HEBRIƑUƆ 9

1Bunyimi budeedi bɔmmɔ ni, bɔdanku ulu ɔni beeti taakpa ku kesii kani na baakpá na kalɔ lɛlɔ mɛni. 2Bátu kakpakɔ kani na béle ɔtɔ ku katɔma. Na ɔtɔ udeedi kemo ni, ligyii lɛni lɛlɔ na baatu asogya taasia lɛlɛ. Na ala kasiakɔ kani lɛlɔ na bodobodo ɔni na béti bákpa bete Katɔti ɔsia lɛnɔ use. Mmɔ baalɔ banii kakpakɔ kedee. 3Na kakpakɔ kammɔ katɔma kesii kani na béti kayakun kɔdi báda ni, mmɔ baalɔ banii ɔtɔ ɔni nse kedee ntulo ƒui. 4Mmɔ na sika ugyiedi lɛbi lɛni lɛlɔ na baakyula oloƒui lɛlɛ ku sika ugyiedi adaka ɔni kemo na Katɔti bunyimi bɔkya. Na adaka ɔmɛni kemo ni, atabi kɔlɛkɛ kɔni lɛlɔ bénweni bunyimi bɔmmɔ basia kɔkya. Na Aaron ugyii ɔdadi ɔni nédie evete lɛnɔ ɔkya-nwu kemo ku sika ugyiedi lɛkyami lɛdi. Na nina kemo ni, Katɔti adila ani baalɔ mana akya. 5Na adaka ɔmmɔ katɔ ni, bávɔ Katɔti batu badi udu mbo avwi na baalɔ-ma Kerubim bényene. Na ama mɔɔtina ka Katɔti ɔkya mmɔ. Na bana avwi ebi likpo lɛni na beeti bekyuli ekpidi taakyiɛ mmɔ. Nsu bulakana kɔtɛ kɔmmɔ kemo buduo busie ɔgyu ɔƒɛni tɔ. 6Lɛni na bábla ala amɛni bése mmɔ. Na bakpane béteeduo ɔtɔ udeedi kemo mɛni buduo buduo taatábla bana bakpane kabla. 7Na katɔma kammɔ kemo aka ni, ɔkpane unengudi kani néteeduo mmɔ kunwi na lɛkwa kemo. Na ntu úti ebuo ɔni na béeti bákpa ubugya ɔ́da na weti wakpa na anwu ɔlati ku bekyuli ekpidi ani bátati asa na bábla lili. 8Katɔti Kɔyu kɔkɛnku ɔmmɔ lɛlɔ kɔɔtina-bu nwaa ɔ́si uwi ɔmmɔ ka ulu ɔni lɛlɔ na bɔdubɔsia buduo Katɔti katɔma geen kammɔ kemo ni, útedie-nwu tɔ keyi uwi ɔni na kakpakɔ kedeedi kammɔ kamua kenye. 9Mmomu ɔmmɔ ɔdi lɛla lɛni mɔɔtina ka etela ku akpala ani ƒui na bada baabla akpala ammɔ ni, elédie bɔƒiɔ na ukyuli ɔni mɔɔbla akpala ammɔ lɛlɔ. 10Ɔsika ala ammɔ ƒui adanku bɔdi ku bɔni ku lɛlɔ bɔƒɔ ɔdi na lilu bun bun lɛlɔ. Na adi ɔlɔna lɛlɔ ɔda bubo bɔni ndubɔbla kabla ɔƒɛni wetédu ka ulu ɔwɔdi ɔmmɔ úbo. 11Uwi ɔni na Kristo úbo aani ɔkpane unengudi kalɛ úte ala abuni ani náada alɛ ni, ɔ́vi úduo kakpakɔ kani náƒɔ kuye na kadia ketulo ƒui kemo. Na ɔɔɔdi ukyuli enu na béti bátu-ka. Na bɔkana budie kalɔ bɔnii ɔɔɔkɛnku kalɛ na bédie kayawi kamɛni lɛlɔ ala kalɛ. 12Na ɔɔɔdanku bese iye bakɔ bebi ubugya útetéduo mmɔ. Mmomu anwu ɔlati ubugya na úti útéduo likpo lɛni nse kedee ntulo ƒui mmɔ kunwi pɛ kani, na ɔ́ƒɔ-bu lili kayu úte uwi ƒui. 13Bekyuli bani nábla ala ani náya na beesé lɛlɔ na ɔdi ala bɔbla kenye ni, baakana na beeti bese ku bakɔ ubugya ku bebuo bamɛni ntɔ teewi-ma lɛlɔ na bana lɛlɔ lɛɛsɔ taabla sɛɛn ute ɔdi ala bɔbla. 