BATALANE KABLA 4

1Amu uwi ɔni na Petro ku Yohane benye baatɛmi ku bekyuli bammɔ ni, Yudaƒuɔ bakpane badi ku kakpakɔ bagyumanane benengu ku Sadukiƒuɔ lɛnɔ bébo mmɔ. 2Ka bénu ka Petro ku Yohane bakya baasu ala taasiku Yesu bɔta lɛlɔ ɔni mɔɔtina ka ukpine ɔdubo bɔta bulie ngba ni, béti kɔnyi geen! 3Anwuɔsu béƒie-ma. Na ka kadi kábɔyu ɔsu ni, bákya-ma ɔtɔ útédu lɛdigye. 4Nsu bekyuli pii bani nénu bana etemila amɛni kemo ni, báƒɔ litemi buni lɛmɛni bádi. Na bana bumomo bɔbla aani banana mpimu ɛlɔ. 5Amu ka kadi kégye ni, úbebo úte ka Yudaƒuɔ kadi lɛlɔ badine ku kadi benengu ku ɔda bubo ala batinane badi bása na Yerusalem. 6Bábasala ku Ɔkpane Unengudi Hana ku Kaiaƒa ku Yohane ku Aleksandro ku Ɔkpane Unengudi lɛlɔ bekyuli badi lɛnɔ. 7Na bédie batalane bamɛni béboku bana anumi mmɔ. Na béye-ma banini, “Ulu ɔmani lɛlɔ na bɛ́bla ɔmɛni? Ɔma lɛnyi ku ɔyikun kemo na bɛ́bla ala amɛni udu?” 8Mmɔ kani ni, Petro ɔ́ta na Katɔti Kɔyu ɔyikun kemo na ɔ́su-ma ɔnini, “Bula batɔnkune ku ɔma benengu, 9si bɛɛwia kenye budie na lɛla lɛbuni lɛni na bɔ́bla búte ukyuli ɔni náƒɛ uwi kalɔ mɛni ku kalɛ na búti bɔ́bwi-nwu ni, 10bite-mi kuƒi na lɛsu amii ku Israel kalɔ lɛlɔ bekyuli ƒui lɛla lɛdi. Ɔkɛ Yesu Kristo ɔni nási Nasaret lɛnyi kemo ɔni na amii bɛ́ya na bákana bámana ugyii lɛlɔ na Unwoti ɔ́sɔ ɔ́gyila-nwu ɔ́lɛku kekpine ɔsu na ukyuli ɔmɛni lɛlɔ lɛ́yu ɔkplu. 11Na Yesu ɔmmɔ lɛlɔ na Bunweni Kedee bɔɔsu taasiku bɔnii, 'Lɛtabi lɛni na amii batune bíni bɛ́va ni, ani nébo líbenwini lɛtabi lɛni náƒɔ kuye lítulo na atabi ƒui akɔ.' 12Anwu lɛti ndi bekyuli Ɔƒɔne, ɔsika anwu kani na Unwoti úte lɛnyi ku ɔyikun na bekyuli ƒui akɔ ɔni makana waƒɔ-bu ngba.” 13Ka lɛlɔ badine ku benengu bammɔ bánu kalɛ na Petro ku Yohane bábla kayi ku ɔtɔtɔ ku kalɛ na lɛkpaklɔ bekyuli badi na beeebo kenyekɔ kadi lɛnɔ na kadi akɔ ɔsu ni, ɔ́bla-ma kalɛ kadi. Na bánu báti ka ama ku Yesu ni, bavinkpana na badi. 14Nsu ka bánu ukyuli ɔni na bábwi na bana anumi mmɔ ɔsu ni, bátakana lɛla lɛdi bɔsu. 15Amu na báda-ma bédie kasalakɔ mmɔ, na ama lɛti lɛti bakya beeye lɛlɔ kasusu. 16Badi béye banii, “Bi na ɔlɛka bɔbla ku bekyuli bamɛni? Bulakana buni bɔnii lɛla lɛni na bábla mɛni lɛɛɛdi akɔla budie taatina, ɔsika ukyuli biala na Yerusalem ɔgyi na únu litemi lɛmɛni. 