LUKA 12

1Ka bekyuli mpimu mpimu badi bábasa mmɔ ɔni na baanya lɛlɔ muedi ni, Yesu ɔ́ka nwuna batɛyane bɔsu ɔnini, “Binye kagyumana kaduɛ na Ƒarisiƒuɔ ɔkɔ ablala ani muuƒú bekyuli mmɔ lɛlɔ. 2Ala ani ƒui na bekyuli bábla bábɛ ni, adubo bɔda bɔlɛ keyi nwaa. 3Anwuɔsu lɛla biala na bɛ́su na kasuudikɔ ni, ɔdubɔlɛ keyi. Na kabɛsɛ iye katɔma kɔtɛ biala na bɛ́su ni, ɔtɔ katɔ na badubo-ku lɛsa bɔkɔ. 4“Bakpana, mɔɔsu-mii ka ni, bitayia bekyuli bani na ɔlɔna kani na badubɔkana bɔdu na ɔmmɔ kama na basɔ balakana lɛla lɛdi bɔbla. 5Ukyuli ɔni na ɔlɛka bɛyia ni, ndubo-mii bɔtina. Bɛyia Katɔti ɔni na si ɔ́du-ɔ ɔ́wɔlɔ ni, na ɔsɔ ubo ɔyikun na uti-ɔ ubo ɔkya lɛgyavonku lɛni mɔɔda uwi ƒui kemo. Bɛƒɔ-mi bɛdi ka ni, anwu ndi ukyuli ɔni na ɔlɛka bɛyia. 6Ɔɔɔdi kaplɛ inyɔ kani na beeyé baasɛ wɛlɛ wɛlɛ ɛlɔ? Nsu Katɔti anu alávia ɔdi lɛlɔ. 7Bula lili linwini muedi ni, Katɔti ɔgyi-ni bumomo. Anwuɔsu ni, bɛda bɔyia bɛya ɔsika bɛ́ƒɔ kuye bitulo baasɛ pii. 8“Mɔɔsu-mii nwaa ka ni, ukyuli ɔni masu na kadi anumi ka ɔdi mina ɔdi ni, Ukyuli Ɔyawine Ubi lɛnɔ ɔdubɔsu lɛni kani na Katɔti batu anumi na nwuna lɛlɔ. 9Nsu ukyuli ɔni meni-mi na kadi anumi ni, Ukyuli Ɔyawine Ubi lɛnɔ weni-nwu na Katɔti batu ƒui anumi. 10Na ukyuli biala ɔni masu lɛla lɛdi na wata wenye Ukyuli Ɔyawine Ubi lɛlɔ ni, Katɔti ɔdubuti ɔkyiɛ-nwu. Nsu ukyuli ɔni matɛmi enyekpi Katɔti Kɔyu lɛlɔ ni, Katɔti uleti ulakyiɛ-nwu. 11“Si bákpanku-mii bésienku Yudaƒuɔ kɔsakɔ iye batɔnkune iye bagadine anumi banii baatɛku-mii litemi ni, ɔƒɛ utada-mii bɛnii bi na bɛdubo bɔsu iye dɛ na bɛdubudie lɛlɔ kenye. 12Ɔsika Katɔti Kɔyu kɔdubɔtina-mii na uwi ɔmmɔ kani lɛlɔ lɛla lɛni na bɛdubo bɔsu.” 13Ukyuli ɔdi ɔkya bekyuli akɔ mmɔ na ɔ́su Yesu ɔnini, “Ala ɔtinane, su mina ɔnwani na ule bula ɔti kadikɔ kani na ɔ́da úse-bu ute-mi.” 14Amu na Yesu údie kenye ɔnini, “Ɔnana, ɔma néte-mi kuƒi ɔnii nle ala iye ntɛ litemi na bina inyɔ ntɛ?” 15Amu na ɔ́su bana ƒui ɔnini, “Bɛsia lɛlɔ anu na binye lɛlɔ kagyumana na ɔdivo udu biala bɔdi lɛlɔ, ɔsika ukyuli ngba geen bɔɔɔkɛnku ala ani nse-nwu lɛlɔ ina dɛ na ɔdi ɔlakɛne.” 