YAKOBO 1

1Ami Yakobo ɔni ndi Katɔti ku Blɔti Yesu Kristo kabla ɔblane muugyele amii Katɔti bekyuli ƒui bani négyingya bakya kayawi ekpo ekpo ƒui. 2Banwa, lɛlɔ litaayɔ-mii si ala lidu lidu eekpóku-mii. 3Ɔsika si bɛ́kana na bɛ́di ala ani muukpóku-mii lɛlɔ ka bɛ́ƒɔ Kristo Yesu bɛ́di ɔsu ni, ɔdubo-mii bubunku na bɛdubɔkana na binye lɛla biala kenye kpakplaa. 4Bɛya na kalɛ na binye kpakplaa mɛni usie anumi ubu na ɔlɛ-mii kɔsia ɔwɔlɔ. Na bɛbla baƒɔtaadine babuni bani na lɛbuni bɔbla bɔ́ƒɔ-ma lɛlɔ kemo ƒui. 5Si bina akɔ ɔdi ɔɔyaki lɛnunda ni, ɔlɛka uvele Katɔti na ɔdubuti-ni ute-nwu, ɔsika Katɔti uuti-ni teete ukyuli biala ku kaƒɔ ƒaa. 6Nsu si biivele-nwu lɛla lɛdi ni, ɔlɛka bɛƒɔ bɛdi ka ɔdi-nwu bɔyɔ ka ute-mii. Na bina kasusu ketenwini. Ɔsika ukyuli ɔni na nwuna kasusu keenwíni ni, use aani kalɛ na ɔƒɛƒɛɛ uuƒwi ɔnantu ntu taavinku. 7- 8Na ukyuli ɔni na nwuna kasusu kese inyɔ inyɔ na nwuna ablala eeese siin ni, utasia anu ɔnii ɔdubɔkɛ lɛla lɛdi ɔsiku Blɔti kudɔ. 9Si Katɔti ɔ́talaku ɔƒɔtaadine ɔni ndi ɔwabane katɔ ni, ɔya na lɛlɔ litaayɔ-nwu. 10Lɛni kani na si Katɔti úboku ɔƒɔtaadine ɔni ndi ɔlakɛne kalɔ ni, anwu lɛnɔ ɔya na lɛlɔ litaayɔ-nwu. Ɔsika ɔlakɛne biala uwi ɔdububo ubavi aani kalɛ na lɛku kemo kugyii kuuwiile kuna anwula teewi kalɔ. 11Aanu si ɔƒɛ ɔ́tu na ɔɔbi ni, ɔɔyá na eveteli aayɛyɛ na ana anwula eewiile teewi kalɔ. Na ana bɔdia lɛnɔ bɔɔyii udu. Lɛni kani na ɔlakɛne kabla lɛnɔ kadububo kawɔlɔkɔ. 12Lɛlɔ lɛdubɔyɔ ukyuli ɔni náƒɔ ɔ́di na unye kpakplaa na ɔɔsiáku ala ani ƒui muukpóku-nwu. Ɔsika si enu átaƒɛ-nwu ni, ɔdubɔkɛ ngba ƒui lɛyuƒɔla lɛni na Katɔti ɔ́su úse ka ɔdubute bekyuli bani mɔɔyɔ́-nwu. 13Si lɛla lɛdi liikpóku ukyuli ɔdi taanu ni, utasu ɔnii Katɔti muukpóku-nwu taanu. Ɔsika lɛla lɛdi lilekpoku Katɔti taanu. Anwuɔsu anwu lɛnɔ ulekpoku ukyuli ɔdi ɔnii ɔbla likpidi. 14Mmomu ɔlɔna alaekpidi ani mɔɔda ukyuli ɔkwɛ ni, anya muunwíni teekpoku-nwu. 15Na ala ani mɔɔda-nwu ɔkwɛ mmɔ ni, aaƒɔ́-nwu lɛlɔ kemo na ɔɔyá na ɔɔbla likpidi. Na uwi ɔni na likpidi lɛmmɔ lɛnɔ lɛ́di-nwu lɛlɔ ƒui ni, ɔdubukpi ɔkya likpidi kemo. 16Banwa bayɔne, bitaya na ukyuli ɔdi ɔtɔlɔ-mii. 17Ala abuni ani ƒui na bubo na bɔɔnu ka ɔdia geen sɔsɔ ni, Katɔti kudɔ na aasí. Na ulávumana iye udie-bu atu aani ɔƒɛ ku kɔbuli kɔni nédie kuse na buduo lɛdisa kemo. 18Katɔti ɔkɛ ngba bɔƒɔ litemi geen lɛlɔ na ɔ́ya na bɔ́kɛ kɔyu kemo ngba. Ɔ́bla ɔmɛni ɔ́siaku nwuna lɛƒɔyɔ lɛlɔ. Ɔsika ɔɔwia ka bɔbla bedeedi na nwuna ala ani na údie ƒui akɔ. 19Banwa bayɔne, binyimo na ukyuli biala use atu unu lɛla biala. Na uwi lɛlɔ na ɔkɔsi bɔtɛmi. Na uteteeti kɔnyi pla pla. 20Ɔsika ukyuli kɔnyi kulábla ala abuni ani na Katɔti ɔɔwia taasiku-nwu kudɔ. 21Anwuɔsu bɛda lɛlɔ bidie ala ani naaadia bɔnu ku ekpidi udu biala kudɔ. Na biboku lɛlɔ kalɔ bite Katɔti. Na biƒie nwuna litemi buni lɛni na úti ɔ́kya bina kayi kemo bɛda. Ani ndubɔya na bɛkɛ bɔƒɔ. 22Ɔdi ka bitaabla taasiaku lɛla lɛni na litemi buni lɛmmɔ lɛɛtina lɛlɔ. Na ɔɔɔdi ka binu-ni kani. Si ɔɔɔdi lɛni ni, na bɛɛtɔ́lɔ lɛlɔ. 23- 24Ɔsika ukyuli ɔni na bunu kani na uunú litemi buni lɛmmɔ na ulábla taasiaku-ni lɛlɔ ni, use aani ukyuli ɔni na úti kanu na ɔ́nu kalɛ na nwuna anumi ese. Nsu kɔnakunwi ka ɔ́gyu lɛgba na mmɔ ni, ɔ́yiƒla kalɛ na use. 25Litemi buni lɛmmɔ ndi Katɔti ɔda ɔni na úbo-bu geen. Na ani mɔɔyá bekyuli baakɛ́ bɔnwuna. Si ukyuli únu na úduo etemila ammɔ kemo kaduɛ na útayiƒla ka ɔbla ɔsiaku-nya lɛlɔ ni, ala ani na ɔɔbla ƒui adubɔtɛ ete-nwu. 26Si ukyuli ɔdi ɔɔkali ɔnii ɔdi ɔƒɔtaadine buni na ulákana nwuna unyemi bɔda ni, ɔɔtɔ́lɔ lɛlɔ na nwuna bɔƒɔtaadi bɔmmɔ buuubo kɔsia kɔdi. 27Bɔƒɔtaadi ulu ɔni na Katɔti ɔɔnu ka use sɛɛn na bɔƒiɔ bɔdi buuubo-nwu kemo ndi ɔmɛni. Ɔlɛka ukyuli ubunku bekyuli bani muubó abi aani bekpinebi ku bekpinele kalɛ. Na ɔda lɛlɔ udie kayawi ekpidi biala kemo.

will be added

X\