HEBRIƑUƆ 7

1Melkisedek ɔmɛni ɔ́di lɛga na Salem, na ɔ́bla ɔkpane kabla úte Katɔti ɔni ntulo ƒui. Uwi ɔni na Abraham ɔ́si kekpokɔ útádi baga bani nkya amadɔ mmɔ lɛlɔ ɔdubo ni, Melkisedek ɔmɛni útásiaku-nwu na úte-nwu kusɛ kusɛ. 2Na Abraham úti nwuna ala ƒui lɛkpa leevudi úte-nwu. Kudeedi ni, Melkisedek lɛnyi kalɔ ndi Siin Bɔbla Ɔga. Na ɔmmɔ kama ni, Salem Ɔga kalɔ budie ndi Keyi Buɛɛ Ɔga. 3Na bétenweni lɛla lɛdi bátasiaku ɔti iye uni, iye kaba lɛlɔ, iye nwuna bɔwɔ iye kukpi lɛlɔ. Na Katɔti ɔ́ya na use aani anwu Katɔti Ubidi, ɔsika ɔdi ɔkpane ute uwi ƒui. 4Bɛnu kalɛ na Melkisedek ɔmɛni ɔ́ƒɔ kuye geen. Abraham ɔni ndi bula nana ɔni nédie bula kaba kamɛni muedi úti ala ani na úkpo ɔ́ƒɔ na kekpokɔ mmɔ lɛkpa leevudi úte-nwu! 5Na ɔƒɛni ni, ɔda bubo bɔmmɔ búte Lewi kaba kemo bebi bani nébenwini bakpane ka baƒɔ ala lɛkpa leevudi basiku bekyuli kudɔ ina ka bekyuli bamɛni badi bana banwani bani nási Abraham ɔmmɔ kaba kemo. 6Melkisedek ɔmɛni útasi Lewi kaba kemo, nsu ɔ́ƒɔ ala lɛkpa leevudi ɔ́siku Abraham ɔni na Katɔti úse-nwu kenye úse mmɔ kudɔ, na Melkisedek ɔmmɔ úte-nwu kusɛ kusɛ. 7Na ɔkɔ ɔdi uuubo-nwu kemo ka ni, ukyuli ɔni muute kusɛ kusɛ utulo ukyuli ɔni na béte kusɛ kusɛ mmɔ. 8Na bekyuli bani mɔɔƒɔ́ ala lɛkpa leevudi ni, badi bakpane bani muukpi. Nsu na Melkisedek kakɛ anwu ni, ɔ́ƒɔ lɛkpa leevudi lɛmmɔ aani ɔkpane ɔni nli ngba aani kalɛ na Bunweni Kedee Ɔku ɔɔsu. 9Na bɔkana na bɔsu muedi bɔnii Lewi ɔni mɔɔƒɔ́ ala lɛkpa leevudi lɛnɔ ɔ́sia Abraham lɛlɔ úte Melkisedek ala lɛkpa leevudi lɛmmɔ. 10Ɔsika uwi ɔni na Abraham ɔ́siaku Melkisedek na uute-nwu ala lɛkpa leevudi lɛmɛni ni, na Lewi ɔmua ɔkya bana nana bene ubugya kemo. 11Katɔti úte kadi ƒui bekyuli ɔda bubo bɔni nkɛnku Lewi ɔkpane bɔdi kabla ulu lɛlɔ. Na si bɔbla na bábla bana kabla na kédu káwɔlɔ ni, bi ɔsu na Katɔti ɔ́sɔ ɔ́ƒuna ɔkpane ɔbambadi ka ubo ɔsiaku Melkisedek ɔkpane bɔdi ulu lɛlɔ na ɔɔɔdi aani kalɛ na ɔ́ƒuna Lewi bebi bani ndi Aaron kaba? 12Anwuɔsu si kavumana kadi kébo na ɔkpane bɔdi ulu ɔdi lɛlɔ ni, na agyi anii ɔdi ka kavumana kadi kebo na ɔda bubo bɔmmɔ lɛnɔ kemo. 13Na ukyuli ɔni lɛlɔ na básu ala amɛni ƒui básiku ni, ɔ́si kaba bekyuli babambadi akɔ. Na kaba kammɔ bekyuli akɔ ɔdi útabla ɔkpane kabla na lɛkpabi lɛlɔ kudii. 