MATEO 11

1Uwi ɔni Yesu údie nwuna batɛyane leevu-inyɔ bammɔ ulu ɔ́wɔlɔ ni, ɔ́ta mmɔ na úsie utátina ala na utákɔ lɛsa ute lɛma lɛni nkya amadɔ mmɔ. 2Na uwi ɔmmɔ kemo ni, Ntu Ɔkpilane Yohane ɔtɛ aban ɔtɔ. Únu kabla kani na Kristo ɔɔbla, na ɔ́tala nwuna batɛyane badi ɔ́kya Yesu. 3Na bétéye Yesu banii, "Awɔ ndi ukyuli ɔni na Katɔti ɔ́su úse ka ɔdubo, munuu butaanu ukyuli bamba ulu?" 4Amu na Yesu údie kenye ɔnini, "Binwini bisie na bitásu Yohane ala ani na biinú ku ani na bɛɛnu ka mɔɔbla. 5Banumbwɛne baanu, na bani náƒɛ bewi kalɔ beesié. Ama bani muuƒi ɔlɛgyie lɛlɔ lɛɛbla sɛɛn na batutine beenú. Bekpine baata na mɔɔkɔ́ litemi buni lɛmmɔ lɛsa teete bawabane. 6Lɛlɔ litaayɔ bekyuli bani na bana kasusu kalabla inyɔ inyɔ na mina ala ani mɔɔbla ɔsu." 7Uwi ɔni na Yohane batɛyane bammɔ báatɔlɔ mmɔ ni, Yesu ɔ́su Yohane lɛlɔ litemi ɔ́tina bekyuli bammɔ ɔnini, "Ka bísie ketele kemo ni, bítesie bɛnii bitánu evete ani na ɔƒɛƒɛɛ uubó taavinku. 8Bítesie bɛnii bitánu ɔnana ɔni nkya lɛwu lɛni mɔɔdia bɔnu. Bekyuli bammɔ udu ni, ɔga kesii na beelie. 9Bɛsu-mi ukyuli ɔni udu na bísie bítánu! Katɔti kenye udiene ɔdi munuu dɛ? Ɛɛn, na sɔsɔ na ɔdi. Nsu mɔɔsu-mii ka bɛ́nu ukyuli ɔni ntulo kenye udiene muedi. 10Yohane ɔmɛni ndi ɔtu ɔni lɛlɔ na Bunweni Kedee Ɔku ɔmmɔ ɔ́su ɔ́siku uwi ɔni na Katɔti ɔ́su Ubidi ɔnini, 'Ndubɔtala ɔtu ɔdi na ɔgyu ɔtɔ-ɔ na ɔklibi bekyuli ute ƒula bubo.' 11Na mɔɔsu-mii geen ka Ntu Ɔkpilane Yohane ɔ́ƒɔ kuye utulo ukyuli ɔni nélie kayawi kamɛni úbavi. Nsu ni, ukyuli ɔni nátaƒɔ lɛnyi na Katɔ Ɔga Ɔma muedi ni, ɔ́ƒɔ kuye útulo Yohane ɔmmɔ. 12Na ɔ́si Ntu Ɔkpilane Yohane uwi úbalɛ ɔmwi ni, bekyuli pii báta ku lɛnungyie batáwia Katɔ Ɔga Ɔma ɔmmɔ beduo. Nsu bekyuli bani anumi egyie-ma geen lɛti na baanwanɛ lɛlɔ ni, ama ndubuduo mmɔ. 13Na Mose ɔda bubo ku Katɔti kenye bediene básu Katɔti litemi úbalɛ Yohane uwi lɛlɔ. 14Na si bɛɛyɔ́ ka bɛƒɔ bana litemi bɛdi ni, Yohane ndi Elia ɔni na básu bése ka webo. 15Si bɛɛkana ni, biti lɛla lɛni lɛ́su mɛni. 16"Ɔƒɛni ni, bi na ndubuti ɔmwi kadi bekyuli lɛkɔku? Bese aani banamu bani mɔɔƒia na kuye. Na bana bakpana baakpali-ma taasu banii, 17'Búdie uleku buti agya búte-mii, nsu bítatɔ. Búdie lɛkwanu búte-mii, nsu bítewulo.' 