MARKO 15

1Ɔtanta tutuutu ni, bakpane benengu bátása ku Yudaƒuɔ benengu ku ɔda bubo ala batinane ku litemi batɛne ƒui. Ka béti litemi lɛmɛni lɛlɔ kasusu ku kalɛ na badubɔbla-ni ni, bényimi Yesu na bétiku-nwu bátɔlɔku bésienku aban unengu ɔni baalɔ Pilato kudɔ. 2Mmɔ ni, Pilato úye Yesu ɔnini, “Awɔ ndi Yudaƒuɔ Ɔga?” Yesu ɔ́su-nwu ɔnini, “Ɛɛn, lɛni na use aani kalɛ na adaku bɔsu.” 3Bakpane benengu béti etemila pii básia Yesu lili. 4Anwuɔsu Pilato ɔ́sɔ úye-nwu ɔnini, “Alasu lɛla lɛdi? Se kɔtu na enu etemila ani na badaku bɔsu taasiku-ɔ lɛlɔ!” 5Nsu Yesu ɔ́sɔ útebimi kenye, na ɔ́bla Pilato dɛye dɛye! 6Na limeyi lɛmɛni bɔdi biala uwi ni, Pilato úti ɔ́sia lɛlɔ ka ɔdubɔnyonu ukyuli unwi na bekyuli bekpidi bani béƒie bákya ɔtɔ akɔ ɔni lili na badubuvele bete. 7Uwi ɔmɛni kemo ni, béƒie ɔnana ɔdi baalɔ Baraba bákya ɔtɔ. Anwu nátɔnku bekyuli bani náta bénye Romaƒuɔ Ɔga lɛlɔ. Na bana lɛsɛ lɛni na bákya ɔsu ni, béƒie anwu ku nwuna basiakune na bádu-ma kukpi kɔtɔ na bekyuli bɔdu ɔsu. 8Amu na uwi ɔni na bekyuli pii bamɛni bábasa ni, béye Pilato banii ɔkali nwuna ɔtɔ batɛne kɔnyana bɔnu aani kalɛ na ɔɔbla uwi ndi uwi mmɔ. 9Úye-ma ɔnini, “Bɛɛyɔ́ ka lɛnyonu Yudaƒuɔ Ɔga lite-mii?” 10Pilato úye-ma ɔmɛni ɔsika ɔ́ti ka lɛnungyie ɔsu na bakpane benengu bamɛni béti Yesu béboku-nwu. 11Nsu bakpane benengu bammɔ bénwini bekyuli lisu lɛmɛni kasusu kalɛ na Pilato ɔnyonu Baraba mmomu uti ute-ma. 12Pilato ɔ́sɔ útemi úte bekyuli lisu lɛmɛni na úye-ma ɔnini, “Bi na bɛɛwia ka lɛbla ku ukyuli ɔni na bɛɛlɔ Yudaƒuɔ Ɔga mɛni?” 13Amu na báva básu-nwu banini, “Kana-nwu mana ugyii lɛlɔ!” 14Pilato úye-ma ɔnini, “Bi ɔsu? Bi bɔƒiɔ na ɔ́ƒiɔ?” Nsu bana ƒui básɔ báva momoomo básu banini, “Kana-nwu mana ugyii lɛlɔ!” 15Ka Pilato ɔɔyɔ́ ka ebiti ada-ma ɔsu ni, ɔ́nyonu Baraba úte-ma. Na ɔ́ya na bébo Yesu kaduɛ ku kɔbuli kɔni na bélii básala, na úti-nwu úte bekpone ɔnii batákana-nwu bamana ugyii lɛlɔ. 16Bekpone bammɔ bétiku Yesu na bétéduo aban unengu ɔmmɔ kaduli na bálɔ bekpone bakladi banii bebo. 17Amu na béti awu ugyiedi ɔdi bákya Yesu aani ɔga kalɛ, na bédi liyu kabwa kadi bébi-nwu aani kagabwa. 