GALATIƑUƆ 4

1Lɛla lɛni na mɔɔsu ndi ka uwi ɔni na ɔnamu ɔni mɔɔdi ɔti ala ɔmua use blii suɛ ni, ɔnamu ɔmmɔ use aani ukyuli ɔni mɔɔbla ukyuli ɔdi kabla. Ina ka anwu mbo lɛla biala. 2Uwi ɔni na ɔmua ɔdi ɔnamu mɛni ni, ubo bekyuli bani mɔɔnu anwu ku nwuna ala lɛlɔ úti útédu uwi ɔni na ɔti úse úse. 3Lɛni kani na use abu lɛnɔ uwi ɔni na bɔdi banamu. Na ala ani na baatina na kayawi mɛni nátaadi-bu lɛlɔ. 4Nsu ka uwi ɔni na Katɔti úse mmɔ geen údu ni, ɔ́tala Ubidi ɔ́kya-bu. Na ɔ́ya na uleku ɔdi ɔ́wɔ-nwu ɔ́kya kadi kadi akɔ na bana ɔda bubo bɔdi-nwu lɛlɔ 5kalɛ na ɔda bani nkya ɔda bubo bɔmmɔ kalɔ udie na benwini Katɔti bebi geen. 6Ka bɔdi Katɔti bebi ɔsu ni, ɔ́tala Ubi ɔmmɔ Kɔyu ɔ́kya bula kayi kemo. Na Kɔyu kɔmmɔ mɔɔkpali katɔ taalɔ ɔnini, “Abba” ɔni kalɔ ndi mina Ati. 7Anwuɔsu ni, bɛsɔ bɛɛɛdi bekyuli bani mɔɔbla kabla teete bekyuli badi lɛnɔ. Mmomu bɛdi nwuna bebi. Na ka amii lɛnɔ bɛdi nwuna bebi mɛni ni, Katɔti ɔ́bla-mii nwuna ala badine. 8Uwi ɔni návi kemo ni, na nka bɛɛɛgyi Katɔti. Anwuɔsu ɔyikun ɔni naaadi Katɔti ɔdi nátaadi-mii lɛlɔ. 9Nsu ɔƒɛni ɔni na bɛgyi Katɔti mɛni iye lɛsu nnii Katɔti ɔgyi-mii mɛni ni, bi ɔsu na bɛ́sɔ bíti lɛlɔ biite ɔyikun ɔmmɔ bene udu. Munuu bɛɛyɔ́ ka ɔda bubo bɔdi bɔsɔ butaadi-mii lɛlɔ? 10Na bɛ́sɔ bínwini kama bísie bɛɛdi emeyi ku abuli ku uwi ku akwa adi udu lɛlɔ. 11Liƒu lɛɛda-mi na bina lɛlɔ. Na ɔɔbla-mi aani ka kabla kani na lɛ́bla líte-mii ƒui kadi kabla keeke. 12Banwa, muuvele-mii nnii bɛtɛya-mi na bɛlɛ-mi. Ɔsika ami lɛnɔ ukyuli ndi aani bina kalɛ. Na ɔdi útabla-mi likpidi lɛdi. 13Binyimo kudeedi kɔni na lɛ́ka litemi buni lɛmmɔ lɛsa bɔ́kɔ bute-mii mmɔ, ɔsika na lɛlɔ kemo kaaadia-mi. 14Ina ka udu ɔni kemo na nkya na mina ɔlɛ ɔsu ɔdi bɔkɔku taanu ute-mii muedi ni, bítanu-mi kalɛ kadi iye bini-mi. Mmomu bɛ́ƒɔ-mi aani kalɛ na bɛdubɔƒɔ Katɔti ɔtu, na bɛ́ƒɔ-mi lɛnɔ aani kalɛ na bɛdubɔƒɔ Kristo Yesu ɔmmɔ ɔlati. 15Wɛ na lɛlɔyɔ lɛni náƒɔ-mii lɛlɔ kemo mmɔ ƒui lɛ́vi. Lɛla lɛni lɛlɔ na ami ɔlati muedi lɛkana na lidie-mii kenye ka nka bɛkana bɛkpa bina anumi ani na bɛda bɛɛnu muedi bite-mi. 16Munuu línwini-mii ukisine na litemi geen lɛni na lɛ́su-mii ɔsu? 17Anumi eegyie bekyuli bani muubo-mii kudɔ ka benwini-mii kasusu basia bana lɛlɔ. Nsu ɔɔɔdi kasusu kabuni na bada. Mmomu kalɛ na bamami-mii bula lɛlɔ na baya bina anumi eteegyie bana lɛlɔ ɔsu kani. 