LUKA 6

1Na lɛnwunameyi lɛdi lɛlɔ ni, Yesu ku nwuna basiakune bakɛ ulu ɔni ntɛ ɔ́vi edula kemo kadi. Amu na basiakune bammɔ bakya baaƒɛ edula ammɔ taavumi taakun. 2Amu na Ƒarisiƒuɔ badi béye-ma banini, “Bi ɔsu na bɛɛbla lɛla lɛni na bula ɔda bubo bútete-bu kuƒi ka bɔbla na lɛnwunameyi lɛlɔ?” 3Mmɔ na Yesu údie kenye na úye-ma ɔnini, “Bítaka Bunweni Kedee Ɔku kemo ala bítenu lɛla lɛni na Dawid ɔ́bla uwi ɔni na kɔka kɔɔda anwu ku nwuna bekyuli? 4Dawid útéduo Katɔti ɔtɔ kemo na útéti adila ani na béti bákpa béte Katɔti ɔ́di. Na úte nwuna badi lɛnɔ na bádi ɔdi ina ka ɔdi bɔƒiɔ na bula ɔda bubo kenye ka ukyuli bamba ɔdi adila ammɔ. Amu ntu Katɔti ɔkpane lɛti pɛ.” 5Amu na kawɔlɔkɔ ni, Yesu ɔ́su-ma ɔnini, “Ukyuli Ɔyawine Ubi ni, anwu ndi Unwoti ute lɛnwunameyi.” 6Na lɛnwunameyi lɛbambadi lɛlɔ ni, Yesu úsie Yudaƒuɔ kasalakɔ na útátina ala. Na mmɔ ni, ukyuli ɔdi ɔkya ɔni na nwuna kɔdianu kɔ́gogolo-nwu. 7Na ka ɔda bubo ala batinane ku Ƒarisiƒuɔ badi baawia ulu ɔni lɛlɔ na basia na bada Yesu kenye ka ɔɔƒiɔ́ ɔda bubo bɔmmɔ ɔsu ni, básia-nwu anumi kaduɛ banii baanu si wabwi ɔlɛ na lɛnwunameyi lɛlɔ. 8Nsu ka Yesu ɔ́nu bana kasusu ɔ́ti ɔsu ni, ɔ́su ɔnana ɔmmɔ ɔnini, “Ta nye, na alɛ ebo anumi mɛni.” Na ɔnana ɔmmɔ ɔ́ta úbenye-ma anumi. 9Amu na Yesu úye-ma ɔnini, “Bi na bula ɔda bubo búte-bu ulu ka bɔbla na lɛnwunameyi lɛlɔ? Ɔdia ka bɔbla lɛbuni na lɛnwunameyi lɛlɔ munuu ka bɔbla likpidi? Iye ni, ɔdia ka bɔƒɔ bekyuli ngba munuu bɔyila-mu?” 10Yesu ɔ́tɛ anu ɔ́mana-ma na ɔ́su ɔnana ɔmmɔ ɔnini, “Nene ƒula kɔnu.” Únene-ku, na mmɔ kani ni, nwuna kɔnu kɔ́sɔ kɔ́bla-nwu kaduɛ. 11Kɔnyi kɔ́kɔ bana ƒui ɔsu bése kalɔ beeti kasusu na lɛla lɛni na badubɔkana Yesu bɔbla lɛlɔ. 12Uwi ɔmmɔ kemo ni, Yesu ɔ́tɔlɔ úsie kɔbi lɛlɔ. Na ɔkya ɔɔkpali katɔ usien ɔmmɔ ƒui. 13Ka kadi kégye ni, ɔ́lɔ nwuna basiakune ƒui úbasala nwuna kudɔ na ɔ́ƒuna leevu-inyɔ bani na ɔ́sia-ma lɛnyi ɔnii nwuna batalane. 14Ama ndi Simon ɔni na ɔ́sia lɛnyi ɔnii Petro ku ɔnwani Andrea ku Yakobo ku Yohane ku Ƒilipo ku Bartolomeo 15ku Mateo ku Toma ku Alƒeo ubidi Yakobo ku Simon ɔni bátaalɔ banii ukyuli ɔni mɔɔyɔ́ nwuna ɔma 16ku Yakobo ubidi Yuda ku Yuda Iskariot ɔni nébenwini kakya ɔkyane. 17Uwi ɔni na Yesu ku nwuna basiakune báyu bási kɔbi kɔmmɔ lɛlɔ ni, bébo bébenye kesii kani na nse ƒiaa. Na nwuna basiakune pii badi bakya mmɔ ku bekyuli lisu bonwu lɛni nási Yudea kalɔ lɛlɔ ƒui ku Yerusalem ku lɛma lɛni nde ɛpu kɔtu lɛni ndi Tiro ku Sidon. 