MATEO 16

1Ƒarisiƒuɔ ku Sadukiƒuɔ badi bésie Yesu kudɔ banii betéwi-nwu kenye benu. Anwuɔsu básu-nwu banii, "Bla akɔla adi na bɔnu bɔti nwaa ka Katɔti kudɔ na ási sɔsɔ." 2Nsu Yesu údie kenye ɔnini, "Si ɔƒɛ úsela kanukɔ na kayaa kégyie ni, bɛɛsu bɛnii kadi kadubo bɔdia kɔnaadi. 3Na ɔtanta tutuutu si ɔƒɛ ɔ́tu ɔdubo na kadi kese suu ni, bɛɛsu bɛnii ɔnantu ɔdubo bɔna. Bɛɛkana na bɛɛtí kalɛ na kadi kadubo buse si bɛ́nu kayaa. Nsu bilákana na bɛnu ala ani mɔɔtina uwi ɔni na Ukyuli Ɔƒunadi ɔmmɔ ɔdububo bɛti! 4Amii, ɔmwi limeyi bekyuli bekpidi bani mɔɔlɛ́ Katɔti kama ni, bɛɛwia ka lɛbla akɔla budie taatina na bɛnu. Nsu naaabla! Akɔla budie taatina ani kani na bɛdubɔnu ndi ani nálɛ na Yona lɛlɔ." Anwuɔsu ɔ́gyu ɔ́tɔlɔ-ma kudɔ. 5Amu na batɛyane bammɔ ku Yesu béti ɔkɔlɔ ɔdi na bávia bésie ɛpu ɔmmɔ ɔvi. Ka bédu mmɔ ni, bánu ka báyiƒla na béteti adila adi baaada. 6Mmɔ na Yesu ɔ́su-ma ɔnini, "Bɛnu kaduɛ na Ƒarisiƒuɔ ku Sadukiƒuɔ bɔnyii bɔni baakya ala kemo na uuƒu lɛlɔ." 7Amu na bése kalɔ beeye lɛlɔ banii, "Ɔni na búteti adila adi bɔɔɔda ɔsu na ɔɔsu ɔmɛni?" 8Na ka Yesu ɔ́ti lɛla lɛni baasu ɔsu ni, úye-ma ɔnini, "Bi ɔsu na bɛɛtɛmiku lɛlɔ ɔ́si adila ani na bɛɛɛda ɔsu? Bina bɔƒɔtaadi na mina lɛlɔ bɔ́sɔ. Útabla-mii tɔ nwaa? 9Bilényimo kalɛ na líti bodobodo ɛlɔ líte banana mpimu ɛlɔ na bádi bémo ku kɔgyigyɛ ɛlɛ kɔni na kɔkɛ kɔmmɔ kúyi? 10Na bodobodo maatɛ ɔni na líti líte banana mpimu ine nɔɔ? Bilényimo kɔgyigyɛ ɛlɛ kɔni na kɔkɛ kɔmmɔ kúyi? 11Dɛ na ɔ́bla na bilenu kalɔ bɛnii ɔɔɔdi adila lɛlɔ litemi na mɔɔsu uwi ɔni na lɛ́su nnii, 'Bɛnu kaduɛ na Ƒarisiƒuɔ ku Sadukiƒuɔ bɔnyii bɔni baakya ala kemo na uuƒu lɛlɔ'?" 12Mmɔ asa na ɔ́bla batalane bammɔ nwaa ka ɔɔɔdi bɔnyii bɔni baakya ala kemo na uuƒu lɛlɔ ɔda na uubó-ma. Mmomu ni, ala ani na Ƒarisiƒuɔ ku Sadukiƒuɔ baatina na ɔda. 13Yesu ku nwuna batɛyane bésie kalɛkɛ kani nde Kaesarea Ƒilipi amadɔ. Mmɔ na úye nwuna batɛyane ɔnini, "Ɔma na bekyuli baasu banii ami Ukyuli Ɔyawine Ubi ndi?" 14Bédie kenye banii, "Badi banii awɔ ndi Ntu Ɔkpilane Yohane. Na badi lɛnɔ banii awɔ ndi Katɔti Kenye Udiene Elia. Na babambadi lɛnɔ baasu banii awɔ ndi Yeremia iye Katɔti kenye bediene bammɔ akɔ ɔbambadi ɔdi." 15Amu na Yesu úye-ma ɔnini, "Na amii nɔɔ? Ɔma na bɛɛsu ka ami ndi?" 16Mmɔ na Simon Petro údie kenye ɔnini, "Awɔ ndi Ukyuli Ɔƒunadi ɔmmɔ. Na adi Katɔti ɔni nli ngba uwi ƒui Ubidi." 