14Na si ɔbladu ɔmɛni ɔɔyá na ukyuli ɔɔbla sɛɛn ni, na Kristo ubugya ɔɔkana na ɔɔbla ukyuli sɛɛn teetulo. Ɔkɛnku Katɔti Kɔyu kɔni nli uwi ƒui lɛlɔ ni, Kristo úti lɛlɔ ɔ́bla akpala ani nédu áwɔlɔ úte Katɔti na lɛla lɛdi lítebie-mu lɛlɔ. Nwuna ubugya ɔdubɔbla bina kayi sɛɛn bɔsiku ɔdi bɔbla bɔni nsɔ neeebo kɔsia ƒui kudɔ kalɛ na bɔbla Katɔti ɔni nli kabla. 15Ɔmɛni ɔsu na Kristo ndi ukyuli ɔni nnye bunyimi bɔwɔdi bɔmɛni kenye kalɛ na bekyuli bani na Katɔti ɔ́lɔ ka babla anwu badi ni, bana kɔnu kutuku linyese lɛni ndi ngba bɔni nsɔ naaadubo bɔsa kudii. Ɔmɛni uubo teete lɛni, ɔsika Kristo kukpi ɔsu na Katɔti uuti ekpidi ani na bekyuli bábla na bunyimi bɔkukudi kemo taakyiɛ-ma. 16Si bédie ɔku ɔni mɔɔtina kalɛ na beele ukyuli ɔdi ala keyi ni, ɔlɛka batina ka ukyuli ɔni nénweni ɔku ɔmmɔ úukpi. 17Ɔsika ɔku ɔmɛni uuubo tɔ ɔyikun ɔdi si ukyuli ɔni nénweni-nwu mmɔ ɔmua uli ngba. Amu ntu nwuna kukpi kama kani asa na ɔku ɔmmɔ wabla kabla. 18Ɔmmɔ ɔsu ni, asa na bunyimi bɔkukudi bɔbala ukyuli ni, ubugya néwi kalɔ. 19Kudeedi ni, Mose úbo ɔda ute bekyuli na ala ani mɔɔbala na ɔda bubo bɔmmɔ kenye. Ɔmmɔ kama ni, úti bese ku bakɔ ubugya ɔ́salaku ntu na úti ɔ́kuna ubugya ɔmmɔ úwi ɔda bubo ɔku ɔmmɔ lɛlɔ ku bekyuli bammɔ ƒui lɛlɔ. Na úti unwu ugyiedi únyimi evete ani baalɔ bani hisope na úti ɔ́bla ɔdi ɔmmɔ. 20Na ɔ́su ɔnini, “Ɔmɛni ndi ubugya ɔni na Katɔti úti úse nwuna bunyimi bɔmɛni likpo. Na ɔ́su-mii ka bɛdi-mu lɛlɔ.” 21Lɛni kani Mose ɔ́kuna ubugya úwi kakpakɔ kammɔ ku ala ani na beeti taabla lɛkpa lɛmmɔ ƒui. 22Geen ni, ɔda bubo bɔmmɔ bɔɔtina na bɔkana na bɔsu bɔnii ala ƒui aabla sɛɛn ɔkɛnku ubugya lɛlɔ. Na ɔkɛnku ubugya kalɔ buwi kemo na Katɔti uuti bula ekpidi taakyiɛ-bu. 23Ɔ́manku úte ka ekposela ani baabla na kalɔ lɛlɔ mɛni na katɔ adi udu kenye ni, babla-nya sɛɛn ku akpala amɛni udu. Nsu katɔ adi alati anya ni, ɔlɛka beti akpala ani ndia ntulo ammɔ babla-nya sɛɛn. 24Ɔsika ɔɔɔdi kakpakɔ kani na bekyuli bayawine béti enu bábla básiaku katɔ ɔdi kenye kemo na Kristo úduo. Mmomu Katɔ Ɔga Ɔma geen kadi kemo na úduo ɔkya ɔƒɛni na Katɔti anumi na bula lili. 25Na uléti lɛlɔ taakpa lɛkwa ndi lɛkwa aani kalɛ na ɔkpane unengudi uuduo kesii kani nse kedee ntulo ƒui mmɔ ku ubugya ɔni naaadi anwu ɔlati ɔdi kalɛ. 26Si lɛni na use ni, ɔlɛka nka Yesu ɔsɔ ubebo abi ɔsia kama kɔlɛ kɔlɛ ɔ́si kayawi kalɔ kesekɔ ƒui. Nsu kalɛ na use ni, kunwi pɛ kani na úbo kayawi kamɛni kemo úbedie-bu na ekpidi ƒui kemo ku nwuna ubugya ɔni na úti ɔ́kpa na bula lili. Na ɔdanku uwi ƒui utédu kayawi kawɔlɔkɔ. 27Katɔti ɔ́lɛ ugyii úse ka ukyuli ukpi kunwi pɛ kani, na ɔmmɔ kama na ɔtɛku-nwu litemi. 28Lɛni kani na Kristo lɛnɔ úti lɛlɔ ɔ́kpa kunwi pɛ kani na údie bekyuli pii na bana ekpidi kemo. Na ɔdubɔsɔ ubo kunyɔdi. Na ɔɔɔdi ɔni na ɔsɔ ubebo abi na ekpidi ɔsu. Mmomu kalɛ na uti ngba bɔƒɔ uboku bekyuli bani na benye bagya-nwu.

will be added

X\