18Bébo banii bebenu ala ani na Yesu ɔɔtina na ɔbwi-ma lɛlɛ lidu lɛni na beeƒi. Bekyuli bani na ayu ekpidi eekpóku lɛnɔ bébo na ɔ́bwi-ma. 19Bekyuli bammɔ ƒui bákya ɔkplu ka betuku Yesu na bana lɛlɛ lɛba-ma, ɔsika ɔyikun ɔdi udu útaalɛ Yesu lɛlɔ kemo na ɔɔbwi bekyuli ƒui. 20Yesu ɔ́sia nwuna basiakune anu na ɔ́su-ma ɔnini, “Lɛlɔ litaayɔ amii bawabane, ɔsika Katɔti lɛga kadikɔ kadi bina ɔdi! 21Lɛlɔ litaayɔ amii bani na kɔka kɔɔda ɔƒɛni, ɔsika amii ndubumo! Lɛlɔ litaayɔ amii bani muuwulo ɔƒɛni, ɔsika bɛdubɔma! 22Lɛlɔ litaayɔ-mii si bekyuli beekisi-mii na beení-mii na beedumi-mii na baasu-mii banii bibo likyulikpi na ami Ukyuli Ɔyawine Ubi ɔsu! 23“Bɛkɛ ebiti si amɛni ƒui aalɛ́ na bɛtɔ ku ebiti, ɔsika Katɔti ɔdubute-mii lɛyuƒɔla bonwu na katɔ. Ɔsika ala amɛni udu na béti bábla Katɔti kenye bediene bani nákya ƒui. 24“Nsu bɔbwɛ muute amii balakɛne, ɔsika bɛ́ɛkɛ bina ngba ebiti mɛni! 25Bɔbwɛ muute amii bani némo ɔƒɛni, ɔsika kɔka kɔdubo-mii bɔda! Bɔbwɛ muute amii bani mɔɔmá ɔƒɛni, ɔsika bɛdubo kɔnyana ku keku buwulo! 26Bɔbwɛ muute amii bani na bekyuli ƒui beemwi ɔƒɛni, ɔsika lɛni kani na bana bati kuuku bémwi bekyuli bani nátɔlɔ bekyuli ka badi Katɔti kenye bediene. 27“Nsu amii bani muunú-mi butemi ni, mɔɔsu-mii nnii bɛyɔ bina bekisine na bɛbla lɛbuni bite-ma. 28Na bekyuli bani mɔɔkpali ala taakya-mii ni, bite-ma kusɛ kusɛ. Na bekyuli bani mɔɔbla-mii kalala ni, bɛkpali katɔ na bana lili. 29Na si ɔdi ɔƒiɛmi-ɔ kɔnu ɔtugya unwi ni, ya na ɔƒiɛmi-ɔ ɔtugya unyɔdi lɛnɔ. Na si ukyuli ɔdi úti ƒula awu ɔni na aakya taasia ɔtɔdi lɛlɔ ni, ya na uti ɔtɔdi lɛnɔ si ɔɔyɔ́. 30Ukyuli biala ɔni mevele-ɔ lɛla lɛdi ni, te-nwu. Na si ɔdi úti-ɔ lɛla lɛdi ni, tasu anii aasia-ni kama. 31Lɛla lɛni na aayɔ́ anii babla bete-ɔ ni, ani kani na awɔ lɛnɔ ɔlɛka abla ete bekyuli. 32“Si bekyuli bani mɔɔyɔ́-ɔ kani na awɔ lɛnɔ aayɔ́ ni, bi ɔsu na ɔlɛka bemwi-ɔ? Alaekpidi bablane muedi ni, baayɔ́ bekyuli bani mɔɔyɔ́-ma. 33Na si bekyuli bani nábla-a lɛbuni kani na awɔ lɛnɔ aabla lɛbuni teete ni, bi ɔsu na ɔlɛka bemwi-ɔ? Alaekpidi bablane lɛnɔ baabla lɛni. 34Na si bekyuli bani na masɔku mete-ɔ lɛti pɛ na eevó ƒula ala teete ni, bi ɔsu na aawia ka bemwi-ɔ? Alaekpidi bablane lɛnɔ beevó teete bana bakpana kalɛ basɔku bete-ma! 35Mmomu ni, bɛyɔ bina bekisine na bɛbla-ma lɛbuni. Bivo ala bite-ma, na bina anu atasia ka badubɔsɔku bete-mii kokooko. Si bɛ́bla lɛni ni, bɛdubɔkɛ lɛyuƒɔla bonwu. Na bɛdubɔlɔ-mi banii Katɔti Ɔni Ntulo Ƒui bebi. Ɔsika Katɔti ubo kaƒɔ buni ute bani ala alaƒɔ-ma anu ku belikplune lɛnɔ muedi. 