MATEO 18

1Uwi klukui ɔdi kama ni, batɛyane bammɔ bébo Yesu kudɔ na bébeye-nwu banii, "Ɔma náƒɔ kuye utulo na Katɔ Ɔga Ɔma?" 2Amu na Yesu ɔ́lɔ ɔnamu blii suɛ ɔdi úbenyene-ma anumi. 3Na ɔ́su-ma ɔnini, "Mɔɔsu-mii nnii si bítavumana udu na binwini aani banamu ni, bileduo Katɔ Ɔga Ɔma kudii. 4Ukyuli ɔni náƒɔ kuye utulo ƒui na Katɔ Ɔga Ɔma ni, anwu ndi ukyuli ɔni néboku lɛlɔ kalɔ na únwini aani ɔnamu ɔmɛni udu. 5"Na ukyuli ɔni maƒɔ ɔnamu blii suɛ aani ɔmɛni udu na mina lɛnyi kemo ni, ɔ́ƒɔ ami lɛnɔ. 6Nsu si ukyuli ɔdi ɔ́ya na banamu bamɛni akɔ ɔdi únwini kama ɔ́kya nwuna bɔƒɔtaadi na mina lɛlɔ ni, Katɔti ɔdubɔni-nwu kɔtu geen utulo si béti kukɔ bonwu báƒala-nwu ɔkwɛ na bátányina-nwu ɛpu kemo. 7"Bɔbwɛ muute kayawi ɔsika ala adi akya-ka kemo ani ndubɔya na bekyuli benwini kama bakya bana bɔƒɔtaadi na mina lɛlɔ. Ala ammɔ udu adubo bɔkya uwi biala bɔdi. Nsu ukyuli ɔni lɛlɔ na ala amɛni adubɔsia eduo bekyuli akɔ ni, bɔbwɛ ndi anwu ɔdi. 8Anwuɔsu si ƒula kɔnu iye ƒula ɔgba mɔɔyá na aabla likpidi ni, kulo-ku vaakun. Ɔdia ute-ɔ si ebo kɔnu kunwi iye ɔgba unwi na ákɛ ngba ƒui utulo ka ebo enu ku lɛgba na Katɔti uti-ɔ ɔkya lɛgyavonku kemo. 9Na si ƒula lɛnumi mɔɔyá-a na aabla likpidi ni, die-ni vaakun. Ɔdia ute-ɔ si ebo lɛnumi linwi na akɛ ngba ƒui kemo utulo ka Katɔti uti-ɔ utákya lɛgyavonku kemo. 10"Bɛnu kaduɛ kalɛ na bilanu banamu wɛlɛ wɛlɛ bamɛni ɔdi bɛnii ɔɔɔdi lɛla lɛdi na bina akɔ. Ɔsika mɔɔsu-mii nwaa nnii bebo Katɔti batu bani nnye mina Ɔti anumi na katɔ uwi biala. 11Ɔsika Ukyuli Ɔyawine Ubi úbo ɔnii ubaƒɔ bekyuli bani náyii ngba geen ulu ɔmmɔ. 12"Si ukyuli ɔdi ubo baƒonu eti anyɔ na kunwi kɔ́yii ni, lɛla lɛni na ɔdubo bɔbla ndi ka ɔdubɔda liti ku aavlene-yaalenwi bammɔ unyene kɔbi kaƒɔna mmɔ na bataadi. Na usie utáwia unwi ɔni náyii mmɔ. 13Na mɔɔsu-mii nnii si ɔ́nu-ku ni, lɛlɔ lɛdubɔyɔ-nwu na kuna lɛlɔ utulo baƒonu liti ku aavlene-yaalenwi bani nátayii mmɔ lɛlɔ. 14Lɛni kani na bina ɔti ɔni nkya katɔ ulawia ka banamu wɛlɛ wɛlɛ bamɛni ɔdi ɔyii. 15"Si ɔƒɔtaadine ɔkpana ɔ́ƒiɔ-ɔ ni, sie-nwu kudɔ na etédie atina-nwu ka ɔ́ƒiɔ-ɔ. Na ya na ɔmɛni ɔbla bina inyɔ ntɛ lɛti kɔtɛ. Si únu kalɔ ni, awɔ ku-nwu bɛsɔ bilie kɔnwa ku kɔnwa. 