MARKO 9

1Amu na Yesu ɔ́sɔ ɔ́su-ma ɔnini, “Mɔɔsu-mii geen ka bina akɔ badi bilekpi tɔ wetédu ka bɛ́nu ka Katɔti lɛga bɔdi búbo ku ɔyikun.” 2Emeyi aku kama ni, Yesu útiku Petro ku Yakobo ku Yohane úsienku kɔbi kɔdi lili. Na ama lɛti pɛ bésie bakya. Ka batɛyane bammɔ baanu ni, kavumana kadi kébo Yesu lɛlɔ! 3Na nwuna awu uukeye na ɔ́ƒuala ƒututuutu ɔni na uukeye teetulo kalɛ na ukyuli ɔyawine ɔdubɔkana lɛla lɛdi bɔƒɔ na ntu kemo na ukeye. 4Amu na nwuna batɛyane ɛtɛ bamɛni bánu ka Mose ku Elia báda bálɛ na baatɛmiku Yesu. 5- 6Liƒu lɛ́da Petro ku bakladi bammɔ ɔni na bátati lɛla lɛni na basu. Amu na Petro ɔ́su Yesu ɔnini, “Ala ɔtinane, bula mɛni bubo bɔdia geen! Ya bɔtu nvo ɛtɛ. Kenwi kadi ƒula kadi, na kenwi kadi Mose kadi, na kenwi lɛnɔ kadi Elia kadi.” 7Amu na uyɔlɔ ɔdi úbewi bana ƒui lɛlɔ, na lɛdi lɛdi lɛ́su lɛnini, “Ɔmɛni ndi mina ubi ɔyɔne. Bise atu na binu-nwu litemi!” 8Bátɛ anu bámana, nsu bátanu ukyuli ɔdi ntu Yesu ɔni nnye-ma kudɔ kani. 9Ka báyu kɔbi lɛlɔ bási mmɔ bébo ni, Yesu úbo-ma ɔda ɔnini, “Bitasu ukyuli ɔdi biala lɛla lɛni na bɛ́nu mɛni wetédu ka ami Ukyuli Ɔyawine Ubi lɛ́ta lɛ́lɛ bekpine akɔ.” 10Bábala etemila amɛni na bana akɔ, nsu si ama lɛti belie ni, na beeye bana lɛlɔ banii, “Kekpine bɔta taasi bɔmmɔ kalɔ ndi dɛ?” 11Amu na béye Yesu banini, “Bi ɔsu na ɔda bubo ala batinane básu ka Elia na ɔlɛka ɔka Kristo bubo?” 12Yesu ɔ́su-ma ɔnii, “Sɔsɔ na básu. Elia na ɔlɛka ɔka bubo kalɛ na wabaklibi lɛla biala wese. Nsu Bunweni Kedee Ɔku lɛnɔ ɔ́su ka Ukyuli Ɔyawine Ubi ɔdububo abi pii na badubudumi-nwu. Dɛ bɛɛkali ka ɔmɛni lɛnɔ kalɔ kaatina? 13Mɔɔsu-mii ka Elia ɔmmɔ úubo. Nsu bekyuli bátabu-nwu kaduɛ. Mmomu bábla-nwu kalɛ na ama baayɔ́. Lɛla lɛmɛni líbalɛ aani kalɛ na Katɔti kenye bediene bénweni bése na Bunweni Kedee Ɔku kemo básiku-nwu lɛlɔ.” 14Uwi ɔni na Yesu ku Petro bene bénwini bébo batɛyane bakladi kudɔ ni, bábanu ka bekyuli pii badi benye bámana-ma, na ama ku ɔda bubo ala batinane badi benye baaní litemi lɛdi teenene. 15Ka bekyuli bammɔ ƒui bánu ka Yesu ɔdubo ni, ɔ́bla-ma yaa, na békeli bátasiaku-nwu na bakya-nwu kenye. 16Yesu úye nwuna batɛyane ɔnini, “Bi lɛsɛ lɛlɔ na amii ku-ma binye bɛɛní?” 17Amu na ɔnana ɔdi unye bekyuli bammɔ akɔ na ɔ́su Yesu ɔnini, “Ala ɔtinane, líti mina ubi líboku-ɔ, ɔsika kɔyu kukpidi kɔdi kɔsiaku-nwu na kɔ́ya na ulakana butemi. 