HEBRIƑUƆ 10

1Ɔda bubo ndi ekposela úte ala abuni ani ndubo. Na ɔɔɔdi ɔda bubo bɔmmɔ ndanku ala abuni ammɔ alati geen tɔ. Ɔmɛni ɔsu ni, akpala ani nkɛnku ɔda bubo bɔmɛni ani na baabla lɛkwa ndi lɛkwa ni, alakana bekyuli bani mɔɔwia ka bakpa Katɔti bɔbla sɛɛn bɔwɔlɔ. 2Na si bɔkana na akpala ammɔ adubɔkana-ma bɔbla sɛɛn bɔwɔlɔ ni, nka báada bɔkpa báya na bana kayi kasɔ kaladu-ma kɔtɔ kɔdi. 3Nsu ni, akpala ammɔ geen mɔɔyá na beenyimo bana ekpidi lɛkwa ndi lɛkwa. 4Ɔsika bese ku bakɔ ubugya ulakana ekpidi bɔƒɔ budie ukyuli lɛlɔ. 5Ɔmmɔ ɔsu na asa na Kristo webo kayawi kamɛni lɛlɔ ni, ɔ́su ɔnini, “Ati, ani na béti babakpa bete-ɔ ni, aláda-a kubiti. Mmomu ɔlɔna ɔni na éti éte-mi ka liti lɛkpa lite-ɔ mɔɔda-a kubiti. 6Na akpala ani na bákyula ku ekpidi lili buvele akpala aláda-a kubiti. 7Mmɔ na lɛ́su nnini, 'Ati, aanu-mi. Líbo nnii mbabla ƒula lɛƒɔyɔ aani kalɛ na bénweni básiku-mi lɛlɔ na Bunweni Kedee Ɔku kemo.' ” 8Kudeedi ni, ɔ́su ɔnini, “Ala ani na béti béboku na bábla akpala ku ani na béti bákyula ku ala ekpidi lili buvele akpala ni, átada-a kubiti. Na útayɔ-ɔ kaƒɔ lɛnɔ,” ina ka ɔda bubo bɔmmɔ nátina ka babla lɛni. 9Mmɔ na ɔ́su ɔnini, “Aanu-mi. Líbo nnii mbabla ƒula lɛƒɔyɔ.” Katɔti údie akpala edeedi úse kɔmadɔ. Na úse Kristo ɔdi na ana kenye. 10Na Katɔti ɔ́bla-bu kedee na nwuna bɔyɔ kenye ɔkɛnku kalɛ na Yesu Kristo úti nwuna ɔlɔna ɔ́kpa úte-nwu kunwi pɛ kani úte uwi ƒui ɔsu. 11Limeyi ndi limeyi ni, Yudani ɔkpane biala uunye taabla nwuna ɔkpane kabla kani ndanku bɔkpa ulu ɔmmɔ lɛlɔ. Ɔɔbla akpala ammɔ udu kani limeyi ndi limeyi ani naaadubo bɔkana na udie likpidi na ukyuli lɛlɔ kudii. 12Nsu uwi ɔni na Kristo anwu úbo úbeti lɛlɔ ɔ́kpa kunwi úte bekyuli ƒui ekpidi lili ɔni ndanku utédu kayawi kawɔlɔkɔ ni, ɔ́yu úlie Katɔti kɔdianu kesii kani náƒɔ kuye. 13Na ɔ́si uwi ɔmmɔ kemo ni, Kristo unye ɔgya uwi ɔni na Katɔti ɔdubuti nwuna bekisine ɔkya-nwu lɛgba kalɔ. 14Ɔsika ɔkɛnku kunwi kɔni na úti lɛlɔ ɔ́kpa mmɔ ɔsu ni, ɔ́wɔlɔ nwuna kabla úte bekyuli uwi ƒui kalɛ na babla kedee. 15Katɔti Kɔyu ɔlati údie ɔmɛni ɔ́tina-bu nwaa ɔnini, 16“Bunyimi bɔni na ami Katɔti mɔɔsu ka ndubo bunyimiku-ma na uwi ɔni ndubo kemo ndi ɔmɛni. Ndubuti mina ɔda bubo lɛkya-ma kayi kemo. Na ndubunweni-mu lɛsia-ma kasusu lɛlɔ.” 17Na ɔ́sɔ ɔ́su ɔnini, “Nsɔ lɛɛɛdubo bana ekpidi ku bana likyulikpi bunyimo.” 18Na ka Katɔti úti ala amɛni ɔ́kyiɛ ni, ala ekpidi lili buvele akpala adi asɔ eeebo. 19Ɔmɛni ɔsu ni, banwa, ulu ɔtɛ ute-bu ka bɔkana na buduo katɔma kani nse kedee ntulo ƒui mmɔ kemo ɔkɛnku Yesu ubugya lɛlɔ. 20Ɔsika úti nwuna ɔlɔna úte na bula lili na ɔ́lɛmi ngba bɔni naaadubo bɔsa ulu ɔwɔdi úte-bu. Ɔ́bla ɔmɛni kalɛ na bɔkana bɔvi kayakun kɔdi kɔni nnye nte nwuna ɔlɔna, na bɔda bɔlɛ Katɔti anumi. 