HEBRIƑUƆ 4

1Anwuɔsu ka linyese lɛni na úte-bu ka buduo nwuna bɔnwuna ƒui kemo kamua kese kéte-bu ɔsu ni, bɛya na bɔnu lɛlɔ kemo kaduɛ kalɛ na ɔdi ulásɔ na kenye kammɔ lɛlɔ. 2Ɔsika básu abu lɛnɔ litemi buni lɛmmɔ aani kalɛ kani na básu ama lɛnɔ. Nsu litemi lɛni bénu kátalɛ kɔsia kɔdi kétete-ma. Ɔsika ama bani nénu kenye kammɔ ni, bátaƒɔ-ka bátadi. 3Nsu abu bani mɔɔƒɔ́ taadi ni, bɔdubɔkɛ bɔnwuna bɔmmɔ. Na bani nátaƒɔ bátadi ni, bátakɛ-mu aani kalɛ kani na Katɔti ɔ́su lebo lɛni na ɔ́su ɔnini, “Anwuɔsu lɛ́kpali lɛlɔ lɛ́su na kɔnyi kemo nnini, 'Baláni beléde-mi na bakɛ bɔnwuna kudii!' ” Katɔti ɔ́su ɔmɛni ina ka úte kuƒi úse uwi ɔni na ɔ́wɔlɔ kayawi budie. 4Ɔsika na Bunweni Kedee Ɔku kemo ni, bénweni lɛla lɛdi na limeyi maatɛdi lɛlɔ banini, “Na limeyi maatɛdi lɛlɔ ni, Katɔti ɔ́da kabla ƒui ɔ́ya na ɔ́nwuna.” 5Na litemi lɛni bɔ́su bɔ́vi mɛni kemo ni, Katɔti ɔ́su ɔnini, “Baláni beléde-mi na bakɛ bɔnwuna kudii!” 6Litemi lɛmɛni lɛmua lise lɛni ka badi badubɔkɛ bɔnwuna bɔmmɔ. Na bani na báka lɛsa lɛmmɔ bɔkɔ bute ni, ama mmomu néteduo bɔnwuna bɔmmɔ kemo ɔ́si bana atuɔkplu ɔsu. 7Ɔmɛni ɔsu na Katɔti ɔ́sɔ úse limeyi lɛbambadi lɛni na ɔɔlɔ ɔnii ɔmwi úse uwi ɔni na ɔ́tɛmiku kuuku bekyuli ɔkɛnku Ɔga Dawid lɛlɔ lɛni na bɔ́su búbavi bɔnini, “Si bínu Katɔti lɛdi ɔmwi ni, bitabla atuɔkplu.” 8Ɔsika bɔya na si Yosua ɔ́ya na bákɛ bɔnwuna ni, nka Katɔti ɔ́sɔ útasu lɛla lɛdi útasiku limeyi lɛbambadi lɛdi lɛlɔ. 9Ɔmɛni ɔsu na lɛnwunameyi lɛmua lise lite Katɔti bekyuli. 10Ɔsika ukyuli biala ɔni muuduo Katɔti bɔnwuna kemo ni, ɔɔda nwuna kabla ƒui taaya na ɔɔnwuna aani kalɛ kani na Katɔti ɔ́bla. 11Anwuɔsu bɛya bɔkya ɔkplu biala na buduo bɔnwuna bɔmmɔ kemo. Na ɔdi biala uláwɔ ulu ka ɔsiaku bana atuɔkplu bɔbla kama ɔsu. 12Katɔti litemi lɛdi lɛla lɛni mbo ngba na lɛɛbla kabla pla pla teetulo kewii kani na bádɔ-ka lɛvi inyɔ. Na liiduo ukyuli kasusu ku kɔyu ntɛ. Na lɛɛbla lɛni aani kalɛ na kewii keele ɔlɔna ku ekubi ntɛ. Litemi lɛmmɔ lɛɛnu lɛla biala lɛni nkya ukyuli kasusu ku kayi kemo taatina-nwu. 13Ala ani ƒui na Katɔti údie lítabɛ-nwu. Na ɔɔnu lɛla biala kalɛ na lise. Na nwuna anumi na bɔdubo bula akunta ƒui bɔbu. 14Anwuɔsu ka bubo ɔkpane unengudi ɔbuni ƒui ɔni ndi Katɔti Ubidi Yesu ɔni nkya-nwu kudɔ na katɔ mmɔ ɔsu ni, bɛya na buƒie bɔƒɔtaadi bɔni kenye na buudie mɛni bɔda kpakplaa. 15Ɔɔɔdi ɔkpane unengudi ɔni na bula lɛlɔ lilakywi-nwu kaƒɔ na bula kpɛtɛ kpɛtɛ bɔbla kemo. Mmomu ɔdi ukyuli ɔni na ala ékpoku-nwu ánu na ulu biala lɛlɔ aani bula kalɛ kani. Nsu útabla likpidi lɛdi. 16Anwuɔsu bɛya na buti bula lɛlɔ ƒui bute-nwu na bɔkpɛ bude-nwu na nwuna lɛgaboku kudɔ ku kayi buse ka ubo lɛƒɔndia ɔsu. Na ɔkɛnku nwuna lɛƒɔndia ɔsu ni, ɔdubɔnu-bu kɔnyana na ubunku-bu uwi biala na búvele-nwu lɛla lɛdi.

will be added

X\