uwi ɔdi ni, ukyuli ɔdi ɔ́ta ɔtanta tutuutu ɔnii utáwia bekyuli badi na batuma nwuna kemo bete-nwu na limeyi lɛyuƒɔla kenye. 2Kemo ɔlati ku kabla bablane bénu lɛlɔ kalɔ ka badubɔƒɔ limeyi lɛyuƒɔla, na bátɔlɔ bésie-nwu kemo. 3"Uwi ɔni na úbo lɛdɔ yaalenwi ni, ɔnana ɔmmɔ ɔ́sɔ úsie kuyeya na útánu banana badi ka benye ukpludi. 4Anwuɔsu ɔ́su-ma ɔnini, 'Amii lɛnɔ biteesie mina kemo bitátuma na ndubɔƒɔ-mii kayu kani námanku bina kabla kammɔ.' 5Anwuɔsu bésie kemo kammɔ. "Na ɔ́sɔ úsie kuyeya mmɔ útábla lɛni kani lɛdɔ leevu-inyɔ ku lɛdɔ ɛtɛ kemo. 6Uwi ɔni na lɛdɔ ɛlɔ líbo ni, ɔ́sɔ úsie kuyeya mmɔ na útánu banana babambadi ka bénye mmɔ. Na úye-ma ɔnini, 'Bi nébo ɔsu na amii bilie mɛni ɔmwi limeyi limodi na bítabla kabla kadi?' 7"Bédie kenye banii, 'Ukyuli ɔdi útete-bu kabla kadi ɔnii bɔbla.' "Anwuɔsu ɔ́su-ma ɔnini, 'Amu biteesie mina kemo.' 8"Amu uwi ɔni na lɛdɔ ɛku líbo ni, kemo ɔlati ɔmmɔ ɔ́su batumane bammɔ lɛlɔ ɔnune ɔnini, 'Lɔ batumane bammɔ ƒui na aƒɔ-ma kayu. Na ese kalɔ asi bekyuli bekplodi lɛlɔ atálɛ bedeedi lɛlɔ.' 9"Amu na báƒɔ limeyi lɛyuƒɔla kayu béte bekyuli bani nébo useyi lɛdɔ ɛlɔ kemo. 10Na uwi ɔni na údu bani néesie ɔtanta lɛdɔ ɛku lɛlɔ ni, básusu banii ama badubɔkɛ betulo bana bakpana. Nsu ama lɛnɔ ɔdi biala ɔ́kɛ limeyi kenye lɛyuƒɔla. 11Na ka báƒɔ egulabi ammɔ ni, bése kalɔ baadɔnku kemo ɔlati ɔmmɔ banii, 12'Bekyuli bani nábla kabla ɔdɔ unwi ku abu bani nénye ɔƒɛ lɛlɔ limeyi limodi ƒui bɔ́ƒɔ lɛyuƒɔla linwi!' 13"Amu na kemo ɔlati ɔmmɔ ɔ́su-ma ɔnini, 'Bakpana, binu kalɔ. Ńtaƒiɔ-mii. Ami ku-mii ƒui búnu kalɔ bɔnii limeyi kenye kayu ndi bina lɛyuƒɔla. 14Anwuɔsu bɛƒɔ bina lɛyuƒɔla na biteesie kaduli. Mɔɔyɔ́ ka lite bekyuli bekplodi bamɛni lɛyuƒɔla lɛni kani na líte-mii. 15Mbo kuƒi na lɛblaku mina egulabi kalɛ na mɔɔyɔ́. Anwuɔsu ɔƒɛ utada-mii na mina lɛƒɔndia lɛlɔ.' " 16Amu na Yesu ɔ́wɔlɔ ɔnini, "Lɛni geen na bekyuli bani ntɔ badubɔvi bakpɛ kama, na bani nkpɛ kama bavi batɔ." 17Uwi ɔni na Yesu ku nwuna batɛyane bákɔ bésela Yerusalem ni, úti-ma úsienku kɔƒɛlɛ. 