MATEO 19

1Ka Yesu ɔ́su ala amɛni ƒui ɔ́wɔlɔ ni, ɔ́tɔlɔ Galilea na úsie Yudea kalɛkɛ na Yordan ketu ɔvi. 2Na bekyuli pii badi básiaku-nwu kama na ɔ́bwi-ma lɛlɛ na mmɔ. 3Amu na Ƒarisiƒuɔ badi bésie-nwu kudɔ banii bétéwi-nwu kenye benu. Na béye-nwu banini, "Mose ɔda bubo úte kuƒi ka ɔnana ɔsia kasusu biala lɛlɔ na ɔnyonu ulekudi?" 4Yesu údie kenye ɔnini, "Bítaka na Bunweni Kedee Ɔku kemo ka kalɔ kesekɔ ni, Katɔti údie ɔnana ku uleku? 5Na Katɔti ɔ́su ɔnini, 'Ɔmɛni ɔsu ni, ɔnana ɔdubɔda ɔti ku uni use na uti lɛlɔ utámana ulekudi na bana inyɔ babla ɔlɔna unwi.' 6Ɔmɛni ɔsu ni, basɔ baaadi nkyuli inyɔ. Mmomu bénwini ukyuli unwi. Anwuɔsu útalɛka ukyuli ugyingya lɛla lɛni na Katɔti úti ɔ́sala." 7Mmɔ na Ƒarisiƒuɔ bammɔ básu-nwu banii, "Amu na bi ɔsu na Mose úte kuƒi ɔnii ɔnana ute ulekudi ɔku ka ɔnyonu-nwu na udie-nwu ulu?" 8Yesu údie kenye ɔnini, "Mose úte-mii kuƒi ɔnii bɛnyonu bina beleku na bina atu ɔkplu ɔsu. Nsu ɔ́si kalɔ kesekɔ ni, na uuuse lɛni. 9Na ɔƒɛni ni, mɔɔsu-mii nnii si ɔnana ɔdi ɔ́nyonu ulekudi na ɔɔɔdi kɔsɔnɔ na ɔ́di asa na útéti uleku ɔbambadi ni, ɔ́di kɔsɔnɔ." 10Amu na Yesu batɛyane básu-nwu banini, "Si lɛni na kɔgya ku kule litemi lise ni, si ɔnana úteti uleku muedi ni, na ɔdia utulo." 11Na Yesu ɔ́su-ma ɔnini, "Ɔɔɔdi ukyuli biala ndubɔkana na ɔbla ala ani na bɛɛsu mɛni, amu ntu bekyuli bani na Katɔti úte-ma kani. 12Ɔsika lɛla lɛni ɔsu na banana beléti beleku lɛdanku kasusu lidu lidu. Badi ni, lɛni na báwɔ-ma. Na badi ama ni, bekyuli nábla-ma lɛni. Na badi lɛnɔ ni, beléti beleku ɔsika baawia ka belie ngba bataabla Katɔti lɛga bɔdi kabla ɔsu. Si bɛɛkana ni, bitaabla lɛla lɛni na lɛ́su mɛni." 13Bekyuli badi béti banamu béboku Yesu kudɔ banii uti enu ɔsia-ma lɛlɔ na ɔkpali katɔ ute-ma. Nsu ni, nwuna batɛyane bádɔnku bekyuli bammɔ. 14Amu na Yesu ɔ́su batɛyane bammɔ ɔnini, "Bɛya na banamu bammɔ bebo-mi kudɔ na bitetile-ma kuƒi. Ɔsika Katɔti lɛga kadikɔ kese kete bekyuli bani néboku lɛlɔ kalɔ aani banamu bamɛni udu kalɛ." 15Yesu úti nwuna enu ɔ́sia-ma lɛlɔ na ɔ́kpali katɔ úte-ma. Nwuna kama ni, ɔ́tɔlɔ. 16Na uwi bamba kemo ni, okloƒu ɔdi úbo Yesu kudɔ na úye-nwu ɔnini, "Ɔtinane, bi ndia na ɔlɛka lɛbla asa na Katɔti ute-mi ngba bɔni nsɔ naaadubo bɔsa kudii?" 