YUDA 1

1Ami Yuda ɔni ndi Yesu Kristo kabla ɔblane na ndi Yakobo ɔnwani ni, muunweni ɔku ɔmɛni lite amii bani nénu Katɔti bɔlɔ. Na ka bɛ́siaku-nwu ɔsu ni, ɔɔyɔ́-mii. Na Blɔti Yesu Kristo lɛnɔ ɔɔgyumana-mii geen. 2Muuvele Katɔti nnii ɔnu-mii kɔnyana na nwuna keyi buɛɛ kasiaku-mii, na nwuna bɔyɔ butaakɔ katɔ teebu na bina akɔ. 3Banwa bayɔne, ɔdi lɛla lɛni na mɔɔyɔ́-mii kaƒɔ geen ka linweni-mii ɔku ɔ́si ulu unwi pɛ ɔni lɛlɔ na Katɔti ɔdubɔsia ɔƒɔ-bu ngba lɛlɔ. Na ɔƒɛni ni, lɛ́nu ka ɔlɛka lɛkya-mii ogya na kalɛ na bɛ́ƒɔ Kristo bɛ́di lɛlɔ na bɛda-nwu kpakplaa. Ɔsika ɔmmɔ ndi bɔƒɔtaadi ulu unwi pɛ ɔni na Katɔti úti úte-bu na ulakana na wavumana kudii lɛnɔ. 4Bekyuli bekpidi bani naaayia Katɔti bábɛ béduo-mii akɔ. Na Katɔti ɔ́lɛ ugyii úse ɔ́si kukuuku ƒui ka ɔdubɔdu-ma kɔtɔ na ɔyila-ma udu. Badi bekyuli bekpidi bani nákɛ kasiakɔ na bánu kalɛ na Katɔti ubo lɛƒɔndia úte-bu, na bátu ala bénwini kalɛ na bakɛ kuƒi bataabla bana lɛyalɛ ku likyulikpi ala. 5Bɛgyi ɔmɛni, nsu nsɔ mɔɔsu-mii ka uwi ɔni na Katɔti údie Israelƒuɔ ɔ́siku Egyipte kalɔ lɛlɔ ni, ɔ́du bani nátaƒɔ-nwu bátadi ƒui. 6Na Katɔti batu bani nátakana na benye bana kenyekɔ na ɔyikun ɔni na Katɔti úte-ma kenye ni, Katɔti úbo-ma kɔgba ɔ́kya kasuudikɔ wetédu limeyi lɛni na watɛku-ma litemi na limeyi likplodi lɛmmɔ lɛlɔ. 7Na Sodom ku Gomora ku lɛma lɛni náka lɛ́mana-ma lɛnɔ ni, bátakana lɛlɔ bɔda na bábla lɛyalɛ ku ala ekpidi bamba. Katɔti úti ogya ɔ́kyula-ma kalɛ na abu bɔnu bɔtɛya. 8Lɛni kani na ala ani na bekyuli bekpidi bani na bébeduo-mii akɔ baanu na ana ani na baatɛ teegye kemo ni, áya na baabla alaekpidi ani mɔɔyá bana ɔlɔna uusé lɛlɔ. Báta bénye Katɔti lɛlɔ na baatɛmi enyekpi na bagadine lɛlɔ. 9Na Katɔti ɔtu unengudi ɔni ndi Mikael muedi ka kadɔ kéduo anwu ku Satan ntɛ na baakya unyeƒi na Mose ɔlɔna lɛlɔ ni, úteti anwu ɔlati kenyekɔ ɔyikun útabɔku Satan. Mmomu ɔ́su ɔnini, “Blɔti ɔbɔku-ɔ!” 10Nsu bekyuli bamɛni udu ama ni, lɛla biala kalɔ na bétenu ni, beewida na beedumi. Na ala ani kalɔ na bénu ni, beléti kasusu baabla-nya aani bebuo kalɛ. Na anya geen mɔɔyila-ma udu. 11Bɔbwɛ muute-ma! Ɔsika ulu ɔni lɛlɔ na Kain ɔ́vi ni, nwuna lɛlɔ kani na ama lɛnɔ bakɛ. Na bányonu lɛlɔ na belie ngba bukpidi bɔni na ukyuli ɔni baalɔ Bileam úlie ka baawia kayawi lɛkɛ ɔsu. Báta bénye Katɔti ɔda bubo lɛlɔ aani kalɛ na Koran ɔ́bla. Na badubɔyii udu aani Koran ɔmmɔ kalɛ. 12Badi bekyuli bani ablala mɔɔyá na bina kasala keesé lɛlɔ si bɛ́sala bɛɛdi Blɔti adila ammɔ. Beedie