MARKO 5

1Ɔmɛni kama ni, Yesu ku nwuna batɛyane bammɔ bétéduo Galilea Ɛpu ɔvi ɔni ngye na Geraseƒuɔ kalɔ lɛlɔ. 2Amu ka Yesu ɔ́nya ɔ́lɛ ɔkɔlɔ kemo ni, ukyuli ɔdi na kɔyu kukpidi kɔsiaku-nwu ni, úbasiaku-ma. 3Ɔnana ɔmɛni ɔ́si bekyuli kavakɔ kadi nde mmɔ, ɔsika mmɔ na uli. 4Uwi ɔni návi ni, bekyuli ƒui balákana-nwu lɛkpu bubo. Uwi pii ni, baakana na benyimi-nwu enu ku lɛgba. Nsu uukúlo kɔgba kɔni bébo-nwu mmɔ. Ukyuli ɔmɛni ubo ɔkplu geen ɔni na ukyuli biala ulákana-nwu bɔda. 5Usien ku ɔƒɛ ƒui na ɔkɛ ɔɔví bekyuli kavakɔ mmɔ ku abi lɛlɔ, na ɔkɛ ɔɔva taavi na ɔda atabi uukúlo lɛlɔ. 6Ukyuli ɔmɛni unye ɔgyu asa na ɔ́nu Yesu. Anwuɔsu úkeli úbalɛ akɔnkɔ na Yesu anumi. 7Na ɔ́va momoomo ɔ́su ɔnini, “Yesu, katɔ ku kalɔ Ɔyikune Ƒui Ubi! Buvele, su-mi se ka aláni-mi kɔtu!” 8Ɔ́su lɛni ɔsika únu ka Yesu ɔɔsu ɔnini, “Kɔyu kukpidi, vi lɛ ɔnana ɔmɛni kemo!” 9Amu na Yesu úye-nwu ɔnii, “Dɛ baalɔ-ɔ?” Mmɔ na kɔyu kɔmɛni kɔ́su kɔnini, “Ami baalɔ Lisu, ɔsika abu bani nkya ɔnana ɔmɛni kemo ni, bumomo!” 10Na kɔyu kɔmmɔ kɔ́sia kama kúvele Yesu ka utabɔku ayu amɛni utalɛku kalɔ kammɔ kemo. 11Uwi ɔmmɔ kemo ni, baplakuo pii badi benye baadi na kataku kadi lɛlɔ. 12Amu na ayu amɛni évele Yesu anii, “Bɔku-bu tákya baplakuo bani nnye ngye akɔ na butéduo-ma kemo.” 13Amu na úte-ma kuƒi, na ayu amɛni álɛ ɔnana ɔmɛni lɛlɔ kemo na étéduo baplakuo bammɔ lɛlɔ kemo. Amu na baplakuo bamɛni ƒui, bani mabla aani mpimu inyɔ békeli báyu kataku kammɔ lɛlɔ, na bétéduo ɛpu kemo na bana ƒui békpi. 14Amu na bekyuli bani mɔɔnu-ma lɛlɔ mmɔ békeli bésie ɔmankemo ku amadɔ mmɔ, na bátásu bekyuli ƒui lɛla lɛni nébo. 15Bekyuli békeli bésie mmɔ banii batánu lɛla lɛni nébo. Na ka bésie Yesu kudɔ ni, bánu ukyuli ɔni na nka ayu ekpidi pii akya-nwu lɛlɔ kemo mmɔ. Na ulie kalɔ, na ubi kɔdi lɛlɔ, na nwuna kasusu kese nwaa. Na liƒu lɛda bana ƒui! 16Bekyuli bani nánu-nwu kudeedi ni, básu lɛla lɛni nálɛ ƒui na ɔnana ɔmmɔ ku baplakuo bammɔ lɛlɔ. 17Anwuɔsu bévele Yesu banii ɔtɔlɔ na bana kalɔ lɛlɔ. 18Ka Yesu utéduo ɔkɔlɔ kemo ni, ɔnana ɔni na nka ayu ekpidi akya-nwu lɛlɔ kemo mɛni úvele-nwu ɔnini, “Ya-mi libo buteesie!” 19Nsu Yesu útatuna. Mmomu ɔ́su-nwu ɔnini, “Sɔ teesie ƒula lɛlɔ bekyuli kudɔ na atásu-ma kalɛ na Unwoti úbunku-ɔ ku kalɛ na ɔ́nu-ɔ kɔnyana.” 20Anwuɔsu ɔnana ɔmɛni ɔ́tɔlɔ na útávi lɛma leevu kemo, na ɔ́su bekyuli bammɔ lɛla lɛni ƒui na Yesu ɔ́bla úte-nwu. Na ɔ́bla bani nénu ƒui kalɛ kadi. 21Yesu ɔ́sɔ únwini úse ɛpu ɔmmɔ ɔvi ɔni ngye. Ka údu ketudɔ mmɔ ni, bekyuli pii badi bábaka bámana-nwu. 22Na ukyuli ɔni baalɔ Yairo na ɔkya ɔma ɔmmɔ kasalakɔ batɔnkune akɔ ni, úbo mmɔ. Ka ɔ́nu Yesu ni, úboku lɛlɔ kalɔ. 23Na úvele-nwu kpakplaa ɔnini, “Muuvele nda-a! Mina ubi ulekubi blii ɔdi uuƒi geen. Anwuɔsu bo na ebeti ƒula enu asia-nwu lɛlɔ kalɛ na wakɛ ɔlɔkplu na welie ngba.” 24Amu na Yesu ɔ́ta na ɔsiaku-nwu. Bekyuli bani nsiaku Yesu bemomo ɔsu ni, báka-nwu bakya ntɛ uwi ɔni na úsela. 