18Na bakya beewi-nwu anumi kalɔ banini, “Yiidu! Yudaƒuɔ Ɔga ulie ngba gyɔlɔɔ!” 19Béti kegyiimi bébo-nwu kuli na bétuo lisuo béwi-nwu lɛlɔ. Amu na bálɛ akɔnkɔ na nwuna anumi na béboku eli kalɔ béte-nwu. 20Uwi ɔni na báma-nwu báwɔlɔ ni, bédie nwuna awu ugyiedi ɔmmɔ na basɔku nwuna lɛwu geen bakya-nwu. Amu na bétiku-nwu bátɔlɔku banii batákana-nwu bamana ugyii lɛlɔ. 21Uwi ɔni na bakɛ bésela ni, básiaku ɔnana ɔni baalɔ Simon ka ɔ́si lɛkpaklɔ ɔdubo Yerusalem. Amu na bekpone bammɔ básu-nwu banii ɔlɛka ubunku Yesu ugyii ɔmmɔ buti. Na Simon ɔmɛni ɔ́si Sireni, na nwuna bebi ndi Aleksandra ku Ruƒo. 22Béti Yesu bésienku kataku kadi baalɔ Golgota ɔni kalɔ ndi kesii kani nálɛ ukyuli kuli. 23Mmɔ na béte-nwu ntɛ bɔni na básala ku kuvo kɔni mbo ɔdu kati kati banii ɔni, nsu Yesu útani. 24Amu na bekpone bammɔ bákana-nwu bámana ugyii lɛlɔ mmɔ. Na bátu egulabi bánu asa na béti nwuna lɛwu béle béte lɛlɔ kalɛ na bati ɔdi biala ku nwuna lɛla. 25Bákana-nwu bámana ugyii lɛlɔ na ɔtanta lɛdɔ yaalenwi. 26Na bébo kegyiikɛ kadi bámana-nwu eli na bénweni lɛla lɛni ɔsu na bádu-nwu básia-ka lɛlɔ banini, “Ɔmɛni ndi Yudaƒuɔ Ɔga.” 27Na bákana beyune inyɔ lɛnɔ bámana ligyii lɛlɔ mmɔ bébunku Yesu. Unwi ɔ́ma-nwu kɔdianu kakɛ, na unwi lɛnɔ ɔ́ma-nwu kɔmiinu kakɛ. 28Ɔmɛni úbo úte lɛni kalɛ na bénweni bése na Bunweni Kedee Ɔku kemo banini, “Bádu-nwu bébunku ekpidi bablane.” 29Bekyuli bani návi ƒui bákunku bana eli na bédumi Yesu básu banini, “Ɛhɛɛn! Awɔ násu ka adubɔƒɛ bula kakpakɔ kenengudi na asɔ atu-ka emeyi atɛ kama! 30Yu na aƒɔ lɛlɔ asiku kukpi enu kemo na bɔnu!” 31Lɛni kani na bakpane benengu ku ɔda bubo ala batinane bammɔ lɛnɔ báma-nwu básu lɛlɔ banini, “Úbunku badi, nsu ulákana nwuna lɛlɔ bubunku! 32Si anwu ɔni baalɔ Yudaƒuɔ Ɔga mɛni ndi Kristo ɔni na Katɔti ɔ́ƒuna úse sɔsɔ ni, ɔkya ɔkplu na ɔyu ɔ́si ugyii lɛlɔ ubo kalɔ na bɔƒɔ-nwu bɔdi!” Nkyuli inyɔ bani na bákana bámana ligyii lɛlɔ bébunku Yesu mɛni ni, ama lɛnɔ bédumi-nwu. 33Ɔƒii uwi ni, kalɔ kammɔ ƒui kábla suu. Na ɔmɛni ɔ́bla lɛni laa útédu lɛdɔ ɛtɛ kemo. 34Na lɛdɔ ɛtɛ ɔmmɔ kemo ni, Yesu ɔ́va momoomo ɔ́su ɔnini, “Eli, Eli, lama sabaktani?” Bɔtɛmi bɔmɛni kalɔ ndi bɔnii, “Mina Ati, mina Ati, bi ɔsu na áda-mi ányonu?” 