KOLOSEƑUƆ 4

1Amii benwoti bani mbo kabla bablane ni, bɛda-ma na bɛnu-ma lɛlɔ kaduɛ. Ɔsika amii lɛnɔ bɛgyi ka bibo Unwoti ɔni nkya katɔ. 2Bitada Katɔti bɔkpali bitaya. Na binye kagyumana, na biteeti linugya teete-nwu. 3Na uwi biala kemo na bɛɛkpali katɔ ni, bivele Katɔti na ɔlɛmi ulu ute-bu na bɔkana na bɔsu Kristo litemi buni lɛmmɔ abɛla. Ɔmɛni ɔsu na ntɛ aban ɔtɔ. 4Bɛkpali ku-mi katɔ na lɛkana na lɛsu litemi buni lɛmmɔ na benu-ni kalɔ nwaa. 5Bɛda anu na bina keliela kemo na bɛti kalɛ na bilieku bani naaadi baƒɔtaadine. Na kuƒi biala na bɛ́kɛ ni, bɛbla kabla bite Blɔti. 6Bɛya na bina butemi bɔdia bunu na ɔda kubiti. Bɛya na Katɔti lɛnunda lɛkya-mii kemo kalɛ na bɛti ala kenye budie bite ukyuli biala. 7Tihiko ɔdubɔsu-mii mina lɛlɔ kɔtɛ. Ɔdi bula ɔnwa ɔni litemi na mɔɔyɔ́ geen na unye Blɔti kabla kammɔ kemo sɔsɔ uubunku-bu. 8Ɔmɛni ɔsu na mɔɔtala-nwu lɛkya-mii na ubakya-mii ogya na ɔsu-mii kalɛ na abu lɛnɔ buwi kabla kammɔ lɛlɔ. 9Ɔdubo-mii kudɔ ku bula ɔnwa Onesimo ɔni litemi na bɔɔyɔ́ geen na bɔ́ƒɔ-nwu bɔ́di na ɔdi bina akɔ unwi. Ama ndubɔsu-mii ala ani ƒui mɔɔlɛ́ mɛni. 10Aristarko ɔni na ami ku-nwu bɔtɛ ɔtɔ mɛni ku Marko ɔni ndi Barnaba ɔnwani banii beegyele-mii o-o! Líte-mii bɔti na Marko ɔmɛni lɛlɔ ka si úbo-mii kudɔ ni, bigyingya enu na bɛƒɔ-nwu ku ebiti. 11Yosua ɔni na basɔ baalɔ banii Yusto lɛnɔ uugyele-mii. Yudaƒuɔ nkyuli ɛtɛ bamɛni ndi baƒɔtaadine bani nkya-mi kudɔ na bɔɔbla kabla kalɛ na Katɔti lɛga bɔdi kebo. Kalɛ na benye ku-mi mɛni ni, ɔ́ya na lɛlɔ lɛɛyɔ́-mi geen. 12Epaƒra ɔni ndi Kristo kabla ɔblane na ɔdi bina lɛkpa lɛmmɔ baƒɔtaadine kemo unwi lɛnɔ uugyele-mii o-o! Ɔnwa ɔmɛni úti ɔ́sia lɛlɔ kpakplaa na ɔɔkpali katɔ na bina lili kalɛ na binye kpakplaa na bɛlɛ lili bɛwɔlɔ na bina bɔƒɔtaadi kemo na bɛdi Katɔti litemi biala lɛlɔ. 13Ami ɔlati muudie-nwu kenye ka ɔ́bla kabla kpakplaa úte-mii ku bani nkya Laodikea ku Hierapoli. 14Bula ɔkpana ɔyɔne Luka ɔni ndi evogyii ɔblane ku Dema lɛnɔ banii beegyele-mii o-o! 15Bɔɔkya banwa bani nkya Laodikea ku Ɔnwa Uleku Nimƒa ku baƒɔtaadine lɛkpa lɛni mɔɔsa na nwuna kaduli kenye o-o! 16Si bɛ́ka ɔku ɔmɛni ni, biti bimene Laodikea baƒɔtaadine lɛkpa, na ama lɛnɔ baka. Na amii lɛnɔ bɛka ɔku ɔni na línweni líte Laodikea baƒɔtaadine lɛkpa lɛmmɔ. 17Na bɛsu Arkipo ka ɔkya ɔkplu na ɔwɔlɔ Blɔti kabla kani na úti ɔ́kya-nwu enu kemo mmɔ. 18Ami Paulo ɔlati mina kɔnu na líti muunweni-mii kegye kamɛni. Na bitayiƒla ka ntɛ aban ɔtɔ. Na muuvele Katɔti nnii ɔya na nwuna lɛƒɔndia lɛsiaku-mii.

will be added

X\