36Bitaanu kɔnyana aani kalɛ kani na bina Katɔti ɔɔnu kɔnyana. 37“Bitababla bitatɛku bekyuli litemi, na Katɔti lɛnɔ ulatɛku-mii litemi. Bitadu bekyuli kɔtɔ, na Katɔti lɛnɔ uládu-mii kɔtɔ. Biti bɛkyiɛ bekyuli, na Katɔti lɛnɔ weti wakyiɛ-mii. 38Bite bekyuli ala, na Katɔti lɛnɔ wete-mii ala. Geen ni, Katɔti ɔdubuyile-mii kɔvumi tɛtɛɛtɛ na nwuna lɛƒɔndia kenye. Keyile kani udu na ákɔku éte ukyuli ni, kana udu kani na Katɔti ɔdubɔkɔku ute-ɔ.” 39Amu na Yesu úbo-ma lɛgba ɔnini, “Ɔnumbwɛne ulakana ɔnumbwɛne ɔkpana bɔtɔnku. Si ɔɔɔdi lɛni ni, bana inyɔ ƒui badubɔnu beduo ubu kemo. 40Ala ɔtɛyane biala uletulo nwuna ɔtinane. Nsu si uwi ɔni na ɔtɛyane ɔmmɔ ɔ́wɔlɔ ala bɔtɛya ni, ɔɔbla aani nwuna ala ɔtinane kalɛ. 41“Bi ɔsu na aanu lɛlakpi lɛni nkya ƒula ɔnwani lɛnumi na alánu kegyiikɛ kani nsia-a lɛnumi ani? 42Dɛ na ɔ́bla na aasu ƒula ukyulikpana anii, 'Buvele, ya na lidie-ɔ lɛlakpi lɛnumi.' Na átakana na anu kegyiikɛ kani nsia-a lɛnumi? Anumi lɛlɔ ukyuli na adi! Ka kegyiikɛ kani nsia-a lɛnumi bɔtimi asa na anu nwaa na edie ƒ^ɔnwani lɛlakpi lɛnumi. 43“Kugyii kɔbuni kulánwu ebi ekpidi, na kugyii kukpidi lɛnɔ kulanwu ebi buni. 44Kugyii biala ni, kuna ebi lɛlɔ na baanu-ku taati. Belede kɔnwingyie ebi na liyu kugyii lɛlɔ, na belede atoo na lɛnyɛ kɔbuli lɛnɔ lɛlɔ. 45Ukyuli ɔbuni ni, ala abuni na uudie taalɛku nwuna akɛla abuni ani nkya nwuna kayi kemo. Na ukyuli ukpidi lɛnɔ uuboku akɛla ekpidi ani nkya-nwu kayi kemo. Ɔsika ala ani néyi ukyuli kayi kemo ni, anya na nwuna kenye kaasu. 46“Bi ɔsu na bɛɛlɔ-mi bɛnii Blɔti, nsu bilábla taasiaku lɛla lɛni na lɛ́su-mii lɛlɔ? 47Ukyuli biala ɔni muubo-mi kudɔ na uubo teebenu lɛla lɛni mɔɔsu na ɔɔbla taasiaku-ni lɛlɔ ni, ndubɔtina-mii kalɛ na ukyuli ɔmmɔ use. 48Use aani ukyuli ɔni mɔɔtú ɔtɔ na ɔ́ka awodu libu budie, na ɔ́nwu lɛti ku atabi kpakplaa úti ɔ́kya lɛtakpɛ lɛlɔ asa na ɔ́tu ɔtɔ ɔ́sia-nwu lɛlɔ. Ka ketu kéyi na kágba kávi awodu ammɔ kalɔ ni, ɔtɔ ɔmmɔ útabla lɛla lɛdi, ɔsika ɔ́kɛ kenyekɔ kabuni. 49Nsu ukyuli biala ɔni muunú-mi litemi na uleti-ni taada ni, use aani ukyuli ɔni mɔɔtú ɔtɔ na ɔtɔ kalɔ katayu ɔkplu. Ɔsu si uwi ɔni na ketu kéyi na kágba kávi ɔtɔ ɔmmɔ kalɔ ni, ɔɔƒɛ teewi kalɔ ku kɔku bonwu!”

will be added

X\