YAKOBO 4

1Bi muuti kekpo ku kadɔ teeboku bina akɔ? Bina kayawi ebiti ani kama na bɛsiaku na eekpóku-mii na bina lɛlɔ kemo ni, ana kudɔ na ɔɔsí. 2Bɛɛwia kayawi ala, nsu bilakɛ-nya. Anwuɔsu na bɛɛdú lɛlɔ. Anumi eegyie-mii na ana lɛlɔ geen, nsu bilakɛ-nya. Anwuɔsu bɛɛdɔ na biikpóku lɛlɔ. Bɛɛwia-nya nsu kɔnu kuletuku-mii, ɔsika bilévele Katɔti na ute-mii. 3Si ina bívele Katɔti muedi ni, ulákpete-mii. Ɔsika ɔɔɔdi kasusu kabuni kemo na biiye-nwu ala ammɔ. Na lɛla lɛni kani na bɛɛwia ka biti lɛlakɛ lɛmmɔ bɛbla ndi ka biti-nya bɛsiaku kayawi ebiti ekpludi kama. 4Bɛdi bekyuli bani na biládi Katɔti ɔda bubo lɛlɔ. Bɛɛɛgyi ka si bɛ́bi bɛsiaku kayawi ala ni, bíti lɛlɔ bínwini Katɔti bekisine? Na ukyuli biala ɔni meti kayawi ala aani nwuna ɔkpana ni, ɔdi ukisine ute Katɔti. 5Ɔɔɔdi keeke na Bunweni Kedee Ɔku ɔ́su ɔnini, "Katɔti uukpó kogyulo geen na kɔyu kɔni nkya-bu lɛlɔ kemo ɔsu." 6Nsu ka Katɔti ɔɔyɔ́-bu ɔsu ni, ɔɔkya-bu ɔkplu kalɛ na bɔkana bunye kpakplaa. Ɔmɛni ɔsu Bunweni Kedee Ɔku ɔɔsu ɔnini, "Katɔti ulátunaku bekyuli bani mɔɔtalaku lɛlɔ katɔ, mmomu ɔɔkya bani muuboku lɛlɔ kalɔ ɔkplu." 7Anwuɔsu biboku lɛlɔ kalɔ bite Katɔti. Bitatunaku ukisine ɔmmɔ, na ɔdubukeli-mii kudɔ. 8Bɛni bide Katɔti, na anwu lɛnɔ ɔdubɔni ude-mii. Amii alaekpidi bablane, bɛƒɔ bina enu! Na amii bani bina kasusu kese inyɔ inyɔ ni, bɛvumana bɛsia Blɔti lɛti kama! 9Na biteewulo kɔnyana. Amii bani mɔɔmá ni, bina lɛma linwini keku. Na bina lɛlɔyɔ linwini kɔnyana buwulo. 10Biboku lɛlɔ kalɔ bite Blɔti, na ɔdubɔtalaku-mii katɔ. 11Banwa, bitalɔ lɛlɔ anyikpi. Si ɔdi ɔ́bla lɛni iye ɔ́tɛku ɔnwani ɔdi litemi ni, na ulábu ɔda bubo bɔmmɔ na ɔ́ta únye-mu lɛlɔ lɛnɔ. Si bɛ́ta bínye ɔda bubo bɔmmɔ lɛlɔ ni, na ɔɔtina ka bɛ́da ɔda bubo bɔmmɔ lɛlɔ bɔdi bɛ́ya. Na bínwini bɛɛtɛku ɔda bubo bɔmmɔ litemi. 12Katɔti muute-bu ɔda bubo bɔmɛni, na anwu kani ndi Litemi Ɔtɛne ɔmmɔ. Anwu kani ndubɔkana na ɔƒɔ-bu ngba. Na anwu kani ndubɔkana na ɔyila-mu. Anwuɔsu buuubo kuƒi ka bɔtɛku bula banwani litemi. 13Binu, amii bani mɔɔsu bɛnini, "Ɔmwi iye kɔnaadi bɔdubusie ɔma ɔdi butádi kuye, na bɔdubɔkya mmɔ lɛkwa linwi na bɔbla egulabi pii." 14Nsu bɛɛɛgyi kɔnaadi lɛla lɛni malɛku-mii. Bise aani uyɔ ɔni na si ɔƒɛƒɛɛ úduo-nwu akɔ pɛ na ɔɔyii taakya. 15Lɛla lɛni na ɔlɛka bɛsu ndi ɔnini, "Si Blɔti úte kuƒi na bútekpi ni, bɔdubɔbla kabla kamɛni iye kani ngye." 16Nsu ɔƒaani ni, bɛɛtina lɛlɔ na bɛɛkun lɛmɛnɛ lɛnɔ. Na lɛmɛnɛ bɔkun biala bɔɔɔdia. 17Anwuɔsu ukyuli ɔni ngyi lɛla lɛbuni bɔbla nsu ulábla-ni ni, ɔdi likpidi ute-nwu.

will be added

X\