MARKO 16

1Kadi kégye useyi uwi ɔni na lɛnwunameyi kadi káyu ni, Maria Magdalene ku Maria ɔni ndi Yakobo uni ku Salome bétéye klobo banii batáwɛɛ Yesu ukpine. 2Amu ka kadi kégye Kwasida ɔtanta ni, báta bésie kaƒiɔtɔ kammɔ kudɔ. 3- 4Uwi ɔni na bakɛ bésela ni, béye lɛlɔ banini, “Ɔma na bɔdubɔkɛ na uminime lɛtakpɛ lɛmmɔ udie na kaƒiɔtɔ kammɔ kenye ute-bu?” Béye lɛlɔ ɔmɛni ɔsika lɛtakpɛ lɛmmɔ líbomo geen. Nsu ka bédu mmɔ ni, bánu ka ukyuli ɔdi úuminime lɛtakpɛ lɛmmɔ údie. 5Anwuɔsu ka béduo kaƒiɔtɔ kammɔ kemo ni, bánu okloƒu ɔdi ka ulie kɔdianu kakɛ. Na ɔda ala aƒualadi sɔɔn! Ɔtɔtɔ ɔ́gyu-ma. 6Amu na okloƒu ɔmmɔ ɔ́su-ma ɔnini, “Bitayia. Ngyi ka Yesu Nasareni na bɛɛwia, anwu ɔni na bákana bámana ugyii lɛlɔ. Uuubo mɛni! Ɔ́ta uli ngba! Bɛnu! Mɛni ndi likpo lɛni na béti-nwu bákya. 7Anwuɔsu biteesie na bitásu nwuna batɛyane ku Petro lɛnɔ bɛnii, 'Yesu ɔtɔ-mii na Galilea. Mmɔ na bɛdubɔnu-nwu aani kalɛ na ɔ́su-mii úse.' ” 8Ɔmɛni ɔ́bla beleku bamɛni kalɛ kadi, na bálɛ kaƒiɔtɔ kamɛni kemo ku lɛlɔ bɔtɔ, na békeli bátɔlɔ. Ɔni bakɛ ulu bésela ni, bátasu ukyuli biala lɛla lɛdi, ɔsika liƒu lɛɛda-ma. 9Ka Yesu ɔ́ta ɔ́lɛ kaƒiɔtɔ kemo na Kwasida ɔmɛni lɛdigye ni, ɔ́ka lɛlɔ budie bɔtina Maria Magdalene ɔni lɛlɔ kemo na ɔ́bɔku ayu ekpidi maatɛ ɔ́lɛku dii. 10Anwu nésie útásu Yesu bakpana ka Yesu ɔ́ta uwi ɔni kemo na ama bakya beewulo kɔnyana na nwuna kukpi ɔsu. 11Na ka Maria ɔ́su-ma ɔnii Yesu ɔ́ta uli ngba na ɔ́nu-nwu ni, bátaƒɔ-nwu bátadi. 12Ɔmɛni kama ni, Yesu údie lɛlɔ ɔ́tina batɛyane inyɔ ka bakɛ ulu. Bátanu-nwu bátati na kalɔ kesekɔ. 13Nsu kama ka bábati ni, básɔ bénwini bátásu bakladi. Nsu bakladi bammɔ bátaƒɔ-ma bátadi. 14Kukplodi ni, Yesu údie lɛlɔ ɔ́tina nwuna batɛyane leevu-unwi uwi ɔni na belie baadi. Nsu ɔ́dɔnku-ma ɔsika beeebo bɔƒɔtaadi, na bábla atu ɔkplu bágya, na bátaƒɔ bekyuli bani nánu-nwu ka ɔ́ta ɔ́sɔ úbo uli ngba bátadi. 15Ɔ́su-ma ɔnini, “Biteesie kayawi ƒui na bitákɔ Katɔti litemi buni lɛmɛni lɛsa na bekyuli ƒui akɔ. 16Ukyuli ɔni náƒɔ litemi buni lɛmɛni ɔ́di na ɔ́ƒɔ ntu bɔkpila ni, Katɔti ɔdubudie-nwu ɔlɛku ekpidi kɔtu bɔni kemo. Na ukyuli ɔni nátaƒɔ útadi ni, Katɔti ɔdubɔdu-nwu kɔtɔ. 17Na Katɔti ɔdubute baƒɔtaadine ɔyikun na babla akɔla lidu lidu. Badubɔgya ayu ekpidi na mina lɛnyi kemo. Badubutemi adi lidu lidu. 18Na si béƒie kɔlakpi báda iye báni ugyulo ukpidi ɔdi biala ni, ulabla-ma lɛla lɛdi. Si béti bana enu básia balɛne lɛlɔ ni, badubɔkɛ lɛlɔ ɔkplu.” 19Uwi ɔni na Blɔti Yesu ɔ́tɛmiku-ma mmɔ kama ni, Katɔti úti-nwu úsienku katɔ na útélie keliekɔ kenengudi kani nsiaku Ɔti kadi. 20Nwuna basiakune lɛnɔ bávi kayawi ƒui na básu litemi buni lɛmɛni. Na Blɔti ɔ́kɛnku-ma lɛlɔ na údie ɔ́tina ka nwuna litemi lɛdi litemi geen ɔ́si akɔla lidu lidu lɛni na bátaabla na nwuna ɔyikun kemo ɔsu.

will be added

X\