MATEO 14

1Lebo lɛmmɔ kemo ni, Herode ɔni mɔɔdi lɛga na Galilea únu Yesu lɛlɔ litemi. 2Na ɔ́su nwuna badi ɔnini, "Ukyuli ɔmɛni ɔdi Ntu Ɔkpilane Yohane ɔni násɔ únwini úbo úlie ngba. Ɔmɛni ɔsu na ubo ɔyikun ɔni na ɔɔbla akɔla budie taatina lɛni." 3Ɔ́su lɛni ɔsika Herode ɔmɛni náya na béƒie Yohane na ɔ́ya bényimi-nwu na béti-nwu bákya aban ɔtɔ. Herode ɔ́bla ɔmɛni na ɔnwani Ƒilipo ulekudi Herodia ɔsu. 4Ɔsika Ntu Ɔkpilane Yohane ɔ́su Herode ɔnini, "Katɔti ɔda bubo buléte kuƒi ka nka eti ƒula ɔnwani ulekudi Herodia." 5Anwuɔsu Herode ɔ́yɔ ka badu Yohane. Nsu ɔ́yia bekyuli pii bani ƒui nénu-nwu ala bɔtina, ɔsika bana ƒui baabu Yohane aani Katɔti kenye udiene. 6Limeyi lɛdi ni, Herode ɔɔdi nwuna lɛwɔmeyi na ɔ́lɔ bekyuli pii. Na Herodia ubidi ulekubi úbatɔ na bekyuli bammɔ anumi. Ɔmɛni ɔ́da Herode ebiti geen. 7Na ɔ́kpali ala ɔ́lɔ Katɔti ɔnini, "Mɔɔsu-ɔ ka ndubute-ɔ lɛla biala na éye." 8Amu na uni ɔ́kya ugblebi ɔmmɔ kakwɛ na lɛla lɛni na uye lɛlɔ. Anwuɔsu útéye ɔnini, "Mɔɔwia Ntu Ɔkpilane Yohane lili ka eti-ni akya lɛkyami kemo ete-mi mɛni kani." 9Lɛla lɛni na ulekubi ɔmɛni úye ɔ́bla Herode kɔnyana. Nsu ɔ́si kenye kani na úse na benengu bammɔ ƒui anumi ɔsu ni, ɔ́su ka babla ugblebi ɔmmɔ lɛyɔla bete-nwu. 10Ɔmɛni ɔsu ɔ́tala ukyuli ɔdi na útékulo Yohane lili na aban ɔtɔ katɛnkɔ mmɔ. 11Úti lili lɛmmɔ ɔ́kya lɛkyami lɛdi kemo úboku ugblebi ɔmmɔ na anwu lɛnɔ úti-ni úsienku uni. 12Yohane batɛyane bébo bébeti nwuna ukpine ɔmmɔ bátáva, na bésie bátásu Yesu. 13Uwi ɔni na Yesu únu ka bádu Yohane ni, úti ɔkɔlɔ na ɔ́tɔlɔ úsie kesii kani nábɛ. Nsu ka bekyuli bénu kesii kani na ɔkya ni, bana pii bási bana lɛma kemo bakɛ lɛgba bátasiaku-nwu na mmɔ. 14Amu na Yesu ɔ́lɛ ɔkɔlɔ ɔmmɔ kemo. Na uwi ɔni na ɔ́nu bekyuli pii bammɔ ni, bana lɛlɔ lɛ́kywi-nwu kaƒɔ na ɔ́bwi bani muuƒi. 15Uwi ɔni na useyi uwi údu ni, nwuna batɛyane bákpɛ béde-nwu na básu-nwu banini, "Kadi káasa káwɔlɔ, na mɛni lɛnɔ kágyunku ɔma. Anwuɔsu die bekyuli bamɛni ulu pla na beteesie akpaklɔ kemo na bakɛ lɛla lɛdi beye badi." 16Yesu údie kenye ɔnii, "Utalɛka batɔlɔ. Amii alati bite-ma lɛla lɛdi na badi." 17Batɛyane bammɔ básu-nwu banini, "Adila ani bubo kani ndi bodobodo ɛlɔ ku kɔkpaku inyɔ." 18Amu na Yesu ɔ́su-ma ɔnini, "Biti-nya biboku-mi mɛni." 19Na ɔ́su bekyuli bammɔ ƒui ɔnii belie kalɔ na livo lɛmmɔ lɛlɔ mmɔ. Amu na úti bodobodo ɛlɔ ku kɔkpaku inyɔ bɔmmɔ na ɔ́talaku anumi ɔ́nu katɔ na ɔ́gya Katɔti enu. Na ɔ́bwɛ bodobodo ɔmmɔ kɔkɛ kɔkɛ úte nwuna batɛyane. Na batɛyane bammɔ lɛnɔ béti béte bekyuli bammɔ. 