18Uwi biala si kɔyu kɔmɛni kuukpóku-nwu ni, na kuubó-nwu kɔva kalɔ, na avlɔvɔ aalɛ́-nwu kenye, na ɔɔdu anyi, na nwuna lɛlɔ ƒui lɛɛsinsi. Amu na líti-nwu líboku ƒula batɛyane nnii babwi-nwu, nsu bátakana.” 19Amu na Yesu ɔ́su-ma ɔnini, “Eei! Ɔmwi keyi kamɛni bekyuli, bina bɔƒɔtaadi bɔ́sɔ! Uwi ɛlɛ na ɔlɛka lɛkya-mii kudɔ ntédu asa na bɛƒɔ bɛdi? Munuu uwi ɔmani na ndubɔda-mii asa na binu ala kalɔ? Biti ɔnamu ɔmmɔ biboku-mi!” 20Amu na béti-nwu béboku Yesu. Na ka kɔyu kɔmɛni kɔ́nya kɔ́nu Yesu ni, kɔ́kunku ɔnamu ɔmmɔ na kɔ́ya na úbuli ɔ́tɛ kalɔ uubó teeminime, na avlɔvɔ aalɛ́-nwu kenye. 21Amu na Yesu úye ɔti ɔmmɔ ɔnini, “Ka úse kalɔ ɔɔbla-nwu lɛni ni, uwi úutu?” Ɔnana ɔmmɔ ɔ́su-nwu ɔnini, “Úse kalɔ úti ɔ́si uwi ɔni na ɔdi ɔnamu. 22Uwi pii kɔyu kɔmɛni kɔɔkya ɔkplu ka nka kɔdu-nwu. Si úbo lɛni ni, kɔɔyá na uubuli teeduo ogya iye ntu kemo. Buvele, nu-bu kɔnyana na ebunku-bu si ɔdi lɛla lɛni na akana bɔbla!” 23Yesu ɔ́su-nwu ɔnini, “Bi ɔsu na aasu-mi anii si makana? Lɛla lɛdi liiibo ɔkplu liite ukyuli ɔni náƒɔ-mi ɔ́di.” 24Kɔnakunwi ni, ubi ɔti ɔmmɔ ɔ́va momoomo ɔ́su ɔnini, “Mbo bɔƒɔtaadi, nsu buuumomo. Bunku-mi na lɛkɛ bɔƒɔtaadi libu!” 25Amu na uwi ɔni na Yesu ɔ́nu ka bekyuli pii bammɔ baaní teede-ma ni, útemi úte kɔyu kɔmɛni ɔnini, “Kɔyu kukpidi kɔni neeenu na kulétemi, mɔɔsu-ɔ ka vi lɛ ɔnamu ɔmɛni lɛlɔ kemo, na sɔ teduo-nwu lɛlɔ kemo kudi kudii lɛnɔ!” 26Kɔyu kɔmɛni kɔ́va momoomo, na kúdi ɔnamu ɔmɛni kúbo kalɔ na kɔ́lɛ-nwu lɛlɔ kemo kɔ́tɔlɔ. Ɔnamu ɔmɛni ɔ́tɛ mmɔ aani si bukpi na úkpi. Na ukyuli biala ɔni nnye mmɔ ɔɔsu ɔnini, “Úkpi!” 27Nsu Yesu ɔ́da ɔnamu ɔmɛni kɔnu na ɔ́ta únye. 28Nwuna kama uwi ɔni na Yesu útéduo kaduli ni, nwuna batɛyane béye-nwu buɛɛ banini, “Bi ɔsu na abu bútakana kɔyu kɔmɛni bɔbɔku bɔlɛku ɔnamu ɔmmɔ lɛlɔ kemo?” 29Amu na Yesu ɔ́su-ma ɔnini, “Ntu ukyuli ɔni mɔɔkpali katɔ uwi ndi uwi na uulie kɔka kani ndubɔkana kɔyu kɔmɛni udu bɔbɔku bɔlɛku ukyuli lɛlɔ kemo.” 30Yesu ku nwuna bakpana bátɔlɔ mmɔ na bátávi Galilea. Yesu útayɔ ka ukyuli ɔdi ɔti kesii kani na ɔkya, 31ɔsika ɔkya ɔɔtina nwuna batɛyane ala. Ɔ́su-ma ɔnini, “Ukyuli ɔdi ɔdubo Ukyuli Ɔyawine Ubi kakya bɔkya na uti-nwu ute bekyuli na badu-nwu. Na limeyi lɛtɛdi lɛlɔ ni, ɔsɔ ɔdubɔta na ulie ngba.” 32Nsu bétenu lɛla lɛni na ɔɔsu-ma mɛni kalɔ, na baayia ka beye-nwu litemi lɛmɛni kalɔ benu. 33Amu ka bésie bétédu Kapernaum ni, bétéduo kaduli kadi kemo. Mmɔ ni, Yesu úye nwuna batɛyane ɔnini, “Bi litemi na bɛda bɛɛní teenene bina akɔ ka bɔdubo?” 