MATEO 10

1Yesu ɔ́lɔ nwuna batɛyane leevu-inyɔ bammɔ ɔ́sala na úte-ma ɔyikun kalɛ na bagya ayu ekpidi balɛku bekyuli lɛlɔ na babwi lɛlɛ lidu lidu lɛnɔ. 2Batalane bammɔ anyi ndi amɛni. Simon ɔni basɔ baalɔ Petro ku ɔnwani Andrea ku Yakobo ku ɔnwani Yohane bani ndi Sebedeo bebi 3ku Ƒilipo ku Bartolomeo ku Toma ku kuyi ɔƒɔne Mateo ku Yakobo ɔni ndi Alƒeo ubidi ku Tadeo 4ku Simon ɔni nási Kana ku Yuda Iskariot ɔni ndubo Yesu kakya bɔkya. 5Yesu ɔ́tala banana leevu-inyɔ bamɛni na úbo-ma ɔda ɔnini, "Bitesie bekyuli bani naaadi Yudaƒuɔ kalɔ lɛlɔ. Na bitesie Samariaƒuɔ ɔma ɔdi lɛnɔ kemo. 6Mmomu bisie Israelƒuɔ bani nse aani baƒonu bani náyii ulu mmɔ kudɔ. 7Bisie na bitákɔ lɛsa bɛnii, 'Uwi ɔni na Katɔti ɔdi lɛga na bula kɔyi kemo úude.' 8Bɛbwi balɛne na bɛgyila bekpine. Bɛbwi bani muuƒi ɔlɛgyie, na bɛgya ayu ekpidi. Bíteye ɔyikun ɔmɛni na mina kudɔ, anwuɔsu amii lɛnɔ biteti bitadi kuye. 9Biteti egulabi adi biala bitada. 10Na ɔdi biala uteti koƒo utada aani ala bevelene kalɛ. Biteti awu iye lɛgbanvuo lɛbambadi lɛdi iye ugyii ɔdadi. Kabla ɔblane biala ni, nwuna kabla kemo na ɔdubɔdi. 11"Si biduo ɔma iye lɛkpaklɔ lɛdi kemo ni, bɛwia ukyuli ɔbuni ɔni mɔɔyɔ́ ka ɔƒɔ-mii. Na biduo-nwu kudɔ na bɛkya mmɔ utédu uwi ɔni na bɛdubɔtɔlɔ. 12Na si biduo kaduli kadi kemo ni, bigyele-ma bɛnii, 'Keyi kayɔku-mii.' 13Si báƒɔ-mii ku kaƒɔ ƒaa ni, keyi buɛɛ kegye kammɔ kadubɔƒɔ kaduli kammɔ ƒui. Na si bátaƒɔ-mii ni, keyi buɛɛ kegye kammɔ kaaadubulieku-ma. 14Na si ama iye ɔma ɔmmɔ bekyuli bátaƒɔ-mii iye béni bina litemi ni, bɛtɔlɔ na biveli bina lɛgba kalɔ ɔtumu biwi-ma. 15Mɔɔsu-mii geen ka limeyi lɛni na Katɔti ɔdubɔtɛku bayawine litemi ni, ɔdubɔnu lɛma likpidi aani Sodom ku Gomora kɔnyana utulo ɔma ɔmmɔ kalɛ. 16"Bɛnu! Mɔɔtala-mii aani baƒonu lɛkya begiti akɔ. Binye kagyumana aani balakpi kalɛ, nsu bɛda lɛlɔ aani babloduma. 17Bɛsia lɛlɔ anu, ɔsika bekyuli badubudie-mii bete na beƒie-mii besienku litemi katɛkɔ. Na badubo-mii bubo lɛnɔ na Yudaƒuɔ kɔsakɔ. 18Na ka bɛdi mina batɛyane ɔsu ni, badubɔtɛku-mii litemi na kalɔ kammɔ lɛlɔ badine ku baga anumi. Na bɛsu ama bani naaadi Yudaƒuɔ litemi buni lɛmmɔ. 19Si béti-mii bésienku litemi katɛkɔ ni, biteti kasusu na lɛla lɛni bɛdubɔsu lɛlɔ. 20Ɔsika Katɔti ndubute-mii etemila ani na bɛdubɔsu. Katɔti Kɔyu kɔdubɔtɛmi kɔsiaku-mii lɛlɔ. 21"Na uwi ɔmmɔ kemo ni, bekyuli badi badubuti bana banwa alati bete na badu na ami ɔsu. Na bebi bati badi lɛnɔ badubɔbla lɛni na bana bebi lɛlɔ. Bebi badubɔta benye bana bawɔne lɛlɔ na bakya-ma kakya kalɛ na badu-ma. 22Ukyuli biala ɔdubukisi-mii na ami ɔsu. Nsu si bínye bina bɔƒɔtaadi kemo kpakplaa bitédu kawɔlɔkɔ ni, Katɔti ɔdubɔƒɔ-mii ngba. 23Si beekpóku-mii