LUKA 10

1Ɔmɛni kama ni, Blɔti ɔ́ƒuna banana liti ku aavlanyɔ-inyɔ babambadi na ɔ́tala-ma inyɔ inyɔ ɔnii besie lɛma ku akpaklɔ ani kemo na nka ɔlɛka usie. 2Na ɔ́su-ma ɔnini, “Edula pii éedu bɔƒɛ, nsu nkyuli ɛlɛɛ badi kani nnye kabla kamɛni lɛlɔ. Bɛkpali katɔ na bivele kemo ɔlati na umene bekyuli bani maƒɛ-nya masala. 3Biteesie! Mɔɔtala-mii aani baƒonu na begiti akɔ. 4Na biteti egulabi kavumi iye koƒo iye lɛgbanvuo, na bitedi bitenye ulu bɛnii biigyele ukyuli ɔdi. 5“Kaduli biala na bítéduo ni, bɛka bɔsu bɛnii, 'Keyi buɛɛ kasiaku kaduli kamɛni bekyuli.' 6Na si ukyuli ɔni mɔɔyɔ́ keyi buɛɛ ɔdi ɔkya mmɔ ni, bɛya na bina keyi buɛɛ kasiaku-nwu. Nsu si ɔdi uuubo ni, bɛsɔku bina keyi buɛɛ kegye bɛtɔlɔku. 7Bɛsɔ bɛkya kaduli kani kemo na báƒɔ-mii. Na lɛla biala lɛni na badubuti bete-mii ni, bɛdi na bɛni-ni. Ɔsika kabla ɔblane biala ni, ɔlɛka bete-nwu nwuna lɛyuƒɔla. Bitatáka bitamana ɔ́si kaduli kani úsie kani. 8“Na ɔma biala ɔni kemo na báƒɔ-mii ni, bɛdi lɛla biala na bákɛ béte-mii. 9Bɛbwi balɛne na ɔma ɔmmɔ kemo. Na bɛsu ɔma ɔmmɔ bekyuli bɛnii, 'Uwi ɔni na Katɔti ɔdi lɛga na bula kɔyi kemo ɔ́ɔkpɛ úde.' 10Nsu si bísie ɔma ɔdi kemo na bátaƒɔ-mii ni, bɛlɛ bisie kuyeya na bɛsu bɛnii, 11'Bina ɔma ɔtumu ɔni mma-bu lɛgba kalɔ muedi ni, búveli búwi-mii. Nsu binyimo ka uwi ɔni na Katɔti ɔdi lɛga na bina kɔyi kemo ɔ́ɔkpɛ úde-mii!' 12Na mɔɔsu-mii kede kede nnii na litemi bɔtɛ limeyi ni, Katɔti ɔdubɔnu Sodom ɔma kɔnyana utulo ɔma ɔmmɔ! 13“Bɔbwɛ muute amii Korasin! Na bɔbwɛ muute amii Betsaida! Si Tiro ku Sidon lɛma likpidi kemo na lɛ́bla akɔla budie taatina ani lɛ́bla na bina akɔ ni, nka badubɔyu belie kalɔ kukuuku na beti aƒɔ ekuku bada lɛlɔ na bawɛɛ ntɔ ɔni mɔɔtina ka béni bana ekpidi! 14Katɔti ɔdubɔnu Tiro ku Sidon lɛma kɔnyana butulo amii na litemi bɔtɛ limeyi. 