LUKA 2

1Na uwi ɔmmɔ kemo ni, Ɔga Unengudi Kaesare Augusto úte ɔyikun ɔnii benweni bekyuli bani ƒui nkya Roma lɛga bɔdi kalɔ anyi. 2Na bekyuli anyi bunweni budeedi bɔmɛni kemo ni, aban unengu ɔni baalɔ banii Kirenio mɔɔdi Siria kalɔ lɛlɔ. 3Anwuɔsu ukyuli biala úsie nwuna ɔma úténweni lɛnyi. 4Amu na Yoseƒ lɛnɔ ɔ́ta ɔ́si Nasaret ɔma na Galilea kalɔ lɛlɔ úsie Betlehem na Yudea kalɔ lɛlɔ kesii kani na báwɔ Ɔga Dawid. Yoseƒ úsie mmɔ ɔsika ɔdi Dawid kaba kemo ubi. 5Útiku Maria ɔni na bévele béte-nwu na ɔda kaƒɔ lɛnɔ. 6Na uwi ɔni na bakya Betlehem mmɔ ni, uwi úbedu Maria ka ɔwɔ. 7Ɔ́wɔ nwuna ubi ɔnanabi udeedi na ɔtɔ kakɛ kani na bebuo batɛ. Na únyimi-nwu ɔ́kya kɔdi kemo, na úti-nwu ɔ́va lɛla lɛni kemo na bebuo bammɔ baadi, ɔsika kakyakɔ kadi kasɔ keeebo na baƒɔ keduokɔ. 8Amu na likpo lɛmmɔ na kalɔ kammɔ lɛlɔ ni, baƒonu badane badi bakya baanu bana bebuo lɛlɔ usien ƒui. 9Katɔti ɔtu ɔdi ɔ́da ɔ́lɛ-ma lɛlɔ na Unwoti bukeye bɔdi búkeye búbewi-ma lɛlɔ. Ɔmɛni ɔsu báyia geen, 10nsu Katɔti ɔtu ɔmmɔ ɔ́su-ma ɔnini, “Bitayia. Líboku-mii linyesia lɛbuni lɛni ndubuti lɛlɔyɔ ku ebiti geen ute bekyuli ƒui. 11Na ɔmwi limeyi lɛmɛni kani lɛlɔ ni, báwɔ Ɔƒɔne ɔni ndi Blɔti Kristo béte-mii na Ɔga Dawid ɔma kemo. 12Na lɛla lɛni na bɛdubuti bɛnu bɛti ni, ani ndi ka bɛdubɔnu ubiwɔ ɔni bényimi bákya kɔdi kemo na ɔtɛ bebuo kadikɔ.” 13Kɔnakunwi ni, Katɔti batu lɛkpa bonwu lɛdi lɛ́si kayaa lɛ́da lɛ́lɛ-ma lɛlɔ na líbebunku ɔtu ɔmɛni na bakya beemwi Katɔti banii, 14“Ɔbu ku bumwi ute Katɔti na katɔ kakaaka ƒui, na keyi buɛɛ kasiaku bayawine ƒui bani na Katɔti ɔɔyɔ́!” 15Na uwi ɔni na Katɔti batu bamɛni bátɔlɔ-ma kudɔ na básɔ bénwini bésie katɔ ni, baƒonu badane bamɛni básu lɛlɔ banii, “Bɛya na busie Betlehem butánu ala ani nálɛ na Unwoti údie ɔ́tina-bu mɛni.” 16Amu na bábabla bésie na bátánu Maria ku Yoseƒ ku ubiwɔ ɔni ntɛ bebuo kadikɔ mmɔ. 17Na ka bánu-nwu lɛni ni, básu ala ani ƒui na Katɔti ɔtu ɔmmɔ ɔ́su-ma ɔ́si ubi ɔmmɔ lɛlɔ. 18Amu na bekyuli bani ƒui nénu baƒonu badane bamɛni etemila ni, ɔ́bla-ma kalɛ kadi. 19Nsu Maria únyimo ala amɛni ƒui, na úti-nya lɛlɔ kasusu úsie ɔgyu. 20Amu na baƒonu badane