16Nsu si útenu lɛlɔ kalɔ ni, ya na ukyuli unwi iye ɛlɛɛ benuku-ɔ litemi lɛmmɔ aani kalɛ na bénweni na Bunweni Kedee Ɔku kemo ka akɛ nkyuli inyɔ iye ɛtɛ na benye-ɔ litemi kama. 17Na si mmɔ lɛnɔ útenu kalɔ ni, ya na baƒɔtaadine lɛkpa lɛmmɔ bati. Na si mmɔ lɛnɔ útenu lɛlɔ kalɔ ni, die-nwu atu aani ukyuli ɔni na útaƒɔ útadi iye likpidi ɔblane ɔni na útenwini kayi. 18"Anwuɔsu mɔɔsu bina ƒui nnii lɛla lɛni lɛlɔ na bitile kuƒi na kayawi mɛni ni, Katɔti ɔdubɔsia-ni kɔnu. Na lɛla lɛni lɛlɔ na bite kuƒi na kayawi mɛni ni, Katɔti ɔdubɔsia-ni kɔnu lɛnɔ. 19"Na nsɔ mɔɔsu-mii lɛnɔ nnii si bina inyɔ bɛ́bla kenye kenwi na kayawi mɛni na bɛ́sala bivele lɛla lɛdi ni, mina ɔti ɔni nkya katɔ ɔdubɔbla-ni ute-mii. 20Ɔsika kesii kani na nkyuli inyɔ iye ɛtɛ bása na mina lɛnyi kemo ni, ami lɛnɔ nkya-ma akɔ." 21Amu na Petro ɔ́kpɛ úde Yesu na úye-nwu ɔnini, "Blɔti, si mina ɔƒɔtaadine ɔkpana ɔɔƒiɔ́-mii ni, kɔlɛ na ɔdi ka liti lɛkyiɛ-nwu? Liti lɛkyiɛ-nwu laa maatɛ?" 22Yesu ɔ́su-nwu ɔnini, "Ɔɔɔdi maatɛ kani! Mmomu liti ku aavlanyɔ akpa maatɛ na ɔlɛka eti akyiɛ-nwu. 23"Ɔmɛni ɔsu na Katɔti lɛga bɔdi buse aani ɔga ɔni náwia ka ɔbuku nwuna bekyuli bani mɔɔbla-nwu kabla akunta. 24Uwi ɔni na úse kalɔ kani na béti ɔnana ɔdi ɔni nda-nwu lɛlakɛ bonwu kayu béboku. 25Na ka ɔnana ɔmmɔ uuubo lɛla lɛni na ɔkana kayu kammɔ bɔƒɔ ɔsu ni, ɔga ɔmmɔ údie lɛdi ɔnii beti anwu ku ulekudi ku nwuna bebi ku ala ani ƒui na ubo beye na baƒɔ kayu kammɔ. 26"Mmɔ na ɔnana ɔmɛni ɔ́lɛ ɔga ɔmmɔ akɔnkɔ kalɔ na úvele-nwu ɔnini, 'Kɛku-mi kayi na ndubɔƒɔ-ɔ kana ƒui!' 27Ɔnana ɔmmɔ lɛlɔ lɛ́kywi ɔga ɔmmɔ kaƒɔ, anwuɔsu úti kayu kammɔ ƒui ɔ́kyiɛ-nwu na ɔ́nyonu-nwu na ɔ́tɔlɔ. 28"Amu ka ɔnana ɔmɛni ɔ́lɛ ni, útánu nwuna ɔblane ɔkpana ɔni nda-nwu abuli atɛ lɛyuƒɔla. Amu na úƒie-nwu na ɔ́da-nwu limɔ ɔ́mana momoomo na ɔ́su-nwu ɔnini, 'Ƒɔ-mi kayu kani na ada-mi!' 29"Na nwuna ɔkpana ɔmmɔ úvele-nwu ɔnini, 'Kɛku-mi kayi na ndubɔƒɔ-ɔ kana ƒui!' 30"Nsu úbulo na ɔ́ya na bákya-nwu ɔtɔ watálɛ uwi ɔni na wakana kayu kammɔ ƒui bɔƒɔ. 31Na ka nwuna kabla bablane bakpana bánu lɛla lɛni nálɛ ni, kasusu kékpoku-ma na bésie bátásu ɔga ɔmmɔ ala ani ƒui nébo. 32"Anwuɔsu ɔga ɔmmɔ ɔ́tala na bátálɔ kabla ɔblane ɔmmɔ béboku na ɔ́su-nwu ɔnini, 'Ukyuli ukpidi na adi. Ka évele-mi anii nti nkyiɛ-ɔ ni, líti lɛla lɛdi biala lɛ́kyiɛ-ɔ. 33Lɛni kani na ɔdi ka awɔ lɛnɔ anu ƒula ɔkpana kɔnyana aani kalɛ na lɛ́nu-ɔ kɔnyana.' 34Na ɔga ɔmmɔ ɔ́kɛ kɔnyi geen na úti-nwu úte ɔnii bakya-nwu ɔtɔ na bani-nwu kɔtu utédu uwi ɔni na waƒɔ kayu kammɔ ƒui." 35Amu na Yesu ɔ́wɔlɔ kɔtɛ kɔmmɔ ɔnini, "Lɛni kani na mina Ɔti ɔni nkya katɔ ɔdubɔbla bina akɔ ɔdi biala si biléti taakyiɛ bina baƒɔtaadine bakpana ɔ́si bina kayi kemo ƒui."

will be added

X\