15Na awɔ Kapernaum ni, bɔkali na bɛda bɛnii bɛdubɔkɔliku lɛlɔ bitédu katɔ? Badubɔyula-mii na bɛyii udu!” 16Amu na Yesu ɔ́su nwuna batɛyane ɔnini, “Ukyuli biala ɔni muunú bina litemi ni, ɔɔtina ka uunú ami lɛnɔ litemi. Na ukyuli biala ɔni muuní-mii ni, ɔɔtina ka uuní ami lɛnɔ. Na ukyuli biala ɔni muuní-mi ni, ɔɔtina ka uuní Katɔti ɔni nátala-mi lɛnɔ.” 17Nkyuli liti ku aavlanyɔ-inyɔ bammɔ básɔ bénwini bébo ku ebiti. Na bábasu-nwu banii, “Blɔti, ayu ekpidi muedi énu-bu litemi ɔni bɔ́bɔku-ma na ƒula lɛnyi kemo.” 18Amu na Yesu ɔ́su-ma ɔnini, “Lɛ́nu Satan ka ɔ́si katɔ úbanu aani ogya bɔtu kalɛ. 19Binu kaduɛ! Líte-mii ɔyikun ɔni na bɛkana na bɛkɔ bɛnya balakpi ku batamlukpa lɛlɔ. Na bɛkana bɛdi ukisine ɔmmɔ ɔyikun ƒui lɛlɔ ɔni na lɛla lɛdi lilabla-mii. 20Nsu ni, lɛlɔ litayɔ-mii ka ayu ekpidi eenú-mii litemi ɔsu. Mmomu ebiti ada-mii ka Katɔti únweni-mii anyi ɔ́kya Katɔ Ɔga Ɔma.” 21Uwi ɔmmɔ lɛlɔ ni, Katɔti Kɔyu ebiti áƒɔ Yesu lɛlɔ kemo ƒui na ɔ́su ɔnini, “Ati, katɔ ku kalɔ Unwoti, mɔɔgyá-a enu ɔsika lɛla lɛni na éti ábɛla bakutine ku banundane ni, ani na éti átina bekyuli bani na baaagyi lɛku ku badɔlɔdi. Sɔsɔ na ɔdi, Ati, lɛni geen na aayɔ́ anii ɔlɛ.” 22Amu na ɔ́sɔ ɔ́su ɔnini, “Mina Ɔti úti ala ƒui úte-mi. Ɔdi biala ɔɔɔgyi ukyuli ɔni na Katɔti Ubi ɔmmɔ ɔdi, ntu Katɔti lɛti pɛ. Na ɔdi lɛnɔ ɔɔɔgyi ukyuli ɔni na Katɔti ɔmmɔ lɛnɔ ɔdi, ntu Ubidi ɔmmɔ lɛti pɛ ku bekyuli bani na Ubi ɔmmɔ ɔ́ƒuna ka udie Ɔti ɔmmɔ ɔtina kani.” 23Amu na Yesu únwini útánu nwuna batɛyane bammɔ na ɔ́su-ma na bɔbɛ kemo ɔnini, “Lɛlɔ litaayɔ-mii geen ka bɛɛnu ala ani na bɛdaku bɔnu mɛni! 24Mɔɔsu-mii ka ni, Katɔti kenye bediene pii ku baga lɛnɔ báwia ka banu lɛla lɛni bɛɛnu ɔƒɛni, nsu bátanu. Na báwia ka benu lɛla lɛni na amii biinú mɛni, nsu bétenu.” 25Mmɔ na ɔda bubo ala ɔtinane ɔdi úbo ku kasusu ka ɔkɔku Yesu ɔnu. Na úye-nwu ɔnini, “Ala ɔtinane, bi na ɔlɛka lɛbla asa lɛkɛ ngba ƒui?” 26Amu na Yesu údie kenye na úye-nwu ɔnini, “Bi na Bunweni Kedee Ɔku ɔɔsu? Na dɛ na awɔ eenú litemi lɛmmɔ kalɔ?” 27Mmɔ na ɔnana ɔmmɔ údie kenye ɔnii, “Yɔ Unwoti Katɔti ku ƒula kayi ƒui, ku ƒula kɔyu ƒui ku ƒula ɔyikun ƒui ku ƒula kasusu ƒui lɛnɔ, na ayɔ ƒula ukyulikpana aani ƒula lɛlɔ kalɛ.” 28Amu na Yesu ɔ́su-nwu ɔnini, “Ásu na ɔ́tɛ. Bla lɛni na adubɔkɛ ngba ƒui.” 29Nsu ka ɔda bubo ala ɔtinane ɔmɛni ɔɔwia ka ute lɛlɔ ubo ɔsu ni, ɔ́sɔ úye Yesu ɔnini, “Ɔma ndi mina ukyulikpana?” 