HEBRIƑUƆ 12

1Anwuɔsu ka bubo bekyuli pii bamɛni udu bani muudie bɔƒɔtaadi bɔmɛni kenye ni, bɛya buti ala ani muutile-bu kuƒi mmɔ ku ekpidi ani mɔɔbala-bu uwi pii bɔvaakun. Na bukeli usi ɔni ntɛ-bu anumi ku lɛnungyie. 2Na bɛya na butaanu Yesu lɛti pɛ anumi. Anwu ntɔnku-bu na anwu kani ndubɔya na bula bɔƒɔtaadi bɔbla bɔƒɔtaadi geen bɔwɔlɔ. Ka ɔgyi lɛlɔyɔ lɛni na Katɔti ɔdubɔya na ɔkɛ ɔsu ni, ɔ́kya ɔkplu na úbo abi na ugyii lɛlɔ. Na útakpete edumi ku kɔƒa kɔni bákya-nwu. Na ɔmmɔ kama ni, útélie lɛgaboku lɛlɔ na Katɔti kɔdianu kesii kani náƒɔ kuye ketulo. 3Bɛtɛya Yesu ɔni nákya ɔkplu na úbo abi na ala ekpidi bablane bamɛni enu kemo, kalɛ na enu alaƒɛ-mii na binwini kama. 4Lɛlɔ lɛni na biikpóku kalɛ na bɛdi likpidi lɛlɔ ni, útedu tɔ kalɛ na bina ubugya uwi kalɔ. 5Munuu bɛ́ɛyiƒla Katɔti etemila ani na ɔ́su-mii úti ɔ́kya-mii ogya aani bebi kalɛ? Ɔ́su ɔnini, “Mina ubi, teti Katɔti kɔtu bɔni tabla lɛla keeke. Na enu ataƒɛ-ɔ si ɔɔdɔnku-ɔ. 6Ɔsika bekyuli bani na Katɔti ɔɔyɔ́ ni, ama na ɔɔlɛ kpakplaa. Na bani lɛnɔ na ɔɔƒɔ́ ka badi anwu badi ni, ama na ɔɔní kɔtu.” 7Binye lɛbibo biala kenye aani kɔtu bɔni bɔni na ubi ɔti uute ubi. Na ɔmɛni ɔɔtina ka Katɔti mɔɔní-mii kɔtu lɛni aani nwuna bebi. Ɔsika ubi ɔti ɔdi uuubo ɔni na ulani ubidi kɔtu. 8Si balani-ɔ kɔtu aani kalɛ na bɔgyi ka baaní ɔdi biala kɔtu ni, na ɔgbami na báwɔ-ɔ básiku na aaadi kaduli kammɔ kemo ubi. 9Ɔmɛni kama bubo bati bani náwɔ-bu na kalɔ kamɛni lɛlɔ na baaní-bu kɔtu na bɔɔbu-ma lɛnɔ na ɔmɛni ɔsu. Anwuɔsu ɔlɛka buboku lɛlɔ kalɔ bute Katɔti ɔni ndi bula kɔyu kemo Ɔti kalɛ na bulie ngba. 10Bula bati bani na bubo mɛni baaní-bu kɔtu uwi klukui ɔdi kemo kani kalɛ na bánu ka ɔ́manku-bu. Nsu Katɔti ɔɔní-bu kɔtu kalɛ na ɔdia ute-bu na abu lɛnɔ bɔbla kedee aani kalɛ na use. 11Kɔtu bɔni biala buláyu ukyuli emini na uwi ɔmmɔ kemo. Mmomu bɔɔyu ɔlɛ. Nsu ɔmmɔ kama ni, bani na báni-ma kɔtu lɛni ni, baabla ala abuni na ulu siin lɛlɔ, na baakɛ́ keyi buɛɛ. 12Ɔmɛni ɔsu ni, bina akɔnkɔ ku enu ani mɔɔtɔ́-mii ni, bɛya na ɔyikun ɔwɔdi uduo-ni kemo. 13Bɛbwɛ na bina kɔvinkɔ ƒui na kɔdia bɔvi kalɛ na bani neeebo ɔlɔkplu ni, balakpa balaƒɛ belewi kalɔ, mmomu basia-mii kama na bakɛ ɔlɔkplu bawɔlɔ. 14Bɛsia ulu biala lɛlɔ na keyi buɛɛ kakya amii ku bekyuli ƒui ntɛ na bɛbla kedee. Ɔsika ɔdi biala ulakana na wanu Katɔti si uuuse kedee. 