18Ɔdia ka ukyuli anumi eteegyie na lɛla lɛbuni lɛlɔ. Na ɔdi ka use lɛni uwi biala, na ɔɔɔdi uwi ɔni na nkya-mii kudɔ kani. 19Mina bebi bayɔne, nsɔ muunú-mii lɛlɔ ɔlɛ aani uleku ɔni ntɛ kɔwɔ úti utédu uwi ɔni na manu ka Kristo udu ɔ́ƒɔ-mii lɛlɔ kemo ƒui. 20Na mɔɔyɔ́ geen ka nka lɛkya-mii kudɔ ɔƒɛni na liboku mina lɛdi kalɔ, ɔsika bina ablala ese-mi kalɛ kadi! 21Mɔɔyɔ́ ka liye amii bani mɔɔyɔ́ ka bɛsɔ bɛkya ɔda bubo bɔmmɔ kalɔ nnii lɛla lɛni na ɔda bubo bɔmmɔ bɔdanku ni, biinú-mu kalɔ geen? 22Ɔsika ɔda bubo bɔmmɔ bɔɔtina ka ni, Abraham ɔ́wɔ bebi inyɔ. Na ubi udeedi ni, uleku ɔni mɔɔbla-nwu kaduli kabla náwɔ-nwu úte-nwu. Na ubi unyɔdi anwu ni, nwuna kɔduni náwɔ-nwu úte-nwu. 23Na ubi ɔni na uleku ɔni mɔɔbla-nwu kaduli kabla ɔ́wɔ ni, báwɔ-nwu na uwi ɔni kemo na ɔnana ku uleku beelie taawɔ kalɛ kani. Nsu ubi unyɔdi ɔni na kɔduni ɔ́wɔ anwu ni, litela na lɛdi lite-ma na Katɔti lɛsuse kenye na uwi ɔni na ɔnana ku uleku basɔ balásia kɔwɔ anu. 24Ala amɛni adi lɛsugba. Na beleku inyɔ bamɛni benye bete bunyimi bɔkukudi ku bɔwɔdi. Na bebi bani na ɔda bubo búnyimi-ma aani bekyuli bani mɔɔbla bekyuli bamba kabla kalɛ ni, badi Hagar bebi. Na ama nnye nte bunyimi bɔni na Katɔti únyimi ku bekyuli na Sinai kɔbi lili. 25Hagar ɔni nnye nte Sinai kɔbi na Arabia kalɔ lɛlɔ ni, ɔdi lɛgba lɛni mɔɔtina kalɛ na Yerusalem ɔni nkya ɔƒɛni ku nwuna bebi bakya lɛbibo kemo ɔmwi na bénwini bekyuli bamba kabla bablane. 26Nsu Yerusalem ɔni nkya katɔ ni, lɛla lɛdi lɛɛɛda-nwu, na anwu ndi kɔduni ɔni ndi bula uni. 27Ɔsika bénweni bákya Bunweni Kedee Ɔku kemo banii, “Lɛlɔ litaayɔ awɔ udinkɔ. Bo kudu momoomo ku lɛlɔyɔ, awɔ ɔni na kawɔƒɔ kátadu-ɔ kudii. Ɔsika uleku ɔni na ɔgyani údie-nwu atu ni, anwu ndubo bɔwɔ butulo.” 28Na ɔƒɛni ni, mina banwa, amii bílieku Isak na bɛdi Katɔti bebi ɔkɛnku nwuna linyese lɛlɔ. 29Na uwi ɔmmɔ kemo ni, ubi ɔni na uleku ɔni mɔɔbla kaduli kabla mmɔ ɔ́wɔ ni, úkpoku ubi ɔni na ɔkɛnku Katɔti Kɔyu ɔyikun lɛlɔ na kɔduni ɔ́wɔ-nwu. Na lɛni kani na ɔɔlɛ́ ɔmwi. 30Nsu bi na bénweni bákya Bunweni Kedee Ɔku kemo? Bénweni banii, “Bɔku uleku ɔni mɔɔbla kaduli kabla mmɔ ku ubidi na batɔlɔ kaduli mmɔ, ɔsika uleku ɔni mɔɔbla kaduli kabla ubi ku kɔduni ubi balakana bana ɔti ala bule bɔdi.” 31Ɔmɛni ɔsu ni, mina banwa, abu bɔɔɔdi kaduli kabla ɔblane bebi, mmomu kɔduni bebi na bɔdi.

will be added

X\