GALATIƑUƆ 2

1Na akwa leevu-ene kama ni, lɛ́sɔ línwini lísie Yerusalem ku Barnaba. Na líti Tito lɛ́da. 2Lísie mmɔ ɔsika Katɔti nédie ɔ́tina-mi. Na lídie ala kalɔ lɛ́tina-ma ɔkɛnku litemi buni lɛni lɛ́sa na lɛ́kɔ líte bani naaadi Yudaƒuɔ mmɔ lɛlɔ. Nsu ami ku batɔnkune bani ntɔnku baƒɔtaadine akpa ammɔ lɛti nása. Ɔsika naaayɔ nnii ɔkɛnku batɔnkune bammɔ ɔsu na mina kabla kani mɔɔbla mɛni iye kani na lɛ́bla lɛ́vi kabla keeke. 3Tito ɔni na líti nda ni, ina ka ɔdi Grikini ni, ukyuli ɔdi útenye-nwu lɛlɔ ka ukulo lego. 4Nsu ɔkɔ banyine bani néti lɛlɔ bénwini banwa badi béyu béduo-bu akɔ, na bábɛ baatú-bu kalɛ na bati bɔnwuna bɔni na bubo na Kristo Yesu kemo na baya na bɔsɔ bunwini kabla bablane bute Yudaƒuɔ ɔdi ala bɔbla. 5Nsu abu lɛnɔ bútete-ma kuƒi kɔdi munu munu kalɛ na litemi geen lɛmmɔ lɛkana-mii akɔ bɔkya ɔsu. 6Na bekyuli bani na bɛɛnu ka ama badi batɔnkune ni, ina ka ami naaanu-ma kavumana kadi ina bi na badi ɔsika Katɔti ulánu ukyuli anumi asa na ɔɔtɛku-nwu litemi ni, ama lɛnɔ béteti lɛla lɛdi bétebunku mina litemi lɛni na mɔɔsu ka mbasu-mii. 7Mmomu bánu báti ka Katɔti néti kabla kamɛni ɔ́kya-mi enu kemo ka lɛkɔ litemi buni lɛmmɔ lɛsa lite bani naaadi Yudaƒuɔ, aani kalɛ na úti ɔ́kya Petro enu kemo na ɔkɔ litemi buni lɛmmɔ lɛsa ute Yudaƒuɔ. 8Na ɔkɛnku Katɔti ɔyikun lɛlɔ na ndi ɔtalane nte bani naaadi Yudaƒuɔ, aani kalɛ Petro lɛnɔ ɔdi ɔtalane ute Yudaƒuɔ. 9Na ka Yakobo ku Petro ku Yohane bani nnye baƒɔtaadine lɛkpa lɛmmɔ kenye geen aani batɔnkune kalɛ bánu Katɔti kabla kani na úti ɔ́kya-mi enu kemo mɛni báti ni, bégyingya enu na báƒɔ ami ku Barnaba. Na bénu kalɔ ka abu buteesie butásu litemi buni lɛmmɔ bute bani naaadi Yudaƒuɔ, na ama lɛnɔ bataasu-ni teete Yudaƒuɔ. 10Na lɛla lɛni básu-bu ndi ka bunyimo na butaanu bawabane kɔnyana. Na ɔmɛni ndi lɛla lɛni na lɛ́sia anu na mɔɔbla geen. 11Uwi ɔni na Petro úbo Antiokia ni, lɛ́ta línye-nwu lɛlɔ, ɔsika ɔ́bla lɛla lɛni naaadia. 