18Ɔsika uwi ɔni na Yohane úbo ni, úlie kɔka na útani ntɛ. Na ukyuli biala ɔ́su ɔnii uukpi libuo. 19Nsu uwi ɔni na ami ɔni ndi Ukyuli Ɔyawine Ubi líbo ni, lɛ́di na lɛ́ni. Na ukyuli biala ɔ́su ɔnii, 'Bɛnu ɔdivone ɔmɛni! Uukpi ntɛ! Anwu ku kuyi baƒɔne ku bekyuli bekpidi muusié.' Nsu takpete-ma. Katɔti lɛnunda lɛdubudie lɛlɔ keyi na lɛla lɛni na ukyuli ɔɔbla kemo." 20Na lɛma lɛni kemo na Yesu ɔ́bla akɔla pii ni, bekyuli bammɔ bétenwini kama bátakya bana ekpidi. Anwuɔsu úse kalɔ na ɔɔdɔnku-ma. 21Ɔ́su ɔnini, "Bɔbwɛ muute awɔ Korasin! Na bɔbwɛ muute awɔ Betsaida! Si lɛma likpidi Tiro ku Sidon na nka lɛ́bla akɔla budie taatina ani lɛ́bla na bina akɔ ni, badubɔda adala ani mɔɔtina ka béni bana ekpidi. 22Na mɔɔsu-mii geen ka limeyi lɛni na Katɔti ɔdubɔtɛku bayawine litemi ni, ɔdubɔnu Tiro ku Sidon lɛma kɔnyana utulo amii. 23Na awɔ Kapernaum ni, aakali ka Katɔti ɔdubɔtalaku-ɔ katɔ? Oowo! Katɔti ɔdubɔyulaku-ɔ kalɔ besienku lɛgyavonku kemo. Ɔsika akɔla budie taatina ani lɛ́bla na bina akɔ ni, si Sodom na lɛ́bla-nya ni, nka ɔmua ɔdi ɔma úbalɛ ɔmwi. 24Bɛnu ɔmɛni bɛti geen ka limeyi lɛni na Katɔti ɔdubɔtɛku bayawine litemi ni, ɔdubɔnu Sodom kɔnyana utulo awɔ." 25Uwi ɔmmɔ kemo ni, Yesu ɔ́su ɔ́kpali katɔ ɔnini, "Ati, katɔ ku kalɔ Unwoti, mɔɔgyá-a enu. Éti ala amɛni ábɛla banundane ku bakutine, na édie-nya átina bani nétesie anumi na lɛlati lɛdi kemo. 26Sɔsɔ Ati, lɛni na aayɔ́ ka ɔlɛ." 27Na ɔ́sɔ ɔ́su ɔnini, "Mina Ɔti úti ala ƒui úte-mii. Na anwu lɛti ngyi ukyuli ɔni udu na ndi. Na ami lɛti ngyi ukyuli ɔni na mina ɔti lɛnɔ ɔdi. Na mɔɔƒuna bekyuli badi bani na medie-nwu matina. 28"Amii bani nti etila bonwu na lɛlɔ líitu-mii ni, bibo-mi kudɔ na ndubɔya na bɛnwuna. 29Bibo bɔda kɔda, na bɛtɛya bɛsiku-mi kudɔ. Nse buɛɛ na muuboku lɛlɔ kalɔ, na bɛdubɔkɛ bɔnwuna. 30Ɔsika kabla kani na mete-ɔ ni, keeebo ɔkplu. Na mina etila lɛnɔ ese ƒaa ƒaa."

will be added

X\