30Amu na Yesu údie kenye ɔnini, “Dii ni, ɔnana ɔdi ɔ́kya ɔni nási Yerusalem úsela Yeriko, na beyune bátáda-nwu ulu. Na bébo-nwu na bédie-nwu lɛlɔ ala na bányonu-nwu báva na ɔɔyɔ́ ukpi. 31Úbebo úte ka Katɔti ɔkpane ɔdi úbo ɔɔví ulu ɔmmɔ lɛlɔ. Nsu ka ɔ́nu ukyuli ɔmɛni na kuludɔ ni, ɔ́sia ɔ́vi ɔbambadi ɔ́tɔlɔ. 32Lɛni kani na Lewini ɔdi lɛnɔ úbo ɔɔví. Na ka ɔ́nu ɔnana ɔmmɔ ni, anwu lɛnɔ ɔ́sia ɔ́vi ɔbambadi ɔ́tɔlɔ. 33Nsu Samariani ɔdi ɔni nábasia mmɔ úsela ulu ɔdi ni, úbasiaku ukyuli ɔmmɔ. Na ka ɔ́nu-nwu ni, kaƒɔ kákywi-nwu. 34Amu na úsie útédu-nwu kudɔ na úti inɔmii ku ntɛ úwi-nwu lɛlɛ lɛmmɔ kemo na únyimi-ni ƒui. Na ɔ́gyu ɔnana ɔmmɔ útásia anwu ɔlati ebuo lɛlɔ. Na úti-nwu úsienku baƒɔ keduokɔ na ɔ́nu-nwu lɛlɔ. 35Kadi kégye ni, údie egulabi adi úte keduokɔ lɛlɔ ɔnune ɔmmɔ ɔnii, 'Taanu-nwu lɛlɔ. Na si lɛ́si líbo mɔɔví mɛni ni, ndubɔƒɔ-ɔ lɛla biala lɛni na adubɔsɔ ebile na nwuna lɛlɔ.' ” 36Amu na Yesu úye ɔda bubo ala ɔtinane ɔmmɔ ɔnini, “Na ƒula kasusu kenye ni, nkyuli ɛtɛ bamɛni akɔ ɔmani nátina lɛlɔ aani ukyulikpana na ukyuli ɔni néduo beyune enu kemo mɛni lɛlɔ?” 37Mmɔ na ɔda bubo ala ɔtinane ɔmmɔ údie kenye ɔnini, “Ukyuli ɔni nánu-nwu kɔnyana.” Amu na Yesu ɔ́su-nwu ɔnini, “Awɔ lɛnɔ teesie na atábla lɛni.” 38Amu na ɔni na Yesu ku nwuna batɛyane básia bana ulu bátɔlɔ bésela ni, bébedu ɔma ɔdi. Mmɔ na uleku ɔdi baalɔ Marta ɔ́ƒɔ-nwu úsienku nwuna kaduli. 39Marta ɔmɛni ubo ɔnwani ulekubi ɔni baalɔ Maria. Anwu ɔ́yu úlie Yesu kudɔ na uunú-nwu ala ani na ɔɔtina. 40Kaduli ablala ani nsia Marta lɛti pɛ lɛlɔ ékpoku-nwu kayi. Ɔmɛni ɔsu úbo na úbasu Yesu ɔnini, “Blɔti, ulábla-a lɛla lɛdi ka mina ɔnwani ulekubi ɔ́da kaduli ablala amɛni ƒui ɔ́sia-mi lɛlɔ? Su-nwu na ubo ubebunku-mi!” 41Amu na Yesu ɔ́su-nwu ɔnini, “Marta! Nu kalɛ na eekpóku lɛlɔ na ala pii lɛlɔ. 42Nsu lɛlakpa linwi kani námanku baawia. Na lɛbuni lɛmmɔ na Maria ɔ́ƒuna. Na basɔ baláƒɔ-ni na nwuna kudɔ.”

will be added

X\