bammɔ básɔ bénwini na beemwi Katɔti na ala ani ƒui na bánu ku ani bénu lɛnɔ lɛlɔ, ɔsika ana ƒui ese pɛpɛɛpɛ kalɛ kani na Katɔti ɔtu ɔmmɔ ɔ́su-ma. 21Na emeyi maane kama ka uwi úbedu ka bekulo ubi ɔmmɔ lego ni, básia-nwu lɛnyi banii Yesu aani kalɛ kani na Katɔti ɔtu ɔmmɔ ɔ́su úse asa na badubɔda-nwu kaƒɔ. 22Amu na uwi úbedu ka Yoseƒ ku Maria babla lɛlɔ bɔbla sɛɛn ɔdi aani kalɛ na Mose ɔda bubo bɔɔtina kenye. Na béti ubiwɔ ɔmmɔ lɛnɔ bésienku Yerusalem banii beeti-nwu bete Unwoti. 23Lɛni na bénweni bákya Katɔti ɔda bubo ɔku kemo banii, “Ɔnanabi udeedi biala ku ebuo ɔgyani udeedi biala ni, ɔdi ka bedie-nwu bese bete Unwoti.” 24Na bésie bátábla akpala béte Unwoti, ɔsika ɔda bubo bɔmmɔ bɔ́tina ka beti babloduma inyɔ iye bamangbɛ inyɔ bakpa bete-nwu. 25Na uwi ɔmmɔ kemo ni, ɔnana ɔdi baalɔ banii Simeon ɔkya Yerusalem. Na ɔdi ukyuli ɔbuni ɔni na ɔɔyia Katɔti na unye ɔɔnu ulu ute Israel bɔƒɔ. Na Katɔti Kɔyu kɔsiaku-nwu 26na kúse-nwu kayi ka ulekpi wetédu lebo lɛni na ɔ́nu ka báwɔ Ukyuli Ɔƒunadi ɔni kenye na Katɔti ɔ́su úse. 27Amu na Kɔyu kɔmmɔ kɔ́tɔnku Simon kúsienku Yudaƒuɔ kakpakɔ mmɔ. Na ka bawɔne bamɛni béti Yesu ubiwɔ béboku banii bababla ala ani ƒui na ɔdi ka babla bete-nwu na ɔda bubo bɔmmɔ kenye ni, 28Simon ɔ́ƒɔ ubiwɔ ɔmmɔ ɔ́da, na ɔ́gya Katɔti enu ɔnini, 29“Unwoti, ɔƒɛni ni, ka ásia ƒula linyese anu ɔsu ni, akana na edie ami, ƒula kabla ɔblane, ulu na nteesie ku keyi buɛɛ. 30Ami ɔlati mina anumi ánu Ɔƒɔne 31ɔni na áya na úbo na kadi bekyuli ƒui anumi. 32Ɔdi bukeye bɔni ndubudie ƒula lɛyɔla keyi ute bekyuli bani naaadi Yudaƒuɔ. Na ɔdubuti ɔbu uboku ƒula kadi bekyuli Israelƒuɔ akɔ.” 33Ala ani na Simon ɔ́su mɛni áya na ɔ́bla Yoseƒ ku Maria dɛye dɛye. 34Na Simon úte-ma kusɛ kusɛ na ɔ́su Maria ɔnini, “Ubi ɔmɛni ɔdi Katɔti Ukyuli Ɔƒunadi. Na ɔdi bɔƒɔ iye bɔyii ute Israelƒuɔ pii na kalɛ na báƒɔ-nwu kenye. Ɔdi bɔnu bɔti bɔni nási Katɔti kudɔ na bekyuli pii badubɔta benye-nwu lɛlɔ. 35Na ɔdubo bekyuli bamɛni kasusu kani nábɛ keyi budie. Na ɔkɛ ɔmɛni ɔsu ni, adubunu ɔlɛ aani kalɛ na kewii kaatu ukyuli kayi.” 36- 37Amu na uleku ɔdi ɔni ndi Katɔti kenye udiene ɔkya mmɔ na baalɔ-nwu