16Amu na Yesu úbo-ma lɛgba lɛmɛni ɔnini, “Ɔlakɛne ɔdi ɔ́kya dii ɔni na ubo kalɔ buni kani náya na nwuna edula ádia geen. 17Ɔmɛni ɔsu ɔ́bla kasusu ɔnii, 'Ka liiibo kesii kani makya mina edula amɛni ni, bi na ɔlɛka lɛbla? 18“ 'Lɛla lɛni ndubɔbla ndi ɔnii ndubugyingya mina edula kakyakɔ kakukudi na lɛbla kawɔdi kani na kébomo kétulo kamɛni. Mmɔ na ndubɔkɛ kesii kani na makya mina edula ƒui. 19Na ndubɔsu lɛlɔ nnii kuli kɔdia-mii. Ala buni ani ƒui ása-mi ute akwa pii. Ndubɔnwuna, na lɛdi, na lɛni, na lɛkya lɛlɔ ebiti.' 20“Nsu Katɔti anwu ɔ́su-nwu ɔnini, 'Awɔ ɔdɔlɔdi! Usien ɔmɛni kani na adubo ƒula ngba bɔda buse. Na ɔma ndubɔdi ala ani na áwia ése éte lɛlɔ mɛni?' ” 21Amu na Yesu ɔ́wɔlɔ nwuna kɔtɛ ɔnini, “Lɛni na use ute bekyuli bani mɔɔwia akɛla batɛ bese lɛlɔ, na beeebo lɛla lɛdi na Katɔti anumi.” 22Mmɔ na Yesu ɔ́su nwuna batɛyane ɔnini, “Anwuɔsu na mɔɔsu-mii nnii bitekpoku lɛlɔ na lɛla lɛni na bɛdi bilie ngba lɛlɔ iye ɔlɔna adala lɛlɔ. 23Ngba bɔ́ƒɔ kuye butulo adila, na ɔlɔna lɛnɔ ɔ́ƒɔ kuye utulo adala. 24Bɛnu baasɛ na kayaa ka balágya na baláƒɛ edula lɛnɔ. Beeebo linwu iye edula kakyakɔ. Nsu Katɔti uute-ma bɔdi! Na amii bɛ́ƒɔ kuye bitulo baasɛ kukuuku. 25Bɛɛkali ka ɔdi wakana ngba bulie gyɔlɔɔ butulo nwuna uwi ina blii suɛ na nwuna lɛlɔ bukpoku ɔsu? 26Na si bɛɛɛdubo lɛla lɛdi bɔkana bɔbla na ala wɛlɛ wɛlɛ amɛni lɛlɔ ni, bi ɔsu na biikpóku lɛlɔ na ala bamba lɛnɔ lɛlɔ. 27“Bɛnu kalɛ na anwula ani mɔɔdia bɔnu aalɛ́ lili. Balábla kabla kadi iye beledi adi teete lɛlɔ. Nsu mɔɔsu-mii nnii Ɔga Salomo muedi ku nwuna lɛkɛ ƒui ni, útakɛ adala ani ndia édu anwula amɛni. 28Katɔti muute livo lɛmɛni bɔdia bɔmɛni udu. Livo lɛmɛni linye ɔmwi na uwi bamba na bekulo-ni bakya ogya na bakyula-ni na livongu kemo. Bute na Katɔti ɔmmɔ ulete-mii adala uletulo livo lɛmmɔ? Bi ɔsu na bina bɔƒɔtaadi buse blii suɛ lɛni? 29Anwuɔsu bitayia na anumi eteegyie-mii na biteeye bɛnii bi na bɔdubɔdi iye bi na bɔdubɔni. 30Ɔsika bekyuli bani nátaƒɔ Katɔti bátadi ni, ama mɔɔsia ala amɛni anu uwi ndi uwi. Bina Ɔti ɔgyi ka ala amɛni ƒui adi ala ani na bɛɛwia. 