HEBRIƑUƆ 13

1Bitaayɔ lɛlɔ uwi biala kemo aani banwa kalɛ. 2Na bitayiƒla baƒɔ bɔƒɔ, ɔsika badi báƒɔ Katɔti batu na béduo-ma kudɔ ɔni na baaagyi. 3Na binyimo bani lɛnɔ ntɛ aban ɔtɔ aani si amii lɛnɔ na bákya ɔtɔ ku-ma ku bekyuli bani na baabla-ma kalala aani si amii muubó abi. 4Ɔgya ku ule ngba bulie ni, ɔdi ka bite-mu ɔbu geen. Na ɔdi utalɛ ɔkpanadi kama. Ɔsika Katɔti ɔdubɔtɛku ukyuli ɔni mɔɔdi kɔsɔnɔ litemi ku bani na lɛyalɛ ala áƒɔ-ma lɛlɔ kemo. 5Anumi asɔ etegyie-mii na egulabi lɛlɔ. Mmomu bɛya na lɛla lɛni bibo limo-mii. Ɔsika Katɔti ɔ́su ɔnini, “Lɛɛɛdubo-mii bɔnyonu kudii, na neeedie-mii atu lɛnɔ kudii.” 6Anwuɔsu bɔɔsu ku kayi ƒui bɔnini, “Blɔti ndi mina ubunkune, anwuɔsu lɛɛɛdubo bɔyia. Bi na ukyuli ɔdubɔkana-mi bɔbla?” 7Binyimo bina batɔnkune bani násu-mii Katɔti litemi. Na bɛbu bɛnu kɔsia kɔni na bákɛ na ulu ɔni na béti bélie ngba kemo. Na bɛnu bana bɔƒɔtaadi bɛtɛya. 8Yesu Kristo ulávumana. Kalɛ kani na úse uwi ɔni návi kemo ni, lɛni kani na use ɔƒɛni ku uwi ɔni mebo ƒui lɛnɔ kemo. 9Bitaƒɔ lɛla bamba lɛni na ukyuli ɔdi watina-mii bitadi. Katɔti lɛƒɔndia mɔɔyá na bɛɛkya kayi ɔkplu, na ɔɔɔdi ɔda bubo bɔni ndanku adila bɔdi kama bɔsia. Bekyuli bani mɔɔsia ala ammɔ kama ni, balakɛ kɔsia kɔdi. 10Abu ni, bubo lɛkpabi lɛni lɛlɔ ala na ama bani mɔɔkpá na Yudaƒuɔ kakpakɔ kammɔ kemo beeebo kuƒi ka badi. 11Mmɔ na ɔkpane unengudi uuti bebuo ubugya teeduoku kesii kani nse kedee ntulo ƒui mmɔ. Na uusié mmɔ taatákpa teevele ala na bekyuli ekpidi lili. Nsu baakyula bebuo bammɔ na kabanye. 12Lɛni kani na Kristo lɛnɔ úbo abi na ɔma kabanye kalɛ na ɔbla nwuna badi kedee ɔkɛnku nwuna ubugya lɛlɔ. 13Anwuɔsu ni, bɛya na busie butásiaku-nwu na kabanye mmɔ na bakya-bu kɔƒa kɔni bákya anwu lɛnɔ. 14Ɔsika na kayawi mɛni ni, buuubo ɔma ɔni ndubuse buteesie uwi ƒui. Mmomu bunye bɔɔnu ulu teete ɔma ɔni mebo. 15Anwuɔsu ni, bɛya na bɔsia Kristo lɛlɔ na buteeti linugya akpala teete Katɔti. Na akpala ammɔ ndi kalɛ na buubó nwuna lɛnyi kedee kudu ku bula kenye. 16Na bitayiƒla ka bɛbla lɛbuni bite lɛlɔ, na bite lɛlɔ ala. Ɔsika akpala ammɔ udu mɔɔda Katɔti kubiti. 17Binu bina batɔnkune litemi na biboku lɛlɔ kalɔ bite-ma na badi-mii lɛlɔ. Ama mɔɔnu-mii lɛlɔ aani bekyuli bani na ɔlɛka babu akunta bete Katɔti. Bɛbu-ma kalɛ na bana kabla kenwini lɛlɔyɔ na ulabla-ma etila. Ɔsika ɔmmɔ ulete-mii kenyekɔ kabuni kadi. 18Bɛkpali katɔ na bula lili. Bɔgyi nwaa ka bula kayi kaladu-bu kɔtɔ kɔdi. Na bɔɔyɔ́ ka butaabla lɛla lɛni ndia uwi biala. 19Na ɔni ntulo ndi ka muuvele-mii geen nnii bɛkpali katɔ na mina lili, kalɛ na Katɔti ɔya na lɛsɔ libo-mii kudɔ pla. 20Na muuvele keyi buɛɛ Katɔti ɔni nkɛnku bunyimi bɔwɔdi bɔni nse úsela ƒui ɔsu na ɔ́gyila Yesu Kristo ɔni ndi baƒonu ɔdane buni ɔ́lɛku bekpine akɔ nnii 21ute-mii ala abuni ani ƒui na bɛkana biti bɛbla nwuna lɛyɔla. Na muuvele-nwu nnii ɔbla lɛla lɛni na ɔɔyɔ́ na bula lɛlɔ kemo ɔkɛnku Yesu Kristo ɔni námanku úte bumwi uwi ƒui lɛlɔ. Ɔsia lɛni. 22Banwa, muuvele-mii geen nnii binu-mi ala ani na mɔɔsu-mii ku ogya ɔni mɔɔkya-mii. Ɔsika ɔku klukui ɔdi kani na línweni-mii. 23Mɔɔyɔ́ ka lɛya bɛti ka bányonu bula ɔnwa Timoteo na aban ɔtɔ. Na si úyile mɛni búbeduo ni, ami ku-nwu bɔdubo bubanu-mii. 24Bigyele bina batɔnkune ƒui bite-bu ku Katɔti bekyuli bammɔ ƒui. Banwa bani nkya Italia ƒui beegyele-mii. 25Katɔti lɛƒɔndia lɛsiaku bina ƒui.

will be added

X\