GALATIƑUƆ 6

1Banwa, si ɔdi ɔ́bla likpidi lɛdi ni, amii bani na Katɔti Kɔyu kɔ́ƒɔ-mii lɛlɔ kemo ni, binwini-nwu buɛɛ na ɔda likpidi lɛmmɔ bɔbla ɔya. Nsu bɛnu kaduɛ kalɛ na bina akɔ ɔdi uleduo ɔgbankpi ɔmmɔ udu kemo. 2Bibunku lɛlɔ si ɔdi ɔkya lɛbibo lɛdi kemo. Na si bɛɛbla ɔmɛni ni, na bɛɛdi Kristo ɔda bubo lɛlɔ. 3Na si ɔdi ɔɔnu lɛlɔ ka ɔdi lɛla lɛdi nsu ɔɔɔdi lɛla biala ni, ukyuli ɔmmɔ ɔɔtɔ́lɔ lɛlɔ. 4Ukyuli biala ɔkɔku nwuna lɛlɔ udu ɔnu. Na si ɔ́nu ɔ́ti ka ɔdia ni, na ɔkana na ɔkun lɛmɛnɛ na nwuna ablala lɛlɔ. Na ɔɔɔdi ɔni na uti lɛlɔ ɔkɔku ukyuli bamba. 5Ɔsika ɔdi ka ukyuli biala uti anwu ɔlati etila. 6Ukyuli ɔni na bátina-nwu bɔƒɔtaadi kemo etemila ni, anwu lɛnɔ ule nwuna akɛla ku ukyuli ɔni mɔɔtina-nwu ala mmɔ. 7Ɔdi utatɔlɔ lɛlɔ, ɔsika ukyuli ɔdi ulakana na wavi Katɔti kekuma. Ɔsika lɛla lɛni na áva ni, ani kani na adubo bude. 8Si aavá ala ani mɔɔda ɔlɔna ɔkwɛ ebi ni, kukpi na adubɔkɛ. Nsu si aavá ala ani mɔɔda Kɔyu ɔkwɛ ebi ni, ngba bɔni nsɔ naaadubo bɔsa kudii na adubɔkɛ. 9Bitaya na enu aƒɛ-bu ku lɛbuni bɔbla. Ɔsika si enu átaƒɛ-bu ni, uwi ɔdubo ɔni na bɔdubɔkɛ edula ani na bɔ́va ebi. 10Anwuɔsu uwi biala na kuƒi kɔtɛ-bu ni, bɛya na butaabla lɛbuni teete ukyuli biala. Ɔni ntulo ndi ka bɛbla bite banwa baƒɔtaadine. 11Amii alati bɛdubɔnu kunweni bonwu kɔni na ami ɔlati líti mina kɔnu línweni mɛni. 12Bani nnye-mii lɛlɔ na baayɔ́ ka bikulo ago mmɔ ni, ama ndi bekyuli bani mɔɔkun lɛmɛnɛ na ɔlɔna lɛlɔ. Baabla ɔmɛni kalɛ na bekyuli belékpoku-ma na Kristo kukpi na ugyii lɛlɔ litemi ɔsu. 13Bani muedi nékulo ago mmɔ ni, baládi ɔda bubo bɔmmɔ lɛlɔ. Nsu baayɔ́ ka amii lɛnɔ bikulo ago na bataakun lɛmɛnɛ na bina ɔlɔna bukulo bɔmmɔ lɛlɔ. 14Ami ni, mina lɛmɛnɛ lɛni ndubɔkun kani ndi kukpi kɔni na Yesu Kristo úkpi na ugyii lɛlɔ. Na ɔkɛnku nwuna kukpi na ugyii lɛlɔ ɔsu use aani si líkpi na kayawi ala kudɔ aani kalɛ kani na kayawi ala ékpi na mina anumi. 15Na ɔɔɔdi lego bukulo iye ago tekulo na bɔɔwia, mmomu lɛla lɛni na bɔɔwia ndi ngba bɔwɔdi bulie. 16Na ama bani mɔɔsia ala amɛni anu na bana ngba bulie kemo ni, keyi buɛɛ ku kɔnyana bɔnu kɔsiaku-ma kama, ama ku Katɔti bekyuli ƒui. 17Ukplodi ni, nsɔ naaayɔ ka ukyuli ɔdi ɔsɔ ute-mi lɛƒɛda lɛdi. Ɔsika lɛtaala lɛni mma-mi lɛlɔ mɛni ɔɔtina ka ndi Yesu kabla ɔblane. 18Banwa, muuvele nnii Blɔti Yesu Kristo lɛƒɔndia lɛsiaku-mii na lɛkya bina kɔyu ɔkplu. Ɔsia lɛni.

will be added

X\