35Bekyuli bani nnye mmɔ badi bénu lɛla lɛni na ɔ́su na badaku lɛlɔ bɔsu banini, “Binu! Ɔɔkpali Elia.” 36Bana akɔ ɔdi úkeli útéti unwo ɔni na béti bákya ntɛ bɔni nányi kemo na úti ɔ́tu kegyiimi kadi lɛlɔ úboku Yesu ɔnii ɔni. Amu na ɔ́su bakladi ɔnini, “Bɛya na bɔnu si Elia ɔdubo ubamami-nwu ɔsiku ugyii ɔmɛni lɛlɔ!” 37Nsu Yesu ɔ́va momoomo na ɔ́yula. 38Kɔnakunwi ni, kɔdi kubendi kɔni nƒa Yudaƒuɔ kakpakɔ na béti bábala Katɔti katɔma kedee kayakun mmɔ kɔ́bwɛ kemo inyɔ kɔ́si katɔ kúbewi kalɔ. 39Na ka bekpone unengu ɔni nnye ugyii ɔmɛni anumi únu Yesu bɔva na ɔ́nu kalɛ na úkpi ni, ɔ́su ɔnini, “Sɔsɔ na ukyuli ɔmɛni ɔdi Katɔti Ubidi.” 40Beleku badi lɛnɔ benye ɔgyu na baanu. Bana akɔ badi ndi Maria Magdalene ku Salome ku Maria ɔni bebi ndi Yakobo ɔnamudi ku Yose. 41Uwi ɔni na Yesu ɔ́kya Galilea ni, ama nátaasiaku-nwu na béteebunku-nwu. Beleku babambadi pii bani násiaku-nwu bébo Yerusalem lɛnɔ benye mmɔ. 42Ala amɛni ƒui álɛ na limeyi lɛni ntɔ lɛnwunameyi lɛlɔ. Na ka ɔdaku useyi uwi budu ni, 43Yudaƒuɔ litemi batɛne kemo unwi ɔni baalɔ Yoseƒ na ɔ́si Arimatea ni, úse kayi na úsie utánu Pilato. Yoseƒ ɔmɛni ɔlati ɔdi ukyuli ɔni nnye mɔɔsia anu na Katɔti lɛga kadikɔ bubo lɛlɔ. Ka útédu Pilato kudɔ ni, úvele-nwu ɔnii ute-nwu ulu na ɔƒami Yesu ukpine ɔmɛni utáva asa na lɛnwunameyi lidu. 44Ɔmɛni ɔ́bla Pilato kalɛ kadi ka únu ɔnii Yesu úkpi pla lɛni. Anwuɔsu ɔ́lɔ bekpone unengudi ɔni nnye ablala amɛni kenye mmɔ, na úye-nwu únu si Yesu úukpi sɔsɔ. 45Na ka unengu ɔmɛni ɔ́su-nwu ka sɔsɔ na ɔdi ni, Pilato úte Yoseƒ kuƒi ɔnii utáƒami ukpine ɔmmɔ. 46Amu na Yoseƒ úse útáƒami Yesu ukpine na únyimi-nwu ɔ́kya lɛdiku lɛwɔdi lɛni na úye kemo. Na úti-nwu útákya lɛtakpɛ kaƒiɔtɔ kani béku bése na kɔbi kɔdi kaƒɔna. Amu na ɔ́ya na béminime lɛtakpɛ lɛdi béti bétile kaƒiɔtɔ kamɛni kenye. 47Na uwi ɔmɛni kemo ni, Maria Magdalene ku Maria ɔni ndi Yoseƒ uni bébo mmɔ bébenye bánu kesii kani na béti Yesu ukpine bátákya.

will be added

X\