17Mmomu bɛya bubo-ma ɔda na bada litemi lɛmɛni bugyingya baya kalɛ na basɔ balasu ukyuli ɔdi litemi lɛdi na Yesu lɛnyi kemo.” 18Na básɔ bálɔ-ma béboku bana kasalakɔ mmɔ na bábala-ma ka ɔ́si ɔƒɛni ni, basɔ batasu ukyuli ɔdi litemi na Yesu lɛnyi kemo. 19Amu na Petro ku Yohane bédie kenye banini, “Amii alati bɛbu bɛnu. Bi mada Unwoti kubiti? Si bunu bina ɔda bubo munuu Unwoti bɔdi? 20Lɛla lɛni na bɔ́nu na búnu ni, bulakana kenye bubile na bɔsɔ bulie kpoo.” 21Amu na kasalakɔ benengu bammɔ bádɔnku-ma kaduɛ na báda-ma bányonu. Na ka bekyuli bammɔ ƒui bakya beemwi Unwoti na nwuna ablala ɔsu ni, bátakɛ lɛkwɛ lɛni lɛlɔ basia bani-ma kɔtu. 22Na ukyuli ɔni na bábwi mmɔ ɔdubɔƒɔ utulo akwa aavlene. 23Uwi ɔni na bánya báda-ma bányonu ni, Petro ku Yohane bésie bana badi bammɔ kudɔ na básu-ma kalɛ na kasalakɔ kammɔ bekyuli básu-ma. 24Amu na baƒɔtaadine bamɛni ƒui bása lisu na bákpali Unwoti banii, “O Ati, awɔ nédie katɔ ku kalɔ ku ɛpu ku ala ani ƒui nkya-nya kemo. 25Akɛnku Katɔti Kɔyu lɛlɔ na étemi ásiaku ƒula kabla ɔblane Dawid lɛlɔ anini, 'Bi ɔsu na bayawine baakya lɛsɛ, na bekyuli baasa lili kekeeke? 26Kayawi baga bábla unwi na benye beekpóku awɔ ku ƒula Ukyuli Ɔƒunadi.' 27Ɔdi litemi geen ka Herode ku Pontio Pilato ku Israelƒuɔ ku bani naaadi Israelƒuɔ básala lɛlɔ na ɔma ɔmɛni kemo, na báta bénye ƒ^ubidi Yesu ɔni ndi Ukyuli Ɔƒunadi Kedee ɔmmɔ lɛlɔ. 28Nsu, awɔ, na ƒula ɔyikun ku lɛnunda kemo ni, énye ánu na básala bábla ala ani na ásu ése. 29Na ɔƒaani ni, O Ati, nu liƒu lɛni na badaku-bu bɔkya, na ete abu, ƒula kabla bablane, kayi buse na bɔkana litemi buni lɛmɛni bɔsu. 30Tuku bekyuli na abwi-ma, na abla akɔla pii ebu na ƒ^ubidi Yesu Kedee lɛnyi kemo.” 31Ka bévele Unwoti ɔmɛni báwɔlɔ ni, ɔtɔ ɔni kemo na bakya mmɔ ɔ́kunku na Katɔti Kɔyu kɔ́ƒɔ bana ƒui lɛlɔ kemo, na bése kalɔ baasu litemi buni lɛmɛni ku kayi buse. 32Na emeyi amɛni kemo ni, baƒɔtaadine bamɛni ƒui bábla unwi na udu ku kasusu kemo, na bana akɔ ɔdi biala útasusu anwu lɛti lɛkɛ. Mmomu ni, bana lɛla biala lɛdi bana ƒui lɛdi. 33Na batalane bamɛni bákɔ Unwoti litemi lɛsa ku kayi geen básiku Blɔti Yesu bɔta bɔlɛ bekpine akɔ lɛlɔ. Na Unwoti keyi buɛɛ ku kusɛ kusɛ ɔkya-ma akɔ. 34Na ɔdi biala ɔɔɔdi ɔwabane, ɔsika ama bani mbo lɛtɔ ku kɔlɔ ni, béti ala amɛni béye. 35Na béti egulabi amɛni bátákya batalane bammɔ lɛkɔkɔ na béle-nya béte bana akɔ ɔdi biala kalɛ na ɔɔwia. 36Amu na ɔnana ɔdi ɔ́kya ɔni baalɔ Yoseƒ na ɔ́si Lewi kaba kemo na Kipro kalɔ lɛlɔ. Na batalane bamɛni básia-nwu lɛnyi banii Barnaba ɔni kalɔ ndi Ogya Ɔkyane. 37Anwu lɛnɔ úti nwuna kalɔ úye na úti egulabi ammɔ úboku batalane bammɔ.

will be added

X\