21Na ka bubo ɔkpane unengudi na Katɔti kakpakɔ kani na katɔ mmɔ ɔsu ni, 22bɛya na bɔni bude Katɔti ku kayi kani naaatɔlɔ-bu na bɔda bɔƒɔtaadi bɔmmɔ kpakplaa. Yesu ɔ́kuna nwuna ubugya ɔmmɔ úwi-bu lɛlɔ kalɛ na bula kayi kaládu-bu kɔtɔ. Na úti ntu bɔni nse sɛɛn ɔ́ƒɔ-bu lɛlɔ ƒui. 23Na bɛya na bunye bɔƒɔtaadi bɔni kenye na buudie lɛlɔ kpakplaa. Ɔsika ukyuli ɔni nése-bu kenye kammɔ ni, ɔɔbla ala ulu lɛlɔ. 24Na butaabu taanu ulu ɔni lɛlɔ na bɔdubɔkana na bɔkya lɛlɔ ogya, na butaayɔ bekyuli, na butaabla ala abuni. 25Bitaya na bɔda bɔsa bɔya aani kalɛ na badi badaku lɛlɔ bɔda teedie. Mmomu bɛya na bɔkya lɛlɔ ogya, na bɔbla lɛni butulo na uwi ɔni kemo na limeyi linengudi lɛmmɔ lɛdaku bɔni teede geen mɛni kemo. 26Nsu si bɔgyi ƒui na búti bɔ́sia lɛlɔ na bɔɔbla ala ekpidi na uwi ɔni na bédie litemi geen lɛmmɔ ala bátina-bu ni, na likpidi buti taakyiɛ akpala adi asɔ eeebo na babla lɛnɔ. 27Mmomu ɔlɛka bunye butaanu ulu ku liƒu ka badubɔtɛku-bu litemi. Ɔsika ogya bonwu ɔni muubile ala ubakyula Katɔti bekisine ƒui. 28Ukyuli biala ɔni néni Mose ɔda bubo na nkyuli inyɔ iye ɛtɛ bédie kenye ka use lɛni ni, bekyuli baadú ukyuli ɔmmɔ ɔni na balánu-nwu kɔnyana. 29Bekyuli bani manu Kristo ubugya aani lɛla lɛni neeese kedee ni, bɔgyi ka Katɔti ɔdubo-ma kɔtu bɔni geen! Ɔsika beedumi Katɔti Kɔyu kɔni mɔɔbla-bu lɛƒɔndia na baanu Katɔti Ubidi aani ɔɔɔdi lɛla lɛdi. Nsu ubugya ɔmmɔ na Katɔti úti ɔ́ƒɔ ekpidi údie-ma lɛlɔ, na ubugya ɔmmɔ kani na úti úse bunyimi bɔmmɔ likpo. 30Ɔsika bɔgyi anwu ɔni násu ɔnini, “Ami ndubudie ukyuli likpidi lɛni na ɔ́bla kasi na lɛƒɔ-nwu kayu na nwuna kayu kenye.” Anwu kani násɔ ɔ́su ɔnini, “Ami Katɔti ndubɔtɛku mina bekyuli litemi.” 31Liƒu lɛla bonwu lɛdi si Katɔti ɔni nli ngba uwi ƒui ɔ́da-a na kɔnyi kemo. 32Binyimo uwi ɔni na bɛ́nu Katɔti bukeye na bínwini nwuna badi ku bukpoku bɔni kemo na bɛ́sia bɛ́lɛ. 33Uwi ɔdi ni, beedumi-mii na beekpóku-mii na kadi anumi. Na uwi bamba kemo lɛnɔ ni, bɛɛnu kalɛ na baabla bekyuli bamba lɛnɔ aani kalɛ na bábla-mii. 34Biiwuloku bani na batɛ aban ɔtɔ kɔnyana. Na bɛɛkɛ́ kayi ƒaa si ina béƒie-mii ala báƒɔ, ɔsika bɛgyi ka bibo akɛla ani ndia ntulo ammɔ na elébie kudii. 35Anwuɔsu bitaya na enu áƒɛ-mii na kalɛ na biisé kayi kemo. Ɔsika bɛdubɔkɛ lɛyuƒɔla bonwu geen. 36Ɔdi ka binye kpakplaa kalɛ na si bɛ́bla lɛla lɛni mɔɔyɔ́ Katɔti kaƒɔ bɛ́wɔlɔ ni, na bina kɔnu kutuku linyese lɛmmɔ. 37Ɔsika Bunweni Kedee Ɔku ɔ́su ɔnini, “Kébu blii na ukyuli ɔni ndubo mmɔ ɔda ɔlɛ ɔni na ɔsɔ uletu uwi. 38Mina bekyuli bani nse siin ni, badubulie na bɔƒɔtaadi kemo. Nsu bani menwini kama makya-mi ni, lɛlɔ liláyɔ-mi na bana lɛlɔ.” 39Nsu abu ni, bɔɔɔdi bekyuli bani muunwíni bula bɔƒɔtaadi kama na bɔyii udu. Mmomu bɔ́ƒɔ bɔ́di, na Katɔti ɔ́ƒɔ-bu.

will be added

X\