MARKO 8

1Uwi útetu asa na bekyuli pii badi bábasa mmɔ. Na ka lɛla lɛdi lítebu-ma na badi ɔsu ni, Yesu ɔ́lɔ nwuna batɛyane úboku nwuna kudɔ na ɔ́su-ma ɔnini, 2“Bekyuli bamɛni lɛlɔ lɛɛkywí-mi kaƒɔ, ɔsika báakya-mi kudɔ emeyi atɛ sɔɔn. Na ɔƒɛni ni, balakɛ lɛla lɛdi badi. 3Si lɛ́nyonu-ma na bátɔlɔ ni, badubusie batátaayila na ulu. Ɔsika bana badi bási kesii kani nágyu.” 4Amu na nwuna batɛyane béye-nwu banini, “Ketele kemo mɛni ni, wɛ na ukyuli ɔdi ɔdubɔkɛ adila bute bekyuli bamɛni na badi bemo?” 5Mmɔ na Yesu úye-ma ɔnini, “Bodobodo ɛlɛ na bɛda?” Básu-nwu banini, “Bodobodo maatɛ na bɔda.” 6Yesu ɔ́su bana ƒui ɔnii basɔ belie kalɔ. Amu na úti bodobodo maatɛ ɔmmɔ, na ɔ́gya Katɔti enu, na ɔ́bwɛ-nwu kɔkɛ kɔkɛ, na úti úte nwuna batɛyane ɔnii beti bete bekyuli bamɛni ƒui. Ama lɛnɔ béti béle béte-ma. 7Ka bánu banii kɔkpaku blii kɔdi lɛnɔ kuse ni, Yesu úti aku lɛnɔ na ɔ́gya enu. Na úti-ku úte nwuna batɛyane ɔnii bele aku lɛnɔ bete-ma. 8- 9Bekyuli bamɛni ƒui bádi na bémo. Na banana lɛti bumomo bɔdubɔbla mpimu ine. Amu ka bádi báwɔlɔ ni, batɛyane bamɛni bála bodobodo kɔkɛ kɔni nébu ƒui na kúyi kɔgyigyɛ maatɛ. Nwuna kama ni, Yesu údie bekyuli bamɛni ƒui ulu na bátɔlɔ. 10Amu na Yesu ku nwuna batɛyane béduo ɔkɔlɔ kemo na bátɔlɔ bésie Dalmanuta kalɔ lɛlɔ. 11Ƒarisiƒuɔ badi bébo Yesu kudɔ na bakya beeye-nwu etemila taakɔku-nwu taanu. Anwuɔsu básu-nwu banii ɔbla akɔla adi na banu ka Katɔti kudɔ na ɔ́si. 12Nsu Yesu údumo geen, na úye-ma ɔnini, “Bi ɔsu geen na ɔmwi bekyuli baawia akɔla bataanu? Oowo, mɔɔsu-mii ka lɛɛɛdubo akɔla ani udu na bɛɛwia mɛni bɔbla bɔtina-mii!” 13Amu na ɔ́tɔlɔ-ma kudɔ, na ɔ́sɔ útéduo ɔkɔlɔ kemo na ɔ́via úsie ɛpu ɔmmɔ ɔvi ɔni ngye. 14Nwuna batɛyane bamɛni báyiƒla bodobodo ɔdi bɔwia bɔda, anwuɔsu bodobodo unwi pɛ na bada na ɔkɔlɔ kemo mmɔ. 15Amu na Yesu ɔ́su-ma ɔnini, “Binye kagyumana na bɛnu kaduɛ na Ɔga Herode ku Ƒarisiƒuɔ bɔnyii bɔni na baakya bodobodo kemo na uuƒu lɛlɔ.” 16Amu na ama lɛti bákya bátaatɛmiku lɛlɔ taasu banini, “Ɔni na bɔɔɔda bodobodo pii ɔdi ɔsu na ɔɔsu ɔmɛni yoo?” 17Nsu ka Yesu ɔ́ti litemi lɛni na baasu ɔsu ni, úye-ma ɔnini, “Bi ɔsu na bɛɛtɛmi taasiku bodobodo tada lɛlɔ? Ku ɔƒɛni ni, bilánu na bilenu tɔ kalɔ? Bina atu ebo ɔkplu bɔdi! 18Bibo anumi, nsu bilánu! Bibo atu, nsu bilenu! 19Bítanu uwi ɔni na lɛ́ƒɛ bodobodo ɛlɔ líte nkyuli mpimu ɛlɔ na bádi? Kɔgyigyɛ ɛlɛ na kɔkɛ wɛlɛ wɛlɛ kɔni nébu kúyi?” Básu-nwu banii, “Kɔgyigyɛ leevu-inyɔ.” 20Yesu ɔ́sɔ úye-ma ɔnini, “Na uwi ɔni na lɛ́ƒɛ bodobodo maatɛ líte nkyuli mpimu ine ni, kɔkɛ wɛlɛ wɛlɛ kɔni nébu ni, kɔgyigyɛ ɛlɛ na kúyi?” Básu-nwu banii, “Maatɛ.” 