MARKO 12

1Amu na Yesu úbo-ma lɛgba ɔnini, “Dii ni, ɔnana ɔdi úse kɔdingyii kemo kadi. Na ɔ́gyi ɔba ɔ́mana-ka. Na úku ubu na kalɔ kammɔ ntɛ kesii kani na ɔdubo ebi ammɔ ntu butaamana teewi. Na ɔ́tu kesii kani nákuku kalɛ na benye mmɔ bataagyumana kemo kammɔ. Amu na úti kemo kammɔ úte kabla bablane badi ɔnii bataanu-ka lɛlɔ, na anwu ku-ma beti lɛla lɛni bákɛ mmɔ bele. Amu na ɔ́tɔlɔ úsie ulu. 2Ka uwi údu na béde ebi ammɔ ni, ɔnana ɔmɛni ɔ́tala ɔtu ɔdi ɔ́kya-ma ɔnii si béede ebi ammɔ ni, na beti nwuna kakɛ bete ɔnana ɔmmɔ na uboku-nwu. 3Nsu nwuna kabla bablane bamɛni béƒie ɔtu ɔmɛni bébo na bágya-nwu, na ɔ́tɔlɔ ku enukplu. 4Amu na ɔnana ɔmɛni ɔ́sɔ ɔ́tala ɔtu ɔbambadi. Na ka úsie ni, kabla bablane bamɛni bébo-nwu na ɔ́ƒɔ ɔlɛ lili, na béwi-nwu anumi kalɔ geen. 5Amu na ɔnana ɔmɛni ɔ́sɔ ɔ́tala ɔtu ɔbambadi lɛnɔ, na bébo anwu lɛnɔ na bádu-nwu. Ɔ́sɔ ɔ́tala babambadi pii. Na bébo badi na bádu bakladi. 6“Ukyuli ɔni násɔ úbu na ɔdubɔtala-nwu ndi ɔnana ɔmɛni ubidi ɔyɔne. Kawɔlɔkɔ ni, ɔ́tala ubidi ɔyɔne ɔmɛni. Na ɔ́su lɛlɔ ɔnini, 'Mɔɔƒɔ́ taadi ka badubute mina ubi anwu ɔbu.' 7“Nsu kabla bablane bammɔ básu lɛlɔ banini, 'Ɔmɛni ndi bula unwoti ala ɔdine. Bibo na bɛya bɔdu-nwu, na buti nwuna kadikɔ bɔbla bula kadi!' 8Anwuɔsu béƒie ɔnamu ɔmɛni. Na ka bádu-nwu ni, bébo-nwu báva kemo kammɔ ɔba kama.” 9Amu na Yesu úye benengu bammɔ ɔnini, “Bi na bɛɛkali ka ɔnana ɔmɛni ɔdubɔbla? Ndubo-mii bɔsu! Ɔdubusie mmɔ utádu kabla bablane bammɔ na uti kemo kamɛni ɔkya bekyuli bamba lɛkɔkɔ. 10Ngyi ka bɛ́ka Bunweni Kedee Ɔku kemo kesii kani na ɔ́su ɔnii, 'Lɛtabi lɛni na batune béni báva banii lɛɛɛdia ni, ani mmomu nébenwini lɛtabi lɛni náƒɔ kuye litulo na atabi ƒui akɔ. 11Katɔti nábla lɛla bonwu lɛmɛni. Na lɛ́ƒɔ-bu anu geen!' ” 12Amu ka bénu lɛla lɛmɛni ni, Yudaƒuɔ benengu bákya ɔkplu ka nka beƒie Yesu. Ɔsika bagyi ka úbo lɛgba lɛmmɔ ɔ́sia-ma lɛlɔ. Nsu báyia bekyuli lisu lɛni nnye mmɔ. Anwuɔsu bágyu lɛgba bátɔlɔ-nwu kudɔ. 13Kama ni, bátala Ƒarisiƒuɔ badi ku Herode kama basiakune badi, na bésie Yesu kudɔ banii beesié na betéwi-nwu kenye benu. 14Ka bétédu-nwu kudɔ ni, básu-nwu banini, “Ala ɔtinane, bɔgyi ka aasu litemi geen uwi biala. Na alávumana ƒula etemila na ɔ́si kalɛ bekyuli baakali taasiku-ɔ lɛlɔ ɔsu. Alánu anii ɔmɛni ɔdi ukyuli ubendi iye ɔmɛni ɔdi ukyuli ubliidi. Nsu aatina ukyuli biala Katɔti kudɔ ulu na ulu geen lɛlɔ. Anwuɔsu su-bu si ɔdia ka butaaƒɔ kuyi teete Romaƒuɔ Ɔga Unengudi. 