na ɔma unwi kemo ni, bikeli bisie ɔbambadi kemo. Na mɔɔsu-mii geen ka bilawɔlɔ bina kabla na Israel lɛma ƒui kemo asa na ami, Ukyuli Ɔyawine Ubi, masɔ mebo. 24"Ɔtinane ɔ́ƒɔ lɛnyi útulo nwuna ɔtɛyane. Na ukyuli ɔni mɔɔdi ukyuli lɛlɔ lɛnɔ ni, útulo ukyuli ɔni lɛlɔ na ɔɔdi. 25Anwuɔsu ni, ɔtɛyane biala ɔbla ka ɔlɛ nwuna ala ɔtinane kalɛ. Na ukyuli ɔni na baadi lɛlɔ lɛnɔ ni, ɔbla ka ɔlɛ Unwoti. Na si bekyuli beedumi ɔtɔlati ɔdi banii ayu ekpidi ɔtɔnkune ɔdi ni, na badubɔlɔ kaduli kammɔ bekyuli ƒui anyikpi betulo ɔtɔlati ɔmmɔ. 26"Anwuɔsu bitayia bekyuli, ɔsika lɛla lɛni na béti ala bébi iye bábla bábɛ ni, Katɔti ɔdubudie-ni keyi. 27Na ala ani ƒui na bínu bɛ́siku ami ɔlati kudɔ ni, bidie-nya keyi. Na lɛla biala na lɛ́su-mii kabɛsɛ ni, bɛkɔ-nya lɛsa. 28Bitayia bekyuli bani na ɔlɔna kani na badubɔkana bɔdu na balakana ukyuli kɔyu aku bɔdu. Mmomu bɛyia Katɔti ɔni ndubɔkana na ɔdu ukyuli kɔyu ku ɔlɔna na lɛgyavonku kemo. 29Baasɛ wɛlɛ wɛlɛ bani na akana eye bana inyɔ ku kaplɛ unwi muedi ni, ɔdi ulekpi na Katɔti kama. 30Na amii bina lili linwini muedi ni, Katɔti ɔgyi nwuna bumomo ƒui. 31Anwuɔsu bitayia, ɔsika bɛ́ƒɔ kuye bítulo baasɛ pii. 32"Si ukyuli ɔdi udie lɛlɔ kenye na kadi anumi ka ɔdi mina ɔdi ni, ami lɛnɔ ndubudie-nwu kenye na mina Ɔti anumi na katɔ. 33Nsu si ukyuli ɔdi úni-mi na kadi anumi ni, ami lɛnɔ ndubuni-nwu na mina Ɔti anumi. 34"Bitakali bɛnii mina bubo búti keyi kayɔdi búboku kayawi. Oowo! Bekyuli badubɔdɔ na ami ɔsu! 35Bebi bananabi badubɔta benye bana bati lɛlɔ. Na bebi belekubi badubɔta benye bana beni lɛlɔ. Na bebile badubɔta benye bana begyieni lɛlɔ. 36Na ukyuli ukisine geen ni, ɔdubɔsi anwu ɔlati nwuna kaduli kemo. 37"Na ukyuli biala ɔni mayɔ ɔti iye uni teetulo-mi ni, útamanku ka ɔbla mina ɔtɛyane. Lɛni kani na ukyuli ɔni mayɔ ubidi ɔnanabi iye ulekubi teetulo-mi lɛnɔ ni, útamanku ka ɔbla mina ɔtɛyane. 38Ukyuli biala na ulayɔ ka ɔsiaku-mi kama na ubo abi aani ami kalɛ ni, útamanku ka ɔbla mina ɔtɛyane. 39Na ukyuli biala ɔni mɔɔwia ka ulie ngba ute nwuna lɛlɔ ni, ɔdubɔyila-mu. Na ukyuli ɔni nányonu nwuna ngba na ɔsiaku-mi kama ni, ɔdubɔkɛ ngba geen. 40"Ukyuli biala ɔni maƒɔ-mii ni, ɔ́ƒɔ ami lɛnɔ. Na ukyuli biala maƒɔ-mi ni, ɔ́ƒɔ Katɔti ɔni nátala-mi lɛnɔ. 41Ukyuli biala ɔni maƒɔ Katɔti kenye udiene ka ɔdi kenye udiene ute Katɔti ɔsu ni, anwu ku kenye udiene ɔmmɔ badubɔkɛ lɛyuƒɔla linwi na Katɔti kudɔ. Na ukyuli ɔni maƒɔ ukyuli ɔni nse siin ka use siin ɔsu ni, anwu ku ukyuli ɔmmɔ badubɔkɛ lɛyuƒɔla linwi na Katɔti kudɔ. 42Bɛnu ɔmɛni kaduɛ ka ukyuli biala meti ntu ɔɔƒɛɛ mete mina basiakune bamɛni akɔ ubliidi ƒui ka ɔsiaku-mi ɔsu ni, nwuna lɛyuƒɔla lilabɔ-nwu."

will be added

X\