17Amu na Yesu údie kenye ɔnini, "Lɛla lɛni ndia na ɔlɛka babla lɛlɔ litemi na eeye-mi? Katɔti lɛti pɛ ndia. Na si aayɔ́ anii Katɔti ute-ɔ ngba bɔni nsɔ naaadubo bɔsa kudii ni, di nwuna ɔda bubo ɔmmɔ lɛlɔ." 18Mmɔ na ɔnana ɔmmɔ úye-nwu ɔnini, "Ɔda bubo bɔmani?" Yesu ɔ́su-nwu ɔnini, "Tadu ukyuli, tadi kɔsɔnɔ, teyu, tada ƒula ukyulikpana kenye, 19bu ƒula ɔti ku ƒula uni, na ayɔ ƒula ukyulikpana aani ƒula lɛlɔ kalɛ." 20Amu na okloƒu ɔmɛni údie kenye ɔnini, "Lɛ́ɛdi ɔmmɔ ƒui lɛlɔ. Bi lɛnɔ násɔ ébu na lɛbla?" 21Yesu ɔ́su-nwu ɔnini, "Si aayɔ́ anii aabla sɛɛn awɔlɔ ƒui ni, sie na etéti ala ani ƒui na ébo eye. Na eti egulabi ammɔ ete bawabane, na adubɔkɛ lɛyuƒɔla na katɔ. Ɔmmɔ kama asa na ebo abasiaku-mi kama." 22Nsu ka okloƒu ɔmmɔ únu lɛla lɛmɛni ni, ebiti átada-nwu na ɔ́gyu ɔ́tɔlɔ, ɔsika ubo egulabi pii. 23Amu na Yesu ɔ́su nwuna batɛyane ɔnini, "Mɔɔsu-mii nwaa nnii ɔdubɔyu balakɛne ɔkplu asa na beduo Katɔti lɛga kadikɔ. 24Nsɔ mɔɔsia kama lɛsu-mii nnii úse ubo ɔlakɛne ɔkplu geen asa na wakana na weduo Katɔti lɛga kadikɔ utulo kalɛ na ebuo ɔni nébomo utulo ƒui ɔvi udila liƒi." 25Uwi ɔni na batɛyane bammɔ bénu ɔmɛni ni, ɔ́bla-ma dɛye dɛye. Anwuɔsu béye banii, "Amu si use lɛni ni, ɔma ndubɔkana na ɔkɛ ngba bɔni nsɔ naaadubo bɔsa kudii?" 26Amu na Yesu ɔ́nu-ma anumi na ɔ́su-ma ɔnini, "Ɔyawine biala ulakana ɔmɛni bɔbla. Nsu Katɔti anwu ni, ɔɔkana lɛla biala bɔbla." 27Amu na Petro ɔ́su-nwu ɔnini, "Nu! Bɔ́da lɛla lɛdi biala búse na bɔsiaku-ɔ kama. Bi na bɔdubo bɔkɛ?" 28Yesu ɔ́su-ma ɔnini, "Amii bɛkɛ kayi. Uwi ɔni na ami Ukyuli Ɔyawine Ubi mebo na mina lɛlɔyɔ kemo na nlie mina lɛgaboku lɛlɔ na kayawi kawɔdi kammɔ kemo ni, bina leevu-inyɔ bani nsiaku-mi lɛnɔ bɛdubulie agaboku lɛlɔ na bɛdi Israelƒuɔ adukpa leevu-inyɔ lɛlɔ. 29Na ukyuli biala ɔni néni nwuna kaduli iye banwani bananabi iye banwani belekubi iye uni iye bebi iye imo ka ɔsiaku-mi ɔsu ni, ɔdubɔkɛ-nya akpa eti anyɔ utulo. Na Katɔti ɔdubute-nwu ngba bɔni nsɔ naaadubo bɔsa kudii. 30Nsu ni, bekyuli pii bani ntɔ ɔƒɛni ni, badubɔvi bakpɛ kama. Na bani nkpɛ kama ɔƒɛni ni, badubɔvi batɔ."

will be added

X\