15Ɔlɛka bɔƒɔ, munuu butaƒɔ?” Nsu Yesu ɔ́ti ka anumi lɛlɔ bekyuli badi, na úye-ma ɔnini, “Bi ɔsu na bɛɛyɔ́ ka bɛkywɛ-mi kakpagyuɛ? Biti kaplɛ kadi bite-mi na lɛnu.” 16Béti béte-nwu. Amu na úye-ma ɔnini, “Ɔma lili ku lɛnyi bávɔ básia mɛni?” Mmɔ na bédie kenye banini, “Romaƒuɔ Ɔga Unengudi Kaesare na ɔdi.” 17Amu na Yesu ɔ́su-ma ɔnini, “Amu ni, biti lɛla lɛni ndi Kaesare lɛdi bite-nwu. Na biti lɛla lɛni ndi Katɔti lɛdi bite Katɔti.” Ɔmɛni ɔsu ni, bébimi bana inye béwi, ɔsika ɔ́bla-ma dɛye dɛye. 18Amu na Sadukiƒuɔ bani mɔɔsu ka si ukyuli úkpi ni, ɔsɔ uláta teelie ngba badi bébo Yesu kudɔ, na bébeye-nwu litemi lɛdi. 19Béye-nwu banini, “Ala ɔtinane, Mose únweni úse-bu ka si ɔnana ɔdi úkpi na ɔ́da ulekudi úse ɔni na bátawɔ bebi ni, ɔlɛka ɔnwani ɔnanabi uti ukpinele ɔmɛni kalɛ na si báwɔ bebi ni, na badubɔbu-ma ka ɔgya udeedi ɔmmɔ bebi badi. 20Amu na dii ni, banwani maatɛ badi bélie. Udeedi úti uleku ɔdi na úkpi ɔni na bátawɔ ubi ɔdi. 21Amu na unyɔdi lɛnɔ úti-nwu, na anwu lɛnɔ úkpi ɔni na anwu ku uleku ɔmɛni bátawɔ ubi ɔdi. Ɔnwani ɔtɛdi lɛnɔ úbeti uleku ɔmɛni, na anwu lɛnɔ úbekpi ɔni na bátawɔ ubi ɔdi. 22Lɛni kani na bana maatɛ bammɔ ƒui béti uleku unwi ɔmɛni bása. Nsu bana ƒui békpi ɔni na ama ku uleku ɔmɛni bátawɔ bebi badi. Na kawɔlɔkɔ ni, uleku ɔmɛni lɛnɔ úkpi. 23Na uwi ɔni na bekpine ƒui badubɔta bɔsi kekpine bebelie ngba ni, bana akɔ ɔmani ndubɔbla uleku ɔmɛni ɔgya ka bana nkyuli maatɛ bamɛni ƒui béti-nwu dii?” 24Amu na Yesu údie kalɔ ka, “Uuuse lɛni munu munu. Mɔɔnu ka bilenu litemi lɛmɛni kalɔ, ɔsika bɛɛɛgyi Bunweni Kedee Ɔku kemo etemila iye Katɔti ɔyikun. Anwuɔsu na bɛɛƒiɔ́-nwu. 25Uwi ɔni na bekpine badubɔta ni, badubuse aani Katɔti batu kalɛ, na beleti beleku. 26Nsu na bekpine bɔsɔ taata litemi lɛlɔ ni, Mose únweni lɛla lɛdi na Bunweni Kedee Ɔku kemo ɔ́siku kugyii blii kɔni mɔɔkywí lɛlɔ. Munuu bilenyimo? Mmɔ na únweni ka Katɔti ɔ́su-nwu ɔnini, 'Ami ndi Abraham Katɔti ku Isak Katɔti ku Yakob lɛnɔ Katɔti.' 27Ɔmɛni kalɔ ndi ɔnii bekyuli bani néekpi bamua beli ngba, na ɔdi ama lɛnɔ Katɔti. Nsu amii ni, bɛ́yii ulu ɔmmɔ geen!” 28Amu na ɔda bubo ala ɔtinane ɔni nnye mmɔ únu kɔtɛ kɔni badaku. Na únu ka Yesu údie lɛla lɛmɛni kemo kaduɛ. Anwuɔsu ɔ́ni úde Yesu na úye-nwu ɔnini, “Ɔda bubo bɔmani ndi bunengudi ƒui na ɔda bubo ƒui akɔ?” 29Mmɔ na Yesu ɔ́su-nwu ɔnini, “Bénweni ɔda bubo bɔni ntulo ƒui básu banini, 'Israelƒuɔ, binu kaduɛ! Unwoti ndi bula Katɔti, na anwu lɛti pɛ nkya. 30Anwuɔsu ɔlɛka bɛyɔ Unwoti ɔni ndi bina Katɔti ku bina kayi ƒui ku bina kɔyu ƒui ku bina kasusu ƒui ku bina ɔyikun ƒui.' 31Na ɔda bubo bɔni nsɔ nsia ɔmɛni kama ndi ka, 'Yɔ ƒula ukyulikpana aani ƒula lɛlɔ kalɛ.' Ɔda bubo bɔbambadi bɔsɔ buuubo bɔni ntulo ɔda bubo bɔmɛni.” 