MATEO 17

1Emeyi aku kama ni, Yesu útiku Petro ku Yakobo ku ɔnwani Yohane úsienku kɔbi kɔdi nákuku lili. Na bátákya mmɔ ama lɛti. 2Ɔƒɛni ka baanu ni, kavumana kadi kébo Yesu lɛlɔ. Nwuna anumi eekeye aani ɔƒɛ, na nwuna adala lɛnɔ eekeye na aatu anumi. 3Amu na batɛyane ɛtɛ bamɛni bánu Mose ku Elia ka baatɛmiku Yesu. 4Na Petro ɔ́su Yesu ɔnini, "Blɔti, ɔdia si bɔ́sɔ bɔkya mɛni! Si átuna ni, ndubɔtu nvo ɛtɛ. Ƒula kadi kenwi ku Mose kadi kenwi ku Elia lɛnɔ kadi kenwi." 5Uwi ɔni na ɔɔsu ɔmɛni ni, uyɔlɔ ɔni muukeye úbewi-ma lɛlɔ. Na bénu Katɔti lɛdi na uyɔlɔ ɔmmɔ kemo na lɛ́su lɛnini, "Ɔmɛni ndi mina ubi ɔyɔne unwi pɛ ɔni mɔɔƒɔ́-mi anu geen. Binu-nwu litemi." 6Uwi ɔni na batɛyane ɛtɛ bamɛni bénu lɛdi lɛmɛni ni, liƒu lɛ́da-ma geen na báyu bébi kalɔ. 7Yesu úbo-ma kudɔ na úbetuku-ma na ɔ́su-ma ɔnii, "Bɛta binye. Bɛsɔ bitayia." 8Amu ka bákɔliku anumi katɔ ni, bátanu ukyuli ɔdi ntu Yesu kani. 9Na ka bási baayu kɔbi kɔmmɔ lɛlɔ ni, Yesu úbo-ma ɔda ɔnini, "Bitasu ukyuli ɔdi lɛla lɛni bɛ́nu mɛni wetédu uwi ɔni na ami Ukyuli Ɔyawine Ubi mata malɛ bekpine akɔ." 10Amu na batɛyane bammɔ béye Yesu banii, "Bi ɔsu na ɔda bubo ala batinane baasu banii ɔlɛka Elia ɔka bubo asa na ala amɛni abalɛ?" 11Yesu údie kenye ɔnini, "Sɔsɔ na ɔdi ka Elia ɔka bubo na ubaklibi lɛla biala use. 12Nsu mɔɔsu-mii nnii Elia úubo, nsu bekyuli bátanu-nwu bátati. Na bábla-nwu kalala kalɛ na baayɔ́. Lɛni kani na badubɔbla ami Ukyuli Ɔyawine Ubi lɛnɔ kalala." 13Mmɔ na batɛyane bammɔ báti ka Ntu Ɔkpilane Yohane na ɔda. 14Uwi ɔni na Yesu ku nwuna batɛyane báyu bébo bekyuli pii bammɔ kudɔ ni, ɔnana ɔdi úbo Yesu kudɔ na úbalɛ-nwu akɔnkɔ kalɔ. 15Na ɔ́su-nwu ɔnini, "Ati, nu mina ubi ɔnanabi ɔmɛni kɔnyana. Uuƒi kalɛteebo na uubó abi geen. Uwi pii ni, uubuli teeduo ɔgya kemo ku ntu kemo lɛnɔ. 16Líti-nwu líboku ƒula batɛyane, nsu bátakana na babwi-nwu." 17Amu na Yesu údie kenye ɔnini, "Amii, ɔmwi limeyi bekyuli, bi ɔsu na bilaƒɔ-mi taadi na bɛɛyu atu ɔkplu? Uwi ɛlɛ sɔɔn na ndubɔkɛku-mii kayi? Naaakana na makya-mii kudɔ uwi biala! Biti ɔnamu ɔmmɔ biboku-mi mɛni!" 18Amu na Yesu ɔ́bɔku kɔyu kukpidi kɔni nli ɔnamu ɔmmɔ lɛlɔ kemo na kɔ́lɛ! Na ɔlɛ ɔmmɔ ɔ́ba-nwu kɔnakunwi. 19Amu na batɛyane bammɔ bébo Yesu kudɔ na bébeye-nwu banii, "Bi ɔsu na bútakana kɔyu kukpidi kɔmmɔ bɔbɔku bɔlɛku?" 20Yesu údie kenye ɔnini, "Bina bɔƒɔtaadi na mina lɛlɔ bɔ́sɔ. Mɔɔsu-mii nwaa nnii si banii bibo bɔƒɔtaadi bɔni nse aani edula kebi kebliidi ƒui ni, nka bɛdubɔkana na bɛsu kɔbi kɔmɛni bɛnii, 'Gyu mɛni, ténye ngye!' Na kɔdubusie. Lɛla biala liiibo na bilakana bɔbla! 21Nsu amu ntu aakpali katɔ na elie kɔka asa na adubɔkana na abɔku kɔyu kukpidi kɔmɛni udu alɛku." 22Uwi ɔni na batɛyane bammɔ ƒui bábasa na Galilea ni, Yesu ɔ́su-ma ɔnini, "Badubo ami Ukyuli Ɔyawine Ubi buti bɔkya bekyuli enu kemo, 23na badu-mi. Na emeyi atɛ kama ni, Katɔti ɔdubɔgyila-mi ɔsiku bekpine akɔ." Mmɔ ni, batɛyane bammɔ enu áƒɛ-ma. 24Uwi ɔni na Yesu ku nwuna batɛyane bébo bébeduo Kapernaum ni, Yudaƒuɔ kakpakɔ kuyi baƒɔne bébeye Petro banii, "Bina ala ɔtinane lɛnɔ uuyi kakpakɔ kuyi kɔmmɔ?" 25Petro údie kenye ɔnii, "Uuyi nii!" Amu ka Petro útéduo bana kaduli ni, mmɔ kani na Yesu ɔ́ka-nwu buye ɔnini, "Simon, bi ndi ƒula kasusu? Ɔma bene na ɔlɛka baƒɔ kuyi bete baga na kayawi kamɛni? Kalɔ kammɔ bekyuli munuu baƒɔ?" 26Na Petro údie kenye ɔnini, "Baƒɔ." Amu na Yesu údie kenye ɔnini, "Ɔmɛni ɔɔtina ka kalɔ kammɔ bekyuli ama útalɛka baƒɔ ɔdi. 27Nsu ka bulayɔ bɔnii bɔɔƒiɔ́ ukyuli ɔdi ɔsu ni, teesie ɛpu kɔtu na atátu ɔdaa. Na kabɛ kedeedi kani na adubɔni alɛku ni, adubɔnu ligulabi lɛdi na nwuna kenye lɛni ndubudu ami ku-ɔ kakpakɔ kuyi bɔƒɔ. Die-ni, na atáƒɔ-ma bula kuyi kayu."

will be added

X\