31Mmomu ni, biteeti kasusu na Katɔti lɛga kadikɔ lɛlɔ na ɔdubuti ala amɛni ƒui ute-mii. 32“Mina basiakune lisu libliidi, bitayia. Ɔsika ɔdi Katɔti lɛƒɔyɔ ka ute-mii nwuna lɛga kadikɔ. 33Biti bina lɛlɔ ala biye na bile egulabi ammɔ bite bawabane. Na bɛwia egulabi kɔvumi kɔni na bɛgyi ka kulatɔ bise katɔ bite lɛlɔ. Mmɔ na bina akɛla adubuse kpoo na alaƒana kudii. Ɔsika uyune ɔdi ulakana mmɔ buduo, na kubweyi kɔni muubile ala lɛnɔ kulakana-nya bubile. 34Ɔsika kesii kani na bina akɛla ese ni, mmɔ na bina kɔyi lɛnɔ kɔdubɔkya. 35“Bɛklibi lɛlɔ bise bite lɛla biala mebo, na bɛtu akpagya. Na bina likpo liteni. 36Na binye lɛni aani kabla bablane bani nnye bagya bana Unwoti ka ɔsi uleku ketikɔ ɔda ubalɛ. Na si úbo na uubó kɔnu kegbuta ni, na balɛmi bete-nwu kɔnakunwi. 37Kabla bablane bammɔ badubɔkɛ ebiti geen si bana Unwoti úbanu-ma ka benye kagyumana bete nwuna bɔsɔ bubo! Mɔɔsu-mii ka ni, ɔdubɔsabla kɔdi lɛlɔ use, na ɔya na belie kalɔ na anwu alati ute-ma adila na badi. 38Na ina usientɛ iye kadi ƒulu ƒulu na webo na wabanu-ma ka benye kagyumana ni, nu ebiti ani udu na wabla-ma! 39Ɔƒɛni ni, bɛdubɔnu bɛti ka si bɔti na kaduli ɔlati wati uwi na uyune webeyu-nwu ni, nka ulete-nwu kuƒi na wabwɛ weduo-nwu ɔtɔ. 40Anwuɔsu na ɔlɛka amii lɛnɔ binye kagyumana, ɔsika ami Ukyuli Ɔyawine Ubi ndububo mbeyu-mii lɛtu.” 41Amu na Petro úye Yesu ɔnini, “Blɔti, abu na lɛgba lɛmɛni lɛdanku, munuu ukyuli biala na ada?” 42Mmɔ na Yesu údie kenye ɔnini, “Kabla ɔblane ɔni náda anu na ɔɔbla ulu lɛlɔ ni, anwu na nwuna Unwoti uuti teenyene kabla bablane bakladi kenye. Na anwu ndubute kabla bablane bakladi bana lɛdila kalɛ na ɔ́manku na uwi ɔbuni kemo. 43Nu, si kabla ɔblane ɔmmɔ ɔ́kana na ɔɔbla ɔmɛni kaduɛ asa na nwuna Unwoti úbo ni, ɔdubɔbla ebiti bonwu geen ute kabla ɔblane ɔmmɔ! 44Geen geen ni, mɔɔsu-mii nnii Unwoti ɔmmɔ ɔdubuti kabla ɔblane ɔmmɔ unyene nwuna ala ƒui kenye. 