HEBRIƑUƆ 5

1Ɔkpane unengudi biala ni, bekyuli akɔ na baaƒuna-nwu taalɛku. Na anwu muunye bekyuli bammɔ kenye na ala ani ƒui ndanku Katɔti lɛlɔ. Na uuti etela ku akpala teete Katɔti na bana ƒui ekpidi lili. 2Na bekyuli bani naaagyi ɔda bubo bɔmmɔ na báyii ulu ni, ɔkpane ɔmmɔ ɔgyi kalɛ na ɔbla bana litemi buɛɛ. Ɔsika anwu lɛnɔ ulákana ɔda bubo bɔmmɔ ƒui lɛlɔ bɔdi. 3Lɛni ɔsu na ɔlɛka ɔbla akpala na anwu ɔlati ekpidi ku bekyuli bammɔ ƒui ekpidi lili. 4Ukyuli ɔdi ulakana ɔkpane unengudi kenyekɔ kamɛni bɔƒuna bute lɛlɔ. Mmomu ɔdi ka Katɔti náƒuna-nwu aani kalɛ na ɔ́ƒuna Aaron. 5Lɛni kani na Kristo lɛnɔ útaƒuna ɔkpane unengudi kenyekɔ kamɛni útete lɛlɔ kalɛ na bekyuli babu-nwu. Mmomu Katɔti ɔ́su-nwu ɔnini, “Awɔ ndi mina ubi. Na ɔmwi ni, línwini-ɔ ɔti.” 6Na likpo bamba ni, ɔ́sɔ ɔ́su ɔnini, “Adi ɔkpane úsela uwi ƒui na Melkisedek ɔkpane bɔdi ulu lɛlɔ.” 7Uwi ɔni na Yesu úlie ngba na kayawi kamɛni lɛlɔ ni, ɔ́kpali katɔ úvele Katɔti ɔni kani ndubɔkana na udie-nwu na kukpi kemo ku kɔvanu momoomo ku imii. Na Katɔti únu-nwu bɔkpali, ɔsika úboku lɛlɔ kalɔ úte-nwu na ɔɔbu-nwu ɔsu. 8Na ina ka ubidi na ɔdi ni, ɔ́tɛya abi ani na ɔdi ka ukyuli ubo si uunú Katɔti litemi. 9Na ka Katɔti ɔ́ya na ɔ́bla nwuna kabla ɔ́wɔlɔ ni, únwini ukyuli ɔni lɛlɔ na bekyuli bani muunú-nwu litemi ƒui baasia taakɛ ngba bɔƒɔ. 10Na Katɔti nédie-nwu ka unwini ɔkpane unengudi na Melkisedek ɔkpane bɔdi ulu lɛlɔ. 11Bubo ala pii na bɔsu bɔsiku ɔmɛni lɛlɔ, nsu ka bilákana ala buƒie taakya lili kemo pla pla ɔsu ni, nwuna kalɔ budie bubo ɔkplu. 12Sɔsɔ ni, ɔƒɛni kalɛ bene nka bɛdi ala batinane muedi. Nsu bɛsɔ bɛɛwia ukyuli ɔni nsɔ medie Katɔti litemi buni lɛmmɔ ala kalɔ kesekɔ mete-mii. Ɔni na bɛwia adila geen kama ni, bɛɛwia lɛnyi ntu mmomu. 13Na ukyuli ɔni na lɛnyi ntu kani na ɔɔnyimi ni, ɔmua ɔdi ɔnamu na útedu ka unu ala bɔtina bɔni ndanku ukyuli lɛlɔ bɔbla siin kalɔ. 14Nsu adila geen ani mbo unu ni, ese ete bekyuli bani náabi lɛlɔ. Lɛni kani na bekyuli bani náabi lɛlɔ ni, báanyuɛ lɛlɔ na báti kavumana kani nkya lɛbuni ku likpidi ntɛ.

will be added

X\