MATEO 15

1Amu na Ƒarisiƒuɔ badi ku ɔda bubo ala batinane badi bási Yerusalem bébo Yesu kudɔ na bébeye-nwu banii, 2"Bi ɔsu na ƒula batɛyane balásiaku bula bati kuuku ɔda bubo kama? Baláƒɔ bana enu kalɛ na bula ɔdi ɔɔtina asa na baadi." 3Yesu údie kenye ɔnini, "Na bi ɔsu na biiní na biládi Katɔti ɔda bubo lɛlɔ na bɛsiaku bina bati kuuku ala bɔtina kama? 4Katɔti ɔnini, 'Bu ƒula ɔti ku ƒula uni. Na ukyuli ɔni mɔɔlɔ ɔti iye uni lɛnyikpi lɛdi ni, ɔlɛka badu-nwu kukpi kɔtɔ.' 5Nsu bɛɛtina ka ukyuli ɔdi ɔni mbo lɛla lɛni na ɔkana na uti ubunku ɔti iye uni nsu ɔ́su ɔnii, 'Líti lɛla lɛmɛni líse kenye lite Katɔti' ni, 6ɔ́kɛ kenyekɔ kalɛ na uni na ulabu na ulebunku nwuna bawɔne lɛnɔ. Ulu ɔmɛni lɛlɔ na bɛɛsia teeni Katɔti ɔda bubo kalɛ na bɛsia bina bati bammɔ ala bɔtina kama. 7Amii anumi lɛlɔ bekyuli! Lɛla lɛni na Katɔti Kenye Udiene Yesaia ɔ́su úse líbo líte lɛni na bina lɛlɔ geen. 8Katɔti ɔnini, 'Bekyuli bamɛni bada bana kenye kani baabu-mi, nsu balayɔ-mi na bana kayi kemo. 9Keeke kani na baabla-mi kabla. Baatina kayawi lɛlɔ ala aani si mina ɔda bubo bɔdi.' " 10Amu na Yesu ɔ́lɔ bekyuli pii bammɔ úboku nwuna kudɔ na ɔ́su-ma ɔnini, "Bise atu na binu ɔmɛni biti bɛtɛya lɛla. 11Adila ani muuduo ukyuli kaƒɔ ni, ɔɔɔdi anya mɔɔyá na uusé lɛlɔ. Mmomu etemila ani mɔɔlɛ́ taasi-nwu kenye kemo mɔɔyá na uusé lɛlɔ." 12Amu na nwuna batɛyane bammɔ bébo-nwu kudɔ na bábasu-nwu banini, "Agyi ka ala ani na ásu mɛni éduo Ƒarisiƒuɔ bammɔ geen?" 13Yesu údie kenye ɔnini, "Mina ɔti ɔni nkya katɔ ɔdubɔgyu kugyii biala na útalɛ ɔvaakun. 14Anwuɔsu bitakpete-ma. Bese aani banumbwɛne bani mɔɔtɔnku banumbwɛne bamba. Na si ɔnumbwɛne ɔtɔnku nwuna ɔkpana ɔnumbwɛne ni, bana inyɔ ƒui badubɔnu beduo ubu kemo." 15Petro ɔ́su-nwu ɔnini, "Die adila ani muusé lɛlɔ lɛgba lɛmɛni kalɔ tina-bu." 16Na Yesu ɔ́su-ma ɔnini, "Ɔmua use amii lɛnɔ susuusu aani bana kalɛ kani? 17Binu ɔmɛni kalɔ ka ni, lɛla ndi lɛla lɛni muuduo ukyuli kenye kemo ni, liiduo kaƒɔ kemo. Na kama ni, uudie-ni teewiakun. 18Nsu ni, etemila ani mɔɔlɛ́ kenye kemo ni, ási kayi kemo. Na anya mɔɔyá na ukyuli uusé lɛlɔ. 19Na kasusu kekpidi kani mɔɔyá na bekyuli baadú bekyuli, na baadi kɔsɔnɔ, na baabla lɛyalɛ ala, na beeyú, na baadá bekyuli kenye, na baalɔ bekyuli anyikpi ni, ana ƒui aasí kayi kemo. 20Ala amɛni udu mɔɔyá na ukyuli uusé lɛlɔ. Nsu si ukyuli ɔdi útaƒɔ kɔnu aani kalɛ na Ƒarisiƒuɔ baatina kalɛ asa na ɔ́di ni, ɔmmɔ ulaya na uusé lɛlɔ." 21Yesu ɔ́si mmɔ na úsie kalɛkɛ kani nde lɛma linengudi lɛni ndi Tiro ku Sidon. 