KOLOSEƑUƆ 2

1Mɔɔyɔ́ ka bɛti kalɛ na muukpóku lɛlɔ na amii ku Laodikeaƒuɔ ku bekyuli bani ami ku-ma bútasa tɔ dii ƒui lili. 2Mɔɔbla ɔmɛni kalɛ na bakɛ ɔkplu bɔkya na bana kayi kemo na babla unwi lɛnɔ na bɔyɔ kemo. Ɔmɛni ndubɔya na bakɛ lɛkɛ libendi lɛni nkɛnku ala kalɔ bunu nwaa. Na badubɔti Katɔti lɛbɛla lɛni ndi Kristo. 3Kristo ɔmmɔ kemo na Katɔti úti nwuna lɛlati ku lɛnunda ƒui ɔ́bɛla ɔ́kya. 4Mɔɔsu-mii ɔmɛni kalɛ na ukyuli biala uleti kenye emini etemila adi ulakyaku-mii unyeƒi na ɔtɔlɔ-mii. 5Ina ka liiibo-mii kudɔ na ɔlɔna kemo ni, nkya-mii kudɔ na kɔyu kemo. Na lɛlɔ lɛɛyɔ́-mi ka lɛ́nu kalɛ na bɛda lɛlɔ na binye na bina bɔƒɔtaadi kemo kpakplaa bite Kristo ɔsu. 6Na kalɛ na bɛ́ƒɔ Yesu Kristo ku bina kayi ƒui aani bina Ɔti ni, bɛblaku-nwu unwi lɛni kani. 7Binye kpakplaa na nwuna kemo aani kalɛ na kugyii ugyiitu ɔɔnyí kalɔ kemo. Na bina bɔƒɔtaadi buteesie anumi teebu aani kalɛ na bɔ́tina-mii mmɔ. Na bitaagya Katɔti enu uwi ndi uwi. 8Bɛnu kaduɛ kalɛ na ukyuli ɔdi uleti nwuna kayawi lɛnunda lɛni neeebo kɔsia kɔdi ulátɔlɔ-mii. Ɔsika lɛnunda lɛmmɔ ni, lɛsiaku bati kuuku ɔdi bɔbla ku kayawi kamɛni ala bɔtina kama na ɔɔɔdi Kristo kudɔ na ɔ́si. 9Ɔsika Kristo kemo ni, Katɔti ulie ngba na ɔlɔna kemo ku nwuna udu ƒui. 10Na Katɔti ɔɔyá na bɔɔlɛ́ lili taawɔlɔ ɔkɛnku abu ku Kristo unwi bɔbla ɔsu. Na Kristo ɔmɛni mɔɔdi bayikune ku kenyekɔ biala lɛlɔ. 11Ka bɛ́blaku Kristo unwi ɔsu ni, Katɔti úti nwuna Kɔyu úse-mii likpo ka bɛdi nwuna badi. Nsu ɔɔɔdi aani kalɛ na Yudaƒuɔ baabla ago bukulo ɔdi kalɛ. Mmomu Kristo ɔlati nábla-mii ɔmɛni úti úkulo ekpidi udu údie-bu lɛlɔ. 12Na uwi ɔni na bɛ́ƒɔ ntu bɔkpila ɔdi ɔmmɔ ni, ɔ́tina ka amii ku Kristo nékpi na báva-mii. Na amii ku-nwu lɛnɔ náta bɛ́lɛ bekpine akɔ ɔkɛ bina bɔƒɔtaadi bɔni bibo kenye. 13Uwi ɔdi kemo ni, bíkpi na kɔyu kemo ɔ́si bina ekpidi ɔsu ku ka bátabla-mii ekpidi bukulo teedie ɔdi ɔmmɔ ɔsu. Nsu Katɔti ɔ́ya na bɔ́sɔ búnwini búbo bulie ngba ku Kristo ka úti bula ekpidi ƒui ɔ́kyiɛ-bu ɔsu. 14Katɔti úkulo lɛla biala nétile-bu ulu na lɛ́bala-bu na bula ngba bulie ablala kemo ƒui na ɔda bubo bɔmmɔ etemila kenye údie-bu lɛlɔ kede kede. Na úti-nya ɔ́kana ɔ́mana ugyii lɛlɔ ku Kristo. 15Na ugyii ɔmmɔ lɛlɔ ni, Kristo ɔ́ƒɔ ɔyikun ɔ́lɛku bayikune ku kenyekɔ biala enu kemo. Na ɔ́kya-ma kɔƒa na bekyuli anumi ka ɔ́di-ma lɛlɔ. 16Anwuɔsu bitaya na ukyuli ɔdi ubo-mii ɔda ɔdi na bina bɔdi ku bɔni lɛlɔ, iye emeyi kedee lɛlɔ, iye abuli awɔdi limeyi bɔdi, iye lɛnwunameyi bɔdi lɛlɔ. 17Ɔsika Kristo ndi kebi kani geen na bɔɔwia! Ɔsika ala ammɔ bene ƒui lɛlɔ bɔdi mɔɔtina ka Kristo ɔdubo úbada ɔlɛ. 18Bitaya na anumi lɛlɔ ukyuli ɔni mɔɔsiaku katɔ batu ɔdi ɔtɔlɔ-mii na utile-mii ngba bɔƒɔ kuƒi. Bekyuli bamɛni baakun lɛmɛnɛ ka bánu budie taatina bɔdi bɔni na sɔsɔ ni, bɔɔɔkɛnku Katɔti Kɔyu lɛlɔ. 19Anwuɔsu baayiƒla lili lɛni lɛlɔ na ɔlɔna ekpo ƒui adanku asa na Katɔti ɔɔyá na ɔlɔna umodi ɔmmɔ ɔɔlɛ́ lili. 20Kristo kukpi kɔɔtina ka amii ku-nwu nékpi, na úkpo ɔ́ƒɔ-mii ɔ́lɛku kayawi kamɛni ala bɔtina ulu lɛlɔ kemo. Na si use lɛni ni, bi ɔsu na bɛɛbla lɛlɔ aani si bɛmua bɛsiaku kayawi kamɛni ɔda bubo bɔmmɔ kama, na bɛmua bɛɛdi bana ala ani na bényimi lɛlɔ? 21Banii bitani bitede ala adi iye bitetuku-nya, na bitadi adila adi udu lɛnɔ. 22Ala ani ƒui bényimi na básu-mii banii bitabla mmɔ ni, asɔ eeebo kɔsia kɔdi uwi ɔni na ana uwi ɔ́vi. Na kasusu kani béti asa na bényimi ala ammɔ ni, kayawi kamɛni kani kemo na lɛnunda lɛmmɔ lɛ́si. 23Na bɔgyi ka ala ani baasu mɛni ni, aatina aani si adanku lɛnunda lɛdi bɔdi na Katɔti kabla kani na bánwi bámana-ka lɛlɔ ɔsu ku kalɛ na baabla ala adi na bekyuli anumi na baaní ɔlɔna ɔmmɔ kɔtu. Nsu ala ammɔ eléte kebunku kani maya na ukyuli ɔlɛ nwuna ɔlɔna ɔkwɛ adala kemo.

will be added

X\