34Nsu bátaka kenye budie. Ɔsika ɔni badubo ni, bakɛ baaní lɛsɛ ka bati ukyuli ɔni ntulo ƒui na bana akɔ. 35Amu na Yesu úlie kalɔ na ɔ́lɔ nwuna batɛyane leevu-inyɔ bammɔ, na ɔ́su-ma ɔnini, “Bina akɔ ukyuli ɔni mɔɔwia ka bakladi bete-nwu ɔbu ni, ɔlɛka uti lɛlɔ ɔbla aani si uuubo kenyekɔ biala na bina ƒui akɔ na ɔbla bina akɔ ƒui kabla.” 36Amu na ɔ́ya na ɔnamu ɔdi úbenye bana anumi. Na ɔ́gyu ɔnamu ɔmɛni ɔ́sia nwuna lɛgba lɛlɔ na ɔ́su-ma ɔnini, 37“Ukyuli biala ɔni mɔɔƒɔ́ ɔnamu na ami ɔsu ni, ami na ɔ́ƒɔ. Na ukyuli biala ɔni mɔɔƒɔ́-mi ni, ɔɔɔdi ami lɛti na ɔ́ƒɔ. Mmomu ɔ́ƒɔ mina Ɔti ɔni nátala-mi lɛnɔ.” 38Nwuna kama ni, ɔtɛyane ɔni baalɔ Yohane ɔ́su Yesu ɔnini, “Ala ɔtinane, bɔ́nu ka ukyuli ɔdi ɔkya ɔɔbɔku ayu ekpidi na ƒula lɛnyi kemo. Na bɔ́su-nwu bɔnii ɔda ɔya, ɔsika uuubo-bu akɔ.” 39Yesu ɔ́su-ma ɔnini, “Bitetile-nwu kuƒi, ɔsika ukyuli ɔni mɔɔbla akɔla budie taatina na mina lɛnyi kemo ni, ulásu lɛla likpidi taasiku-mi lɛlɔ. 40Na ukyuli ɔni nétenye útetile-bu ni, abu ku-nwu bɔdi benwi. 41“Na muute-mii bɔti ka ukyuli biala ɔni ndubute-mii ntu ɔnii bɛni ka mina badi na bɛdi ɔsu ni, Katɔti ɔdubɔƒɔ-nwu kayu. 42“Nsu si ukyuli ɔdi ɔ́ya na banamu bani náƒɔ bádi mɛni ɔdi únwini kama ɔ́kya nwuna bɔƒɔtaadi ni, ɔdububo abi geen! Si béti kabuli bényimi báda lɛtabi bonwu lɛdi na béti báƒala-nwu limɔ, na bébo-nwu bákya ɛpu kemo ni, ɔdia-nwu utulo. 43- 44“Anwuɔsu si ƒula kɔnu kunwi kuubile ƒula bɔƒɔtaadi ni, tuna na ekulo-ku edie! Ɔdia ka ebo kɔnu kunwi pɛ na eli ngba uwi ɔni ƒui utulo ka ebo enu anyɔ na Katɔti ɔdububo-ɔ ɔvaaku na kebu kani na baakyula ala ani naaadia kemo. 45- 46Na si ƒula ɔgba muubile ƒula bɔƒɔtaadi ni, ɔlɛka ekulo ɔgba ɔmmɔ edie. Ɔdia si ebo ɔgba unwi na ákɛ ngba ƒui utulo si ebo lɛgba inyɔ na bébo-ɔ bátákya ogya kemo. 47Na si ƒula lɛnumi lɛɛkpanku-ɔ taatákya likpidi kemo ni, da-ni die. Ɔdia si ebo lɛnumi linwi na éduo Katɔti lɛga kadikɔ utulo si ebo anumi anyɔ na bébo-ɔ bátákya kebu 48kani kemo básu banii, “ 'Beklubi bani muubile ala na mmɔ ni, belekpi kudii! Na ogya ɔni mɔɔkyula ala na mmɔ ni, uleni kudii.' 49Ɔsika kalɛ na beeti mma taakya adila kemo ni, lɛni kani na Katɔti ɔdubɔya na ama bani meduo ogya ɔmmɔ kemo bebo abi. 50“Mma bɔdia. Nsu si buuubo emini ni, alakana-mu emini bɔsɔ bɔkya lɛnɔ. Anwuɔsu ni, binye lɛbibo biala kenye kpakplaa. Na bilieku lɛlɔ na bɔyɔ kemo.”

will be added

X\