lɛlɔ na ama lɛti baadi teemo kalɛ na baayɔ́. Bese aani ɔnantu ɔni nánwu, nsu ulána kudii, na ɔƒɛƒɛɛ kani muubó-nwu taavinku. Na bese lɛnɔ aani egyii ani naaanwu ina egyiibi bɔnwu uwi muedi. Bese aani egyii ani na bágyu-nya ku ligyiitu na ékpi ƒui. 13Bese aani ɛpu ntu bɔni mɔɔnwanɛ lɛlɔ ku avlɔvɔ. Bana kɔƒa ala na bada baatina lɛlɔ aani kalɛ na avlɔvɔ aata. Na bese aani ayabi ani mɔɔkpa na kayaa na aayii. Bekyuli bamɛni udu geen na Katɔti ɔ́klibi kasuudikɔ kammɔ úse ka uti-ma ɔkya mmɔ uwi ƒui. 14Bekyuli bamɛni lɛlɔ litemi geen na Henok ɔni ndi kaba maatɛdi ubi ɔ́si Adam lɛlɔ ɔ́su úse ɔnini, “Katɔti ku nwuna batu ƒui bumomo báyu bébo kalɔ lɛlɔ. 15Bébo banii babatɛku bekyuli ƒui litemi. Na bekyuli bani ƒui na balábla Katɔti lɛƒɔyɔ ku ala ani ƒui na bábla ka baláyia Katɔti ɔsu ni, bátɛmi enyekpi na nwuna lɛlɔ lɛnɔ. Anwuɔsu Katɔti ɔni-ma kɔtu.” 16Bekyuli bamɛni baadɔ na bana lɛlɔ kemo. Na beedie bekyuli bamba bɔƒiɔ. Baakun lɛlɔ lɛmɛnɛ, na bekyuli bamba ala alaƒɔ-ma anu amu ntu uwi ɔni na bákɛ-ma lɛlɔ kɔsia kani. Bana likyulikpi ala ani mɔɔda-ma ɔkwɛ kani na baabla uwi biala. 17Nsu ni, mina banwa, bɛkali etemila ani na Yesu Kristo batalane básu-mii. 18Básu banini, “Emeyi ekplodi ammɔ kemo ni, bekyuli badubo-mii buti bɔbla lɛmala na ala ani baasu taasiku-mii lɛlɔ ɔsu. Na basiaku bana udunkpi ala ani na Katɔti ulayɔ kama.” 19Ama mɔɔyá na bekyuli beele lɛlɔ akpa akpa. Na Katɔti Kɔyu kuuubo-ma lɛlɔ kemo, anwuɔsu bakɛ basiaku bana ɔlɔna kemo ala ani mɔɔda-ma ɔkwɛ kani. 20Nsu ni, mina banwa, biti lɛlɔ bɛsia Kristo kalɛ na bina bɔƒɔtaadi kedee bɔyu ɔkplu, na bitaakpali katɔ na Kɔyu kemo na ɔkya-mii ɔyikun. 21Bɛda lɛlɔ na bitaayɔ Katɔti uwi ɔni na binye bɛɛnu ulu ka Yesu Kristo wanu-mii kɔnyana na bɛkɛ ngba bɔni nsɔ naaadubo bɔsa kudii. 22Ɔmɛni ɔsu ni, bekyuli bani na bana bɔƒɔtaadi bútayu tɔ ɔkplu ni, bɛnu-ma kɔnyana. 23Na bidie babambadi lɛnɔ ɔkplu kemo na beleduo lɛgyavonku lɛmmɔ kemo. Na bakladi ni, bitaanu-ma kɔnyana. Nsu bɛgyumana bina lɛlɔ kalɛ na bana lɛyalɛ udunkpi ɔni náƒɔ-ma lɛlɔ aani adala kalɛ alávi-mii. 24Na anwu ɔni ndubɔkana na uƒie-mii ɔda na bilebuli ni, ɔdubɔkana na ɔbla-mii kedee lɛnɔ. Na lɛlɔ lɛyɔ-mii na ɔya na bɛkana na binye nwuna anumi ani muukeye lɛtɔtɔ na bilásɔ. 25Anwu ɔmmɔ ndi Katɔti unwi pɛ ɔni náƒɔ-bu ngba ɔkɛ Blɔti Yesu Kristo lɛlɔ. Anwu na buumwi, ɔsika anwu mɔɔdi lɛga na ɔɔdi ala ƒui lɛlɔ ku ɔyikun ɔ́si kukuuku ku uwi ɔmɛni kemo ku ɔni mebo lɛnɔ kemo. Ɔsia lɛni.

will be added

X\