22Mmɔ ni, kalɛkɛ kammɔ uleku úbo Yesu kudɔ. Na úvele-nwu ɔnini, "Blɔti, Ɔga Dawid Uwɔ, nu-mi kɔnyana! Kɔyu kukpidi kɔdi kuukpóku mina ubi ulekubi na uubó abi geen!" 23Nsu Yesu útakpete-nwu. Amu na nwuna batɛyane bébo bábasu-nwu banini, "Bɔku-nwu, ɔsika ɔsiaku-bu uutile-bu atu." 24Amu na Yesu údie kenye ɔnini, "Israelƒuɔ bese aani baƒonu bani náyii kalɛ. Na bana kudɔ kani na Katɔti ɔ́tala-mi." 25Mmɔ na uleku ɔmɛni ɔ́lɛ-nwu akɔnkɔ kalɔ na úvele-nwu ɔnini, "Ati, bunku-mi." 26Yesu údie kenye ɔnini, "Ɔɔɔdia ka beti bebi adila bebo bewi bana bakpɛwe." 27Uleku ɔmmɔ údie kenye ɔnini, "Ati, sɔsɔ na ɔdi. Nsu bakpɛwe lɛnɔ baadi adila kɔkɛ kɔni mɔɔsí bana unwoti kadikɔ teewi kalɔ." 28Mmɔ na Yesu údie kenye ɔ́su-nwu ɔnini, "Adi uleku ɔni náƒɔ ɔ́di geen! Ákɛ lɛla lɛni na aawia." Anwuɔsu uwi ɔmmɔ kemo kani ni, ubidi ulekubi ɔmmɔ ɔlɛ ɔ́ba-nwu. 29Yesu ɔ́tɔlɔ mmɔ na ɔkɛ Galilea Ɛpu ɔmmɔ kɔtu útákɔ lɛbinkpo lɛdi na ɔ́yu úlie kalɔ. 30Bekyuli pii bébo-nwu kudɔ na badanku balɛne bani ndi bekyuli bani náƒɛ béwi kalɔ ku bani na lɛlɔ ekpo átasa-ma ku banumbwɛne ku bamumu ku bani muuƒi lɛlɛ bamba ƒui bébewi Yesu anumi na ɔ́bwi-ma. 31Ɔni na bekyuli bammɔ bánu ka bamumu beetemi, na bani na lɛlɔ ekpo átasa-ma ása-ma, na bani náƒɛ bewi kalɔ beesié, na banumbwɛne lɛnɔ baanu ni, ɔ́bla-ma kalɛ kadi. Na bémwi Israel Katɔti. 32Yesu ɔ́lɔ nwuna batɛyane úboku nwuna kudɔ na ɔ́su-ma ɔnini, "Kaƒɔ kaakywí-mi teete bekyuli bamɛni, ɔsika báakya-mi kudɔ emeyi atɛ sɔɔn. Na ɔƒaani ni, basɔ beeebo lɛla lɛdi na badi. Naaayɔ nnii muudie-ma ulu ku kɔka. Anumi adubɔvinku-ma si bakɛ ulu." 33Nwuna batɛyane béye-nwu banini, "Wɛ na bɔdubɔkɛ adila na ketele kemo mɛni bute bekyuli pii bamɛni na udu-ma?" 34Yesu úye-ma ɔnii, "Adila adi ese?" Na básu-nwu banii, "Bodobodo maatɛ ku kɔkpaku blii suɛ kani nse." 35Amu na Yesu ɔ́su bana ƒui ɔnii basɔ belie kalɔ. 36Na úti bodobodo maatɛ ku kɔkpaku kɔmmɔ na ɔ́gya Katɔti enu, na ɔ́bwɛ ɔdi biala kɔkɛ kɔkɛ na úti úte nwuna batɛyane. Na ama lɛnɔ béle-nwu béte bekyuli bammɔ. 37Na bana ƒui bádi na bémo. Amu na batɛyane bamɛni básala adila kɔkɛ kɔni na bádi bébu ƒui na kúyi kɔgyigyɛ maatɛ. 38Na banana bani nádi adila ammɔ bumomo bɔdubɔbla mpimu ine. Nsu bátaka beleku ku banamu. 39Amu na Yesu údie bekyuli bammɔ ulu na úduo ɔkɔlɔ kemo na ɔ́tɔlɔ úsie Magadan kalɛkɛ lɛlɔ.

will be added

X\