17Amu na Yesu údie kenye ɔnini, "Lɛlɔ litaayɔ awɔ, Simon, Yona ubidi. Ɔsika ɔɔɔdi ɔyawine nédie litemi geen lɛmɛni ɔ́tina-a. Mmomu mina Ɔti ɔni nkya katɔ nédie ɔ́tina-a. 18Anwuɔsu mɔɔsu-ɔ ka awɔ ndi Petro ɔni kalɔ ndi lɛtakpɛ. Na lɛtakpɛ lɛmɛni lɛlɔ na ndubuti mina baƒɔtaadine lɛtu linyine aani ɔtɔ kalɛ. Na kukpi ɔyikun muedi ulakana-ma lɛlɔ bɔdi. 19Na ndubuti Katɔti lɛga bɔdi ɔyikun lite-ɔ. Na lɛla lɛni na bɛdubɔƒɛnimi na kalɔ lɛlɔ ni, Katɔti ɔdubɔsia-ni kɔnu. Na lɛla lɛni na bɛdubɔnyonu na kalɔ lɛlɔ ni, Katɔti ɔdubɔsia ani lɛnɔ kɔnu." 20Amu na Yesu úbo nwuna batɛyane ɔda ɔnii, "Bitasu ukyuli ɔdi bɛnii ami ndi Ukyuli Ɔƒunadi ɔmmɔ." 21Ɔ́si uwi ɔmmɔ kemo ni, Yesu úse kalɔ ɔɔsu nwuna batɛyane bammɔ nwaa ɔnii, "Ɔlɛka lisie Yerusalem na ntébo abi na kadi benengu ku bakpane benengu ku ɔda bubo ala batinane enu kemo. Badubɔdu-mi. Nsu limeyi lɛtɛdi lɛlɔ ni, Katɔti ɔdubɔgyila-mi ɔlɛku kekpine na nsɔ mbelie ngba." 22Petro ɔ́da-nwu úsienku kɔmadɔ na ɔ́dɔnku-nwu. Na ɔ́su-nwu ɔnini, "Pɛ kuse Blɔti! Tuo lisuo lɛmmɔ wiakun! Ɔmmɔ utebo-ɔ lɛlɔ kudii!" 23Yesu únwini kɔnakunwi ɔ́su Petro ɔnini, "Satan! Gyu tɔlɔ-mi lɛlɔ! Éti lɛlɔ eenwíni ukisine na mina lɛlɔ. Aayɔ́ akpanku-mi atákya likpidi kemo! Kasusu kani na éti mɛni kátasi Katɔti kudɔ. Mmomu bekyuli kasusu kadi." 24Amu na Yesu ɔ́su nwuna batɛyane ɔnini, "Si ukyuli ɔdi ɔɔwia ka ɔsiaku-mi kama ni, ɔlɛka udie nwuna lɛlɔ atu na ubo abi na ɔsiaku-mi kama. 25Ukyuli biala ɔni mɔɔwia ka ɔƒɔ nwuna lili ngba ute lɛlɔ ni, ɔdubɔyila-mu. Na ukyuli biala ɔni nányonu nwuna ngba ka ɔsiaku-mi kama ni, ɔdubɔkɛ ngba geen. 26Bi kɔsia na ukyuli ɔdubɔkɛ si ɔ́kɛ kayawi ala ƒui na ɔ́yila ngba geen bɔmmɔ. Munuu bi na ukyuli ubo na uti ɔvumana na ɔkɛ ngba geen bɔmmɔ? 27Ɔsika ami ɔni ndi Ukyuli Ɔyawine Ubi ndububo ku Katɔti batu na Katɔti ɔyikun kemo. Na ndubɔƒɔ ukyuli biala kayu na nwuna kabla kenye. 28Mɔɔsu-mii nwaa ka ni, bekyuli badi bakya mɛni ɔni na belekpi watálɛ uwi ɔni na bánu ka Ukyuli Ɔyawine Ubi úbo aani ɔga kalɛ."

will be added

X\