LUKA 5

1Limeyi lɛdi ni, Yesu unye ɛpu ɔni baalɔ banii Genesaret kɔtu, na bekyuli baanwanɛ lɛlɔ kalɛ na bakpɛ bede-nwu na benu Katɔti litemi lɛni na ɔɔsu. 2Yesu ɔ́nu ka lɛkɔlɔ inyɔ linye ɛpu kɔtu mmɔ na lɛsawu bewine bammɔ bátɔlɔ bésie baaƒɔ bana lɛsawu. 3Amu na Yesu ɔ́kɔ úduo unwi kemo ɔni ndi Simon ɔdi, na ɔ́su-nwu ɔnii udi ɔkɔlɔ ɔmmɔ usienku ntu anumi blii. Ɔkɔlɔ kemo mmɔ na úlie ɔ́tina bekyuli bammɔ ala. 4Ka ɔ́tina-ma ala ɔ́wɔlɔ ni, Yesu ɔ́su Simon ɔnini, “Di ɔkɔlɔ ɔmmɔ sienku kesii kani na ntu bɔmmɔ bɔ́gyu blii, na awɔ ku ƒula bakpana biwi bina lɛsawu na bidie lɛna.” 5Na Simon údie kenye ɔnini, “Ati, usien umodi ɔmɛni bɔ́bla kabla ku lɛnungyie na bútedie lɛla lɛdi. Nsu ni, ndubɔya na buwi lɛsawu lɛmmɔ aani kalɛ na ásu.” 6Béwi lɛsawu lɛmmɔ na bédie lɛna pii ɔni náya na bana lɛsawu líse kalɔ liikúlo. 7Ɔmɛni ɔsu ni, bébo bana bakpana enu na ɔkɔlɔ unyɔdi kemo banii bebo bebebunku-ma. Bébo na bédie lɛna béwi lɛkɔlɔ inyɔ lɛmɛni kemo tɛtɛɛtɛ ɔni blii nébu na lɛkɔlɔ lɛmmɔ lɛnyi ntu kemo. 8Ka Simon Petro ɔ́nu lɛla lɛni nálɛ mɛni ni, ɔ́lɛ akɔnkɔ na Yesu anumi na ɔ́su-nwu ɔnini, “Blɔti, takpɛ tede-mi, ɔsika alaekpidi ɔblane na ndi.” 9Lɛna pii lɛni na bédie mɛni ɔsu ni, ɔ́bla anwu ku nwuna badi kalɛ kadi. 10Lɛni kani na ɔ́bla Simon bakpana Yakobo ku Yohane bani ndi Sebedeo bebi lɛnɔ. Amu na Yesu ɔ́su Simon ɔnini, “Tayia. Ɔ́si ɔƒɛni úsela ni, bɛdubuteedie bekyuli teete Katɔti.” 11Ɔmmɔ kama ni, báni lɛkɔlɔ lɛmmɔ ƒui bétéwi utublii na bányonu lɛla biala béwi na bésie bátásiaku Yesu kama. 12Uwi ɔdi ni, Yesu úsie ɔma ɔdi kemo ɔni na ukyuli ɔdi ɔ́kya úteeƒi ɔlɛgyie. Amu ka ukyuli ɔmɛni ɔ́nu Yesu ni, ɔ́yu ɔ́tɛ kalɔ na Yesu anumi na úvele-nwu ɔnii, “Ati, si aayɔ́ ni, akana na aya na ɔlɛ ɔmɛni ɔba-mi.” 13Yesu únene kɔnu útuku-nwu. Na ɔ́su ɔnana ɔmmɔ ɔnini, “Mɔɔyɔ́ lɛni. Anwuɔsu ɔlɛ ɔmɛni ɔba-a.” Mmɔ kani ni, ɔlɛ ɔmmɔ ɔ́ba-nwu. 14Amu na Yesu úbo-nwu ɔda ɔnini, “Tasu ukyuli ɔdi lɛla lɛdi. Mmomu teesie siin na eti lɛlɔ atátina Katɔti ɔkpane. Na ɔdubɔnu-ɔ kaduɛ na wedie-ɔ kenye wete ukyuli biala ka sɔsɔ ni, ɔlɛ ɔmmɔ ɔ́ba-a. Na abla akpala aani kalɛ na Mose ɔda bubo bɔɔtina.” 