18Na ɔ́su-ma ɔnini, "Binu, búsela Yerusalem kesii kani na badubuti ami Ukyuli Ɔyawine Ubi bakya bakpane benengu ku ɔda bubo ala batinane enu kemo. Na badubɔdu-mi kukpi kɔtɔ. 19Na ama bani naaadi Yudaƒuɔ badubuti-mi babla lɛmala, na bebo-mi, na bakana-mi bamana ugyii lɛlɔ na likpi. Nsu emeyi atɛ kama ni, Katɔti ɔdubɔgyila-mi ɔlɛku bekpine akɔ." 20Amu na Sebedeo ulekudi útiku nwuna bebi inyɔ úsienku Yesu kudɔ ɔnii útevele-nwu kebunku. 21Na Yesu úye-ma ɔnini, "Bi na aawia?" Amu na uleku ɔmmɔ údie kenye ɔnini, "Mɔɔwia ka ese-mi kayi na si éduo ƒula lɛga kadikɔ na ete kuƒi na mina bebi bananabi inyɔ bamɛni belie ƒula kɔdianu kakɛ ku ƒula kɔmii kakɛ." 22Yesu ɔ́su-ma ɔnini, "Bɛɛɛgyi lɛla lɛni geen na biiye. Lɛbibo lɛni ndubo buti ni, amii lɛnɔ bɛdubɔkana-nya buti?" Amu na bedie kenye banii, "Ɛɛn, bɔdubɔkana." 23Mmɔ na Yesu ɔ́su-ma ɔnini, "Sɔsɔ na ɔdi ka bɛdubɔkana-nya buti. Nsu liiibo kuƒi ka lidie ukyuli ɔdi nnii ulie-mi kɔdianu ku kɔmii. Kuliekɔ kɔmɛni kuse kute bekyuli bani na mina ɔti ɔ́klibi-ku úse." 24Amu uwi ɔni na batɛyane leevu bakladi bénu ka banwani bammɔ baayɔ́ ka badi-ma lɛlɔ ni, béti kɔnyi geen! 25Anwuɔsu Yesu ɔ́lɔ-ma ɔ́sala na ɔ́su-ma ɔnini, "Bɛgyi ka lɛlɔ badine bani mɔɔdi bekyuli bani nátaƒɔ bátadi lɛlɔ ni, bebo ɔyikun biala na bana lɛlɔ. 26Nsu ɔɔɔdi lɛni na ɔlɛka use na amii baƒɔtaadine akɔ. Si bina akɔ ɔdi ɔɔyɔ́ ka ɔƒɔ lɛnyi ku ɔbu ni, ɔlɛka unwini kabla ɔblane ute bakladi. 27Na si bina akɔ ɔdi ɔɔyɔ́ ka ɔbla udeedi ni, ɔlɛka ɔbla lɛlɔ aani ukyuli uyedi ute bakladi ƒui. 28Lɛni na ami Ukyuli Ɔyawine Ubi lɛ́bla. Ńtebo nnii babla mina kabla. Mmomu líbo mbabla kabla na liti mina ngba lɛƒɔ bekyuli pii lili kayu." 29Uwi ɔni na Yesu ku nwuna batɛyane bátɔlɔ Yeriko ni, bekyuli pii badi basiaku-ma. 30Na banumbwɛne inyɔ badi belie ulu kudɔ na bénu ka Yesu ɔ́si ɔɔví. Amu na bése kalɔ baava banii, "Blɔti, Ɔga Dawid Uwɔ! Nu-bu kɔnyana!" 31Bekyuli bammɔ básu banumbwɛne bammɔ banii baba lɛsɛ. Nsu ni, báva momoomo bébu banii, "Blɔti, Ɔga Dawid Uwɔ! Nu-bu kɔnyana!" 32Yesu údi únye na ɔ́lɔ-ma úboku na úye-ma ɔnini, "Bi na bɛɛwia bɛnii mbla nte-mii?" 33Amu na bédie kenye banini, "Ati, bɔɔyɔ́ ka aya na butaanu." 34Amu na Yesu ɔ́nu-ma kɔnyana na útuku bana anumi. Na kɔnakunwi ni, bákana na baanu, na básiaku-nwu kama.

will be added

X\