KOLOSEƑUƆ 1

1Ami Paulo ɔni nkɛnku Katɔti lɛƒɔyɔ lɛlɔ ɔsu na ndi Yesu Kristo ɔtalane ni, ami ku bula ɔnwa Timoteo muunweni ɔku ɔmɛni. 2Na búti buute amii, bula banwa kedee, bani lɛnɔ náƒɔ Kristo bɛ́di geen na bɛkya Kolose. Buuvele Katɔti bɔnii nwuna lɛƒɔndia ku keyi buɛɛ kasiaku-mii. 3Uwi biala si bɔɔkpali katɔ ni, bɔɔgyá Katɔti ɔni ndi Blɔti Yesu Kristo Ɔti enu na bina lili. 4Ɔsika búnu kalɛ na bɛda bina bɔƒɔtaadi na Yesu Kristo kemo ku kalɛ na bɛɛyɔ́ bina banwa baƒɔtaadine ƒui. 5Uwi ɔni na básu-mii litemi geen lɛni ndi litemi buni lɛmmɔ kudeedi ni, bínu ala abuni ani nse nte-mii na katɔ. Na ka bɛsia-nya anu ɔsu ni, bina bɔƒɔtaadi ku bina bɔyɔ bunye ala ani bɛsia anu mɛni lɛlɔ. 6Litemi buni lɛmɛni ala abuni amua aalɛ́ku bekyuli na liigyingya na kayawi ekpo ƒui aani kalɛ na ɔ́lɛku-mii uwi ɔni na bínu Katɔti kɔnyana bɔnu litemi geen lɛmmɔ kudeedi, na bɛ́nu bɛ́ti kalɛ na Katɔti ɔɔyɔ́-mii. 7Bula ɔnwa Epaƒra ɔni náƒɔ-bu kuye na anwu lɛnɔ ɔdi kabla ɔblane geen ute Kristo na bula kabla kamɛni kemo nábasu-mii Katɔti kɔnyana bɔnu litemi lɛmmɔ. 8Ɔ́su-bu kalɛ na Katɔti Kɔyu kɔ́ya na bibo bɔyɔ bite bina baƒɔtaadine bakpana. 9Anwuɔsu ɔ́si uwi ɔni na búnu-mii kɔku ni, bútada Katɔti bɔkpali na bina lili bútaya. Na buuvele Katɔti bɔnii ubimi bina kasusu kemo na ɔya na bɛti nwuna lɛyɔla. Na nwuna Kɔyu kute-mii lɛnunda ku ala kalɔ bunu kalɛ na bɛti ala ani na ɔɔyɔ́ ka bɛbla. 10Ɔmɛni ndubɔya na bɛti bina lɛlɔ bɔda na bilie ngba bɔni na Blɔti ɔɔwia. Na bina ngba bulie ɔbladu biala ɔbla ɔbuni. Na ɔdubo-mii bubunku na bitaati Katɔti teebu. 11- 12Muuvele-nwu nnii ɔya na nwuna ɔyikun ɔni nási nwuna bukeye kemo ɔƒɔ-mii lɛlɔ kemo ƒui kalɛ na bɛkana bunye kpakplaa na ala ani muukpóku-mii kenye ku kayi buɛɛ. Bɛgya Katɔti enu ku lɛlɔyɔ, ɔsika anwu náya na bínwini ala badine na Katɔ Ɔga Ɔma kesii kani na muukeye. 13Na anwu náda-bu údie ukisine ɔmmɔ enu kemo na kasuudikɔ mmɔ, na úti-bu útákya Ubidi ɔni na ɔɔyɔ́ geen mmɔ lɛga bɔdi kemo. 14Na anwu náƒɔ bula ekpidi lili kayu na bɔ́kɛ bula ekpidi buti taakyiɛ. 15Kristo ukyuli udu ɔni na bɔɔnu muudie Katɔti ɔni ukyuli udu na bulánu taatina. Na anwu ndi Katɔti Ubi udeedi ɔni mɔɔdi nwuna ala ani na údie ƒui lɛlɔ. 16Na ɔkɛnku anwu ɔmmɔ lɛlɔ na Katɔti údie ala ani ƒui nkya katɔ ku kalɔ kamɛni kemo, ala ani na bɔɔnu ku ani na bulánu aani lɛgadi ku bagadine ku bayikune ku kenyekɔ biala ƒui lɛlɔ. Ɔkɛnku ubi ɔmmɔ lɛlɔ na údie ala ƒui, kalɛ na lɛla biala lɛbu Kristo ɔmmɔ. 17Kristo ɔ́kya asa na Katɔti údie ala ƒui. Na ɔkɛnku-nwu lɛlɔ na ala ƒui eesié kaduɛ. 