21Amu na úye-ma ɔnini, “Asa na bítenu tɔ ukyuli ɔni na ndi kalɔ?” 22Ka bésie bétédu Betsaida ni, bekyuli badi béti ɔnumbwɛne ɔdi béboku Yesu na bévele-nwu banii utuku-nwu. 23Yesu ɔ́da ukyuli ɔmmɔ kɔnu na útiku-nwu ɔ́lɛku ɔma kemo. Ka útuo lisuo úwi ukyuli ɔmmɔ anumi lɛlɔ na úti enu ɔ́sia-nwu lɛlɔ ni, úye-nwu ɔnini, “Aanu lɛla lɛdi?” 24Amu na ukyuli ɔmɛni ɔ́talaku anumi ɔ́nu katɔ na ɔ́su ɔnini, “Ɛɛn, mɔɔnu bekyuli, nsu bese aani egyii. Nsu akɛ eesié taavi.” 25Amu na Yesu ɔ́sɔ útuku-nwu anumi. Uwi unyɔdi ɔmɛni kemo ni, ukyuli ɔmmɔ úbimi anumi kaduɛ na nwuna anumi ábla-nwu nwaa na ɔɔnu lɛla biala kaduɛ! 26Amu na Yesu údie-nwu ulu ɔnii uteesie kaduli, nsu ɔsɔ utavi ɔma ɔni kemo na bási bébo mmɔ. 27Ɔmmɔ kama ni, Yesu ku nwuna batɛyane bátɔlɔ mmɔ na bésie akpaklɔ ani nkya Kaesarea Ƒilipi kudɔ. Na ka bákɛ ulu ni, Yesu úye-ma ɔnini, “Bɛsu-mi ukyuli ɔni na bekyuli baasu ka ndi?” 28Básu-nwu banini, “Badi baasu banii awɔ ndi Ntu Ɔkpilane Yohane. Na badi lɛnɔ baasu banii awɔ ndi Elia. Na babambadi lɛnɔ baasu banii adi Katɔti kenye bediene bammɔ kemo unwi.” 29Amu na Yesu ɔ́sɔ úye-ma ɔnini, “Na amii nɔɔ? Ɔma na bɛɛkali ka ami ndi?” Petro ɔ́su-nwu ɔnini, “Awɔ ndi Kristo ɔmmɔ.” 30Amu na Yesu úbo-ma ɔda ka batasu ukyuli ɔdi biala lɛla lɛni bagyi básiku-nwu lɛlɔ mɛni. 31Amu na Yesu úse kalɔ ɔɔtina nwuna batɛyane ala adi. Ɔ́su-ma ɔnini, “Ɔlɛka Ukyuli Ɔyawine Ubi ubo abi pii na ɔma benengu ku bakpane benengu ku ɔda bubo ala batinane enu kemo na bɛdumi-nwu. Badubɔdu-nwu, nsu na limeyi lɛtɛdi lɛlɔ ni, ɔdubɔta ulie ngba.” 32Ɔ́su-ma ɔmɛni nwaa, na bénu kalɔ. Amu na Petro ɔ́kpanku-nwu úsienku kɔƒɛlɛ na ɔ́dɔnku-nwu. 33Nsu ka Yesu úbo únwini na ɔ́nu nwuna batɛyane ni, ɔ́dɔnku Petro ɔnini, “Satan, gyu lɛgba na mina kudɔ!” Ɔ́sɔ ɔ́su ɔnini, “Aláwia ala ani na Katɔti ɔɔwia, mmomu aawia bayawine ayɔla kani!” 34Amu ka Yesu ɔ́lɔ bekyuli lisu lɛmmɔ ku nwuna batɛyane úboku nwuna kudɔ ni, ɔ́su-ma ɔnini, “Si ukyuli ɔdi ɔɔyɔ́ ka ɔsiaku-mi kama sɔsɔ ni, ɔlɛka udie nwuna lɛlɔ atu, na ubo abi na ɔsiaku-mi kama. 35Ɔsika ukyuli biala ɔni mɔɔwia ka ɔƒɔ nwuna lili ngba ute lɛlɔ ni, ɔdubɔyila-mu. Na ukyuli biala ɔni nányonu nwuna ngba na ami ɔsu ku litemi buni lɛmɛni ɔsu ni, ɔdubɔkɛ ngba geen. 36Bi kɔsia na ukyuli ɔdubɔkɛ si ɔ́kɛ kayawi ala ƒui na ɔ́yila ngba geen bɔmmɔ? 37Munuu bi na ukyuli ubo uti ɔvumana na ɔkɛ ngba geen bɔmmɔ? 38Ɔƒɛni ni, bekyuli pii baabla ekpidi na beenwíni kama taakya Katɔti. Anwuɔsu si ami ku mina ala ani mɔɔtina ƒui ékpo ukyuli ɔdi kɔƒa ni, anwu lɛnɔ ɔdubukpo ami Ukyuli Ɔyawine Ubi kɔƒa uwi ɔni na mebo ku Katɔti batu kedee na Katɔti ɔmmɔ bukeye ƒui kemo.”

will be added

X\