25Na uleku ɔdi ɔkya-ma akɔ ɔni na ubugya uuwi-nwu lɛlɔ akwa leevu-anyɔ sɔɔn, ina ka bevone baabla-nwu evo. 26Úubile nwuna egulabi ƒui na ɔlɛ ɔmɛni bɔbwi ɔsu, nsu ɔlɛ ɔmmɔ ulába-nwu. Mmomu katɔ kani na ɔɔkɔ́. 27Únu Yesu lɛlɔ litemi, anwuɔsu úbasiaku bekyuli bani nkpɛ Yesu kama. 28Na ɔɔsu nwuna lɛlɔ ka, “Si bɔ́kana makana-nwu awu butuku ni, nka lɛlɔ lɛdubɔba-mi.” 29Amu ka útuku Yesu awu ni, nwuna ubugya buwi bɔmmɔ kenye kékulo kɔnakunwi! Na ɔ́ƒɔ ɔ́di na nwuna lɛlɔ kemo ka nwuna ɔlɛ ɔ́ba-nwu na ɔ́lɛ nwuna lɛbibo kemo. 30Kɔnakunwi ni, Yesu ɔ́ti ka ɔyikun ɔdi ɔ́lɛ-nwu lɛlɔ kemo. Anwuɔsu ɔ́tu únwini na úye bekyuli bani nsiaku-nwu ɔnii, “Ɔma nétuku mina awu?” 31Nwuna batɛyane básu-nwu banini, “Aanu kalɛ na bekyuli bamɛni báka bámana-bu. Bi ɔsu na eeye anii ɔma nétuku-ɔ?” 32Nsu Yesu ɔ́mua unye ɔɔtɛ anu ɔnu si wanu ukyuli ɔni nétuku-nwu. 33Uleku ɔmmɔ ɔ́nu ɔ́ti lɛla lɛni nábla-nwu ɔ́ti. Anwuɔsu na liƒu ku lɛlɔ bɔtɔ kemo ni, úbalɛ akɔnkɔ na Yesu lɛgba akɔ. Na ɔ́su-nwu lɛla lɛni nébo nwaa. 34Yesu ɔ́su-nwu ɔnini, “Mina ubi ulekubi, ƒula bɔƒɔtaadi bɔ́bwi-ɔ. Teesie ku keyi buɛɛ. Na ƒula lɛbibo lɛmmɔ lɛsɔ lilebo-ɔ lɛlɔ.” 35Uwi ɔni na Yesu ɔɔsu ɔmɛni ni, batu badi bási Yairo kesii bébo bábasu-nwu banini, “Ƒ^ubidi úukpi. Bi ɔsu na ásɔ aakya ala ɔtinane ɔmɛni bɔnɔ lɛnɔ?” 36Yesu útakpete litemi lɛni na básu mmɔ. Mmomu ɔ́su Yairo ɔnini, “Tayia, awɔ ƒɔ di kani!” 37Amu na Yesu útiku Petro ku Yakobo ku ɔnwani Yohane lɛti pɛ na bátɔlɔ bésie mmɔ. 38Na ka bédu Yairo kaduli na Yesu ɔ́nu kalɛ na benye baabla lɛlɔ ku keku kani na benye beewulo ni, 39úduo úsie-ma kudɔ na úye-ma ɔnini, “Bi néboku lɛsɛ lɛmɛni? Bi ɔsu na biiwulo? Ɔnamu ɔmɛni útekpi. Bɔlɛɛ na ɔda!” 40Ka ɔ́su lɛni ni, bekyuli bani nnye mmɔ bakya baamá-nwu. Anwuɔsu Yesu ɔ́ya bana ƒui bávi bálɛ, na ɔ́ya na ubi ɔti ku uni ku nwuna batɛyane ɛtɛ bammɔ béduo bésie kesii kani na ɔnamu ɔmmɔ ɔtɛ. 41Yesu úƒie-nwu kɔnu ɔ́da na ɔ́su-nwu ɔnini, “Talita Koumu.” Na nwuna kalɔ na lɛdi lɛmmɔ kemo ndi ɔnii, “Ulekubi blii, mɔɔsu-ɔ nnii ta nye!” 42Kɔnakunwi ulekubi ɔni náaƒɔ akwa leevu-anyɔ mɛni ɔ́ta únye na ɔkɛ uusié taavi. Ka lɛla lɛmɛni líbo lɛni ni, ɔ́bla bana ƒui yaa! 43Nsu Yesu úbo-ma ɔda kpakplaa ka batasu ukyuli ɔdi biala. Na ɔ́sɔ ɔ́su-ma ɔnini, “Bite-nwu lɛla lɛdi na ɔdi.”

will be added

X\