MARKO 11

1Uwi ɔni na bákpɛ béde Yerusalem na bétédu Betƒage ku Betania amadɔ mmɔ ni, bébedu kɔbi kɔni baalɔ Inɔ Egyii Kɔbi kudɔ. Na mmɔ ni, Yesu ɔ́tala nwuna batɛyane inyɔ ɔnii ama bataatɔ. 2Na ɔ́su-ma ɔnini, “Si bítédu ɔma udeedi ɔni bɛdubɔda bɔlɛ kemo ni, bɛdubɔnu ka bakya ebuo ala utine ubi ɔdi kabuli bényene mmɔ ɔni na ukyuli ɔdi útelie-nwu kama kudii. Bidie-nwu kabuli na biti-nwu biboku-mi. 3Na si ukyuli ɔdi úye-mii ɔnii, 'Bi bɛɛka-nwu?' ni, bɛsu-nwu ka bina Unwoti mɔɔwia-nwu, na biti-nwu biboku mɛni ɔƒaani.” 4Anwuɔsu nkyuli inyɔ bamɛni bésie na bátánu ka bakya ebuo ala utine ubi ɔdi kabuli bényene ukyuli ɔdi kayakun. Na uwi ɔni beedie-nwu na kabuli kemo ni, 5bekyuli bani nnye mmɔ badi béye-ma banini, “Bi biidie-nwu kabuli bɛbla?” 6Básu kalɛ na Yesu ɔ́su-ma. Amu na ama lɛnɔ béte-ma kuƒi na bédie-nwu. 7Ka béti ebuo ɔmɛni béboku Yesu ni, bébimi bana adi béwi ebuo ɔmmɔ lɛlɔ, na Yesu ɔ́kɔ úlie-nwu kama. 8Bekyuli pii lɛnɔ bébimi bana adi béwi kalɔ, na badi lɛnɔ békulo evete ku like béwi ulu ɔni lɛlɔ na ɔdubo bɔvi. 9Bekyuli bani ntɔ ku bani nkpɛ ƒui baava taasu banini, “Hosiana! Bimwi anwu ɔni ndubo na Blɔti lɛnyi kemo! 10Biti bumwi bite Ɔga Dawid lɛga kadikɔ kani ndubo! Hosiana ute Katɔti na katɔ ƒui!” 11Ɔni na úduo Yerusalem ni, Yesu úsie Yudaƒuɔ kakpakɔ. Na ɔ́nu mmɔ ku lɛla biala ɔ́mana. Nsu ka kadi káayu ɔsu ni, ɔ́tɔlɔ úsie Betania ku nwuna batɛyane na bátátɛ mmɔ. 12Kadi kégye uwi ɔni na bávia Betania badubo ni, kɔka kúbo kɔɔda Yesu. 13Ɔ́nu ɔgyu ka kɔdingyii kɔdi kunye kɔni lɛlɔ na evete asia pii. Anwuɔsu úsie ɔnii útánu si ebi adi asia-ku lili. Nsu ka údu kugyii kɔmmɔ kalɔ ni, ɔ́nu ka kútanwu ebi. Evete kani nsia-ku lili. Na uwi ɔni na kɔsɔ kɔnwu lɛnɔ útedu tɔ. 14Amu na Yesu ɔ́su kugyii kɔmmɔ ɔnini, “Ukyuli ɔdi uleti ƒula kegyiibi ulakya kenye kudii lɛnɔ!” Na nwuna batɛyane bénu ka ɔ́su lɛni. 15Ka bétéduo Yerusalem ni, Yesu úsie Yudaƒuɔ kakpakɔ na ɔkya ɔɔgyá bekyuli bani nkya mɔɔdi kuye na mmɔ taalɛku kaduli kammɔ. Údi egulabi bavumanane ala kasiakɔ úbo. Na údi bani nlie beeyé babloduma lɛnɔ eboku úbo. 16Na útatuna ɔnii ukyuli ɔdi uti lɛla lɛdi ɔvinku útéye na kakpakɔ kaduli mmɔ. 17Amu na ɔ́tina bekyuli bammɔ ala na ɔ́su-ma ɔnini, “Bénweni na Bunweni Kedee Ɔku kemo ka Katɔti ɔ́su ɔnii, 'Badubɔlɔ mina kesii banii kaduli kani kemo na bayawine ƒui baakpali katɔ.' Nsu amii bíti-ka bínwini beyune kabɛkɔ!” 