GALATIƑUƆ 5

1Kristo úte-bu bɔnwuna kalɛ na bɔkɛ bɔnwuna sɔsɔ. Anwuɔsu binye kpakplaa na bɛsɔ bitete kuƒi na ɔdi unye-mii lɛlɔ na bitaabla ukyuli ɔdi kabla lɛnɔ. 2Bise ɔmɛni likpo! Ami Paulo mɔɔsu-mii ka si bíte kuƒi na békulo-mii ago ni, na Kristo ɔsɔ uuubo kɔsia kɔdi uuute-mii. 3Na nsɔ mɔɔsu-mii nwaa ka si ukyuli ɔdi ɔ́ya na békulo-nwu lego ni, na únyimi lɛlɔ ka ɔdi ɔda bubo bɔkukudi bɔmmɔ ku ala ani na adanku-nwu lɛlɔ ƒui. 4Na amii bani mɔɔkali bɛnii amii ku Katɔti ntɛ bɔdubɔdia ɔkɛnku ɔda bubo bɔmmɔ lɛlɔ bɔdi ɔsu ni, bɛgyi bɛnii bɛ́da lɛlɔ bɛ́mami Kristo lɛlɔ. Na bɛsɔ bilákɛ Katɔti lɛƒɔndia. 5Na abu ni, ɔkɛnku bɔƒɔtaadi ku Katɔti ɔyikun lɛlɔ ni, bɔsia anu kpakplaa ka Katɔti ɔdubɔnu-bu aani bekyuli bani nse siin. Na ɔmɛni na bunye bɔgya. 6Na si bɔ́bla unwi ku Kristo ni, lego bukulo ku tekulo ɔsɔ uuubo kɔsia kɔdi. Lɛla lɛni bɔɔwia ndi bɔƒɔtaadi bɔni mɔɔtina kalɛ na bɔɔyɔ́ lɛlɔ. 7Na nka binye kabla kammɔ lɛlɔ kaduɛ! Na ɔma náya na bɛ́da bɛ́ya, na ɔ́ya na bɛ́da litemi geen lɛmmɔ lɛlɔ bɔdi bɛ́ya? 8Ɔmmɔ udu útasi Katɔti kudɔ. 9Bɔnyii blii suɛ mɔɔyá na ɔlaaƒɔ ɔni bánwu ƒui uuƒu. 10Lɛ́ƒɔ lɛ́di na Blɔti lɛnyi kemo ka bɛsɔ bileti kasusu kabambadi. Na ukyuli ɔni muuƒú-mii kasusu mmɔ ni, ɔdubɔkɛ nwuna kɔtu bɔni kalɛ na ɔ́manku-nwu si ina bi ukyuli na ɔdi. 11Banwa, na mina kakɛ ni, si bɔsu na mmua mɔɔsu bekyuli ka ɔlɛka bekulo ago ni, na nka bi ɔsu na bekyuli beekpóku-mi? Na ɔɔtina ka nka Kristo kukpi na ugyii lɛlɔ lɛsa lɛni mɔɔkɔ́ ni, ɔsɔ ulékpoku Yudaƒuɔ. 12Na bekyuli bani muuƒú-mii kasusu mɛni ama ni, ndubɔyɔ ka besie anumi utédu ka bekulo lɛlɔ bedie bina akɔ ƒui. 13Banwa, bɔlɔ na Katɔti ɔ́lɔ-bu ɔnii bɔkɛ bɔnwuna. Nsu utalɛka buti bɔnwuna bɔkɛ bɔmɛni butaabla ala ekpidi. Mmomu ɔlɛka buti-mu buteebunku lɛlɔ na bɔyɔ kemo. 14Na ɔda bubo bɔmmɔ ƒui kalɔ budie bɔdanku lɛla linwi pɛ. Na ani ndi ka, “Yɔ ƒula ukyulikpana aani ƒula lɛlɔ kalɛ.” 15Nsu si bɛɛtu lɛlɔ akpɛlɛ ka bibile lɛlɔ ni, na bɛti ka lɛkpa lɛmmɔ lɛdubo udu bɔyii ƒui. 16Na lɛla lɛni mɔɔsu-mii ndi ka bɛya na Katɔti Kɔyu kɔtɔnku-mii na bina ngba bulie kemo. Na bitaya na bina ɔlɔna ɔkwɛ adala adi-mii lɛlɔ. 17Na ala ani na bula ɔlɔna ɔɔyɔ́ ni, aata teenye ala ani na Kɔyu kɔɔyɔ́ lɛlɔ. Lɛni kani na ala ani na Kɔyu lɛnɔ kɔɔyɔ́ aata teenye ala aani na ɔlɔna ɔɔyɔ́ lɛlɔ. Na ɔlɔna ku Kɔyu kɔmɛni badi bekisine bete lɛlɔ. Anwuɔsu bɛsɔ bilakana na bitaabla lɛla biala mɔɔda-mii ɔkwɛ. 18Na si Kɔyu kɔ́tɔnku-mii ni, na biiibo ɔda bubo bɔmmɔ kalɔ. 19Na ala ani na ɔlɔna ɔɔbla ni, aalɛ́ keyi nwaa na anya ndi lɛyalɛ ku kɔbɔ ala bɔbla ku adɔlɔla bɔbla 20ku lɛƒiɔkpa ku kabɔ bɔdu ku bekyuli bukisi ku kekpo ku bekyuli bani muukpó kogyulo ku kɔnyi buti ku awɔ lɛti lɛkɛ ku unyeƒi ku lɛlɔ bule akpa akpa 21ku lɛnungyie ku ntɛ bukpi ku adikpi emeyi bɔdi ku ana udu. Na muubó-mii ɔda na ana lɛlɔ aani kalɛ na lɛ́ɛsu-mii ḿbavi ka bekyuli bani mɔɔbla ala ammɔ udu ni, baladi Katɔ Ɔga Ɔma ala! 22Nsu Kɔyu ablala ani nse aani ebi buni kalɛ ni, anya ndi bɔyɔ ku kubiti ku keyi buɛɛ ku kayi bɔkɛ ku lɛƒɔndia ku lɛbuni bɔbla ku ala bɔbla ulu lɛlɔ 23ku lɛlɔ buwi buɛɛ ku lɛlɔ bɔti bɔda. Na ɔda bubo bɔdi bulétile ala amɛni kuƒi. 24Na bekyuli bani ndi Kristo Yesu badi ni, bákana bana ɔlɔna udu ɔkukudi ɔmmɔ ku nwuna ɔkwɛ adala ekpidi ƒui bámana ugyii lɛlɔ ku Kristo. 25Na ka ɔkɛnku Kɔyu kɔmmɔ lɛlɔ ɔsu na bulie ngba ni, bɛya na Kɔyu kɔmmɔ kɔtɔnku-bu. 26Na bitaya na bɔtalaku lɛlɔ katɔ iye butaakya lɛlɔ kɔnyi iye buteekpoku lɛlɔ kogyulo.

will be added

X\