LUKA 23

1Amu na bana ƒui báta na bétiku Yesu bésienku Pilato kudɔ. 2Mmɔ na bése baadá-nwu kenye banini, “Búƒie ukyuli ɔmɛni ka ɔ́kpanku bula kadi ɔɔvínku ulu ukpidi lɛlɔ. Na ɔɔsu-ma ɔnii basɔ bataƒɔ kuyi betete Romaƒuɔ Ɔga Unengudi. Na ɔ́su lɛnɔ ɔnii anwu ndi Katɔti Ukyuli Ɔƒunadi na ɔnii ɔdi ɔga lɛnɔ.” 3Amu na Pilato úye-nwu ɔnini, “Awɔ ndi Yudaƒuɔ Ɔga?” Na Yesu údie kenye ɔnini, “Awɔ mɔɔsu.” 4Mmɔ na Pilato ɔ́su bakpane benengu ku bekyuli bammɔ ɔnini, “Ńtanu lɛla lɛdi na ukyuli ɔmɛni lɛlɔ kalɛ na lɛdu-nwu kɔtɔ kɔdi.” 5Nsu bénye kpakplaa bébu na básu banii, “Nwuna ala ani na ɔɔtina éti lɛsɛ éboku Yudea bekyuli ƒui akɔ. Úse ɔmɛni kalɔ na Galilea, na úubo úbedu mɛni lɛnɔ.” 6Uwi ɔni na Pilato únu litemi lɛmɛni ni, úye-ma ɔnini, “Galileani na ukyuli ɔmɛni ɔdi?” 7Anwuɔsu ka ɔ́ti ka Yesu ɔ́si Galilea kalɛkɛ kani lɛlɔ na Herode ɔɔdi ɔsu ni, úti-nwu úmene Herode. Na Herode ɔmɛni úsie ɔkya Yerusalem uwi ɔmmɔ kemo. 8Ebiti áda Herode geen uwi ɔni na ɔ́nu Yesu, ɔsika úunu-nwu kɔku na ɔɔwia ka ɔnu-nwu ɔ́si kukuuku ƒui. Na ubo lɛnunsia ka ɔdubɔnu Yesu na ɔbla akɔla budie taatina bɔdi. 9Anwuɔsu Herode úye Yesu etemila pii, nsu Yesu útedie lɛdi kenye. 10Mmɔ na bakpane benengu ku ɔda bubo ala batinane bálɛ bébo animi na báda kenye bonwu bonwu básia Yesu. 11Herode ku nwuna bekpone báma Yesu na bédumi-nwu. Na béti awu gyɔlɔɔ ɔbuni ɔdi bákya-nwu aani ɔga kalɛ, na básɔku-nwu bémene Pilato. 12Limeyi lɛmmɔ kani na Herode ku Pilato bénwini bakpana, na nka badi bekisine. 13Pilato ɔ́lɔ bakpane benengu ku batɔnkune ku bekyuli bammɔ ɔ́sala. 14Na ɔ́su-ma ɔnini, “Bɛ́kpanku ukyuli ɔmɛni biboku-mi bɛnii ɔɔkpanku bekyuli taavinku ulu ukpidi lɛlɔ. Na ɔƒɛni ni, líye-nwu ala na amii alati anumi. Na ńtanu lɛla likpidi lɛdi na nwuna lɛlɔ aani kalɛ na amii bɛ́da-nwu kenye. 15Na Herode lɛnɔ útanu lɛla likpidi lɛdi na nwuna lɛlɔ, ɔsika na ɔ́sɔku-nwu úmene-bu. Ukyuli ɔmɛni útabla lɛla lɛni na bɔdu-nwu kukpi kɔtɔ. 16Anwuɔsu ndubɔya na bebo-nwu kugyiimi na lɛda-nwu lɛnyonu.” 17Na Kukpi Lili Bɔvia bɔdi emeyi biala kemo ni, ɔdi Pilato kabla ka ɔnyonu ɔtɔ batɛne akɔ unwi ute-ma. 18Amu na bana ƒui báva momoomo banii, “Du-nwu! Na anyonu Baraba ete-bu!” 19Na Baraba ɔmɛni ni, bákya-nwu ɔtɔ na lɛsɛ lɛdi na ɔ́kya na ɔma unengudi ɔmmɔ kemo ku ukyuli bɔdu ɔsu. 20Na ka Pilato ɔ́yɔ ka ɔnyonu Yesu ɔsu ni, ɔ́sɔ útemi úte bekyuli bammɔ. 