15Nsu Yesu lɛlɔ kɔtɛ kuugyingya teesie ɔgyu kakaaka. Na bekyuli pii beebo kalɛ na benu-nwu ala bɔtina na ɔbwi-ma lɛlɛ lɛni nda-ma. 16Nsu uwi ndi uwi ni, ɔɔlɛ́ teesie kesii kani nábɛ taatákpali katɔ. 17Limeyi lɛdi ka Yesu ɔkya ɔɔtina ala ni, Yudaƒuɔ lɛkpa lɛni baalɔ Ƒarisiƒuɔ ku ɔda bubo ala batinane badi bási Galilea ku Yudea kalɔ lɛlɔ ekpo ekpo ƒui bébo bélie mmɔ. Na Katɔti ɔyikun ɔni Yesu uti ɔbwi balɛne lɛnɔ ɔkya-nwu lɛlɔ kemo. 18Na mmɔ ni, bekyuli badi béti ukyuli ɔni na lɛlɔ kakɛ kenwi kékpi-nwu béboku. Na báwia ulu ɔni na beti-nwu beduoku ɔtɔ kemo na beti-nwu batáva Yesu anumi. 19Nsu bekyuli bumomo ɔsu ni, bátakana ulu bɔkɛ. Ɔmɛni ɔsu béti-nwu bákɔliku lɛsa. Na bátu liƒi na kugyiikɛ akɔ mmɔ na báyula-nwu ku nwuna atɛla bátáva Yesu anumi na bekyuli bammɔ ntɛntɛ na ɔtɔ kemo mmɔ. 20Na ka Yesu ɔ́nu bana bɔƒɔtaadi ɔsu ni, ɔ́su ukyuli ɔmmɔ ɔnini, “Ɔnana, ákɛ ƒula ekpidi buti taakyiɛ!” 21Amu na Ƒarisiƒuɔ ku ɔda bubo ala batinane bákya anumi ku lɛlɔ buye banii, “Ɔma na ɔdi mɛni na úti lɛlɔ ɔɔkɔ́ku Katɔti lɛni! Katɔti lɛti pɛ kani ndubɔkana na uti ukyuli ekpidi ɔkyiɛ-nwu!” 22Amu ka Yesu ɔ́nu-ma kasusu ɔ́ti ɔsu ni, úye-ma ɔnini, “Bi ɔsu na bɛɛkali ala amɛni udu? 23Ɔmani bɔsu mbo ɔkplu ntulo na amɛni kemo, 'Ákɛ ƒula ekpidi buti taakyiɛ' munuu 'Ta nye na esie'? 24Ndubudie lɛtina-mii ka Ukyuli Ɔyawine Ubi ubo kuƒi na kayawi kamɛni lɛlɔ na uti ekpidi ɔkyiɛ.” Anwuɔsu únwini na ɔ́su lɛlɔ kakɛ kenwi ukpine ɔmɛni ɔnini, “Mɔɔsu-ɔ nnii ta na eti ƒula atɛla na eteesie kaduli!” 25Mmɔ kani ni, ɔnana ɔmmɔ ɔ́ta únye bekyuli bammɔ anumi na úti nwuna atɛla ani lɛlɔ na ɔtɛ na ɔ́tɔlɔ úsie kaduli na uumwi Katɔti. 