banii Hana. Na nwuna ɔti Ƒanuel ɔ́si Aser kaba kemo. Akwa maatɛ kani na úlie kɔgya asa na ɔgyani úkpi. Na ɔdi ukpinele ɔni na ɔ́ɔbi lɛlɔ geen. Ɔbla akwa liti ku aavlatɛ-ine sɔɔn mɛni. Uusié Yudaƒuɔ kakpakɔ mmɔ uwi ndi uwi teetémwi Katɔti usien ku ɔƒɛ na ɔɔkpali katɔ na uulie kɔka lɛnɔ. 38Uwi ɔmmɔ kani kemo ni, anwu lɛnɔ úbo na úti linugya úte Katɔti, na útemi ɔ́siku ubi ɔmmɔ lɛlɔ úte bekyuli bani ƒui nnye baanu Katɔti ulu ka waƒɔ Yerusalem. 39Na ka Yoseƒ ku Maria báwɔlɔ bana ɔdi bɔbla aani kalɛ na Katɔti ɔda bubo ɔku ɔ́tina kalɛ ni, bénwini bésie bana ɔma Nasaret na Galilea kalɔ lɛlɔ. 40Ubi ɔmmɔ ɔ́lɛ lili na ɔ́kɛ lɛlɔ ɔkplu, na ɔ́da anu geen. Na nwuna lɛlɔ lɛ́da Katɔti kubiti. 41Lɛkwa ndi lɛkwa ni, Yesu bawɔne beesié Yerusalem taatádi limeyi lɛni baalɔ banii Kukpi Lili Bɔvia Limeyi. 42Amu ka Yesu ɔ́ƒɔ akwa leevu-anyɔ ni, básɔ bésie Yerusalem aani kalɛ na baabla kukuuku kalɛ. 43Na ka limeyi lɛmmɔ bɔdi lɛ́sa na básɔ bénwini bésela ɔma ni, Yesu anwu ɔ́sɔ ɔ́kya kama na Yerusalem mmɔ. Na nwuna bawɔne bátati lɛni. 44Ama bábu banii ɔkya bekyuli bammɔ akɔ ɔsu bésie ɔƒɛ umodi ulu asa na bése kalɔ baawia-nwu na bakpana ku nwuna lɛlɔ bekyuli akɔ. 45Na ka bátanu-nwu ɔsu ni, básɔ bénwini bésie Yerusalem bakɛ baawia-nwu. 46Na limeyi lɛtɛdi lɛlɔ ni, bátánu-nwu na Yudaƒuɔ kakpakɔ ka anwu ku Yudaƒuɔ ala batinane badi belie. Mmɔ na ɔkya uunú bana ala ani na baasu na uuye-ma etemila ekpo ekpo teenu. 47Na bani nénu-nwu ala kenye budie ni, ɔ́bla-ma dɛye dɛye na lɛlati bonwu lɛni udu na ɔda uudie ala ani beeye-nwu kenye ɔsu. 48Ɔtɔtɔ ɔ́gyu nwuna bawɔne ka bánu-nwu lɛni. Na uni úye-nwu ɔnini, “Ubi, bi ɔsu na ábla-bu lɛmɛni udu? Ami ku ƒula ɔti ƒui búduo lɛƒɛda kemo na bɔkɛ bɔɔví taawia-a.” 49Amu na Yesu údie kenye ɔnini, “Bi ɔsu na bɛkɛ bɛɛwia-mi taavi? Bɛɛɛgyi bɛnii mina Ɔti kesii na ɔlɛka lɛkya yoo?” 50Nsu ama bétenu lɛla lɛni na ɔ́su-ma mɛni kalɔ. 51Amu na Yesu ɔ́siaku-ma na bátɔlɔ bésie Nasaret, na úboku lɛlɔ kalɔ úte-ma. Na ala amɛni ƒui éduo uni kasusu kemo úsie ɔgyu. 52Na Yesu úbalɛ lili na lɛnunda ku ɔlɔna kemo, na ɔ́ƒɔ lɛnyi na bekyuli ku Katɔti ƒui anumi.

will be added

X\