45Nsu si kabla ɔblane ɔmmɔ ɔ́su ɔnii, 'Mina Unwoti úsela útákya ulu na uwi utu,' ɔsu na úse kalɔ ɔɔdi na ɔɔní ntɛ teekpi na uubó kabla bablane bakladi bani ndi banana ku beleku ƒui na ɔɔbla-ma kalala ni, 46nwuna Unwoti ɔdububo ubeyu-nwu ɔtu ɔni na ɔɔɔgyi uuuse. Mmɔ ni, Unwoti ɔmmɔ ɔdubɔni-nwu kɔtu kpakplaa kɔni námanku batuɔkplune bammɔ udu. 47“Kabla ɔblane ɔni ngyi lɛla lɛni na nwuna Unwoti ɔɔwia ka nka ɔbla ute-nwu nsu uuní-ni bɔbla ka útada lɛlɔ útese ɔsu ni, bubo na badubo-nwu bubo na ebola eduo-nwu lɛlɔ. 48Nsu kabla ɔblane ɔni naaagyi lɛla lɛni na nwuna Unwoti ɔɔwia ka ɔbla nsu ɔ́bla lɛla lɛni na bani-nwu kɔtu ni, nwuna kɔtu bɔni bɔɔbla blii suɛ. Si ukyuli ɔni na béte-ɔ ala pii ni, lɛni kani na ɔlɛka abla ala pii. Na ukyuli ɔni na béte-ɔ ala pii betulo ni, lɛni kani na ɔlɛka abla kabla pii etulo. 49“Líti Katɔti kɔtu bɔni líboku bekyuli akɔ ɔni nse aani ogya kalɛ. Na mɔɔwia geen ka nka ogya ɔmmɔ úuse kalɔ ɔdaku bɔda. 50Lɛƒɛda bonwu lɛdi lɛdubo-mi lɛlɔ aani kalɛ na ketu keeti ukyuli. Na liiibo bɔnwuna bɔdi úti utédu uwi ɔni na lɛƒɛda lɛmɛni líbo líbavi. 51Bɔkali bɛda bɛnii keyi buɛɛ na líti líboku kayawi? Oowo! Ɔɔɔdi keyi buɛɛ, mmomu lɛlɔ bugyingyaku na bɔdi. 52Na ɔ́si ɔƒɛni úsela ni, kaduli kani kemo na nkyuli ɛlɔ bakya ni, badubo lɛlɔ bule. Inyɔ bata benye ɛtɛ lɛlɔ. 53Ubi ɔti wata wenye bananabi lɛlɔ, na bananabi bata benye bana ɔti lɛlɔ. Bebi beni badubɔta benye bana belekubi lɛlɔ, na belekubi lɛnɔ bata benye bana beni lɛlɔ. Na begyieni badubɔta benye bana bebi bele lɛlɔ, na bebi bata benye bana begyieni lɛlɔ.” 54Yesu ɔ́su bekyuli bammɔ lɛnɔ ɔnini, “Si bɛ́nu ka uyɔlɔ úminime lɛlɔ ɔ́si ɔƒɛ kanukɔ na kayaa ni, bɛɛsu kɔnakunwi ka ɔnantu ɔdubo bɔna. Na ɔɔlɛ́ lɛni. 55Na si bɛ́nu bɛ́ti ka kada kakɛ ɔƒɛƒɛɛ uukpó ni, bɛɛsu ka liwulu lɛdubo. Na ɔɔlɛ́ lɛni. 56Anumi lɛlɔ bekyuli, ka bɛɛnu kalɔ ku kayaa na bɛɛtí uwi taatina ni, bi ɔsu na bilenu uwi ɔmɛni anwu kalɔ? 57“Bi ɔsu na bileduo ala kemo taanu lɛbuni lɛni na ɔlɛka bɛbla bɛti? 58Si ukyuli ɔdi ɔ́lɔ-ɔ katɛ na litemi katɛkɔ ka awɔ ku-nwu bɛ́kɛ lɛla lɛdi ni, sia ulu biala lɛlɔ na bɛklibi litemi lɛmmɔ asa na biduo litemi katɛkɔ. Si ɔɔɔdi lɛni ni, ɔdubuti-ɔ ute litemi batɛne ku beƒiene na bakya-a ɔtɔ. 59Na mɔɔyá-a na ati ka mmɔ na adubo bɔkya wetédu uwi ɔni na áƒɔ ƒula kɔtu bɔni kayu étédu kawɔlɔkɔ.”

will be added

X\