15Bɛnu kaduɛ kalɛ na ɔdi ulayii Katɔti lɛƒɔndia ulu ɔmmɔ, kalɛ na ulénwini ligyukwi likpidi ulakya bakladi akɔ na weboku ɔgbankpi na webile bekyuli pii. 16Bɛnu kaduɛ kalɛ na lɛyalɛ ala elebile ɔdi kasusu iye ɔsɔ ulayia Katɔti aani kalɛ na Esau útayia ɔsu na úti nwuna linengu kadikɔ úye ɔ́vumanaku adila bɔdi kunwi pɛ. 17Na ɔmmɔ kama aani kalɛ na bɛgyi ni, uwi ɔni na ɔɔwia ka ɔti use-nwu kama ku kusɛ kusɛ ni, úni-nwu. Na Esau ɔ́sɔ útakana lɛla lɛni na ɔ́bla bɔvumana ina ka ɔ́wia kusɛ kusɛ ɔmmɔ ku keku. 18Amii biiise aani Israelƒuɔ bani nébenye lɛla lɛni na bakana bɔnu bɔti iye betuku kudɔ ɔni ndi Sinai kɔbi kɔni mɔɔda ku ogya bonwu na lɛdisa ku kesii kani nse suu na ɔƒɛƒɛɛ kpakplaa kemo. 19Bítenu tɔ kakpɛɛ kani náku momoomo iye lɛdi lɛni etemila na bani nénu bévele ka basɔ baláwia belénu lɛnɔ. 20Ɔsika balákana ala ani na ɔ́su-ma lɛlɔ bɔdi ɔni na ɔ́su-ma ɔnini, “Si ina ebuo ɔdi nétuku kɔbi kɔmmɔ ni, ɔdi ka bebo-nwu atabi badu.” 21Lɛla lɛni báanu mmɔ lɛdi liƒu lɛla libendi lɛni náya na Mose ɔ́su ɔnini, “Liƒu lítulo-mi, na lɛlɔ lɛɛtɔ́-mi!” 22Biiise aani Israelƒuɔ bammɔ. Mmomu amii ni, Sion kɔbi kudɔ na bíbo bínye ɔni ndi Katɔ Ɔga Ɔma Yerusalem ɔni ndi Katɔti ɔni nli ngba uwi ƒui ɔma unengudi. Katɔti batu mpimu mpimu kasala bani na lɛlɔyɔ lɛ́ƒɔ-ma kemo na bíbo bíbasiaku. 23Na bíbo bíbasiaku Katɔti bekyuli bani nse aani nwuna bebi bedeedi bani anyi na bénweni bése katɔ. Katɔti ɔni ndubɔtɛku bayawine ƒui litemi anumi na bíbo bínye na bekyuli babuni bani nékpi na Katɔti ɔ́bla bana ayu sɛɛn ɔ́wɔlɔ akɔ. 24Na bíbo bíbasiaku Yesu ɔni ndi bunyimi bɔwɔdi bɔmɛni kenye unyene. Na ɔ́kuna nwuna ubugya ɔni mɔɔsu etemila ani mbo ɔyikun etulo Abel ɔdi úwi-mii lɛlɔ. 25Bɛnu kaduɛ na biléni anwu ɔni mɔɔtɛmiku-mii. Ɔsika si bekyuli bani nénu anwu ɔni nálɛ-ma kpakplaa na kayawi kamɛni lɛlɔ batakana na bekeli bana kɔtu bɔni ni, bɛti ka ulése abu lɛnɔ buɛɛ uletulo ama si búni anwu ɔni nási katɔ úbalɛ-bu. 26Uwi ɔmmɔ kemo ni, nwuna lɛdi lɛkunku kayawi. Nsu ɔƒɛni ni, ɔ́su-bu úse ɔnini, “Nsɔ ndubo kayawi kammɔ bɔkunku kunwi. Na ɔɔɔdi aka lɛti, mmomu ku katɔ lɛnɔ.” 27Etemila ani na ɔ́su ɔnii, “Nsɔ ndubo bɔkunku kunwi” ni, ɔɔtina ka Katɔti ɔdubɔda ala ani na údie na aakunku mmɔ budie ana kenyekɔ. Na ani na balákana bɔkunku asɔ akya. 28Anwuɔsu ka lɛga kadikɔ kani kemo na bɔdubuduo kalákunku ɔsu ni, bɛya na bɔgya Katɔti enu na bumwi-nwu na ulu ɔni námanku lɛlɔ ku ɔbu ku bɔyia. 29Ɔsika bula Katɔti use aani ogya ɔni mɔɔkyula ala.

will be added

X\