EƑESOƑUƆ 1

1Ami, Paulo ɔni nkɛnku Katɔti lɛƒɔyɔ lɛlɔ ɔsu na ndi Kristo Yesu ɔtalane ni, ami muunweni ɔku ɔmɛni lite amii Katɔti baƒɔtaadine bani nkya Eƒeso na bɛ́blaku Kristo unwi na bɛɛdi nwuna etemila lɛlɔ. 2Muuvele Katɔti ku Blɔti Yesu Kristo nnii nwuna lɛƒɔndia lɛkya-mii ɔkplu na ute-mii keyi buɛɛ. 3Bɔɔgyá Katɔti ɔni ndi Blɔti Yesu Kristo Ɔti enu. Anwu muute-bu kɔyu kemo kusɛ kusɛ ƒui ɔ́siku katɔ mmɔ ɔkɛnku Kristo lɛlɔ. 4Ɔsika ɔkɛnku Kristo ɔmmɔ lɛlɔ na Katɔti ɔ́ƒuna-bu úse asa na údie kayawi kalɛ na bɔlɛ sɛɛn na nwuna anumi na bɔƒiɔ bɔdi bulakya-bu lɛlɔ. 5Katɔti ɔ́lɛ ugyii úse na nwuna kaƒɔ ƒaa bɔyɔ kemo ka ɔdubɔsia Yesu Kristo lɛlɔ na ɔbla-bu nwuna bebi. 6Anwuɔsu bɛya na bumwi Katɔti na nwuna lɛƒɔndia libendi lɛni na ɔ́bla úte-bu ɔkɛnku Ubidi ɔni na ɔɔyɔ́ geen lɛlɔ ɔsu. 7Ɔsika ɔkɛnku Kristo ubugya lɛlɔ na bɔ́kɛ bɔƒɔ, na ɔmɛni ɔ́tina ka bɔ́kɛ likpidi buti taakyiɛ. Bɛnu Katɔti lɛƒɔndia bonwu lɛni na úti úte-bu! 8Lɛƒɔndia lɛni neeebo bɔkɔku bɔdi. Ɔkɛnku nwuna lɛnunda ku kalɛ na nwuna kasusu kagyi lɛla biala ɔsu ni, 9kaƒɔ káyɔ-nwu ka údie nwuna kasusu kemo abɛla ƒui ɔ́tina-bu. Ani na ɔ́su úse ka ɔdubɔbla ɔkɛnku Kristo lɛlɔ. 10Na kasusu kammɔ kadububo kete lɛni na kawɔlɔkɔ uwi ɔni na Katɔti ɔ́su úse lɛlɔ. Ɔdubɔsala ala ani ƒui nkya katɔ ku kalɔ na uti-nya ɔkya lɛlɔ ɔdine unwi ɔni ndi Kristo kalɔ. 11Katɔti ɔ́bla ala ƒui na nwuna kasusu ku bɔyɔ kenye na abu ku Kristo unwi bɔbla ɔsu. Na Katɔti ɔ́ƒuna-bu ka bɔbla nwuna bebi ɔkɛnku nwuna kasusu kani na ɔ́bla úse kalɔ kesekɔ ƒui lɛlɔ. 12Ɔmɛni ɔsu ni, bɛya na abu bani ndi bekyuli bedeedi bani nákɛ lɛnunsia na Kristo kemo mɛni ni, bumwi Katɔti ka ɔdia geen ɔsu. 13Lɛni kani na béti amii lɛnɔ bébunku Kristo badi akɔ ɔkɛnku litemi geen lɛni na bɛ́ƒɔ bɛ́di ɔsu. Na litemi buni lɛmmɔ néti ngba bɔƒɔ búboku-mii. Na ka bɛ́ƒɔ Kristo bɛ́di ɔsu ni, Katɔti úti nwuna Kɔyu kɔni na ɔ́su úse ka wete-bu mmɔ úse-bu likpo. 14Katɔti Kɔyu kɔmɛni na úti únyene kama úte ala ani ƒui na bɔdubɔkɛ wetédu uwi ɔni na wawɔlɔ anwu badi bɔƒɔ. Ɔmɛni ɔdubɔya na bemwi nwuna lɛnyi bonwu lɛmmɔ. 15Ɔmɛni ɔsu ni, ɔ́si uwi ɔni na línu kalɛ na bɛ́ƒɔ Blɔti Yesu bɛ́di na bɛɛyɔ́ Katɔti bekyuli ni, 16ńtada linugya buti teete Katɔti na bina lili ńtaya. Na uwi biala na mɔɔkpali katɔ ni, muuvele na bina lili. 17Muuvele nnii Katɔti ɔni ndi Blɔti Yesu Kristo Ɔti na ɔdi bula Ɔti Buni geen ute-mii nwuna Kɔyu kɔni ndubɔya na bɛda anu na udie Katɔti ɔmmɔ ɔtina-mii. Na ɔya na bɛti-nwu kaduɛ bibu. 18Na muuvele Katɔti nnii bina kasusu kabla nwaa na bɛnu nwuna bukeye bɛti kalɛ na biti bina anu bɛsia ala ani ɔsu na ɔ́lɔ-mii ku ala bonwu ani na bɔɔkɛ́ taadi na nwuna baƒɔtaadine akɔ lɛlɔ. 19Na bɛnu lɛnɔ kalɛ na Katɔti ɔyikun ɔɔbla kabla geen kani neeebo bɔkɔku bɔdi na nwuna baƒɔtaadine akɔ bɛti. Na ɔyikun ɔni nkya-bu lɛlɔ kemo mɛni ni, útavumanaku ɔyikun unengudi 20ɔni na Katɔti úti ɔ́talaku Kristo ɔ́lɛku bekpine akɔ na úti-nwu útése nwuna kɔdianu na katɔ mmɔ. 21Mmɔ na Kristo ulie ɔɔdi bayikune ku kenyekɔ biala ku kɔyu ɔyikun ku bagadine ƒui lɛlɔ. Na nwuna lɛnyi litulo lɛga bɔdi ɔyikun lɛnyi biala na kayawi kamɛni ku kani mebo lɛnɔ ƒui kemo. 22Katɔti úti lɛla biala ɔ́kya Kristo lɛgba kalɔ na úti-nwu ɔ́bla baƒɔtaadine ƒui lili. 23Baƒɔtaadine bamɛni badi Kristo ɔlɔna na beedie-nwu keyi na ulu biala lɛlɔ ka anwu ndi ukyuli ɔni náƒɔ lɛla biala kemo ƒui.

will be added

X\