21Nsu ama báva básialaku-nwu litemi lɛlɔ banii, “Kana-nwu mana ugyii lɛlɔ! Kana-nwu mana ugyii lɛlɔ!” 22Mmɔ na Pilato ɔ́sɔ ɔ́su-ma kɔtɛdi ɔnini, “Na bi likpidi na ɔ́bla? Ńtanu lɛla lɛni na ɔ́bla na mɔɔdú-nwu kukpi kɔtɔ! Ndubɔya na bebo-nwu kugyiimi na lɛnyonu-nwu.” 23Nsu bunye kani na benye baava momoomo banii, “Ɔdi ka aya na bɔkana Yesu bɔmana ugyii lɛlɔ.” Na kawɔlɔkɔ ni, bádi lɛlɔ. 24Anwuɔsu Pilato úkulo litemi lɛmmɔ kemo kalɛ na bekyuli bammɔ baawia. 25Na ɔ́nyonu ukyuli ɔni na baayɔ́ úte-ma. Na ɔdi ukyuli ɔni na litemi batɛne bákya ɔtɔ na lɛsɛ ku ukyuli bɔdu ɔsu. Na ɔ́nyonu Yesu ɔ́kya-ma enu kemo na batáblaku-nwu kalɛ na baayɔ́. 26Bekpone bákpanku Yesu bátɔlɔku. Na ɔni bakɛ ulu bésela ni, bátásiaku Kireneni ɔdi baalɔ Simon ka ɔ́si lɛkpaklɔ lɛdi ɔdubo Yerusalem. Bédi-nwu bényene na bénye-nwu lɛlɔ banii uti ɔƒɔ ugyii ɔni na Yesu uti mmɔ na ɔsiaku-nwu kama. 27Bekyuli pii badi basiaku Yesu kama. Na beleku badi bakya bana akɔ bani nkɛ muuwulo teete-nwu. 28Amu na Yesu únwini na ɔ́su-ma ɔnini, “Yerusalem beleku, bitewulo bitete-mi. Mmomu biteewulo na amii ku bina bebi lili. 29Ɔsika uwi ɔdi ɔdubo ɔni na bekyuli badubɔsu banii, 'Lɛlɔ litaayɔ bedinkɔ ku kaƒɔ kani kemo na ubi útalɛ tɔ kudii ku anyi ani na bátanyimi kudii!' 30Uwi ɔmmɔ ndi uwi ɔni na bekyuli badubɔsu abi banii, 'Ƒɛ beewi-bu lɛlɔ!' Na badubɔsu abinkpo banii, 'Bɛla-bu!' 31Ɔsika si bákana na báni ukyuli ɔni na útabla lɛla lɛdi kɔtu lɛni ni, bɛti bɛnii bekyuli bekpidi kɔtu bɔni bɔdubutulo ɔmɛni ƒui.” 32Uwi ɔmmɔ ni, bekpone bétiku banana bekpidi inyɔ badi bésela batádu ku Yesu. 33Ka bébedu likpo lɛni baalɔ banii Opokuo ni, bákana Yesu bámana ugyii lɛlɔ mmɔ. Na banana bekpidi inyɔ bammɔ lɛnɔ ni, bákana-ma bámana ligyii lɛlɔ na Yesu kɔmii ku kɔdianu kakɛ. 34Mmɔ na Yesu ɔ́su ɔnini, “Ati, ti kyiɛ-ma, ɔsika baaagyi lɛla lɛni na baabla.” Ɔmmɔ kama ni, bekpone bammɔ béle Yesu adala aani kalɛ na ɔdi biala egulabi ani na ɔ́tu ádi kalɛ. 35Na uwi ɔmmɔ ni, bekyuli bammɔ ƒui benye mmɔ baanu. Na Yudaƒuɔ batɔnkune bammɔ benye baamá Yesu taasu banini, “Ɔ́ƒɔ bekyuli bamba ngba, anwuɔsu ɔlɛka ɔƒɔ anwu ɔlati bɔdi lɛnɔ si anwu ndi Ukyuli Ɔƒunadi ɔni na Katɔti úse likpo úse na bɔnu ɛ-ɛ!” 36Lɛni kani na bekpone bammɔ lɛnɔ báma Yesu. Na bésie-nwu kudɔ na béti ntɛ bɔni nányi béte-nwu banii