GALATIƑUƆ 1

1Ami Paulo ɔni ndi Kristo ɔtalane ni, mina bɔlɔ bútasi bekyuli kudɔ iye ɔɔɔdi ukyuli ɔdi náƒuna-mi. Mmomu mina bɔlɔ bɔ́si Yesu Kristo ku Katɔti ɔni nágyila Yesu ɔmmɔ ɔ́lɛku bekpine akɔ kudɔ. 2Ami ɔmmɔ nénweni ɔku ɔmɛni na ami ku mina banwa bani nkya mɛni buugyele amii Katɔti baƒɔtaadine bani ƒui nkya Galatia. 3Na buuvele bɔnii Katɔti ku Blɔti Yesu Kristo lɛƒɔndia ku keyi buɛɛ kasiaku-mii. 4Kristo ɔmmɔ néti lɛlɔ ɔ́kpa na bula lili kalɛ na udie-bu ɔlɛku bula ekpidi kemo na ɔƒɔ-bu ɔlɛku uwi ukpidi ɔni kemo na ekpidi bɔbla bɔ́ƒɔ kayawi kemo mɛni. Na ɔ́ƒɔ-bu lɛni ɔkɛnku Katɔti ɔni ndi bula Ɔti lɛƒɔyɔ lɛlɔ. 5Anwuɔsu bɛya na bumwi Katɔti ɔ́si ɔƒɛni úsela uwi ƒui! Ɔsia lɛni. 6Bina lɛlɔ lɛ́bla-mi kalɛ kadi geen, ɔsika ńtaƒɔ ńtadi nnii bɛdubɔlɛ Katɔti ɔni nálɔ-mii ɔkɛnku Kristo Yesu kaƒɔ buni kani na ɔ́bla-mii kama na bɛsiaku litemi bamba kama. 7Sɔsɔ na ɔdi ka litemi buni bamba lɛdi liiibo. Nsu mɔɔsu ɔmɛni ɔsika bekyuli badi bakya beeƒú-mii kasusu, na baayɔ́ ka bavumana Kristo litemi buni lɛmmɔ. 8Na mɔɔsu-mii nnii si abu iye kayaa na ɔtu ɔdi ɔ́si úbo úbasu-mii litemi lɛbambadi lɛdi na lɛɛɛdi litemi buni lɛni na bɔ́su-mii mmɔ ni, Katɔti ɔyila-nwu udu ƒui. 9Bɔ́ɔsu-mii búbavi na lɛni kani na nsɔ mɔɔsu-mii ɔƒɛni lɛnɔ ka ni, si ukyuli ɔdi ɔɔsu-mii litemi lɛdi na lɛɛɛdi litemi buni lɛni bínu na bɛ́ƒɔ-ni bɛ́di mmɔ ni, Katɔti ɔyila ukyuli ɔmmɔ udu ƒui kede kede. 10Na kabla kani na mɔɔbla mɛni ni, bɛɛkali bɛnii bekyuli bumwi na mɔɔwia? Munuu Katɔti bumwi na mɔɔwia? Munuu mɔɔbla-ka kalɛ na kaƒɔ kayɔ bekyuli? Na si bekyuli lɛyɔla kabla na mɔɔbla ni, nka lɛɛɛdi Kristo kabla ɔblane. 11Banwa, mɔɔyɔ́ ka lɛsu-mii ka ni, litemi lɛni mɔɔsu mɛni ni, lítasi ukyuli ɔdi kudɔ. 12Na ɔɔɔdi ukyuli ɔdi kudɔ lɛnɔ na lɛ́ƒɔ-ni lɛ́siku iye ɔdi nátina-mi lɛla lɛmmɔ lɛnɔ. Mmomu Yesu Kristo ɔlati nédie nwuna ablala etemila ammɔ ɔ́tina-mi. 13Ɔsika bínu ngba bɔni na lílie lɛ́vi uwi ɔni nsiaku Yudaƒuɔ bɔkpa ulu kama kpakplaa ku kalɛ na líti lɛnungyie kemo líkpoku Katɔti baƒɔtaadine akpa ammɔ, na lɛ́yɔ ka lɛyila-nya udu muedi. 14Na anumi égyie-mi étulo mina ligyekpa na ntɔ-ma na Yudaƒuɔ bɔkpa ulu ɔmmɔ kemo. Na mina bati kuuku ɔdi kama kani na mina kasusu kasia kpakplaa ka lɛbla. 15- 16Nsu na Katɔti kɔnyana bɔnu ɔsu ni, ɔ́ƒuna-mi úte nwuna kabla asa na badubɔwɔ-mi. Ka uwi údu-nwu ni, údie Ubidi ɔmmɔ ɔ́tina-mi kalɛ na lɛkana na lɛkɔ-nwu lɛlɔ lɛsa na amii bani naaadi Yudaƒuɔ akɔ. Na ńtatádiku ɔdi kasusu na ɔmɛni lɛlɔ, 17iye lisie Yerusalem ntánu bani ndi batalane asa Katɔti úbaƒuna-mi. Mmomu lɛ́tɔlɔ lísie Arabia kɔnakunwi. Kama asa na línwini líbo Damasko. 18Na akwa atɛ kama asa na lísie Yerusalem ńtánu Petro, na lílie-nwu kudɔ emeyi leevu-alɔ. 19Ɔmmɔ kama lɛ́sɔ ńtanu ɔtalane ɔdi lɛnɔ, amu ntu Yakobo ɔni ndi Blɔti ɔnwani kani. 20Na sɔsɔ ni, litemi geen na muunweni-mii mɛni, na Katɔti ɔlati ɔgyi ka naaanyi ɔkɔ. 21Ɔmmɔ kama lɛnɔ ni, lísie Siria ku Kilikia. 22Uwi ɔmmɔ kemo ni, baƒɔtaadine akpa ani nkya Yudea kalɔ lɛlɔ na Kristo kemo bátanu-mi anumi kudii tɔ. 23Na lɛla lɛni kani na bénu na mina lɛlɔ ndi ka, “Ukyuli ɔni na nka ɔ́kya úteekpoku-bu mmɔ ni, ɔƒɛni amu ɔkya ɔɔkɔ́ bɔƒɔtaadi bɔni na ɔ́yɔ ka nka ubile mmɔ lɛsa.” 24Anwuɔsu beemwi Katɔti ɔkɛnku ami ɔsu.

will be added

X\