12Ɔsika asa na bekyuli bani na Yakobo ɔ́tala bɔdububo bebeduo ni, Petro ku banwa bani naaadi Yudaƒuɔ básala baadi. Nsu uwi ɔni kani na ɔ́nu batalane bamɛni ni, ɔ́da bɔdi ɔ́ya na ɔ́ta-ma kudɔ. Ɔsika ɔɔyia kasusu kani na bekyuli bani nékulo ago na badi Yudaƒuɔ mmɔ badubuti bɔsiku-nwu lɛlɔ ɔsu. 13Anwuɔsu ka Yudaƒuɔ banwa bani nkya mɔɔdiku-ma lɛnɔ bánu lɛla lɛni na Petro ɔ́bla mmɔ ni, ama lɛnɔ básiaku nwuna anumi lɛlɔ ɔbladu ɔmmɔ kama. Na Barnaba muedi ɔ́bla lɛni kani. 14Amu ka lɛ́nu lɛ́ti ka baaakɛ litemi geen lɛmmɔ ulu lɛlɔ ɔsu ni, lɛ́su Petro na bekyuli bammɔ ƒui anumi nnii, “Yudani na adi, nsu eelie aani ukyuli ɔni naaadi Yudani, na ɔɔɔdi aani kalɛ na Yudaƒuɔ beelie kalɛ. Anwuɔsu dɛ na ɔbla asa na éti ƒula ɔbladu eenye bekyuli bani naaadi Yudaƒuɔ lɛlɔ ka basia Yudaƒuɔ ɔdi bɔbla kama? 15“Abu bani na báwɔ-bu na bɔdi Yudaƒuɔ ni, buuuse aani bekyuli bani naaadi Yudaƒuɔ na bɔɔlɔ-ma ala ekpidi bablane. 16Nsu bɔgyi ka Katɔti ɔɔsɔku anwu ku ukyuli ntɛ taaklibi ɔkɛnku bɔƒɔtaadi bɔni na ukyuli ubo na Yesu Kristo lɛlɔ kani ɔsu. Na ɔɔɔdi ɔda bubo bɔkukudi bɔmmɔ lɛlɔ bɔdi ɔsu. Abu lɛnɔ bɔ́ƒɔ Kristo Yesu bɔ́di ɔsu na Katɔti ɔ́klibi abu ku-nwu ntɛ ɔkɛnku bula bɔƒɔtaadi na Kristo kemo ɔsu. Na ɔɔɔdi ɔni na bɔɔdi ɔda bubo bɔkukudi bɔmmɔ lɛlɔ ɔsu. Ɔsika Katɔti útaklibi anwu ku ukyuli ɔdi ntɛ na ɔda bubo bɔkukudi bɔmmɔ lɛlɔ bɔdi ɔsu. 17“Bɔɔwia ka Katɔti ɔklibi abu ku-nwu ntɛ ɔkɛnku Kristo lɛlɔ. Nsu si ɔni na bɔɔbla lɛni badi baanu-bu aani ala ekpidi bablane ka bulábu ɔda bubo bɔmmɔ lɛlɔ ɔsu ni, ɔɔtina ka Kristo mɔɔkya likpidi bɔbla ogya? Oowo, kudii! 18Si nka ami ɔlati lɛ́sɔku lɛla lɛni na lɛ́bwɛ mmɔ udu mɔɔtú ni, nka ɔdubɔtina ka lɛ́ta línye ɔda bubo bɔmmɔ lɛlɔ aani ala ekpidi ɔblane sɔsɔ. 19Mmomu nse aani ukyuli ɔni nélie ngba ɔkɛnku ɔda bubo bɔkukudi bɔmmɔ lɛlɔ na úkpi ɔsu ɔda bubo bɔmmɔ lɛnɔ búkpi kalɛ na lilie ngba lite Katɔti. 20Ami ku Kristo na bákana bámana ugyii lɛlɔ. Ɔsɔ ɔɔɔdi ami nli ngba, mmomu Kristo nli ngba na mina kemo. Na ngba bɔni na nli ɔƒɛni ni, nli-mu ɔkɛnku ɔyikun ɔni na lɛ́kɛ ka lɛ́ƒɔ Katɔti Ubidi ɔmmɔ lɛ́di ɔsu. Anwu néti nwuna ngba ɔ́kpa na mina lili, ɔsika ɔɔyɔ́-mi. 21Lɛɛɛdubo Katɔti kɔnyana kɔni na ɔɔnu bekyuli kama bɔlɛ kudii. Ɔsika si ɔda bubo bɔkukudi bɔmmɔ lɛlɔ na Katɔti ɔɔsɔku anwu ku ukyuli ntɛ taaklibi ni, na Kristo úkpi keeke.”

will be added

X\