ɔni. 37Na básu-nwu banini, “Si Yudaƒuɔ ɔga na adi ni, na ekpo aƒɔ lɛlɔ!” 38Na nwuna eli kakɛ ni, bunweni bɔdi bɔsia na bɔɔsu bɔnii, “Ɔmɛni ndi Yudaƒuɔ Ɔga.” 39Bekyuli bekpidi bani lɛnɔ na bákana bámana ligyii lɛlɔ mmɔ akɔ unwi ɔkya uudumi Yesu ɔnini, “Ɔɔɔdi awɔ ndi Ukyuli Ɔƒunadi ɔmmɔ? Kpo die lɛlɔ, na edie abu lɛnɔ!” 40Mmɔ na ukyuli unyɔdi ɔ́dɔnku-nwu ɔnini, “Awɔ aláyia Katɔti yoo? Kɔtu bɔni bunwi pɛ na bekpone béti béte awɔ ku anwu ƒui. 41Na abu bula kɔtu bɔni ni, bɔdi ulu lɛlɔ. Ɔsika lɛla lɛni námanku-bu ni, ani na béti béte-bu. Nsu anwu útabla lɛla likpidi lɛdi.” 42Amu na ɔ́su Yesu ɔnini, “Yesu, nyimo-mi si éduo ƒula lɛga kadikɔ.” 43Mmɔ na Yesu ɔ́su-nwu ɔnini, “Mɔɔsu-ɔ geen nnii ɔmwi ɔmɛni kani ni, ami ku awɔ ƒui bɔdubo buduo Paradiso kemo.” 44Uwi ɔmmɔ ka ɔ́bla aani ɔƒiiwi lɛdɔ leevu-inyɔ ni, ɔƒɛ ɔ́da bɔlɛ ɔ́ya na kadi kábla suu na kalɔ kammɔ ƒui lɛlɔ úti útédu lɛdɔ ɛtɛ kemo. 45Na Katɔti kakpakɔ kɔdi kɔni nƒa mmɔ kɔ́bwɛ na kúle akpa anyɔ. 46Na Yesu ɔ́va ku lɛdi momoomo ɔnini, “Ati, líti mina kɔyu lɛ́kya-a enu kemo.” Ka ɔ́su ɔmɛni ni, ɔ́yula. 47Bekpone ɔtɔnkune ɔmmɔ ɔ́nu lɛla lɛni nálɛ na úmwi Katɔti ɔ́su ɔnini, “Sɔsɔ geen na ɔdi ka ukyuli ɔmɛni ɔdi ukyuli ɔbuni.” 48Ka bekyuli bani nébo banii babanu ala ani mɔɔlɛ́ bánu lɛla lɛni nálɛ ni, bénwini bésie kɔduli na béti enu béwi lili. 49Na bekyuli bani ƒui ngyi Yesu ku beleku bani nsiaku-nwu bási Galilea ni, bédi bénye ɔgyu sɛsɛɛ baanu ala amɛni. 50Ɔnana ɔdi ɔkya ɔni baalɔ Yoseƒ na ɔ́si Arimatea na Yudea kalɔ lɛlɔ. Ɔdi ukyuli ɔbuni ɔni na bekyuli baabu geen. Na unye ɔgya uwi ɔni na Katɔti lɛga kadikɔ kadububo. 51Ina ka ɔ́kya Yudaƒuɔ litemi batɛne bammɔ akɔ ni, útatunaku-ma na lɛla lɛni na bálɛ ugyii ku lɛla lɛni na bábla lɛlɔ. 52Úsie Pilato anumi na útévele-nwu Yesu ukpine. 53Amu na ɔ́ƒami ukpine ɔmmɔ na úti kɔdi kɔƒualadi únyimi-nwu lɛlɔ ƒui. Na úti-nwu útáva lɛtabi ubu kaƒiɔtɔ ɔdi kemo ɔni bátáva ukyuli ɔdi nwuna kemo kudii. 54Limeyi lɛmmɔ lɛdi limeyi lɛni na baaklibi lɛlɔ asa na lɛnwunameyi kadi kegye. 55Na beleku bani nsiaku Yesu ɔ́si Galilea ni, básiaku Yoseƒ bésie kaƒiɔtɔ kudɔ kesii kani na báva Yesu ukpine ɔmmɔ. 56Na básɔ bénwini bésie kaduli na bátákɔ ala ƒɛƒɛɛ ɔni na beeti taawɛɛ ukpine lɛlɔ bése. Amu na lɛnwunameyi lɛlɔ ni, bánwuna aani kalɛ na ɔda bubo bɔmmɔ bɔɔtina.

will be added

X\