26Ɔmɛni ɔ́bla bekyuli bammɔ ƒui dɛye dɛye! Na ka liƒu lɛ́ƒɔ-ma lɛlɔ kemo ƒui ɔsu ni, bémwi Katɔti na básu banii, “Bi akɔla budie taatina adi na bɔ́nu mɛni ɔmwi?” 27Ɔmmɔ kama ni, Yesu ɔ́vi ɔ́lɛ ɔtɔ ɔmmɔ kemo na útánu kuyi ɔƒɔne ɔdi baalɔ banii Lewi ka ɔkya nwuna kabla kablakɔ. Amu na Yesu ɔ́su-nwu ɔnini, “Ta, na asiaku-mi.” 28Lewi ɔ́ta na ɔ́siaku-nwu na ɔ́da lɛla biala úwi. 29Lewi ɔ́ya na bánwa adila abuni ɔnii uuti ɔkya Yesu kubiti na nwuna kaduli. Na bekyuli pii bébo mmɔ ku kuyi baƒɔne bamba lɛnɔ. 30Ƒarisiƒuɔ ku ɔda bubo ala batinane bani nkya kasalakɔ mmɔ bákyaku Yesu basiakune unyeƒi banii, “Bi ɔsu na bɛɛdi na bɛɛní ku kuyi baƒɔne ku alaekpidi bablane babambadi bamɛni?” 31Amu na Yesu údie kenye ɔnini, “Bekyuli bani mbo lɛlɔ ɔkplu baláwia uvone, amu ntu balɛne lɛti. 32Ɔɔɔdi bekyuli bani nse siin na líbo mbalɔ nnii benwini kayi, mmomu alaekpidi bablane.” 33Bekyuli badi béye Yesu banii, “Dɛ na ɔ́bla na Yohane basiakune béteelie kɔka bulie bulie na baakpali katɔ, na Ƒarisiƒuɔ basiakune lɛnɔ baabla lɛni, nsu ƒula badi ama bɔdi kani na baadi na baaní?” 34Amu na Yesu údie kenye ɔnini, “Bɛɛkali ka bekyuli bani na bálɔ béboku uleku ketikɔ badubulie kɔka lebo lɛni na uleku ɔgya ɔmmɔ ɔmua ɔkya-ma kudɔ? Kudi kudii! Ulakana bubo bute lɛni! 35Nsu ni, limeyi lɛdi lɛdubo lɛni na badubuti uleku ɔgya ɔmmɔ batɔlɔku-ma kudɔ. Na mmɔ ni, ɔɔɔdi ukyuli ɔdi nsɔ ndubo-ma bɔsu asa na badubulie kɔka.” 36Ɔmmɔ kama ni, Yesu ɔ́sɔ úbo-ma lɛgba lɛmɛni ɔnini, “Ukyuli ɔdi ulabwɛ awu awɔdi taaka taada ɔkukudi liƒi. Si ɔdi ɔ́bla lɛni ni, agyi anii úbile awu ɔwɔdi ɔmmɔ. Na ɔkukudi ɔmmɔ lɛnɔ ku ɔwɔdi ɔmmɔ ulamanku lɛlɔ. 37Na beleti ntɛ bɔwɔdi teewi ɔku koƒo kɔkukudi kɔni kemo béewi ntɛ dii. Si ɔɔɔdi lɛni ni, ntɛ bɔwɔdi bɔmmɔ bɔdubuƒuƒuo na bɔya ɔku koƒo kɔkukudi kɔmmɔ kɔbwɛ, na ntɛ bɔmmɔ lɛnɔ buwiakun. 38Nsu beeti ntɛ bɔwɔdi beewi ɔku koƒo kɔwɔdi kemo. 39Na ɔƒɛni lɛnɔ ni, ukyuli ɔdi ɔ́sɔ uláwia ntɛ bɔwɔdi si ɔ́ɔni bɔkukudi úmo. Si ɔɔɔdi lɛni ni, bɔsu na ɔdubɔsu ɔnii, 'Budeedi bɔdia butulo bɔmɛni!' ”

will be added

X\