20Na bana ƒui bádi na bémo. Na nwuna batɛyane básala kɔkɛ wɛlɛ wɛlɛ kɔni bádi bébu na úyi kɔgyigyɛ leevu inyɔ. 21Na bekyuli bani nádi adila ammɔ babla aani banana mpimu ɛlɔ. Nsu bátaka beleku ku banamu. 22Mmɔ kani na Yesu ɔ́ya na nwuna batɛyane bákɔ béduo ɔkɔlɔ kemo ɔnii bataatɔ beteesie ɛpu ɔmmɔ ɔvi ɔni ngye. Na anwu ɔ́ƒɔ lɛlɔ ɔ́kya kama uudie bekyuli bammɔ ulu. 23Ɔmɛni kama ni, anwu lɛti ɔ́kɔ úsie kɔbi lili na útákpali katɔ. Na usien ɔmmɔ ƒui ni, anwu lɛti pɛ kani nkya mmɔ. 24Na uwi ɔmɛni kemo ni, na ɔkɔlɔ ɔmmɔ úusie ɔgyu. Na ɔƒɛƒɛɛ ubendi ɔni muukpó taasiaku-nwu ɔsu ni, ntu bɔmmɔ buubó ɔkɔlɔ ɔmmɔ taavinku. 25Na lɛdigye aani lɛdɔ ɛtɛ ku lɛdɔ ɛku ntɛ ni, Yesu úsie ntu anumi na úbo nwuna batɛyane bammɔ kudɔ. 26Uwi ɔni na bánu ka ɔkɛ ntu anumi mmɔ ni, ɔ́gyu-ma ɔtɔtɔ na banii, "Ukpine na ɔdi!" Anwuɔsu bése kalɔ baava momoomo! 27Nsu Yesu útemiku-ma kɔnakunwi ɔnii, "Bɛkɛ kayi! Ami na ɔdi! Bitayia!" 28Amu na Petro ɔ́su ɔnini, "Si awɔ geen na ɔdi ni, su-mi anii ami lɛnɔ nsie ntu bɔmmɔ anumi na libo-ɔ kudɔ." 29Amu na Yesu ɔ́su-nwu ɔnini, "Bo!" Na Petro ɔ́lɛ ɔkɔlɔ ɔmmɔ kemo na ɔkɛ ntu bɔmmɔ anumi úsela Yesu kudɔ. 30Nsu ni, ka ɔ́nu ɔƒɛƒɛɛ ɔni muukpó momoomo ni, liƒu lɛ́da-nwu na úse kalɔ ɔɔnyi ntu bɔmmɔ kemo. Amu na Petro ɔ́va ɔ́su ɔnini, "Blɔti, die-mi!" 31Kɔnakunwi Yesu únine kɔnu ɔ́da-nwu na ɔ́su-nwu ɔnini, "Ƒula bɔƒɔtaadi na mina lɛlɔ bútedu! Bi ɔsu na ƒula kasusu kaabla inyɔ inyɔ?" 32Na bana inyɔ ƒui bétéduo ɔkɔlɔ ɔmmɔ kemo, na ɔƒɛƒɛɛ ɔmmɔ ɔ́da bukpo ɔ́ya. 33Amu na batɛyane bammɔ bábu-nwu geen. Na básu-nwu banini, "Katɔti Ubidi geen na adi!" 34Ka bétédu ɛpu ɔmmɔ ɔvi ngye ni, bátáyu na Genesaret kalɔ lɛlɔ. 35Mmɔ ni, bekyuli bammɔ bánu Yesu báti. Na bébo-nwu kudu kaduɛ. Anwuɔsu bekyuli pii bététiku balɛne bani nkya amadɔ mmɔ ƒui béboku Yesu kudɔ. 36Na balɛne bammɔ bévele-nwu banii ɔya na betuku nwuna awu kɔtu. Na bani ƒui nétuku-nwu awu kɔtu ni, bana lɛlɛ lɛ́ba-ma.

will be added

X\