14Ɔsika bɔgyi kede kede ka Yesu ni, Yuda kaba kemo na báwɔ-nwu básiku. Na kaba kammɔ lɛlɔ ni, Mose útasu lɛla lɛdi útasiku bakpane lɛlɔ. 15Na ɔƒɛni ɔni na ɔkpane ɔbambadi ɔdi ɔ́da ɔ́lɛ aani Melkisedek kalɛ ni, lɛla lɛni na bɔ́su mɛni lɛdubɔbla-mii nwaa libu. 16Ɔdi ukyuli ɔni nébenwini ɔkpane na ɔɔɔkɛnku ɔda bubo bɔni ndanku kaba kemo ɔkpane bɔdi ulu lɛlɔ. Mmomu únwini ɔkɛnku ɔkpane ɔyikun ɔni nkya nwuna ngba bɔni naaadubo bɔsa kudii kemo. 17Ɔsika Katɔti ɔ́su nwaa ɔnini, “Adi ɔkpane úsela uwi ƒui na Melkisedek ɔkpane bɔdi ulu lɛlɔ.” 18Béliiku ɔda bubo bɔkukudi bése kɔmadɔ, ɔsika buuubo ɔyikun na buuubo kɔsia kɔdi lɛnɔ. 19Ɔsika ɔda bubo bɔni na Katɔti úte-bu ɔkɛnku Mose lɛlɔ ni, bútabla Katɔti kabla bútawɔlɔ. Na ɔƒɛni ni, bɔ́kɛ lɛnunsia lɛni ndia ntulo na lɛɛyá na bɔɔní teede Katɔti. 20Ɔƒɛni ni, ɔɔɔdi ɔmmɔ lɛti, mmomu ɔkpane bɔdi ulu ɔmmɔ ɔdanku Katɔti linyese. Na uwi ɔni na bése bakpane babambadi ni, ɔɔɔdanku linyese lɛdi. 21Nsu Yesu úbenwini ɔkpane ɔkɛnku Katɔti linyese lɛlɔ uwi ɔni na ɔ́su ɔnini, “Unwoti úse kenye kpakplaa kadi na ulavumana-ka kudii ɔnini, 'Adi ɔkpane úsela uwi ƒui.' ” 22Ɔkɛnku Katɔti linyese lɛmɛni lɛlɔ ɔsu ni, Yesu ndi bula kama kekpokɔ na bunyimi bɔni ndia ntulo mɛni lɛlɔ. 23Kavumana kabambadi kadi lɛnɔ kakya kani ndi ka bakpane bakukudi bammɔ bémomo, ɔsika ɔdi útakana nwuna kabla kenye bunye uwi ƒui ɔ́si kalɛ na beekpi ɔsu. 24Nsu Yesu anwu uli úsela uwi ƒui, na ulavumana nwuna ɔkpane kabla ulete ɔdi kudii. 25Anwuɔsu ni, ukyuli biala ɔni muubo Katɔti kudɔ ɔkɛnku-nwu lɛlɔ ni, Yesu ɔmmɔ ɔɔkana na ɔɔƒɔ́-ma ngba uwi ƒui ɔdubo buteevele teete-ma na Katɔti kudɔ. 26Ɔmɛni ɔsu ni, Yesu ɔmɛni ndi ɔkpane unengudi ɔni kani ndubɔbla lɛla lɛni na bɔɔwia ute-bu. Na use kedee, na lɛla lɛdi lɛɛɛda-nwu. Use sɛɛn na Katɔti údie-nwu ɔ́lɛku alaekpidi bablane akɔ, na ɔ́kɔliku-nwu útése sɛsɛɛ na katɔ kakaaka ƒui. 27Na uuuse aani bakpane benengudi babambadi bammɔ kalɛ bani nálɛ ka bataabla akpala na ama ku bekyuli bakladi lili taasia kama limeyi ndi limeyi. Mmomu kunwi kɔni na anwu úti lɛlɔ ɔ́kpa na bekyuli ƒui lili ni, ɔ́kpa kunwi pɛ kɔmmɔ kani na ɔ́sa. 28Ɔsika ni, ɔda bubo bɔmmɔ bɔɔƒuna bakpane bani naaakana bunye kpakplaa ama alati. Nsu linyese lɛni nébo na ɔda bubo bɔmmɔ kama ni, bɔ́ƒuna Ubi ɔmmɔ na ɔ́ya na ɔ́wɔlɔ nwuna kabla úte uwi ƒui.

will be added

X\