18Bakpane benengudi ku ɔda bubo ala batinane bani nkya mmɔ bénu etemila ani na Yesu ɔ́su. Anwuɔsu báwia ulu ɔni lɛlɔ na nka basia na badu-nwu. Nsu baayia-nwu ɔ́si kalɛ na lɛlɔ lɛɛyɔ́ bekyuli ƒui na nwuna ala bɔtina ɔsu. 19Ɔni na useyi uwi údu ni, Yesu ku nwuna batɛyane bátɔlɔ na ɔma ɔmmɔ kemo. 20Kadi kégye ɔtanta uwi ɔni na bákɛ ulu lɛlɔ bésela ni, bánu ka kɔdingyii kɔmmɔ kúkpi ku lidu. 21Petro ɔ́kali lɛla lɛni nébo, na ɔ́su Yesu ɔnini, “Ala ɔtinane, nu kugyii kɔni na éwida mmɔ kúkpi!” 22Yesu ɔ́su-ma ɔnini, “Bɛƒɔ Katɔti bɛdi. 23Mɔɔsu-mii geen ka ukyuli biala ɔni ndubɔsu kɔbi ɔnii kɔgyu na kutéduo ɛpu kemo, na nwuna kayi kétetile-nwu ulu mmomu ɔ́ƒɔ ɔ́di ni, ɔdububo ute lɛni. 24Anwuɔsu mɔɔsu-mii nnii lɛla biala lɛni na bɛdubuye Katɔti na uwi ɔni na bɛɛkpali katɔ ni, bɛƒɔ bɛdi bɛnii bɛdubɔkɛ-ni. Na Katɔti ɔdubɔbla lɛla lɛmmɔ ute-mii. 25Na si bíboku eli kalɔ bɛnii bɛɛkpali katɔ na bɛ́nu ka ukyuli ɔdi ɔ́ƒiɔ-mii ni, ɔlɛka biti bɛkyiɛ-nwu kalɛ na bina Ati ɔni nkya katɔ lɛnɔ weti bina ekpidi wakyiɛ-mii. 26Nsu si bíteti bítakyiɛ-nwu ni, bina Ati ɔni nkya katɔ lɛnɔ uleti bina ekpidi ulakyiɛ-mii.” 27Amu na Yesu ku nwuna batɛyane básɔ bésie Yerusalem. Ɔni na Yesu úsie útéduo kakpakɔ mmɔ ni, bakpane benengu ku ɔda bubo ala batinane ku ɔma benengu badi bébo-nwu kudɔ. 28Na bébeye-nwu banini, “Ɔma ɔyikun na aabla ala amɛni? Na ɔma lɛnɔ néte-ɔ ulu?” 29Yesu údie kenye ɔnini, “Kudeedi ni, ndubuye-mii litemi linwi pɛ. Na si bídie-ni kenye ni, ndubɔsu-mii ukyuli ɔni ɔyikun nda mɔɔbla ala amɛni. 30Bɛsu-mi wɛ na Yohane ɔ́ƒɔ ɔyikun ɔ́siku asa na ɔ́kpila bekyuli ntu na ketu kemo? Ɔyikun ɔmmɔ ɔ́si Katɔti kudɔ, munuu ukyuli ɔyawine néte-nwu ulu?” 31Bése kalɔ baaní lɛla lɛmɛni teenene na bana akɔ, na beeye lɛlɔ banini, “Bi na ɔlɛka bɔsu? Si bɔ́su bɔnii ɔyikun ɔmmɔ ɔ́si Katɔti kudɔ ni, ɔdubuye ɔnii, 'Si use lɛni ni, bi ɔsu na bitaƒɔ Yohane bitadi?' 32Nsu si bɔ́su-nwu bɔnii ukyuli ɔyawine nátala-nwu ni, ɔmɛni lɛnɔ ɔɔɔdia!” Baayia ka basu lɛni lɛnɔ, ɔsika bekyuli bani nnye mmɔ ɔdi biala ɔ́ƒɔ ɔ́di ka Yohane ɔdi Katɔti kenye udiene. 33Anwuɔsu básu Yesu banini, “Bɔɔɔgyi.” Amu na Yesu ɔ́su-ma ɔnini, “Ami lɛnɔ lɛɛɛdubo-mii ɔyikun ɔni mbo ɔsu mɔɔkana ala amɛni bɔbla bɔsu!”

will be added

X\