32Amu na ɔnana ɔmmɔ údie kenye ɔnini, “Ala ɔtinane, ásu kaduɛ! Sɔsɔ na ɔdi aani kalɛ na áasu ka Unwoti lɛti pɛ ndi Katɔti, na Katɔti ɔbambadi ɔsɔ uuubo ntu anwu lɛti pɛ. 33Na ɔlɛka ukyuli ɔyɔ Katɔti ɔ́siku nwuna kayi kemo ƒui ku nwuna kasusu kemo ƒui ku nwuna ɔyikun kemo ƒui. Na ɔlɛka ɔyɔ nwuna ukyulikpana aani kalɛ na ɔɔyɔ́ anwu ɔlatidi nwuna lɛlɔ kalɛ. Ɔdia ka ukyuli ɔsia ɔda bubo bɔmɛni kama utulo si úti bebuo ku akpala abambadi útákpa Katɔti.” 34Ka Yesu únu lɛnunda ala ani kalɔ na ɔnana ɔmɛni údie ni, ɔ́su-nwu ɔnini, “Awɔ ni, kébu blii asa na eduo Katɔti lɛga bɔdi kemo.” Ɔmɛni kama ni, ukyuli ɔdi ɔ́sɔ útese kayi ɔnii uuye Yesu lɛla lɛdi lɛnɔ. 35Ka Yesu ɔkya ɔɔtina litemi buni na Yudaƒuɔ kakpakɔ ni, úye litemi lɛdi ɔnini, “Dɛ na ɔ́bla asa na ɔda bubo ala batinane baasu ka Ukyuli Ɔƒunadi ɔdi Ɔga Dawid kaba kemo ubi? 36Dawid ɔmmɔ ɔlati nkɛnku Katɔti Kɔyu lɛlɔ na únweni úse ɔnini, 'Katɔti ɔ́su mina Ɔti ɔnini, “Sɔ lie-mi kɔdianu kakɛ wetédu uwi ɔni na maya na akɔliku ƒula lɛgba anya ƒula bekisine lɛlɔ.” ' 37Na mɛni ni, Dawid ɔlatidi ɔɔlɔ Ukyuli Ɔƒunadi ɔnii nwuna ɔti. Anwuɔsu dɛ na ɔ́bla na anwu ɔmmɔ ɔɔbla Dawid kaba kemo ubi?” Na bekyuli pii badi benye beenú ala ani na Yesu unye ɔɔsu ku kubiti. 38Ka Yesu ɔdaku bekyuli bamɛni ala bɔtina ni, ɔ́su-ma ɔnini, “Bɛnu kaduɛ na ɔda bubo ala batinane lɛlɔ. Ama mɔɔkya lɛwu libendi na baayɔ́ busie taavi kuyeya kalɛ na bekyuli bataakya-ma kenye ku ɔbu. 39Ama mɔɔwia ka belie kuliekɔ kunengudi na kasalakɔ ku emeyi kadikɔ. 40Beedie bekpinele kɔkpana. Na kama ni, beeƒie-ma bana ala ƒui taaƒɔ. Na beetile Katɔti atu si baakpali katɔ, ɔsika baatɛmi gyɔlɔɔ teeti taatina lɛlɔ. Bana kɔtu bɔni bɔdubo bumomo butulo bekyuli bakladi bɔdi ƒui!” 41Amu na Yesu ɔ́yu úlie kalɔ na kakpakɔ mmɔ na egulabi kesekɔ kudɔ, na ulie ɔɔnu kalɛ na bekyuli baaví teetéte bana etela. Balakɛne pii bététe egulabi bonwu banii beeti batina lɛlɔ. 42Na ukpinele ɔwabane ɔdi lɛnɔ úbavi na úti kaplɛ inyɔ útéyi. 43Amu na Yesu ɔ́lɔ nwuna batɛyane ɔ́sala lisu na ɔ́su-ma ɔnini, “Mɔɔsu-mii geen ka na Katɔti anumi ni, ukpinele ɔwabane ɔmɛni néte egulabi útulo na bekyuli bamɛni ƒui akɔ. 44Sɔsɔ ni, bekyuli bamɛni ama bana lɛlakɛ kenye na bakɛ bébo beete etela amɛni. Nsu ni, basɔ bebo egulabi abambadi pii. Na uleku ɔmɛni anwu ni, ina ka ɔwabane na ɔdi ni, úti lɛla lɛni nse-nwu ƒui úbete. Lɛla lɛni na ɔdubuti uye nwuna lɛdila ni, ani na úti úbete mɛni.”

will be added

X\