18Anwu ndi lili ute nwuna ɔlɔna ɔni ndi baƒɔtaadine lɛkpa lɛmmɔ. Na ɔdi lɛkpa lɛmɛni kalɔ kesekɔ. Anwu ndi Katɔti Ubi udeedi ɔni na ɔ́gyila ɔ́lɛku bekpine akɔ, kalɛ na ɔtɔnku lɛla biala. 19Na nwuna kemo na Katɔti ɔ́ya na bekyuli bánu nwuna ukyuli udu ƒui báti. 20Na ɔkɛnku Ubidi ɔmmɔ lɛlɔ na Katɔti ɔ́klibi anwu ku ala ani nkya katɔ ku kalɔ ƒui ntɛ. Na ɔ́ya na bɔ́kɛ keyi buɛɛ ɔkɛnku Ubidi ɔmmɔ ubugya ɔni néwiakun na ugyii ɔni lɛlɔ na bákana-nwu bámana ɔsu. 21Na uwi ɔdi nábavi kemo ni, bínwini kama bɛ́kya Katɔti na bíkisi-nwu na bina kasusu kemo ɔ́si ala ekpidi ku kasusu kekpidi kani na bɛ́bla ɔsu. 22Nsu ɔƒɛni ni, Katɔti ɔkɛnku nwuna Ubidi kukpi kɔni na úkpi na ugyii lɛlɔ mmɔ ɔsu ni, ɔ́klibi amii ku-nwu ntɛ kalɛ na bɛkana na binye nwuna anumi aani bekyuli bani nse kedee na bátasɔ na beeebo kɔtu bɔni bɔdi. 23Anwuɔsu ɔdi ka binye kpakplaa na bina bɔƒɔtaadi kemo, na bitaya na enu aƒɛ-mii na bɛyila lɛnunsia lɛni bibo ɔ́si uwi ɔni na bínu litemi buni lɛmmɔ. Na ɔdi litemi buni lɛni lɛsa na lɛ́kɔ líte bayawine ƒui. Na ani ɔsu na ami Paulo ḿbenwini Katɔti kabla ɔblane. 24Na ɔƒɛni ni, ɔdi-mi kubiti ka muubó abi na amii ɔsu. Na mina abi ani na muubó na ɔlɔna kemo mɛni ni, ɔ́ya na muubunku na libo abi ani na Kristo ɔlɛka ubo na nwuna baƒɔtaadine lɛkpa lɛni ndi nwuna ɔlɔna ɔmmɔ lili lɛwɔlɔ. 25Baƒɔtaadine lɛkpa lɛmmɔ ɔsu na ḿbenwini Katɔti kabla ɔblane na kabla kani na úte-mi kenye, kalɛ na lɛkɔ litemi buni lɛmmɔ ƒui lɛsa lite-mii nwaa. 26Na litemi buni lɛni kalɔ mbo ɔkplu ku bunu mɛni ni, Katɔti úti ɔ́bala kuuku bekyuli. Nsu ɔƒɛni ni, údie-ni keyi ɔ́tina nwuna bekyuli. 27Katɔti bɔyɔ ndi ka bekyuli bani naaadi Yudaƒuɔ ƒui bati lɛla libendi lɛni na ɔ́da úse-bu, na lɛ́ƒɔ kuye geen. Na ani ndi Kristo ɔni nkya-bu kayi kemo. Na anwu ndi bula lɛnunsia ka abu lɛnɔ bubo kadikɔ na Katɔti bukeye kemo. 28Na ɔmɛni ɔsu na bɔɔsu Kristo lɛlɔ litemi lɛmmɔ teete ukyuli biala. Na bɔɔlɛ-ma na bɔɔtina-ma ala na lɛnunda ƒui kemo kalɛ na ɔdi biala ɔda ɔlɛ Katɔti anumi na use siin ɔkɛnku lɛla lɛni na Kristo ɔ́bla úte ɔdi biala kenye. 29Ɔmɛni ɔsu na muukpóku lɛlɔ ɔkɛnku Kristo ɔyikun ɔni nkya-mi lɛlɔ kemo ɔɔbla kabla kamɛni kenye.

will be added

X\